رواية احببت اسمراني الفصل الرابع4بقلم نجمة الشمال
هنا كانت بتقرأ قرآن، الباب خبطت، حطت النقاب على رأسها وراحت تفتح.
أركان: اتفضلي الحاجات اللي كنتِ عايزاها.
زهراء بهدوء: شكرًا تعبتك معايا، ياسمين عاملة إيه؟ في تحسن ولا لسه؟
أركان بوجع في نبرة صوته: التحسن بسيط أوي، بس مش هقول حاجة غير الحمد لله.
زهراء قالت: ربنا يشفيها، بدعي لها على طول.
ابتسم أركان وقال: عن إذنك هنزل عشان أطمن عليها.
دخلت زهراء وهي بتدعي لياسمين إنها تتحسن عشان عارفة إن أركان بيحبها جدًا.
فتح أركان باب شقته وألقى السلام.
جريت عليه فتاة (ياسمين) جميلة لكن ملامحها دبلانة، أول ما شافته ردت الحيوية لوجهها وحضنته وباست خده وقالت: اتأخرت ليه يا أركان؟
أركان بدلها الحضن: تعالي أحكيلك. ومسكت إيدها وراحوا باتجاه الكنبة وسألها باهتمام: عاملة إيه دلوقتي؟
ياسمين ابتسمت ابتسامة جميلة وقالت: الحمد لله كويسة عشان أنت جانبي.
أركان بهدوء: فين مؤمن؟ عشان جايب له حلويات.
ياسمين: بعد ما قرأ القرآن نام شوية لحد السحور، وكمان أنت جبت له هو بس ولا إيه؟
أركان ابتسم وقال: لا طبعًا، أنتِ أول واحدة في بالي وأنا بجيب. وأخرج قطع حلويات وقال: اتفضلي. المهم خدتي العلاج ولا لأ؟
ياسمين قالت: يا ربي ده أنا نسيت، العلبة خلصت امبارح ونسيت أقولك.
أركان حس بضيق وقال: ليه طب كده؟ أنتِ مش عايزة تبقي كويسة؟
ياسمين بوجع: لا عايزة أبقى كويسة، بس العلاج ده مسكن مؤقت، وأنا في المرحلة الأخيرة اللي ملهاش علاج.
أركان مكنش عايز يسمع الكلام ده وقام وقال: هنزل أجيب لك العلاج، ويا ريت متتكلميش معايا في الموضوع ده تاني. ونزل.
ياسمين زعلت عليه بس هتعمل إيه؟ دي الحقيقة اللي هو بيحاول يخبيها.
#########
زهراء كانت بتتكلم في الفون وبتقول: ليلي مش هتيجي تسحري معايا النهارده زي ما اتفقنا؟
ليلي بأسف: حقك عليا، جات لنا بنت عاملة حادثة ومحدش معاها وأنا قاعدة معاها عشان بساعدها، لأنها طلبت مني أساعدها تتوب وتقرب من ربنا.
زهراء بحنان: خلاص هقول لبابا وأجي أتسحر معاكم، وهخليه ييجي ياخدني بعد ما نخلص، ماشي؟
ليلي ابتسمت وقالت: هستناكِ، يلا في حفظ الله.
قامت زهراء وراحت استأذنت والدها وراحت تلبس وتجهز أكل عشان يتسحروا.
##########
عند علي كان قاعد في شقته ومعاه بنت، وقاعدين يشربوا أنواع من الخمور ومشغلين أغاني وبيرقصوا.
علي وهو في الوعي واللا وعي: قومي يا سوسو سخني الأكل ده وتعالي.
سوسو بدلع: عيوني يا باشا. وقامت تمشي في اتجاه المطبخ وفتحت الغاز وقعدت تدور على الولاعة.
علي نادى عليها بصوت عالي، خرجت وقالت: عايز إيه يا علي؟ وفين الولاعة؟
علي: حطي كمان فحم على النار وتعالي، هتلاقي الولاعة عندك دوري كويس.
رجعت تاني المطبخ تدور على الولاعة لحد ما لقتها، وحطت الحلة على النار وحطت الفحم على العين التانية وخرجت.
بعد مرور أكثر من ساعة علي قال: في ريحة حاجة بتحرق أو بتولع.
سوسو بسكر: مش عارفة، قوم شوف.
قام علي وهو ماسك سيجارة ودخل المطبخ، لقى كله دخان، حدف السيجارة على الأرض، مسكت في الفوطة، في أقل من ثانية والمطبخ بدأ يولع. حاول يخرج من المطبخ بسرعة عشان يلحقوا يهربوا من النار.
سوسو قالت: استنى أنا هخليها تطفي. ومسكت زجاجة كحول وحدفتها على النار، النار زادت ومسكت في المكان كله بسرعة، وسوسو بتصرخ، وعلي مش عارف يعمل إيه غير إنه بيقول: مش عايز أموت.
ورفع إيده للمرة التانية وقال: يا رب أنقذني المرة دي كمان، هتوب بجد.
ربنا استجاب دعاءه للمرة التانية.
الباب اتكسر ودخل رجال الإطفاء ومعاهم واحد وقال: أنتم كويسين؟ من فترة شميت ريحة حريقة، خبطت محدش رد، فطلبت المطافي عشان لو في حريقة، وفعلاً طلع في حريقة.
علي بهدوء: لسه المكان مولع من كام لحظة، أكيد مسمعناش الخبط. شكرًا لحضرتك. وراح قرب من سوسو اللي أغمى عليها وشالها ونزل من الشقة بعد ما النار انطفت.
#######
عند زهراء راحت المستشفى وعرفت ليلي قاعدة في أنهي أوضة وراحت خبطت ودخلت.
اتفاجئت لما شافت سوزي وقربت منها وقالت بصدمة: أنتِ كويسة؟ إيه اللي حصلك؟
سوزي بتذكر: أنتِ البنت اللي كنتِ في مكتب علي، طلعتِ كمان صاحبة ليلي.
زهراء: أيوه أنا زهراء، احكي لي إيه اللي حصل لك.
سوزي بتعب بدأت تحكي من أول ما كانت ماشية والشباب ضيقوها لحد ما علي سابها ومشي.
زهراء قربت منها وحضنتها.
ليلي عشان تكسر الجو ده قالت: زهراء بتعمل سحور حلو أوي.
سوزي ابتسمت وقالت: واثقة من كده، هاكل عشان أصوم معاكم بكرة.
ليلي: بس أنتِ تعبانة وعادي تفطري.
سوزي وهي بتربع إيدها: لأ مش هفطر، ربنا هيقومني. تعرفي أنا حاسة براحة كبيرة من ساعة ما لبست الإسدل وعلمتيني أصلي إزاي وصليت، وبعدها قرأت قرآن.
زهراء ابتسمت وقالت: حاجات بسيطة جدًا لما نعملها بنحس براحة، بس بيبقى معناها عند ربنا كبير جدًا.
سوزي بشغف: زي إيه؟ أنا عايزة أتعلم كل حاجة عن الدين وربنا.
زهراء قالت: زي الاستغفار الكتير، الحمد والشكر لربنا، الصلاة على رسول الله.
سوزي قالت: ربنا فعلًا جميل أوي، أنا بشكره عشان إداني فرصة تانية. ليلي قالت لي مش كل الناس بتاخد فرصة تانية، بس ربنا كرمني فرصة كمان غير دي بس مش فاهمتها.
ليلي بفضول: إيه الفرصة اللي جتلك غير دي؟
سوزي حكت لهم لما العربية مكانش فيها فرامل وهي مع علي.
زهراء اتنهدت وقالت: يلا ناكل، المهم أنتِ هتقعدي فين؟
سوزي قالت: هروح أوتيل أو حاجة.
ليلي بسرعة: لأ هتيجي تقعدي معايا، أنا قاعدة لوحدي وأهو نتسلى سوا.