رواية رحمه في رمضان الفصل الخامس5بقلم سلوي عوض
#سلوي_عوض
#رحمه_في_رمضان
بارت 5
أمينه: يعني كده عاجبك عمايل بتك؟
صابر: اه عاجبني، وإياكي تزعليها.
أمينه: خلاص يا أخويا وأنا هوجع قلبي معاكم ليه.
صابر: طاب اقفلي، أما أشوف الزبون ده.
لتغلق أمينه الهاتف مع زوجها.
أمينه: طيب يا رحمه، أنا هربيكي من أول وجديد.
أما الأستاذه نجاه فكانت قد استيقظت من نومها.
نجاه: اه رقبتي وجعتني أوي، يا خبر أم إبراهيم ده أنا سيبتها ونمت، أقوم أبص عليها في المطبخ.
لتدخل نجاه المطبخ.
نجاه: ايه ده، الله! المطبخ بيلمع من النضافه ولا ريحته تجنن، ده انتي طلعتي نضيفه أوي يا بخيته، أنا هتصل بيها.
لتتصل نجاه على بخيته.
نجاه: تسلم إيدك على نضافه المطبخ، تعبتك معايا.
بخيته: تعبك راحه.
نجاه: طاب بقولك ايه، انتي بتعرفي تطبخي؟
بخيته: اه أمال ايه.
نجاه: طاب تيجي تعدي عليا كل يومين تروقيلي الشقه وتطبخيلي، وأنا هراضيكي.
بخيته: من عيوني، بس أنا مش عاوزه فلوس.
نجاه: أمال ايه؟
بخيته: بعد إذنك يعني، تدي إبراهيم ابني وأمل بنتي دروس، عشان يعني العيال مش فاهمين حاجه وأنا جاهله معرفش حتى أفك الخط.
نجاه: بس كده؟ من عيوني.
بخيته: معلش بقا، أنا هعدي عليكي كل يوم الساعه ٧ الصبح.
نجاه: تمام، أنا كده كده ببقا في المدرسه، وفاروق جوزي غضبان.
بخيته: ليه كده بس؟
نجاه: يعني عشان نضافه الشقه وإني مبعملش أكل.
بخيته: كل حاجه هتتحل إن شاء الله.
نجاه: هو انتي فين يا بخيته؟
بخيته: في البيت.
نجاه: طاب تعالي، عاوزاكي.
بخيته: حاضر، أجيلك على عيوني.
أما الخاله شكريه أم عصام فها هي قد اشترت خزين رمضان كاملًا، لتتقابل مع رحمه.
رحمه: خالتي أم عصام، هاتي عنك، أطلع معاكي الشنط.
شكريه: الله يكرمك يا بنتي، الشنط قطعت صوابعي.
رحمه: كنتي ندهتي عليا أروح معاكي وأشيلك أنا الحاجه.
أم عصام: انتي قاعده قدام الباب كده ليه؟
رحمه: أصلي متخانقه مع أمي وعم خليل مش عارفه راح فين.
أم عصام: طاب تعالي أصالحك عليها.
رحمه: تعالي بس نطلع الشنط الأول أحسن أمينه تديكي عين، أصل عيونها مدوره.
أم عصام (ضاحكه): ده انتي مشكله.
رحمه: تعالي نطلع على طراطيف صوابعنا.
شكريه: تعالي.
لتصعد رحمه مع أم عصام ليجدو أبو عصام يتحدث مع عصام عبر الهاتف مكالمه فيديو.
رحمه: أوعا على التليفونات التاتش!
أبو عصام: تعالي يا رحمه سلمي على عصام.
رحمه: أييه يا عصام، أخبارك ايه؟
عصام: الحمدلله، انتي أخبارك ايه؟ لسه مجنونه زي ما انتي؟
رحمه: وليه الغلط ده بقا؟
عصام: بهزر معاكي يا الهم، أخبارك ايه؟
رحمه: أديني يعني… انته يرضيك يعني عم خليل وأبوك وأمك معاهم تليفونات تاتش وأنا ماسكه تليفون معفن وبايظ؟ بص أنا رابطاه بأستك، بذمتك ينفع كده؟
ليضحك عصام.
عصام: صعبتي عليا، يومين كده وهبعتلك تليفون محترم.
رحمه: وحياه أمك؟
عصام: وحياه أمي.
رحمه: متحرمش منك يا أبيه، ربنا يكرمك ويسعدك ويبعد عنك أي حاجه وحشه.
عصام: خلاص، انتي هتشحتي؟
رحمه: أنا غلطانه عشان بدعيلك؟
عصام: طاب عشان الدعوتين الحلوين دول هحطلك فيه خط وأشحنهولك نت ورصيد.
رحمه: بقولك ايه، عم خليل هيشتري رواتر.
عصام: تمام، خلاص خليه يعمل باقه كبيره وشحن الباقه عليا.
رحمه: والنعمه انته قمر وسكر وعسل.
عصام: كتر خيرك يا ستي، أنا هقفل عشان عندي شغل، سلام.
لتنزل رحمه إلى شقتهم.
رحمه: علقة تفوت ولا حد يموت.
أمينه: انتي جيتي يا مخفيه؟
رحمه: لاء، لسه مجيتش.
أمينه: طاب خدي مفتاح الشقه وروقيها.
رحمه: وانا مالي؟ هو كل حاجه أنا؟
أمينه: انتي مش خدتي الخمسين جنيه؟ يبقا تعملي بيهم.
رحمه: بجد يعني مش هتعمليلي حاجه؟
أمينه: لاء، مش هعملك.
رحمه: هتسحرينا ايه؟
أمينه: الموجود.
رحمه: ايوه يعني ايه هو الموجود؟
أمينه: في عدس باقي وانا دمست فول.
رحمه: اه، وايه تاني؟
أمينه: ما كده فضل ونعمه.
رحمه: اما احنا هنصبح صايمين تحرقي قلبنا بالعدس بتاعك؟
أمينه: فاض طبق ايه؟ ارميه يعني ولا ايه يا بنتي؟ لمي النعمه تلمك.
وهنا يدخل عليهم صابر.
رحمه: ابويا حبيبي، ايه الكياس ديه؟ فيها ايه؟
صابر: سحور يا بنتي، بيض وزبادي وجبنه براميلي عشان عارف انك بتحبيها، ولانشو عشان اختك رانيا.
أمينه: ايه يا راجل ده؟ انته كده هتخرب بيتنا، ما احنا عندنا سحور.
رحمه: سحور ايه؟ العدس بتاعك ده يبقا سحور؟
أمينه: ماله؟ زي الفل، الناس مش لاقياه، افضلي انتي اتبتري كده لغيت ما يزول من وشك.
رحمه: إن كان على العدس بتاعك يزول يا ستي، مش عاوزاه.
أما ذكيه فكانت تجلس لتشاهد التلفاز.
ذكيه: الله، الفيلم ده حلو اوي وبيضحك، اما اولع السبرتايه واعمل فنجان قهوه ظبط واتفرج بمذاج.
لتخرج عليها أختها عزه.
ذكيه: صحيتي يا اختي؟ تعالي اشربي معايا قهوه.
عزه: هغسل وشي واجيلك.
ذكيه: خشي خديلك قوطه نضيفه من الدولاب.
عزه: امال العيال فين؟
ذكيه: بيلعبو مع عيال الحاره، متخافيش عليهم، ده الحاره النهارده كلها سهرانه، رمضان بكره، كل سنه وانتي طيبه.
عزه: وانتي طيبه يا حبيبتي.
عزه: فكرتي هنعمل اكل ايه لفطور بكره؟
ذكيه: انا سالقه كرنب ومخدعه يعني يا دوبك على الحشو، حتى البطه سلقتها.
عزه: طاب قوليلي بقا ناويه تختمي المصحف كام مره إنشاءالله؟
ذكيه: يا اختي هو في وقت؟
عزه: ليه إنشاءالله مافيش وقت؟
ذكيه: اول عشر ايام بيبقو كلهم طبيخ، وتاني عشر ايام بنعمل الكحك والبسكويت، والعشره الاخرانين بنروق الشقق.
عزه: ايه الهبل ده؟ رمضان يا ذكيه، أوله رحمه واوسطه مغفره وآخره عتق من النار.
ذكيه: ايوه ما انا عارفه، بس انتي عارفه انهم هيذيعو جوالي ٣٠ تمثليه.
عزه: بقولك ايه، احنا عاوزين نصوم ونصلي ونقرا قرءان.
ذكيه: بقولك ايه بقا، ده عامله جدول عشان اعرف اتفرج براحتي.
عزه: اتفرجي، بس بردك اعملي لاءخرتك.
ذكيه: انتي اتدروشتي يا اختي ولا ايه؟
عزه: انا هقولك، جوزي كان بيكلمني وبيتخانق معايا، خلاني اتنكدت وقعدت اعيط وصعبت عليا نفسي، قومت اتوضيت وصليت، وبعد كده قولت اقعد على النت شويه، واول ما فتحت لقيت قدامي فضل صلاه قيام الليل، ومن وقتها وانا الحمدلله بصلي صلاه القيام وبصلي الفجر حاضر، ومن وقتها جوزي ربنا هاديه عليا ومبقاش يرفضلي طلب، غير اني الحمدلله بناتي من الاوائل، وكل حاجه بقت زي الفل.
ذكيه: خلاص، انا هعمل زيك عشان ربنا يصلحلي حالي وحال الواد ذكي.
عزه: طاب ايه رأيك نعمل مسابقه انا وانتي، ونشوف كل واحده فينا هتختم المصحف كام مره؟
ذكيه: موافقه، ولو انا ختمته اكتر منك تجيبلي هديه.
عزه: هجيبلك سلسله دهب.
ذكيه: بجد؟
عزه: اه والله.
أما بخيته فكانت قد ذهبت إلى منزل نجاه.
بخيته: انا جيت اهو، خير يا رب.
نجاه: طاب اقعدي ثواني وجايه.
بخيته: حاضر.
وبعد عشر دقائق تخرج عليها نجاه.
نجاه: خدي الشنطه ديه، وخدي الفلوس ديه كمان.
بخيته: ايه ده؟
نجاه: ديه يا ستي شنطه فيها فراخ ومكرونه ورز وزيت وشويت حاجات تانيه، ودول ٣٠٠ جنيه.
بخيته: بس كده كتير اوي.
نجاه: مش كتير، وبعدين انتي اشتغلتي بيهم يعني مش صدقه، ده حقك.
لتبكي بخيته.
بخيته: الهي يسترك، الهي يكرمك، ده انا كت شايله هم السحور.
نجاه: الشكر لله، بس متنسيش بكره الصبح، بصي خدي المفتاح، تيجي الساعه ٩ زي ما اتفقنا.
بخيته: طاب، وسي فاروق؟
نجاه: فاروق بينزل الساعه ٨ عشان يفتح الورشه بدري عشان بيقعد بعد الفطار.
بخيته: ربنا يوسع عليكم.
نجاه: روحي بقا فرحي جوزك وعيالك.
بخيته: حاضر، ربنا يسترك، ربنا يسترك.
وفي شقه العم خليل كانت شكريه ام عصام تطرق الباب عليه
خليل: طيب يا رحمه جاي
ليفتح الباب ليجد ام عصام أمامه
خليل: معلش كت فاكرك رحمه
شكريه: عامل ايه
خليل: الحمدلله
شكريه: ابو عصام بيقولك اطلع بكره عشان تفطر معانا
خليل: مافيش داعي هفطر هنا
ام عصام: ماليش دعوه انته عايز الراجل ينكد عليا
خليل: لاء خلاص حاضر ربنا يوسع عليكم
شكريه: عايز حاجه اجيبهالك
خليل: كتر خيرك عندي كل حاجه
شكريه: عندك الخير كله
لنذهب الي شقه الخاله بمبه فقد كانت تجلس مع زوجها وحماتها
بمبه: يا اخويا مش عارفه الحاره مالها مبقاش فيها اخبار ليه
زوجها ابوالوفا: ياوليه بطلي العاده المنيله اللي فيكي ديه متسيبي الناس ف حالها
حماتها سكينه: ما انته عارف مراتك لازم تقعد على الخبر
ابوالوفا: هو الفقر جانا من قليل
بمبه: ليه يا اخويا انا مالي
ابوالوفا: انتي يا وليه ايه دخلك مع رحمه بت الاسطي صابر والعيال
بمبه: وانا مالي حد قالها تاكل بفلوس الزينه بت طفسه
سكينه: خد يا ابني اناقبضت المعاش خد هات الخزين
ابوالوفا: مستوره يا اما
بمبه: متقوم يا اخويا افتح الدكان عشان تحلق لعيال الحاره بدل مشعرهم منكوش كده
ابوالوفا: يعني احلقلهم بالعافيه يا وليه انتي عارفه ان الموسم بتاعي ف العيد
بمبه: يعني نجوع لغيت العيد
سكينه: وانتي أمته جوعتي
بمبه: عايزه اشتري قمرالدين
ابوفا: عبده هيشيع الصبي بتاعه انا اشتريت منه كل حاجه
بمبه: شكك انته عايز الناس تمسك سيرتنا
ابو الوفا: وانا من أمته بجيب حاجه شكك
بمبه: امال جيبت الفلوس منين
ابوالوفا: ربك بيرزق انا طالع اقعد علي القهوه شويه ده انتي أعوذ بالله منك وليه سو
اما المعلم حسن كان قد ذهب إلي شقه زوجته التانيه فهيا تقطن ف الدور الثالث في نفس المنزل الذي تقطن به ضرتها
حسن: ايه يا سمرتي
سمره: تعالي يا معلم حسن
حسن: الله ايه الريحه الحلوه ديه
سمره: اصلي مسحت وبخرت
حسن: تسلمي يا غاليه هو انا حبيتك الا عشان نضافتك
حسن: امال فين بيبو قلب ابوها
سمره: سيبها ف حالها
حسن: ليه مالها
سمره: زعلانه منك عشان مجيبتلهاش فانوس رمضان
حسن: وهو انا اقدر
سمره: يعني جيبت
حسن: خشي اند هيها
سمره: طيب
لتدخل سمره غرفه ابنتها
سمره: قومي يا بيبو كلمي ابوكي جابلك فانوس
بهيه: بجد ابويا حبيبي
لتخرج بهيه جري من غرفتها
حسن: بنوتي حبيبتي ايه رءيك ف الفانوس الجميل ده
بهيه: الله ده احلي من اللي مع العيال ف الحاره
حسن: وانتي كمان ياسمره فانوسك اهو
سمره: تعيش وتجيب
حسن: انا هخش اريح وابقي صحيني علي السحور
سمره: مقولتش هتفطر فين بكره هنا ولا تحت
حسن: هنفطر كلنا تحت
سمره: ازاي يعني انته عايز مراتك تسمني
حسن: عيب عليكي جوزك مسيطر برده وكمان عشان بيبو تفطر اول يوم مع اخواتها
سمره: خلاص حاضر كله يهون عشان عيونك يا سونه يا سنسن جيتلك اهو
حسن: الله يحظك
سمره: طاب يعني انزل اعمل الاكل مع فتنه ولا ايه
حسن: لاء يا أبا انتي تقعدي هانم مستته وقبل المغرب بحاجة بسيطه نبقا ننزل نفطر وبعد كده نبقا نطلع نريح
لتضحك سمره
سمره: يخليك ليا يا قلبي من جوه
حسن: طاي عشان الكلمتين الحلوين دول خدي جوز الاساور دول
سمره: ليا انا يا حلاوتك يا ابو علي ده انا بموت فيك
حسن: مش اكتر مني يا غاليه اخش انا بقي ارتاح شويه
ليتركها حسن ويدخل غرفه النوم اما سمره فها هيا تضع الاساور في يديها
سمره: الله كده بقا ٨غوايش واسورتين
بهيه: وانا كمان بابا جايبلي دهب كتير زيك يا ماما
سمره: ما احنا هنلبس دهبنا كله عشان نغيظ مرات ابوكي
بهيه: ديه مش بعيد يجيلها جلطه
سمره: ياريت يا بيبو
اما المعلم شاهين قد ذهب الي منزله فهو يمتلك منزلا مكون من ثلاث طوابق ومتزوج ثلاث سيدات وكل سيده منهم انجبتله ٧اطفال
يدخل اول شقه ليجد أولاده يعلقون الزينه
شاهين: أمكم فين
حسين: امي طلعت عند خالتي امل
شاهين: ليه
لتجاوبه ابنته ايه
ايه: اصلهم عاملين اجتماع
شاهين: هات العواقب سليمه يارب اما اطلع اشوفهم
ليصعد الي شقه زوجته التانيه
شاهين: ايه مالكم متجمعين كده ليه
امل: مافيش يا معلم اصلنا كنا بنشوف هنعمل ايه اكل طول شهر رمضان
شاهين: طيب ربنا يهديكم امال مرضيه فين
امل: كانت قاعده معانا ولسه طالعه
شاهين: طيب اكنسو بقا السطح ووضبوه عشان الفطور عشان مافيش ولا شقه تساعنا كلنا
أمل: ده احنا كنسناه ورقناه وخليناه فل ومرضيه كانت موصيه الاسطي صابر يعملنا ترابيزه كبيره اوي علي ادنا كلنا وكراسي كمان وعملها وبعتنا جيبناها
شاهين: والله عفارم عليكم ايه هتاءكلونا ايه بكره
امل: انته تحب تفطر ايه
شاهين: كل اللي هتعملوه هيبقا حلو
لتنزل مرضيه
مرضيه: الله انته جيت يا معلم
شاهين: اه يا أبا جيت
مرضيه: حمدالله على سلامتك
شاهين: تسلمي
امل: المعلم كان بيساءل هنفطر ايه بكره اول يوم
مرضيه: عندنا بط وعندنا رومي ونعمل عليهم محشي مشكل