رواية احلام ودموع الفصل الخامس 5 بقلم ماريه عبدالله مسعود
افعلو ماشئتم فأانتم على موعد مع الله💔
سحر بنت المايقوما 💔
الليل دخل والبيت مافيو كهرباء طلعت قفلت باب الحوش وختيت فيو حاجه ودخلت الغرفه الكانت واقعه قعدت في سرير وقعدت ابكي استغفرت الله عندي مويه في باقات شلت لي باقه كبيت في الابريق واتوضيت قمت صليت مع كل ركعه دموعي بتنزل مع كل دمعه بشكي لي رب العالمين كسرتي وضعفتي ووحده يالله الله اجبر بخاطري انتهت قعدت في المصلاية دموعي الماعايزه تقيف والعبره خااااااانقني ونفسي كاتم شديد وانا قاعده سمعت الباب البضرب انخلعت وحاولت اتجاهلو البيت كان قريب من الكوشه ومهجور
قعدت اقرا في قرآن وانا خايفه شديد سمعت صوت عليك الله افتحو الباب الدنيا كانت برد شديد ختيت لي حاجه تقيله فيني وشلت لي بطارية وطلعت وصلت باب الشارع قلت وانا بتمتم م م منو في الباب جاني صوت برجف من البرد ااافتحي الباب عليك الله في الأول خفته عايزه ارجع الغرفه حركت رجولي سمعت صوت عليك الله افتحي مديت يدي في الترباس ورجعت يدي انا بنت وقاعده براي وفي بيت مهجور خفته شديد وكل الأفكار جات في راسي وخصوصا انا براي ودا صوت ولد وانا سرحانه سمعت صوت بنت افتحو عليكم الله فتحت الباب من غير تردد حركت البطاريه فيهم لقيتهم تلات اولاد ومعهم بنت كانو ماسكين البنت من شفتهم مسكت منهم البنت ودخلتهم كانو برجفو من البرد هدومهم المقطعه ودموعهم الجاريه عرفتهم اولاد شوارع دخلت البنت الغرفه كانو في اعمار ١٦ و١٧ واظن ١٨ والبنت تقريبا ١٢سنه كانت بتبكي وماقادره تمشي دموعها نازله وبترجف ماعارفه بترجف من البرد ولا من دموعها النازله مشيت سريع جبت بطاطين واديتهم ليهم الاولا قالو لي بنقعد في الحوش قلت ليهم تمام واحد جا طلع معاي السراير كان عندي ٤ سراير طلعت ليهم اتنين وفرشتهم طلعو من الغرفة و قعدو فيهم لما جيت اتحرك قالو لي دا كان بيتنا بنجي ننوم فيو التفت عليهم قلت ليهم يعني انا ضيفه عندكم ماانتو الضيوف ضحكو وضحكت معهم قالو لي ماعندك حاجه ناكله قلت ليهم في واتحركت الغرفه عندي باقي عيش وسلطة ودكوه جهزت ليهم صينه وشلت لي طربيزه وختيتو ليهم واحد قال لي ياسلام صينية وطربيزه وسراير نحنا في الجنه الليلة نزلت مني دمعه مسحته سريع قلت ليو انشاء الله ندخل الجنه قولو امين جبت ليهم ابريق غسلو يديهم كانو بياكلو بسرعة قعدت اعاين فيهم ودموعي نازلة دخلت الغرفة لقيت البنت قاعدة في نص السرير وتبكي وتتنهد جبت ليه حاجه تاكلي قالت لي ماعايزه هدومه كانت جديده بس مقطعه قالت لي عليك الله جاي موية استحمه قلت ليه في البرد دا قالت لي انا قرفانه من نفسي شديد جيت قعت جنبها وحضنته قالت لي انا كنت في المايقوما وكان في فاعل خير بجي وكان بريدني شديد وانا اعتبرتو زي ابوي بجيب لي الحلاوة واللعاب والملابس وانا كنت كل مايجي بجري عليو وحتى بقول ليو بابا الليلة جا وجاب اورق قال انو عايز امشي معاو فرحت فرح شلت حاجاتي وطلعنا بعد ما ماما بلقيس قالت لي انتي بقيتي بتو وهو اتبناك وطلعت ركبت معاو العربية متخيله نمشي بيت يكون فيو ام واسره واخوان
وصلنا وانا مبسوطة شديد مسكتو من يدو ودخلنا وصلنا البيت وقفل الباب وتاني اتغير شديد اتخيلي عمل فيني شنو وقعدت تبكي بكيت معها واتذكرت لما جو ناس المنظمة ولما الراجل اتحرش بي
حضنتي قوي وبكيت معها قمت جبت ليه مويه وجلباب مني ومااظن بكون قدرها شافعه ياناس دي طفلة معقول نفوسكم وسخه لي الدرجة دي!
كده معقول الدنيا دي كلها وسخ في وسخ اخ يالله
قالت لي بعد ما عمل فيني حاجات كعبه ضربني ودفرني بي رجولو وطردني وانا طلعت الشارع وماعرفه امشي وين لفيت ولفيت وانا الألم عايز يقتلني الليل دخل وانا قعدت تحت شجره ارجف من البرد والالم جو علي ٣اولاد ديل في الأول خفت منهم بس تاني مشيت معهم كنت خايفه
انا دموعي كملو من كلامه طلعت خليتها تستحمه قعدت مع الاولاد الكانو بتونسو ويضحكو ويشاغلو في بعض اتعرفت عليهم واحد اسمو علي بقولو ليو كابوكي واحد طارق بقولو ليو نيمار واحد ياسين طلعو ظريفين شديد
دخلت علي البنت لقيته استحمت وطلعت السرير واتكرفست سامعه وصوتها وهي بتبكي وتتنهد
مابيدي انا حاجه انا زاتي كنت عايشه في نفس الوجع ولسه عايشه فيو
قمت ولعت الكانون عندي باقي دقيق وعجين خمير عملت ليه نشا كبيت ليه كباية وقعدت جنبها قلت ليها كان في بنت أهلها جدعوها في حاوية وسخ ولقوها الناس رفعت رأسه وعاينت فيني قلت ليها جو ناس المايقوما شالوها وكبرت هناك وحصل ليها زي ماحصل ليك بس ما استسلمت قاتلت عشان تعيش كانت كل ما تضعف بتقرب من الله شديد والله كان معها كل ماتنكسر بتقوى كل مابتضعف بترفع يدها وبتقول يالله يالله ورب العالمين كان معها كبرت ودخلت الجامعة البتحلم بيها واشتغلت في مطعم واجرت بيت واسه هي بتفتش تشتغل في شركاء عشان تحقق حلمها وعارفه انو في يوم بتحققو وانو الله بستجيب ليه دعواتها قلت ليه البنت دي انا اختك الكبيره سحر وانتي اسمك منو قالت لي يقين قلت ليه اسمك حلو شديد انتي اسه ماعندك حلم قالت لي عندي عايزه اكون دكتورة قلت ليه ارفعي يدك وقولي يالله أمسحي دموعك واوع تضعفي رب العالمين دايمآ معاك انتي بس خليك قوية وخليك مع رب العالمين حضنتي مديت ليه الكباية شالته وقعدت تشرب وانا اعاين فيه وسرحانه
شربت شلت الكباية جبت ليه مويه شربت قعدت جنب رأسه وقعدت اقرا ليه في قرآن وانا سرحانه وانا كمان عايزه اليد البتتمد لي وانا كمان ضعيفه ومكسوره وموجوعه البنت نامت اتحركت شلت لي نشأ في كبابه وطلعت لي الاولاد شالوها مني جبت موية في جك وكباية ختيته جنبهم ومشيت دخلت الغرفة قفلتها علينا قعدت في السرير ولعت البطارية مسكت الدفتر رسمت البنت والتلاتة اولاد لما كانو وقفين في الباب الملابس المقطعة والدموع النازله من البرد والوجع
نمت في السرير وقعدت اسبح وتاني ماحسيت بي حاجه صحيت الصباح لقيت البنت صاحيه وقعده في طرف السرير وتبكي قلت ليه قومي صلي قامت من غير ماترد علي
قمت اتسوكت وصليت ولعت الكانون ختيت لي شاي كبيتو في كبابي وطلعت لي الاولاد واحد قال لي انا اول مره زول يعاملني كده اسه البيوت دي جوها بكون كده سكت ماعرفت ارد ليو بي شنو ختيت الشاي واتحركت لانو حرفيآ دموعي نشفت لو وقفت سمعت باقي كلامهم دموعي مابتقيف دخلت لقيت البنت صلت قلت ليه تعالي اشربي معاي الشاي قامت وكانت حزينه وموجوعه جات قعدت كبيت ليه الشاي وقعدنا نشرب واي وحده سرحانه واحد من الاولاد جاب الصينية شلتها منو قال لي نحنا طالعين قلت ليو تمام غسلت العده قلت ليه انا طالعة الشغل وافتش لي بيت قلت ليه بتقعدي معاي ولا ارجعك المايقوما قالت لي ماعارفه قلت ليها مابقدر اخليك براك واطلع خلاص ارح معاي بس عايزه ليك ملابس
ماعرفت كيف اتصرف جريت لحقت الاولاد قلت ليهم ممكن تجيبو ليه عبايه وطرحه مديت ليهم القروش وانا ماعارفه هل بجيبوها ليه ولا لا واتحركت البيت انتظرت كم ساعة والباب ضرب مشيت فتحتو مد لي الكيس شلتو واتحركت فتحتو كان فيو عبايه وطرحه وجلباب مديتهم ليه لبست قلت ليه يلا نطلع انا اتخرت شديد وطلعنا ركبنا المواصلات وصلت المطعم سلمت على خالتو. ساره شافت البنت قلت ليه دي قريبتي وقعدنا نتونس ونضحك ويقين تعاين فينا ساي وسرحانه خلصت شغلي وطلعنا اتصلت علي خالتو علوية تعتزر وطلبت اسامحه وقالت لي جيبي الويكة والشطه ابيعها ليك وقالت لي في كم وحده جابت البصل عشان تحمري ليه قلت ليه تمام لي بكرا انشاء الله بجي وبشيلهم سألتني عايشه وين وصفت ليه البيت قعدت تتحسبن قالت لي انا بسأل ليك لو في بيوت لي الاجار شكرتها
وقفلت طلعنا نفتش لي بيت لفينا ولف مالقين الاجارات غاليه شديد دخلت السوق اشترينا لي كم حاجه واتحركت وصلنا قعدت عملت الغدا انا ويقين فطرنا في المطعم قعدت اتونس معها وهي نايمه في السرير وتعاين فيني مرات ترد ومرات تسكت ودموعه تنزل كسرت النفس حاره شديد اظن افتكرت انو خلاص حياته حتتغير ويكون عندها بيت واهل وام وابو حسبي الله ونعم الوكيل
انتهيت من الغدا الاولاد جو طلعت ليهم السراير وخت ليهم الغدا ودخلت ختيت الغدايقين رفضت تاكل حنستها تحنيس في النهايه اكلت جبت الصينيه من الاولاد وقفلت الغرفه علينا ونمت كنت تعبانه شديد صحيت الصباح على صوت واحد من الاولاد بكوركو كابوكي قوم عليك الله قوم طلعت لقيت الولادين قاعدين جنب سرير ويحركو في كابوكي ماعايز يقوم انخلعت وجريت عليو هبشتو من يدو في نبض قلت ليهم سريع ارفعوا طلعت معهم جري المستشفى ودخلنا الدكتور قال لينا الولد دا بياخد ليو حاجه واسه كان زايد في الجرعة كنت بعايت فيو بي حسره اظن عمرو ١٦ سنه قعدنا لما فتح عيونو شلنا العلاجات وطلعنا وصلنا البيت عملت الشاي وعملت ليو شوية نشأ وانا ساكته لو اتكلمت اقول شنو غير حسبي الله ونعم الوكيل
اتصلت علي خالتو علوية وقالت لي تعالي في بيت تعالي شوفي سعرو كويس شديد فرحت فرح وقالت لي ماتنسي الويكة والشطه قالت لي بنتظرك جنب دكان... انتي عارفه عمك خالد قلت ليه مامشكلة وماقصرتي ياخالتي الله يديك العافية وقفلت منها التفت لي يقين قلت ليه ارح البس عشان نطلع قلت لي الاولاد تعالو اقعدو جوه نحنا طالعين وخلو كابوكي يرتاح ودي علاجتو أمكن نتاخر وصفت ليهم الاكل والنشا وطلعنا
وصلنا الدكان سلمت على خالتو علويه واتحركنا على البيت كان غرفة وحمام ومطبخ وعريشه فيو شجرة نيم كبيره وبارده اتفقت مع ست البيت وطلعنا مشيت الشغل ورجعت البيت
قلت لي بكرا انشاء الله بشوف لي دفار وبرحل دخلت كنت جايبه معا فول وعيش ختيت العشاء لي الاولاد وختيت لينا يقين كانت بتاكل حبه حبه وساكته وسرحانه رفعت يدها وقالت لي عايزه انوم رفعت الصينية غسلت العده وقفلت الغرفه ونمت صحيت الصباح على صوت كركبه والتفت على سرير يقين وقعدت اصرخ لا لا يالله لاااااااااا يالله وجريت ...يتبع"ولو أنه جدارًا لهدَمْته لكنّه صدري"💔