رواية خلف الابواب المغلقه الفصل السابع والثلاثون 37 والثامن والثلاثون 38 بقلم مشاعر مبعثره
37
دركت لحظتا انو مافي اي حياة من دونو !!! ي يكون عايش ، او عايش!!!! قمت فتحت الباب وجريت ، لقيتهم لسه ملتمين فيه ، ومهيلم طالع له في بطنو بضربو بيديه الصغار ديلك نظام بصحيه !! بعدتو وارتميت مكانو ، ختيت راسي قصاد قلبو ، ومنتظره اسمع نبضو بأضاني البقت اقرب حاجه له .
نزار قوم ، قوم انا بتوسلك!!!😭😭😭😭 ما تموتنا كلنا!!! انت ما سامعني؟ قوم يلا ، قوم يا نزار ، بقيت اضربو في صدرو وابكي ، بللت قميصو بدموعي ، لمن ما حصلت استجابه رفعت راسي وعاينت فيه !!!!
قلت له : ما عاوز تقوم؟ طيب انا ح الحقك !!!
عاوزه اقوم ، فجاءة حسيت اني متوسطه يديه وضاميني بقوه !!!!!😲😲😲😲😲😲
انخلعت شديد ، ومديت يدي المرتجفات لوشو اتحسسو
عاينت له بخوف !!! لقيت عيونو مفتحه ومبتسم !!!!
اتحركت شفايفو كمان : اهدي حبييتي .
: نزار؟ نزار انت عايش؟؟؟؟
قبل افهم الحاصل ، نزلت وشي وبست راسو !!!! ، حضنتو وبكيت ، قام من رقدتو وخباني في حضنو ، ذي ما قاعد يعمل وشغال يهدي فيني ، ويبوسني في راسي ، ووشي
: انا هنا ما تخافي قلبك بدق بقوة ..
: انا ما بتحمل فراقك !!! مستحيل اعيش بلاك يا نزار ولا ثانيه واحده
رفع راسي ، وقال لي : وانا ما بفوتك!!!!
باسني ، قمت مخلوعه ، بعدتو و قلت له : انت بتعمل في شنو؟ ما شايف الاولاد ديل؟؟
دخل حواجبو في بعض وقال لي : وين الاولاد؟
: هنا في السرير .
قعدت اتلفت ، ما شايفاهم!!!! انخلعت شديد ، وقلت بسم الله الرحمن الرحيم ، اسي كانو هنا وببكو ، حتى مهيلم كان جنبك ، اسي نزلتو من حضنك!!!
ختيت يدي في وشي مافيه دموع !!! قلت له : نزار انا دموعي مشت وين؟؟؟
قعد يضحك و قال لي : ممكن تستغفري وتهدي؟؟؟
: استغفر آلَلَهّ آلَعٌظُيَمً ، الحصل شنو؟
: انا زاتي ما بعرف ، كنت نايم ، فجأة صحيت بك واقعه فيني كدا ، تحضني فيني وتنادي ، نزار نزار فما حبيت اقاطعك وبصراحه الوضع عجبني😉
: بالجد؟؟ بس نبضك كان واقف؟؟؟
غمضت عيوني للحظات ، طلعت فيهم من الفاصل الزمني بين النوم واليغظه ، وادركت انو كان حلم م اكتر ، بس من شدة خوفي حسيتو مستمر معاي ، قلت له : نزار انا حلمت اني فقدتك ، ودا حرفيا بمثل اكبر مخاوفي ، والله العظيم
: ما تخافي ، انا موجود هنا معاك ، والموت حق مافي منو مهرب.
: ربنا يطول عمرك ويجعل يومي قبل يومك ، انا نفسي اموت مطمنه على الاولاد وهم معاك!!!!
: وانا برضو بنزعج لمن تقولي كدا يا سمر؟ لاني ما بتحمل اعيش من دونك ، وبرضو ما بتمنى احضر موتك
: بحبك .
: وانا بموت فيك
قست حرارتو بجبيني قلت له : مافي حراره !!! اخر مره كانت عاليه
: ما قلت لك شوية التهاب ، وراح مع العلاج ، شوفي وهم المرض عمل فيك شنو؟؟؟
ضحكت بخجل ، قال لي : يلا ارجعي لمكانك الطبيعي .
: بس مش الصباح جاء؟
: ههههه ، لالا لسه ، دا ضؤ القمر نحن ما كملنا ساعتين من نمنا ، يلا حبيبتي
رجعت حضنتو وانا مطمنه ، وحمدت ربنا انو كان حلم لا !! كان كابوس ما بتمنى اشوفو تاني 🤚🏻
مهيلم صحى وجاء رقد وسطنا !!! مره يحضني ومره يحضن نزار ، محظوظ خلاص😅
نسيبتي تاني جات زارتنا بعد سمعت ب اجهاضي ، وانبسطت شديد بالسعاده النحن عايشين فيها ، وكالعاده مشت بعد وصتنا على بعض وقبلت رؤوسنا كلنا .
: الحمد الله ، الله ريحنا من دخيل السرير .
: يعني مبسوطه عشان حبوبه مشت يا لين؟
: لالا ، عشان السرير ، بس ياريت ماما تنوم معانا الليله!!!
: تنوم معانا كيف يعني؟ انتي بقيتي كبيره ما تنقي ذي الاطفال ، شادن ما بتقول كدا!!!
: بس ليه تنوم مع بابا ونحن لا؟
: لانهم متزوجين افهمي .
: مهيلم محظوظ بنوم معاهم
مهيلم طبعا كان مدوخنا يوما
: الليله الولد دا مالو مساهر كدا؟
: بدا يتعلم الكلام ، وقاشر بالكم كلمه النطقهم صح ، هههه يلا قول بابا .
: بابا
: وماما
: اماااا........
قلت له : قول ماما يا ولدي ، ليه صعبه عليك ماما دي؟؟ يلا شاطر ماما ، ماما...
لف وشو مني وقعد يلعب ، نزار يضحك ساي 😄😄 ، قلت له : لك الحق ، ليه يعني الاولاد بقولو بابا قبل ماما؟؟؟ الام هي البتتعب اكتر .
: ههههه عشان ساهله عليهم حبيبتي ، انتي غرتي يعني؟
: ايوا غرت ، وكمان بحب يلعب معاك اكتر مني 😏
: القبول من عند ربنا يا استاذه😅
: قصدك انو انا ما عندي قبول؟
قعد يضحك ويتغالظ علي وانا اشاكل لمن حضني قال لي : كفاية عليك انا .
: طبعا كفاية ، اما المفتري دا الليله ح انومو مع اخوانو عقابا له .
مسكو مني وقال لي : حرام عليك ياخ😅
كنت مصره ، قال لي : خلاص خليه بعد ينوم ، اسي هو زاتو ما برضى ، قلت له : معناها انت امسك نفسك وما تقربي علي كدا قدامو
: يا سلام ، كدا؟
: ايوا كدا ، خليكم انتو الزكور مع بعضكم انا ماشه على بناتي
: طيب نادي لينا هاني معاك ، وتصبحن على على خير😅
مشيت علي البنات اتونست معاهم شويه ، وكان هدفي اعرف الجديد في حياتهم ، واهتماماتهم خاصة ليان ، لانها ما شاء الله كبرت وزايده حلا ، غير كدا متعلقه بالتلفون شديد .
قالت لي في ولد بضايقا بالفيسبوك ، وبرسل لها حاجات ما تمام ، وهي ما عاوزه تكلم ابوها ، قلت لها : احظريه طوالي واي زول يضايقك ولا يعمل لك حركات ما تمام وقفيه في حدو الناس نفوسا دنيئه .
يلا بعد حظرتو رجع تاني رسل لها من صفحه جديده ، وعاوز الاقيك وبتاع ، ويوصف في شكلا كأنو بعرفا !!!
قمت انا عملت لي صفحه وهميه بإسم سوسو 🙈 ، وضفتو !! جرجرتو لمن اداني رقمو سجلتو ، وظهر لي في الواتساب خاتي صورتو لمن ركزت في الصورة ، لقيتو ولد الجيران السكنو في البيت الكنت مؤجراه ،المفتريين ديلك 😅 .
عاد انا اصلا محروقه منهم عشان الافتراء بتاعهم دا ، وما نسيت لمن رمو الاكل الاديتو لهم ، قلت بتصرف براي بس اصلي ما حكيت لنزار ولا حتى ليان.......
38
بقيت اتواصل معاه واتحملت قلة ادبو ، قال لي : انا ساكن براي تعالي ، وصف لي البيت ، ياهو زاااتو بيت الجيران .
قمت في ساعتي لبست توبي و مشيت لهم قلت الليله ازلو قدام امو .
دقيت الباب جاء فتح لي هو ذات نفسو ، وكمان فضلني من الباب شايفا البيت دا ملخبط ومجدع .
هو قعد يعاين لي بإستغراب ، قلت له امك وينا؟
: امي؟ امي متوفيه الله يرحما .
: شنو؟؟
: انتي عاوزه منو بالضبط؟
صريت وشي وقلت له : انا سوسو بتاعة الفيسبوك 😒
فك خشمو وقال لي : سوسو؟؟ ما كنت فاكرك خاله😁
نهرتو : بخلخل ضروسك يا ولد يا قليل ادب ، انا والدة ليان البترسل لها صور اقبح من وشك دا ، وتقول لها كلام كعب ، وريني شفتها وين؟؟
: ما هي قاعده تنشر صورا في صفحتا .
: واي بنت شفتها ناشره صورا خلاص تحكم عليه على انها بنت وسخه زيك؟؟ انا الليله بادبك اهلك وين؟
: انا ما عندي اهل هنا .
: كيف يعني؟؟
: ساكن براي انا!!
: كيف براك؟ والنسوان البتدخل وتمرق دي شنو انت بتلعب علي يعني؟؟
: مافي اي زول ساكن هنا غيري ! هدا فتشي ، اصلا بيت غرفة واحده يشيل منو؟؟
: يا ولد انت بتقول في شنو؟ البيت دا انا كنت ساكنه فيه ولمن طلعت جات اسره قعدت انت زاتك شفتك معاهم .
: ديل اخوي واسرتو ، ورجعو الخرطوم طوالي ، لانو البيت ضيق وم ارتاحو فيه ، اسي انا قاعد براي
: والبجوك ديل......
قلعت عيوني و قلت له : يا قليل الادب😲😲😲 يعني انت شغال تجيب في النسوان هنا؟؟ والله الليله اكلم زوجي يأدبك..
: يأدبني شنو؟ انا ما جبرت واحده ، براهم بجو دايرات القروش .
: قصدك منو انت؟
قعد يتمتم ، نهرتو قال لي : من النازحات القاعدات في المدارس والداخليات ، العاوزات القروش ديل .
ختيت يدي في راسي .
: لا حول ولا قوة الا بالله ، انت ما بتخجل على نفسك؟ ياخ ما عارف البتعمل فيه دا حرام؟ اهلك وين؟
: امي متوفيه وابوي في قطر ، كنا قاعدين انا واخوي واسرتو في الخرطوم ، بعد الحرب جينا اجرنا البيت دا تاني هم رجعو ذي ما قلت لك .
: وبتلقى القروش وين عشان تديها لبنات الحرام ديل؟؟؟ .
: ابوي برسل لي ، وبعدين البنات ديل مافيهم واحده بنت ناس ، في واحدات بعرفهم من كنا في الخرطوم ، استغلو الظرف ، وبقو يشتغلو الحاجه دي عشان يطلعو مصاريفهم!!!! واسي لمن جو هنا والدنيا ضاقت بهم بعملو نفس الشي .
طبعا اخر حاجه كنت اتوقعا يحصل الكلام دا من النازحات البقينا بنعرفهم ونتداخل معاهم ، يعني القاعدين نقدمو لهم ما كفايه؟ ولا شنو البخليهم يعملو حاجة زي دي؟؟
المهم هددتو شديد وهو اصلا ما زول كبير كدا ، بقى يترجى فيني م اكلم زول ، بس انا طبعا مستحيل اسكت ، حكيت لنزار لمن جاء ، مشى له في ليلو داك نبذو نبذ ، واتصل بسيد البيت ما خلى له كلمه وزكرو لمن طردني ، اداه مهله اسبوع بس قال له : تطلع الولد دا ولا انا بشكيك طوالي ، ما بتقعد لينا ولد عزابي في نص الحي ونحن عندنا بنات ، البيت دا في اسر محتاجاه ومستعدين باي سعر يأجروه ، انت خاليه للمسخره وقلة الادب؟ تاني ي أجرتو لاسره محترمه او تخليه فاضي كدا.
طبعا هو عمل نفسو ما عارف انو اخو الولد سافر ب أسرتو، بس كذاب ، عارف وساكت عشان مؤجرو له ب أضعاف سعرو .
من جهة تانيه نزار مشى المدرسه واتكلم مع الرجال بخصوص سلوكيات بعض البنات والنسوان قليلات الشرف ، وفعلا بقو يتناوبو على الحراسه بليل ، وما بخلو بنت تطلع براها بليل لاي سبب ، ضبطوهم غايتو بقوانين انا بتمنى تطبق في الحتات التانيه ، لانو في بنات سلوكهم شاذ وما بتغيرو لأي سبب ومستعدين يعملو اي شي عشان القروش .
الولد زاتو انا اتصلت به نصحتو غايتو كان يسمع مني ، المهم اني عملت القالو لي ضميري ، والمسؤوليه الحسيتا تجاهو .
ليان طبعا بقت فاهمه وواعيه ، وبتعرف تحمي نفسا من ضعاف النفوس الذي ديل ، وابوها وصاها تعمل حسابا من الناس خاصة في الميديا لانو هي واغلب الفي سنها من بنات واولاد بكونو عايشين في العالم الافتراضي دا ، كل معلوماتهم وافكارهم منه ، وحتى صداقاتهم .!!!! فهو وصاها تنتقي الافضل وتبعد من اي حاجه مثيره للشكوك ، واي صديق او حتى صديقه لاحظت عليها سلوك ما تمام ، حتى لو في الالفاظ او الصور والمنشورات البشاركا تبعد منو وتحظرو ان شاء الله يفضل لها صديق واحد مدام حقيقي ومحترم احسن من مليون صديق سؤ .
كل يوم بنتعلم حاجه جديدة انا والاولاد ، وبنكتشف خصله في نزار دا ما كنا عارفنها ، كل الاخلاق الحميده متمثله في الزول دا الرجوله والطيبه والعفه والايثار وغيرا وغيرا ، مستحيل زول يطلب منو مساعده ما يلبيه ولا يسمع منادي ما يجيبو ، نزار ما براه !!! في زيو كتيرين في المجتمع دا والدنيا لسه بخيرا ، كل البتمناه انو اولادي بعدين يبقو زيو وفي صفاتو
: يا اولاد امشو افتحو الباب دا ما سامعنو؟؟ ، ( ولا كأني بتكلم ).
كنت في المطبخ ، بين قلي وتقطيع ... وعرقي دا لمن سايل من شدة الحر ، والشعر دا منكوش والحاله صعبه ، اما الريحه ما بتنفرز ، توم ولا بصل ، الباب كان بدق وبنادي في الاولاد ما معبرني ، يحضرو في تلفزيونهم .
قمت في حالتي ديك مشيت فتحت وشايله الكمشه في يدي ذي سلاح الحرب ، انخلعت لمن لقيتو نزار ، لانو ما زمن جيتو ، طوالي قفلت فيه !!!!!🙊 ، خليتو في وضع الاستغراب ، ومشيت للاولاد وقفت قدامهم ، طق قفلت التلفزيون وقلت لهم بحزم : سريع واحد يقوم يفتح الباب ولا احرمكم من التلفزيون اسبوع ، طوالي قامو جارين كلهم حتى مهيلم وراهم ، مشو فتحو لأبوهم ، ويحضنو فيه بالصف ويشيلو معاه الاكياس ، وهو مستغرب !!! ما عارفه من تصرفي ولا الهيئه الكنت عليها ، في المسافه دي انا دخلت الحمام استحميت وبخيت الريحه فيني ، اول مره يشوفني مبشتنه كدا ، لاني متعوده اتظبط قبل مواعيد جيتو وانتظرو ، بس جاء بدري اليوم داك ، وخلاني اتخبط !! شغلي ما تميتو .
لبست في اقل من دقيقه والشعر دا قبضتو ورا وختيت فيه طرحه ، جيت...يتبع♥️