رواية حظي الفصل الثاني عشر 12 بقلم سلوى اسماعيل

رواية حظي الفصل الثاني عشر 12 بقلم سلوى اسماعيل

قررت اعترف لعامر ..

قدر مافكرت في طريقه اعترف ليه بيها ماقدرت الاقي واصلا راسي زاتو مافيه افكار واخواتي افورو لي الموضوع جيبي شموع وعشاء رومانسي وبالونات قلت ليهم هيي انتو جنيتو انا عاقده ساي لسه م بقينا على الكلام ده ..

شبكوني حلالك ولازم تتعودي ولازم تتجرئي قلت ليهم لالا شكرا م عايزه خلوها تجي كده من غير افكار ومهاد يحليلا م مقصره سمح اعزميهو عشاء في مطعم طيب جيبي ليه هديه لقيت انه فكرة اني اجيب ليه هديه ظريفه ..

فكرت في الكلام ده المساء لكن بقيت في الطريقه البشيل بيها مقاس اصبعه جانا المساء لانه بجيب لينا حاجاتنا الناقصه قبل يمشي سلمت عليه وعندي طرحه فيها خيوط قطعت واحد وبدون كلام ولا اي شي مسكت يدو قست الخيط على الاصبع ولفيت مشيت خليتو يضحك ..

سقت مهاد بعد المحاضرات ومشيت جبت دبلة فضه نقشت فيها تاريخ اليوم ده زاتو عشان يبقى في الزاكره وجيت البيت مهاد ماخلت طبعا بالونات وكيك وامور فارغه 

قلت ليها والله ولا واحد من ديل م تبشتنيني وانا اصلا مالي في الجو ده 

انتظرت المساء سرحت شعري تسريحه حلوة وفكيت باقيه لبست فستان شفون اسود والطرحه مالبستها ختيتا ف راسي ساي عملت ميكب خفيف وبقيت قاعده في الجلوس بره ومنتظراه ومهاد مصره ختت الكيك وكان عليه  تاريخ اليوم ومكتوب عليه هل تقبل ان نشيخ معا ..

مهاد قالت عازما مهيد تتعشى بره وانا عرفتها بتكون اتفقت معاه انهم يطلعو ويخلوني براي انتظرت عامر جا وشكله كان نعسان لقاني قاعده دخل الحاجات المطبخ وجا علي وانا كنت بشجع في روحي يابت اتكلمي ساي م هي كلمه وحده بتسوي ليك شنو شنو الجرسه دي ..

لما وصلني وقعد جمبي مشيت جبت ليه مويه بقى بيعاين لي 

عامر : شنو الحلاوة دي ومابتبقي حلوة الا وانا نعسان 

قلت ليه ساهرت وله شنو 

عامر : م نمت بدري 

اتلفت علي وبعاين في عيوني  انتي الليله حلوة وغريبه ؟!

فيك حاجه مافاهما 

قلت ليه حاجه حلوة وله ماحلوة !!

عامر : اي حاجه فيك حلوة بس حاجه كده طيرت النعسه بتخليني وقبل يكمل قلت ليه عامر بحبك 

سكت زي كم ثانيه وهو مبتسم وبعاين لي قلت ليه بحبك شديد وآخر حاجه كنت ممكن افكر فيها اني احب بحبك وبس 

عامر بعاين لي وهو مبتسم وماقال ولا كلمه 

طلعت الدبله ولبستها ليه ورفعت ليه قالب الكيك عشان يقرا الكلام الفيه كانت ابتسامه بقت ضحكه شال مني قالب الكيك ختاه على التربيزه وطلع من جيبه دبله ومحبس 

قال لي ديل انا جبتهم ليهم اكتر من شهر وكنت عايز البسك ليهم بس قلت انتظر يوم مميز ومافي احلى من اليوم ده 

يوم انتظرته كتييييير وم اتوقعته يجي من عنادك 

حضني عليه وبقى يقول لي انا واخد عهد على نفسي مالم تحبيني وتوافقي علي برضاك م ح اكمل زوجنا ..

بس بما انك وافقتي ح نكمل بعد كده وكده كده انا مصبر نفسي لكن كفاك ..

قطعنا الكيك ورسلت لمهاد تجي م طولو جو واكتشفت انهم كانو قاعدين في شقة عامر لا طلعو ولا شي ..

 ومن يوما وانا وعامر عشنا احلى قصة حب 

ااي نعم حبيته بس عندي خط صغيروني كده خاتاه بيني وبين اي علاقه بحساب انو لو لا قدر الله حصل شي افترقنا انا م اقع اتأثر نعم بس م انهار ..

كان باقي للسنه التالته اقل من شهر وتخلص 

خلصنا الشهر ده وحددنا عرسنا بقيتا ح نعمله وين قررنا نعمله في السعوديه بس عماتي لازم يحضرو انا طول عمري ده هم بس العاشو معاي المر لازم يعيشو معاي فرحتي ..

جبتهم الخرطوم فترة حبسي الشهر الاول وطلعت ليهم جوازات وامي رسلت لينا كلنا انا ومهاد ومهيد وعماتي 

حجزنا الصاله ويوم الزفاف ده كان يوم براه

جو عمات عامر وبناتم وكالعاده مستحيل يمرو مرور الكرام 

قالو لمهاد سبحان الله قلنا لعامر زوقك من يومه مختلف والعروس شبهك ..

 مهاد قالت ليهم صدقتو لانه فعلا جود بتشبه عامر 

قالو ليها كان عايز اختهم بس م ادته وش طوالي مشى خطب .. وللآن بيتصل ليها ..

مهاد قالت ليهم انتو شكلكم ماعارفين انو عامر معانا قريب سنه ونص وتلفونو مع جود يعني مافاضي ليكم ولا لاختكم

جو اشتكو مهاد لعماتي وقالو ليهم بنتكم قليلة ادب نبزتنا ..

اجي يانبزتنا ..

وصلتا الصاله وكالعاده بيسمعوني تعليقاتم في اضاني وانا ولا همي زول وكل م القى فرصه اغيظم بقربي من عامر م بقصر ..

انتهى يوم الزفه وتاني يوم سافرنا انا وعامر وعملنا احلى شهر عسل وباقي لاجازتنا اقل من شهر قلنا نجي السودان بعد كده ..

قبل نمشي عمتو عزمتنا ف بيتا قلنا خلاص نمشي ليها وبعد اسبوع نرجع السودان وعماتي ومهاد ومهيد رجعو ..

وفي اليوم الكنا ماشين ليهم فيه ...

            الفصل الثالث عشر والاخير من هنا

لقراءه باقي الفصول من هنا