رواية احلام ودموع الفصل الحادي عشر 11 بقلم ماريه عبدالله مسعود

رواية احلام ودموع الفصل الحادي عشر 11 بقلم ماريه عبدالله مسعود

 لا تقترب من 

ناكر الجميل وجاحد العشرة 

متقلب الود لا يؤتمن 

خائن الذات

 لا يؤتمن

ناكر العشرة لا يؤتمن 

الذي لا يأنبه ضميره 

لا يؤتمن

حتى وإن عاد بالف عذر لا يؤتمن 

.متقلب الود لا يؤتمن 

من يتحدث عنك بالسوءفي

غيابك لايؤتمن 

ناكر الجميل 

لايؤتمن 

الغيور والحسود والحقود لايؤتمن 

كاسر الخواطر 

لا يؤتمن

والراحل بدون سبب حتى وإن عاد 

لا يؤتمن 

وأنت_نعم_أنت

إن لم تأخذ الحذر من كل هؤلاء !

فأنت على نفسك

 لا تؤتمن 👌

سحر بنت المايقوما 🤍✨️

طلعت من مستر رياض بعد ماخليتو سرحان وحزين صعب لما الخيانه والقدر  تكون من قريب ليك ولما يكون زول بتحبو وبتثق فيو يكون عايز يدمرك ومابتمنا ليك الخير فعلا في ناس بشوش ناس وبقلوب شياطينن

اتحركت على المشغل وقفني خالد وقال لي رياض كان بحكي ليك في شنو دخل يدينو في جيبو ورفع حاجبو قلت ليو ولا شي كان بشكر في التصاميم وكان بسالني كيف أنجزت كل دا

 قرب مني قال لي جد كيف 

من قربو لي  قعدت اتمتم قلت ليو ااا ااا عادي يعني كنت برسم في البيت ابتسم قال لي يدينك فيهم سحر مفترض تكتبي روايه وتسميه سحره سحر بتكون ظابطه رجعت خطوات لي ورا قلت ليو ماعملت حاجه عشان تستاهل تكون  روايه رجع قرب وقال لي انا شايف بعد نزلت الشحوم دي عقلك اشتغل 

قلت ليو كويس انو انت شفته ابتسم قال لي في زول قال ليك عيونك حلوه قلت ليو حتى لو في انا مافرق معاي اخر همي أعجب الناس 

قال لي وهو يصفق اووووو غرور على جمال على ذكاء سحرتي قلبي يا سحر قلت ليو قلبك من يوم يوم بنسحر بي أي بنت وضحكت

 ضحك قال لي قطعتي لي اللحظه الرومانسية ياخي انا كنت بصور في فلم هندي بعنوان احببت تلك العيون الساحره 

قلت ليو الله يهديك ياخالد قال لي بنهدي بين يدينك ياسحر 

 غلبني ارد عليو دا جاهز لي اي رد ينفع يكون ممثل اتحركت وانا اضحك  وانا متحركة قال لي ضحكت موسيقا قلت ليو ما قبل شهر كانت هزاز قال لي هزاز لسه وهزت كيان قلب خالد ورفع يدينو وعمل لي قلب بي يدينو

 قلت ليو التجاني الماحي قريب من هنا ع فكره واتحركت اضحك طلعت لي نسيبه من وين مابعرف لقول نفين زي الساحره الفي قصص الأطفال جرتني من يدي وقالت لي بوعدك ما بتقعدي كتير في الشركة دي

 م قلت ليك لسانك دا ابلعي

 قلت ليه انتي الشركة دي انتي ماعايزها تنجح؟قالت لي عايزها تنجح بس ما من وحده بنت شوارع لا معروف ليه اصل وفصل زيك قالت لي انتي فاكره انو ماعارفه انتي شنو انا من شفتك وانتي ما ركبتي راسي واسه تلاقيك انتي السرقتي التصاميم وعملتي تصاميم اضافيه عشان بعدين لما يحصل الحصل دا 

 انتي تطلعي التصاميم ويقولو انو انتي مبدعة وذكيه والبطلة الخارقه وانا بعرف كيف اكشف لعبتك واتحركت فاتت

 انا قلبي ضرب شديد معقول في ناس حاقده كده انا شفت كل أشكال البشر

 اخ لي بتين انا بكون مكسوره وموجوعة من البشر كل ما اقول خلاص الدنيا عايزه تفتح ابوابه  لي ترجع تاني تقفل أبوابه في وشي واقف سرحانه كده وقفت جنبي أرام قالت لي ابعدي من خالد وانا حذرتك خالد. دا شيطان على في شكل  بشر انا كلمتك وانتي حره اتحركت وفاتت 

كل مره انصدم في زول في الشركة قلت مستر رياض ليو حق يقول الخاين منهم دخلت لقيت نفين قاعدة مع قصي من شافتني قالت لي واو المنقذه قلت ليه البركة فيك اتعلمت منك وليك الفضل جات حضنتي وقالت لي قلبي وعقلي ويدي يصفقو لي إبداعك وقعدنا نتونس وشالت مني الدفتر وقعدت تشوف فيو قالت لي بتين عملت كل هاد وليه ما حكيت لي فكرة التصاميم المحجبه روعة نحنا كده ممكن نكسب ونكون ضمن الشركتين

 بس لازم نعمل تصاميم محجبة وغير محجبة عشان العرض البكون هنا

 قلت ليه في عرض هنا قالت لي اي ٦شركات دول كده بكونو قدمو الكتالوج دليل على أنهم مشاركين في العروض يلا الوفد بقعد لما يحضر عرض لي ٦ شركات وبشوف الازياء على الواقع وعارض الازياء لي الشركات وبختار من ٦ شركتين 

قلت ليه نحنا الليلة لو ما سلمنا الكتالوج قالت لي بنستبعد من العروض يعني نحنا بنكون  مامستعدين لي العروض ودا بكون دليل على الاستهتار 

شلت الدفتر من نفين واتحركت قالت لي على فكره وزنك نقص كتير ماشه منيح مشاء الله قلت ليه برضو الفضل يرجع ليك يانيفو قالت لي حبيبتي انتي

واتحركت قعدت ارسم وافكر منو الخاين نفين ما اظن مبين انو قلبها ابيض بس خالد دا انا بشك فيو لانو واضح بتاع لف ودوران  بس هو شريك وبعدين مامحتاج لي القروش وابو من اغنياء اغنياء السودان وهو قاعد يساعد في رياض

 نسيبه بتحاول تبعدني انا مع انو ساعدتهم في التصاميم مفترض تشكرني معقول نسيبه بس هي خطيبه رياض وشريكة كمان والشركة أمكن تكون مستقبلة ومستقبل رياض والاتنين اصحابو من الطفولة باقي أرام والمصور أرام ولا المصور البكون الخاين منو ياربي 

 خلصت وطلعت وانا طالعة سكرتيرة رياض قالت لي رياض عايزك في المكتب اتحركت عليو ضربت الباب ودخلت قال لي انا عايزك تعملي كل التصاميم في بيتي  وانا بساعدك 

تصاميم تكون احتياطية حتى بجيب ليك كم بنت يشتغلو معاك فكرتك الاسه دي لو عملتها قبل كم سنه ماكنت خسرت اي حاجه الموضوع يكون سري ماعايز واحد يعرف ولا حتى نفين لانو انا ماواثق في اي زول في الشركة 

التصاميم لازم تكون لي العرض وانا واثق فيك وماتخافي بساعدك في اي حاجه 

انتي هنا بتشتغلي مع نفين التصاميم المفترض نقدمه في العرض وفي البيت بتشتغلي التصاميم البديلة لانو واثق انو التصاميم الهنا في الشركة يابتنسرق تاني أو بحصل لي حاجه

قلت ليو تمام ماعندي اي مشكلة واصلا انا بحب شغلي وكتير ومستعده اعمل التصاميم قال لي عارف انو كده انا بتعبك لكن ماتخافي انا مستعد اخليك شريكة معنا في الشركه بنسبة ١٠ في الميه لو نجحنا في العرض ومد يدو قال لي اتفقنا مديت يدي وانا متوترة عاين فيني مسافه وقال لي واثق فيك نزلت عيوني منو وقلت ليو انشاء الله اكون قدر الثقة واتحركت طلعت وانا طالعه خالد قال لي تعالي اوصلك قلت ليو شكرآ مايحتاج قلال لي بس انا حابب اوصلك جات أرام وعاينت فينا قالت لي خالد ممكن توصلني خالد التفت عليه وانا اتحركت وصلت المواصلات وركبت وصلت البيت لقيت ياسين وعلي وطارق قاعدين وياسين يستفرغ جريت عليو لقيتو يستفرغ دم وديل يبكو وانا انخلعت قلت ليهم وانا بكورك المستشفى المستشفى مسكت ياسين وانا ببكي وهم يبكو وطلعنا وصلنا المستشفى الدكتور كشف عليو وقال انو الكبد منتهي من الشراب انا كوركت فيهم انتو ماقلتو خليتو البتشربو فيو ليه كذبتو وقعدت اضرب فيهم واكورك الدكتور قال لينا انا بكتب ليو علاجات ونشوف البحصل شنو لانو أمكن يحتاج لي زراعة كبد قعدنا يومين في المستشفى وياسين اتحسن وطلعنا وصلنا البيت دخلت عملت ليو شوربه

وجبتها ليو قعدت معهم قلت لي علي ماقلتو خليتو الشارب علي قال لي انا وطارق خلينا بس ياسين ودنقر راسو يبكي قلت ليو كلو لي خير وإنشاء الله بتعالج وبرجع احسن من الاول بكرا بنمشي نشوف مركز لي إعادة التاهيل وبنقيف مع ياسين  علي رفع راسو وقال لي القروش اتحركت جبت الصندوق ومديدو ليو قلت ليو ديل قروشكم انا كنت كل ماتدوني بختها ليكم هنا وانا كمان بخت في الصندوق ماتشيل هم علي قعدت يبكي قلت ليو نحنا اخوان والاخوان بقيفو مع بعض انت بس ادعي ليو وخليك قوي عشان ياسين يتحسن قال لي انشاء الله قلت ليو قوم صلي قام وطارق كان يبكي وساكت قام معاو اتوضو وطلعو الجامع قعدت مع ياسين قلت ليو قوم صلي جبت الابريق وفرشت ليو المصلاية انتظرتو لما انتهى جبت صحن فواكه مديتو ليو قعد ياكل بعد خلص اديتو العلاج  طلع نام جبت كرسي وجبت المصحف قعد اقرا ليو في قرآن لما نام  علي وطارق كانو نايمين في السراير ويعاينو فيني اتحركت دخلت الغرفة وظبطت المنبة على الساعة٢ كان عندو حبوب ونمت صحيت مع المنبة ومشيت اصحي لقيت علي صاحي يصلي صحيتو واديتو الحبوب ورجعت نمت صحيت الصباح عملت الشاي وعملت ليو عصير شلتهم واتحركت على العريشة صبحت عليهم ياسين اتحسن الحمد لله لبست وطلعت الشركة وصلت السكرتيرة قالت لي رياض منتظرك مشيت عليو قال لي حتمشي بيتي مع كم بنت عشان التصاميم

 قال لي في الأول قلت بيتك بس بيتك بعيد من الشركة وبيتي قريب قلت ليو تمام اتحركت ومعاي كم وحده وصلنا بيت رياض بيتو عباره عن فلة مشاء الله من تدخل في بوابة كبيره وفي حديقة وفيها حوض سباحه وفيها مقاعد ومظلات شمسيه وفيها طاولة كبيره عليه كراسي

 تدخل لي جوه بتلاقي البيت طابقين البيت من برا بي اللون الأبيض  وكل الشبابيك زجاج وجوه ابيض على بني رهيب دخلنا فتحت لينا الشغالة وصفت لينا الغرفة البنشغل فيها وقعدنا انا قعدت ارسم والبنات يعدلو لي على التصاميم وجزء يخيط لي الساعه ٢ ونص اتصلت اطمن على ياسين لقيتو كويس طلعت الشركة من دخلت نفين قالت لي كنتي وين قلت ليه مشغولة شوية بلشنا في التصاميم الفي الشركة كنت عايزه اموت من التعب جيت اطلع لقيت خالد قال لي اوو المختفية اتحولتي من فيلة شركتنا لي غزالة شركتنا سلمت عليو مد يدو سلم علي مرتين قال لي عشان ١٠٠ كيلو كل ٥٠ كيلو سلام قلت ليو ظريف قال لي مابحب الا تقل دمك دا وقال لي عازمك عشاء بتقبلي دعوتي قلت ليو معلش مابقدر جا رياض وشافنا واقفين قال لي لو خلصتي الحقيني في المكتب اتحركت المكتب قال لي مشاء الله شايفك منفتحه لي الونسه عاينت فيو ومارديت قرب مني قال لي لما احكي معاك ردي مابحب الزول يطنشني قلت ليو اقول ليك شنو. اي مثلآ ولا ابرر ليك قال لي المهم تردي قلت ليو ضروري ارد صره وشو وقال لي لا المهم خلي الفارغه على جنب عملتي شنو قلت ليو انت لو شايفه فارغه بتسأل منها لي +خلصنا كم تصميم قرب مني وقال لي  على الجمال الفيك والزكاء فصيحة وابتسم انا اتوتر من قربو ورجعت لي ورا قلت ليو عادي رديت ليك على حسب سؤالك مااكتر قال لي دا رد ولا ردح ياشيخه و ابتسم 

قلت ليو ماكنت بقصد اسفه قال لي المهم انو انتي بتكوني تعبانه اتفضلي امشي ارتاحي قلت ليو تمام يسلمو واتحركت

طلعت لقيت نفين طالعه قالت لي ارح اوصلك ركبت معها قالت لي كنتي وين الصباح قلت ليه كنت في البيت قالت لي رياض بخطط لي شنو قلت ليه مابعرف قالت لي شايفه كل شوية برسل ليك حاسه انو في شي قلت ليه رسل لي عشان التصاميم انتي عارفه انو نحنا ضفنا التصاميم المحجبه  وكان عايز يعرف كيف بتكون التصاميم قالت لي بحاول اصدقك في واحد رفع ليه يدو قامت وقفت سلمت عليو كان طويل وحلبي ووجيه شديد قالت لي اعرفك جون عارض أزياء في الشركة سلمت عليو وقام ركب وهي قعدت تتونس معاو انا ماحبيت شخصتو ماعارفه ليه ما ارتحت ليو كان بعاين فيني كل شوية وصلنا ونزلت وهي اتحركت بكرا العيد ماعارفه يكون مختلف المره دي ولا زي الاعياد الفاتت عايزه ادخل وقفت جنبي وحده سلمت علي كانت جارتي في بيتي القديم قالت لي ماعرفتي الحصل لي علوية قلت ليه لا انشاء الله خير قالت لي الدنيا كلها تتكلم في بنتها قلت ليه ماله بنتها واي وحده فيهم 

[نسألك يا الله أن تبعد عنّا(أصحاب) الوجوه المتعددة خبيث النوايا مُبطن الحديث متقلب المزاج

‏خائن العشرة  ناكر المعروف مرتدي لباس الّود

‏يا الله باعد بيننا وبينه لا تُقرِّبهُ منّا ولا تُقرّبنا منه

‏ولا تجمعنا به لحاجة ولا تحوجه إلينا 🤍[.....يتبع

             الفصل الثاني عشر من هنا 

لقراءة باقي الفصول اضغط هنا