رواية ضماد جرح الفصل الثالث 3 بقلم نوسه حمد
صاحبه امي بقت ترطن مع الولد وانا مافاهمه هم بتكلمو عني ولا بتكلمو في شنو بعد كنت اكل وجيعانه قومتا ودخلت اغسل يدي قالت لي الحمام علي يدك الشمال وانا فتحت بابو ميه مره بس كنت مفتكراهو غرفه المهم دخلت وبقيت افتش لي ماسوره ولا برميل فيهو مويه ولا اي مويه غلبني زاتو افهمو شكلها حست بي جات قالت لي تدوسي الزرار دا المويه بتشتغل قلت ليها المويه تشتغل وين وين الماسوره قعدت تضحك وورتني كيف المويه تشتغل ويا سبحان الله نحنا الكنا شايفين نفسنا عايشين في الخرطوم ونحنا للشفتو دا م عايشين ف الخرطوم ولا اي شي اتزكرت لمن مره مشينا البلد وامي مركبه مكنه اننا ساكنين العاصمه واي شي تنظر فيهو وتضحك علي اهل ابوي غايتو امي كان عاشت في القصر دا بتدوس اهل ابوي تحتها بس الله كريم طلعت من الحمام لقيت مياده صاحبه امي واقفه لي قالت لي تعالي نظفي السفره دي امك قالت في شغل البيت ممتازه قلت ليها اكيد يلا مشيت السفره وعايزه الم باقي الاكل قلت ليها عندكم مواعين تلاجه قعدت تضحك قالت لي لا ارمي الاكل في السله انا انخلعت والاكل يشبع بلد بي حاله ضميري انبني قلت ليها م بقدر ارمي النعمه انا م عندي مشكله انظف واغسل ليك بيتك دا كلو بس م برمي النعمه عاينت لي كده وقالت لي نحنا م محتاجين ليها اوديها وين اولادي تاني م بياكلوها يلا عرفت الولد البرطن دا ولدها بس المعاهو ديل منو قلت ليها ممكن اسالك الولد قبيل قال شنو قعدت تضحك قالت لي كان بقول ليك انتي جيعانه شديد حرام تهملي نفسك وكملي اكلك بس انتي م فهمتيهو قلت ليها اتكلم بياتو لغه قالت لي بالانجليزي ي نوسه انتي م بتعرفي الانجليزي قلت ليها ولا هو بعرفني قعدت تضحك قالت لي قريتي حدي كم وكانت لابسه القلفزات وبترمي في الاكل قلت ليها انا م قريت قالت لي لكن ظاهر انك متعلمه قلت ليهو لا بس كنت بفتح قنوات تعليميه عشان اتعلم لاني كنت حتي الصلاه ما بعرفها قالت لي بتصلي انتي قلت ليها الحمد لله قالت لي ربنا بثبتك قلت ليها انتي بتصلي قالت لي اي بصلي بس م بصلي زيكم قلت ليها كيف قالت لي انا مسيحيه قلت ليها كيف مافهمت قالت لي المسيحيه دي ديانه زيها وزي الاسلام قلت ليها كيف انا اول مره اسمع بيها يعني انتي م مسلمه قعدت تضحك قالت لي يلا المسيحيه انزلت علي عيسي عليه السلام والاسلام انزل علي محمد نحنا بنؤمن بي ربنا وبي عيسي عليه السلام بس ما بنؤمن بالرسول ولا القران الكريم قلت ليها يعني كافره قعدت تضحك قالت لي الكافر ما يؤمن بي ربنا بس نحنا بنؤمن بي ربنا وما بنؤمن بالرسول ولا الرساله قلت ليها لكن رساله الرسول هي الاصح قالت لي انتو زي م عندكم كتاب نحنا برضو عندنا كتاب منزل من السماء الانجيل الضمنك شنو انو الاسلام هو الديانه الاصح ليه م تكون المسيحيه هي الاصح قلت ليها استغفر الله استغفر الله انتي عاوزه تبقيني كافره انا ماشه اهلي ولمن دموعي جرت قالت لي مالك قولي بسم الله انتي ليه خوفتي قلت ليها انتو عاوزين تبقوني كافره قالت لي لا وهسي فلنفترض انو نحنا عاوزين نبقيك مسيحيه م كافره انتي بتبقي قلت ليها لا لا مستحيل قالت لي بس لازم اكون ايمانك قوي ومهما خالطتي من شعوب اديانهم مختلفه م تتاثري ونحنا بنحترم الأديان جدا بالذات الاسلام اطمني يا نوسه وانا بعدين جبتك عشان تساعديني انا مريضه واولادي متعبين وكانت بتخدمهم نانا وسافرت اهلا قلت ليها جدا انا م عندي مشكله قالت لي م تخافي مننا اولا اولادي عندهم جامعات وبناتي برضو قلت ليها لا م خايفه انا ربنا معاي قالت لي بس شاطره وربنا يحفظك رمت الاكل وانا نظفت السفره قالت لي الحمام دا فيهو ادوات النظافه نظفي وبخري وخلصي وارقدي ارتاحي الاكل انا عندي مره بتطبخ لي بالأسبوع وانا طالعه بجي المساء م تخافي تمام قلت ليها تمام عاينت للبيت والله نظيف نظافه انا م فهمت المره دي النظافه قاصده بيها شنو المهم مسحت ونظفت وبخرتا قالت لي نظفي لي غرفتي ودا التلفون لو احتجيتي لاي حاجه اتصلي علي في الرقم دا قلت ليها ممكن اقعد هنا احضر في الشاشه قالت لي اي طوالي وانا بجيب ليك معاي شاشه قلت ليها لا لا م بحتاج وطلعت انا حسيت بي راحه م عاديه قلت في سري ان شاءالله نانا م تجي ارتحت ليهم بس متخوفه لي حته انهم مسيحين ديل بقيت احضر ولابسه طرحتي وكنت مستمتعه وبضحك بحضر في فضيل ولدها الكان برطن جا طالع عدلت طرحتي ودايره اقوم قال لي لا لا اخدي راحتك سمعتك بتضحكي قلت ليهو بحضر في فضيل قال لي ممكن احضر معاك قلت ليهو اتفضل دا بيتكم م تستأذن مني قال لي العفو وكمان بيتك انتي قال لي اسمك منو قلت ليهو انا نوسه قال لي يعني منو قلت ليهو نسيبه قال لي اسمك جميل عمرك كم قلت ليهو ١٥سنه قال لي وبتقري في سنه كم قلت ليهو م بقرا قال لي كيف م بتقري غلبني اقول ليهو امي منعتني قلت ليهو كنت بساعد امي في البيت لانها شغاله قال لي حتي لو امك شغاله وانتي بتساعديها مفترض تتعلمي قلت ليهو م عندي نصيب الولد كلامو مررررتب تعليم وادب وجمال ودي كانت اول مره اعاين فيها لي ولد لاني م كنت بطلع قال لي انتي جميله طوالي قومتا ومشيت دخلت الغرفه وقفلتها علي الولد بقا يخبط لي في الباب ويقول لي سوري نوسه وانا مافاهمه بقول فشنو قلت ليهو لو سمحت خليني في حالي واحترم نفسك وانا من داخلي كنت مبسوطه هل انا فعلا جميله ولا الولد دا بكذب علي بقيت اعاين في المرايه وفكيت شعري وبقيت اسرح فيهو وكلام الولد في راسي وكل دقيقه اتزكرو لغايه م بقيت استغفر امو جات داخله ومعاها ولد شايل شاشه وركبوها لي في الغرفه قالت لي عشان فادي مرات بحضر الكوره وانتو المسلمين الاختلاط عندكم حرام وجابت لي مصلايه ومصحف وعبايه صلاه قلت ليها شكراااااا ليك قالت لي م تخافي نحنا ح نحترمك ونحترم ديناتك وما ح تتاثري بينا
مرت الايام وانا مبسوطه قلت ليها ممكن طلب قالت لي اتفضلي قلت ليها عاوزه كراس وقلم عايزه اكتب نفسي اكتب قالت لي بتعرفي تكتبي قلت ليها م بعرف بس نفسي اكتب قالت لي جدا وح اجيب ليك استاذه قلت ليها لا لا م عايزه وبقيت اقول ليها امي لانها حسستني اني بتها الاحساس البجيني منها م حسيتو مع امي قالت لي انا م عندي مشكله في قروش الخير راقد ح اجيب ليك استاذه وبخلي فادي واخواتو يساعدوك في القرايه قلت ليها فادي لا بي خلعه قالت لي ليه فادي اخوك ضايقك ولا حاجه قلت لي اي قالت لي معقوله وبقت تكورك ليهو قالت ليهو انت ضايقت نسيبه ليه قال ليها يا ماما انا م ضايقتها قلت ليها انها جميله وسوري م عندي قصد امو قعدت تضحك قالت لي نوسه انتي كبيره وواعيه وفاهمه ولدي م ح بضايقك تاني حتي لو بي كلمه رغم انو هو م كذب قال حاجه حقيقيه بس عشان هي مسلمه متعقده شويه لازم نحترمها يافادي قال لي انتي مسلمه او ماي قاد قلت ليهو شنو امو قعدت ترطن معاهو قال لي معليش ي نوسه م تزعلي بجد انا م ح اضايقك تاني ومعجب جدا بي ديانتك قلت ليهو ح تسلم قال لي لا للاسف وفات
مرت الايام وفادي حتي في عيوني م بعاين بسلم علي من بعيد وبمشي واخواتو محترمات شديد وبحبني وامهم جابت لي استاذه وبدت لي من الصفر قالت لي انتي ذكيه عارفه انتي لو دخلتي المدرسه ح تجي الاولي وح يزيعوك عديل قلت ليها نفسي بس للاسف م ح اقدر قالت لي تمام انا ح اقريك المقررات في البيت مقرر سنه اوله انتهينا في شهر وتانيه برضو وكنت مبسوطه شديد وفديه وفاتن بشرحن لي وفادي بقريني انجليزي وحبيتهم شديد وكانو لي سند وكنت ليهم اكتر من بت خدامه وبناتها كانو بقولو لي اهتمي بنفسك وبدوني كريمات وفعلا اهتميت بنفسي وفي ايام اتغيرت تغيير شديد لغايه ما جات نانا وهنا انا بطني طمت خلاص ح ارجع لي امي وحياه الزله والاهانه وح اتحرم من التعليم تاني ………يتبع