دكتور سمؤال قال ليه يامي انتي مؤمنة ومؤمنة بقضاء الله والقدر وكلنا بنموت مافي زول بهرب من الموت وكلنا مكتوب لينا بنموت بتين وكيف ووين استغفري ياامي واتصبري ولدك شهيد وانتي ام الشهد ادعي ليو ولدك محتاج ليك ومحتاج لي دعواتك كان لابس سبحه في رقبتو طلعها ومدها لي امي وقال ليه امسكي فيه قوي ربنا يصبرك ويربط على قلبك ياامي سلم عليه في راسه وطلع امي شالت اليوم كلو بكا والنسوان يصبرو فيهه
تلاته سنوات كانت كاتمة الوجع والالم تلاته سنوات وهي عايشه زي الميته محمد اخوي طيب مابستاهل بس نقول شنو غير ان الله وانا اليه راجعون ربنا يصبرنا على فراقو ويغفر ليو ويتقبلو مع الشهداء
امي من البكا حسها راح وبقت دموعها اهي النازله حرفيآ قلبي اتقطع حسبي الله في الحرب
العشا اذن قمت جبت ليه الابريق اتوضت وصلت جبت ليه بندول وعصير بعد تحانيسي حتى بلعت شربت اقعدت اصبر فيه طلعت السرير ختت رأسه في المخده ورفعت السبحه تسبح
انا شربت حمودي اللبن وصليت نمت جنبو سمعتها تنادي ذوبه قمت مشيت عليه قالت لي جيبي محمد ينوم جنبي
شلت محمد حولتو جنبها قالت لي يشبه محمد اخوك شديد حتى طفولتو زي محمد قامت جابت زيت سمسم ومسحتو وحضنتو عليه ونامت
رجعت نمت صحيت الصباح ولقيتها تصلي قمت صليت وولعت الكانو ختيت الشاي جات وحده من المشرفات وشايله ظرف وكرتونه فيه حاجات قالت لينا ديل مفترض نديهم ليكم امس قالت لي ديل الحاجات الجابها دكتور سمؤال شلتهم منها
قعدت تشرب معنا الشاي جات ساره داخله وقعدت تشرب في الشاي معانا امي كانت ساكته وسرحانه وانا سرحانه فيه اي زول في دنيا بعد ماخلصت وغسلت العده
لبست عبايه وطرحه وطلعت الفندق
دخلت شلت أدوات التنظيف وانا انظف سمعت صوت دكتور سمؤال وهو بقول صباح الخير التفت عليو كان لابس تيشيرت اسود وبنطلون جينز رديت ليو صباح النور قال لي اها خالتي اصبحت كيف قلت ليو الحمد لله بخير قرب مني وقال لي وانتي قاله بطريقه حنينه رديت لي وانا بتمتم ببببخير بخير الحمد لله والتفت انظف سامعه صوت خطواتو التفت لقيتو طلع
خلصت وانا راجعه سامعه صوت كواريك وصرخي من المخيم جريت جري ودخلت قلت خلاص حصل حاجه لي امي وحمودي وكل ما أقرب من الجبلون الصوت بزيد وخوفي بزيد اكتر دخلت وقلبي في يدي شايفه وأحد جاريه ومعها كم وحده وهي تكورك غرقو كيف غرقو وااااي يالله وااايي الليله اوب اوب علي ومعها نسوان يكورك والناس جاريه معهم جات ساره تبكي قلت ليه الحصل شنو قالت لي بنات المره دي ومعهم ولد خالتهم مشو البحر يغسلو الملابس اظن وحده اتزلقت ووقعت والاتنين حاولو يطلعوها غرقو معها قلت ليه لا حولا ولاقوة الابالله أعمارهم كم قالت لي البنتين ١٦ و١٧ والولد ١٣ قالت لي ارح البحر نشوفهم انشاء الله يكونو عايشين طلعنا البحر كان قريب من المخيم وصلنا صوت البكا والكوراك الام قاعده في الأرض وتكشح في التراب في رأسها ومعها كم مره البهدي فيه والبكي معها
وقفت اعاين وانا دموعي عشره عشره وادعي انشاء الله يكونو عايشين
الرجال نزلو البحر يفتشو فيهم
شايفه دكتور سمؤال نزل معهم البحر
طلعو وحده وقالو فيه شوية نفس جرو بيها المستشفى وتاني بعد كم ساعة طلعو وحده المكان غريق هو اصلا ماكان بحر قالو كان زمان بيوت وحصل انهيار في سد
المنطقه دي كلها غرقت والمكان دا قالو كان فيو حمامات وابيار غريقه شديد
البنت التانيه طلعوها ميت والولد بعد كم ساعه حتى طلعو
البنت الودوها المستشفى قالو ماتت قبل تصل الام تبكي بكا والعجب الاهل شالو الجثث وهي جاريه وراهم وتكورك
رجعنا المخيم اليوم دا لي الصباح مانمنا صوت بكا الام يقطع قلبك من جوه دموعنا دي كملت من صوت كوراكها كل صرخه منها تقطع القلب
الايام بتمشي الام جو ناس المنظمات وعوضوها وقفو معها وسافرت مصر
وانا قاعده ماسكة الظرف حق دكتور سمؤال القروش الفي الظرف كانت كويس يعني لو رجعت الجزيره ممكن اعمل بيها مشروع بسيط وارجع اكمل الدراسه
وانا قاعده مع امي وحمودي وسرحانه في الرجوع
سمعنا صوت سلام عدلت توبي وطلعت كان دكتور سمؤال بعد ما سلم قال لي بكرا اجهزو نمشي دنقلا عشان تشوفو قبر محمد الله يرحمو امي من قال ليه كده بكت بكا وقامت سريع قالت ليو عرفت مكان قبرو قال لي اي يلا بكرا نتحرك على دنقلا امي شكرتو واتحركت على السرير رفعت سبحته وتبكي وتقول اهاااا يامحمد اهااا ياحشاي ربنا يصبرني على فراقك يامحمد
بعد شكرت دكتور سمؤال اتحركت قعدت جنب امي جات ساره داخله لقتنا نبكي قعدت جبي وتواسي فينا
صحينا الصباح ولبسنا وطلعنا مع دكتور سمؤال وصلنا دنقلا بعد كم ساعة واتحركنا طوالي على المقابر وقفنا جنب قبر محمد كل خطوة بنخطيها لي المقابر كنت بتذكرو وبتذكر ونستو وكلامو وهظارو محمد كان حنين شديد بحب الونسه والضحك فعلا الدنيا مابشيل الا الطيب محمد كان لي الاب والأخ والصديق من قمت لقيت ابوي متوفي وكان محمد اخوي ابوي واخوي وسندي من مات حاسه انو انا مكسوره شديد
لما وقفنا جنب القبر امي انهارت شديد وقعت جنبو تبكي وتتدعي
وتقول مشيتي وين يا نور عيوني محتاجه ليك أنا شديد وفاقداك مسختي علينا الدنيا
يا محمد عليك الله تعالي راجع قول انك بتهظر معانا كعادتك أو انك مسافر بعادك طال أنا مشتاقه ليك مشتاقه لي صوتك وضحكتك مشتاقه لي حنانك وطيبتك وبشاشتك ليه الوجع ده كلو وراك نحنا نعمل شنو ونتعود كيف علي غيابك ما قادرين نصبر ولا عارفين البصبرنا شنو يا محمد وتبكي
وانا نهاي مامصدقه انو محمد تحت التراب وانو محمد خلاص مات وتاني مابنشوفو شايفه حلم حلم اسمو الكان مكتوب على القبر اااااخ بس من الوجع اااخ بس من الموت لما يشيل ليك عزيز ياريت لو مت انا قلب مايموت هو
حلقي اتقفل من البكا والعبره والعجب امي قعدت جنبو
دكتور سمؤال قال لي تعالي خليها معاو اتحركت ووقفنا بعيد نعاين في امي
شالت ليه تراب من قبرو وربطو في توبه وقامت اتحركت علينا
دكتور سمؤال قال لي مافي طريقة نرجع الليله
ننوم هنا والصباح نتحرك كان شايل حمودي حمودي اتعلق بيو شديد وصلنا لينا فندق اجر لينا غرفة دخلت امي وانا عايزه اشيل حمودي من دكتور سمؤال رفض ينزل بعد تحنيس حتى نزل شلتو وشكرت واتحركت دخلت اتوضيت وصليت وقعدت ادعي لي محمد امي صلت وقعدت في المصلاية دموعها كانت جاريه شديد باب الغرفة ضرب فتحتو كان دكتور سمؤال شايل ليو كيس مد لي رفضت اشيلو حلف شلتو منو وشكرتو سالني من امي ومن حمودي وحمودي جا جاري عليو دكتور سمؤال قعد ليو في الأرض وشالو قال لي خلي معاي بنوم وبجيبو ليك قلت ليو تمام شالو وفات حمودي يحكي ليو في حاجات وهو يضحك قعدت اراقب فيهم وبعدها دخلت
الكيس كان فيو اكل امي رفضت وانا ماقادره اكل من التعب والوجع وامي كبيت ليه لبن وحنستها حتى شربت شوية
نمت في السرير اتذكر في محمد وأبكي ماحسيت بي نفسي الا باب الغرفة البضرب صحيت مخلوعة بعد مسافه حتى استوعبت انا وين واتذكرت حمودي كان مع دكتور سمؤال قمت عدلت طرحتي وفتحت الباب كان دكتور سمؤال معاو حمودي كان نايم شلتو منو قال لي تصبحي على خير رديت ليو واتحركت نومت حمودي ونمت عاينت لي امي النايمه ودموعها في وشها سرحت فيه وتاني ماحسيت بي نفسي الا الصباح صحيت صليت امي كانت قاعده في المصلايه تسبح جا دكتور سمؤال بعد صبح قال لينا يلا طلعنا حمودي جر ليو دكتور سمؤال شالو طلعنا دخلنا مطعم وطلب اكل وبعدو شاي اتحركنا حلفا وصلنا نزلنا وشكرنا اتحرك
ونحنا دخلنا المخيم امي بعد شافت قبر محمد شبه اتصبرت شوية جو النسوان سلمو علينا وقعدو يتكلمو مع امي انا قمت صليت الضهر اليوم انتها
صحيت الصباح بعد صليت امي قالت لي ذوبه انا عايزه اعمل كرامه لي محمد كانت لابسه خاتم جايبو ليها هديه طلعتو وقالت لي بيعي وجيب دقيق وزيت وسكر قلت لي خلي الخاتم ماتبيعو وبعدين عندنا نحنا قالت لي لا انا عايزه تكون من قروش محمد من قروش شغلو وتعبو دموعها نزلو
شلت منها الخاتم لبست عبايه وطرحه وطلعت مشيت الفندق وانا داخله لقيت دكتور سمؤال سلم علي وقال لي زينب انا اتكلمت في موضوع محمد الله يرحمو مع ضابط عايز أسقط كل التهم الكانت عليو قلت ليو والله ياريت نفسي امي ترتاح ومحمد يكون في قبرو مرتاح قال لي ماتشيلي هم انشاء الله بتظهر برائتو
شكرتو وقلت ليو مهما عملنا مابنقدر نجازيك يادكتور يديك العافية يارب وفي ميزان حسناتك قال تسلمي يارب انا بتمنا تكوني بخير وخالتي وحمودي وربنا يحفظكم ويحميكم ويردكم لي بلدكم سالمين و اتحرك
وكملت شغلي وطلعت السوق جبت الحاجات رجعت
امي شالت مني الحاجات وطلعت برا جابت ليه كم حله من التكيه قعدت معها عملنا بليله وزلابيه امي اول حاجه نادت اطفال المخيم كلهم وختت ليهم وبعد داك وزعنا انا وساره بعد كم اسبوع دكتور سمؤال قدر يثبت انو محمد اخوي الله يرحمو ماكان مع الدعم ولا عندو علاقه وتشابه اسامي فقط امي دي انهارت وصرخت كوركت لما مشينا بيها المستشفى يومين وهي بين الحياه والموت عايشه على الدربات بعد كم يوم طلعونا من المستشفى رجعنا المخيم قلت ليه بعد دا نر جع الجزيره احسن نرجع لي بيتنا ماكان عندها اعتراض جا دكتور سمؤال و جايب ليو قروش قال لي امي دا تعويض عشان روح محمد امي بكت بكا وقالت ليو خليهم يشيلو قروشهم ويرجعو لي محمد ومستحيل انا أقبل قروش في روح ولدي ولو جابو مال الدنيا كلو مابعوضني عن ولدي شيل القروش ورجعه مدها لي انا بكيت بكا محمد اخوي كان شاب وفي عز شبابو عايزين يعوضو بي الورق قلت ليو نهاي مابنشيل في روح محمد قروش
دكتور سمؤال طلع امي حضنتي وقعدت تبكي قالت لي عايزين يشترو روح محمد بي القروش انا محمد ولدي كنت خايفه عليو من الدعم وماصدقت طلع حسبي الله ونعم الوكيل في الحرب الله يرحمو ويربط على قلبي ويصبرني انا الله وانا اليه راجعون
الايام بتمشي وامي اتحسنت واتصبرت الحمد لله
وانا قاعده معها بقت تتكلم معاي بس شويه ماكتير ماصدقت اتحسنت جات ساره قالت لي زوبة قلت ليه اه قالت لي نحنا مسافرين مصر مسكتني من يدي وقالت لي تعالي طلعت معها وصلت غرفتهم لقيتهم عاملين قهوة قالت لي عاملين قعدت الوداع زعلت شديد ساره كانت لي اخت وصديقه حفقده شديد وانا سرحانه حضنتي عليه وهمست لي يازوله بينا التلفون والله من التلفون اطلع ليك واكرهك العيش ضحكت وضحكت معاي فكتني و
قعدت معهم اخواته كانو يرسمو وامها تصبغ في شعره مشغلين الموسيقى مؤيد يرقص مع علي ساره مدت لي فنجان القهوة وقالت لي اخر قهوة هنا ومعاك ياذوبة ياريت لو تمشو معانا مصر تاجرو هناك وبتلاقي ليك شغل قلت ليه ياريت لكن احسن ارجع بي امي الجزيره هناك خالتي وأهلي موجودين وكلهم رجعو امي هناك بيتحسن وانا واثقه انو خالتي بصبروها
قعدنا نتونس ونتذكر ايام المخيم مؤيد رفع التلفون يصور
وقف التلفون في وشي قال لي ذوبة انتي متأكده سودانية عيونك دي ماعيون سودانيات ضحكت قلت ليو لا خواجيه ضحك قال لي من شفتك وانا قلت كده
كنت رابط عليك بس انتي ماعبرتيني امو قالت ليو اجي يامؤيد قاعد تشاغل في البنت ونحنا قاعدين
ضحكو كلهم جا حمودي مؤيد شالو ومد التلفون لي قال لي صورينا كم صوره تكون ذكره صورتو وهو يضحك مع حمودي ساره أهلها دمهم خفيف شديد ناس بحبو الهزل والهظار ماعندهم لي الدنيا حاجه
بعد شربنا القهوة رتبت معها ملابسهم كنت ارتب وأبكي لانو حرفيا حفقدهم ساره كل شوية تحضني وتبكي همست لي خليت ليك فارس أحلامي وحذفت الياء منو ضيفيها انتي وضحكت ضحكت معها قلت ليو انا عندي فارس أحلامي حمودي ولدي الله يقدرني واربي قالت لي امين وانا زاتي فارس أحلامي من اسه انا حجزتو مشت عليو قعدت تبوس فيو وهو يمسح في مكان بوسته وهي تضحك عليو
رتبت معهم وطلعت وانا طالعة طقشت في زول رفعت راسي كان مؤيد وهو ماسك راسو قال لي كسرتي راسي ياخي وانا بضحك معاو جا دكتور سمؤال ومعاو المشرفين عاين فيني مسافه وصره وشو واتحرك انا اتحرجت واتحركت دخلت لي امي لقيتها مولعه الكانون وتعمل في الأكل قعدت جنبها جابت زيت وقعدت تمسح لي في شعري قالت لي اعفي لي يازوبة قصرت معاك شديد انتي كمان واجعاني زي محمد اترملتي وانتي لسه صغيره وماشفتي لي الدنيا حاجه ربنا يجبر بخاطرك يابتي ويعوضك السند وهي بتمسح لي في شعري قالت لي انا حلمت بي محمد اخوك كان مبتسم هي بتحكي وبتبكي قالت لي ذوبه لو مت هنا عليك الله خليني اندفن جنب اخوك
قلت ليه ماتقولي كده ياامي انشاء الله بعد عمر طويل جا داخل حمودي وكان جاري ويكورك ماما ماما جابو الصوان في حفله ارح لبسيني بنطلون وكان منفعل شديد قمت نحنا فاتحين في الجبلون شباك عاينت بيو ولقيت فعلا يركبو في صوان قلت ليو لما تبدأ الحفله تعال البسك جراني من توبي وقال لي ارح نشوف قلت ليو امشي انت ولما يخلصو تعال البسك جر
جات ساره داخله قلت ليه في شنو برا قالت لي ديل فرقة موسيقيه جو يعملو حفلة هنا ويصوروها
قالت لي جاي عبايتك الاناناسيه خليني اقشر بيه برا في مززز عجيبه ضحكت عليه طلعت ليه العباية شالته وفاتت سمعت صوت الموسيقة جا جاري حمودي قال لي الشفع كلهم لبسو قلت ليو اسه بتلبس انت كمان طلعت ليو ملابس لبس وجر جات ساره لابسه العباية قالت لي أراح نعاين قلت ليه ارح كنت لابسه توب غطيت وشي وطلعت ساره طلعت ودخلت الصوان وانا وقفت جنب باب الجبلون اعاين الصوان جنب الباب كان. في فرقة موسيقيه شباب
اظن شباب جامعات ومرتاحين ظاهر فيهم
نسوان المخيم والبنات والأطفال لابسين ومظبطين وقاعدين في الصوان
وانا واقفه اعاين لفت نظري في ولد حلبي شعرو مفلفل لابس قميص مربعات كحلي وبنطلون كحلي واسبورت ابيض عمرو بكون في العشرينات كان يعين فيني انا رجعت لي ورا ودخلت جوه الجبلون نظراتو وترتني
جات وقفت جنب وحده وقعدنا نتونس كل ما ارفع راسي بلاقي يعاين فيني كان معاو كم واحد وشايلين كاميرا يصورو شال الكاميرا ورفع علي
وقف جنبو دكتور سمؤال واتكلم معاو حول الكاميرا مني دكتور سمؤال عاين فيني مسافه وكان مركز فيني البنت الواقف جنبي قالت لي دكتور سمؤال مالو بعاين فيك كده قلت ليه ماعارفه
جا واحد من الشباب غناء حبيت زنوبه والناس دي هاجت شديدالعجب النسوان الولد لسه مركز معاي ودكتور سمؤال كل شوية يعاين فيو ويعاين فيني المغرب اذن وقفو الموسيقة لي الصلاه اتحركت مشيت صليت غيرت توبي وشلت لي جردل اجيب فيو مويه من الكلر وطلعت لقيت الموسيقة شغاله وانا طالعه جيت ماره بي الولد همس لي ممكن رقمك اتجاهلتو واتحركت سريع طلعت من المخيم حسيت بي خطوات وراي التفت لقيتو نفس الولد. قال لي ممكن ولسه مواصل وقفت وانا زهجان منو قلت ليو انا متزوجة وعندي ولد ممكن تبطل الفارغه البتقول فيه دي جاني دكتور سمؤال وهو بقول ابعد منها عشان ماحيحصل خير الولد التفت عليو وقال ليو اسفه اسفه واتحرك وقف جنبي دكتور سمؤال وشال مني الجردل وقال لي نتحرك اتحركت معاو كان بحكي لي عن حياتو وانا كنت بسمع فيو وصلنا الكلور خت الجردل وقعد جنبي في المسطبه وسألني اها حتعملي شنو قلت لي بالنسبه قال لي بترجعي ولا بتسافرو برا السودان قلت ليو راجعين انشاء الله في الأيام الجايه قال لي انشاء الله الجردل اتمل
عايزه اقوم على الجردل سبقني وشالو اتحركت معاو قربنا من المخيم شايفه
التنكر حق المويه واقف برا والناس واقفه صف وحمودي ولدي شايل ليو باقه ووقف مع الشفع من شافني جا جري لما وصلنا جر على دكتور سمؤال
دكتور سمؤال رفعو وحمودي قال ليو بابا لما قال كده انا انخلعت وانصدمت والتفت عليهم دكتور سمؤال رد ليو ياروح البابا قلت ليو ماعارفه حمودي سمعها من منو اسفه كنت بتكلم وبتمتم انحرجت شديد ابتسم وقال لي ماشايفاني ابو كويس ولا شنو ورفع حاجب قلت ليو لا لا ماكده قال لي حمودي دا من اول يوم شفتو حسيتو ولدي ولد حباب بدخل القلب سريع ربنا يحفظو
حمودي كان راكب في رقبتو ويجرجر في شعرو قلت ليو حمودي انزل عيب دكتور سمؤال ضحك وقال لي خليو ماعندك شغل بيو انا وحمودي أصحاب مش ياحمودي حمودي قال ليو ااااي ماعندك شغل بتينا
شلت الجردل من دكتور سمؤال وقلت لي حمودي يلا انزل دكتور سمؤال نزلو قال لي يلا تصبحو على خير رديت عليو واتحركنا حمودي جر ليو شايفه دكتور سمؤال قعد جنبو في الأرض حمودي حضنو وبوسو وجا جاري قلت ليو حمودي دا ماالبابا مسكتو من يدو قلت ليو حمودي البابا فات مكان احلا من دا قال لي كل الشفع عندهم ابوات الا انا انتي ليه خليتي يمشي
بس انا عايز خالو سمؤال يكون البابا غلبني ارد عليو دخلنا لقيت الحفلة انتهت ويفكو في الصيوان وانا داخله على الجبلون ساره قالت لي واااي انا من المزز قلت ليه اها شلت كم رقم ضحكت أشرت لي على الولد الكان بعاين فيني وقالت لي دا كسر لي ضلعه من ضلوعي امشي قولي ليو البنت دي معجبه بيك ضحكت عليها
هو كان بعاين فينا رفع يدو على شعرو وقعد يحرك يدو في شعرو وابتسم ساره قالت لي واااي ابتسامة ولا صباح العيد
قالت لي دقيقه امشي اجيب رقمو انا خلاص ادردقت فيو واتحركت انا اضحك عليه واتحركت دخلت الجبلون لقيت امي خاته الملاح في الكانون ختيت الموية وقعدت كملت الملاح ختينا الغدا وقعدنا نأكل ساره جات داخله وكانت صاره وزهجانه قالت لي جعانه كده زحو لي اكل غسلت يده وقعدت تاكل همست لي زولك مشيت ادردقو لي الرقم اتخيلي قال لي البنت المعاك اسمها منو وعايز رقمه وقعدت تضحك رفعت حواجبينها وقعدت تلعب بيهم وقالت لي عندك معجب عامل زي وجبة الإفطار في رمضان قلت ليه الله يجزي محنك قالت لي مليتو رقمي وقلت ليو دا رقمه شلبتو منك ضحكت قلت ليه حلال عليك خلصنا هي ختت الشاي بعد شربنا طلعت معها الحمام لقيت مؤيد واقف ليو مع كم بنت وشايل حلاوة في يدينو والبنات واقفات صف وشغال يقول ليهم ابيه ابيه والبنات يقولو اااي اااي ويقولو ليهم تاكلو عيش وطعمية وهم يقولو اااي يقول ليهم تتشاكلو فيها تتشاكلو فيها وهم يقولو ليو ااااي ااااي بصوت عاليه وقام جدع الحلاوة انا وساره جرينا جري وخطفن مع البنات ساره قعدت تضرب في مؤيد وتنبز فيو وتقول ليو توزع الحلاوة لي البنات ونا قاعده وهو جاري وهي وراو
شلت الابريق ودخلت الحمام كان اللمبه قفلت وانا بخاف من الضلام ومن حمامات المخيم طلعت جري لقيت ساره ومؤيد يضحكو اتحرقت منهم شديد رجعت دخلت ولما جيت اطلع اتسحبت طلعت براحه ودخلت بعدي وحده
وهم ماشافوني ساره كانت منتظراني دخلت جوه بعد كم دقيقه طلعت لقيتهم واقفين والمره طلعت ساره ومؤيد شغالين يقولو بسم الله وينه زوبه ضحكت عليهم ضحك قلت ليهم انا هنا التفتو علي قالو لي انتي مادخلتي الحمام دا قلت ليهم بري من قفلتو عليه اللمبه طلعت قعدو يتبسملو ساي دخلت الجبلون اضحك سامعه مؤيد شغال يقول لي ساره دي ام ركب اظن لقت جسمها وساره تتبسمل ضحكت ضحك صليت العشا وانجدعت نمت صحيت الصباح على صوت حركه طلعت لقيت ناس ساره طلعينا بوكس التهريب جا ليهم مشيت وقفت معهم لما طلعو حاجاتهم وطلعت معهم برا بكيت معهم بكا العجب ساره قالت لي اسه لو جيتو معانا يحليلكم بفقدكم والله مدت لي عباية وطرحه قالت لي خليه ذكره مني وبينا التلفون حضنتها وبكينا ودعت امها وأخواته مؤيد قال لي شينه شنه لما تبكي ضربتو قلت ليو مالك ومالي ثقيل خلاص قال لي بفقدك والله يلا خلي بالك من نفسك ومن خالتي وحمودي نستودعك الله يازوبة ركبو في البوكسي ساره نزلت وجات جاريه حضنتني وقعدنا نبكي قلت ليه بفقدك ياساره والله انتي نعم الأخت والصديقه سيد البوكسي طرب بوري قامت ركبت قلت ليهم استودعتكم الله انشاء الله توصلو بي السلامة وقلت لي ساره من تصلي رسلي لي وطمنني عليكم قالت لي انشاء الله والبوكسي اتحرك الشفع جرو وراو رفعت ليهم يدي رفعو يدينهم وانا واقفه ابكي وقف جنبي دكتور سمؤال قال لي الفراق صعب شديد التفت عليو مسحت دموعي قلت ليو اها ربنا يوصلهم بي السلامه قال لي يارب عايزه اتحرك قال لي زينب التفت عليو عاين فيني مسااااافه قال لي هو بتمتم في الكلام وو وينو حمودي قلت ليو بكون جر مع الشفع الجرو ورا البوكسي قبل ما اكمل كلامي جا حمودي جاري شاف دكتور سمؤال جر عليو وقفت اعاين فيهم جو الشفع قعد يلعب معهم ويصور فيهم انا سرحانه في ساره وأهلها وانو هم وقفو معاي في موت محمد اخوي الله يرحمو وموت ياسين وولادتي بي حمودي نهاي ماقصرو معاي رفعت العبايه والطرحه على وشي دموعي نزلو مسحتهم صحيت بصوت دكتور سمؤال هو بضحك مع الشفع عاينت فيهم واتحركت دخلت وانا داخله على الجبلون حاسه بي فراغ ووحده
كان لما تجي داخل الجبلون بتسمع صوت ضحكهم وونستهم والاغاني صوت مؤيد البتشاكل مع ساره وعلى البضحك عليهم امهم البتكورك فيهم
نزلو دموعي وقفت جنب غرفتهم الدخلو فيها ناس جداد سلمت عليهم واتحركت وصلت لقيت امي نايمه في السرير قعدت جنبها رفعت يدي اعصر ليه رجوله لقيت رجوله حاره شديد انخلعت قلت ليه أمي انتي كويسه قالت لي كويسه اتحركت على راسه ختيت يدي في جبهته كانت حاره شديد انخلعت قلت ليه أمي انتي محمومه جسمك نار ياأمي قالت لي شوية تعب قلت ليه وانا بتمتم أراح أراح ااارح المستشفى قمت طلعت ليه توب وجلباب وساعدته عشان تلبس لبست لي توب
كانت بترجف من الحمه قلت ليه دقيقه اشوف لي ركشه طلعت جري لقيت حمودي جنب الباب مسكتو ودخلت بيو غيرت ليو ملابسو زمان كنت بخلي مع ساره ولا اخواتها واسه مابقدر اخلي وراي جريت الشارع اشوف لي ركشه وانا واقفه جا علي دكتور سمؤال قال لي خير قلت ليو ااامي أمي عندها حمه وتعبانه عايزه لي ركشه قال لي انتظري هنا واتحرك فات بعد كم دقيقه جا سايق عربي ونزل دخل معاي وصل الغرفة سلم ودخل سنده معاي ركبنها واتحركنا المستشفى وصلنا دخلنها الدكتور كان عندها ملاريا الدكتور قال لينا حرقت دم اظن عندها طولت بكيت بكا ماكانت بتشكي من حاجه كانت كاتمه المرض والوجع
ركب ليه درب قعدت جنبها كانت تعبانه شديد
قعدنا لي العصر وهي مااتحسنت عندها السكري والضغط وكانو مرتفعين شديد الدكتور قال لينا الا تحولوها مستشفى دنقلا انا عايزه اموت كنت برجف من الخوف والبكاء خايفه افقده زي مافقدت محمد اخوي وياسين
دكتور سمؤال قال لي يلا عشان نتحرك لو ماهو ماكنت عرفت عملت شنو ركبنها في الإسعاف واتحركنا على دنقلا بعد كم ساعة وصلنا دخلنا المستشفى دخلوها سريع قعدت جنب الغرفة حاضنه علي حمودي وأبكي دكتور سمؤال يصبر فيني انا ماقااادره العبره خانقني ماعندي غير أمي
العشا اذن قمت مشيت دخلت ليه كانت نايمه قعدت جنبها ختيت يدي في جبهته الحمه نزلت اتحركت منها طلعت دكتور سمؤال قال لي انا بسوق حمودي بجيب اكل واجي انا ماكنت قادره اجادول او ارد عليو لانو منهاره شديد وخايفه على امي حاسه بي تقل في قلبي حركت ليو راسي واتحركت عشان اصلي صليت وقعدت في المصلاية ادعي ليه قمت اتحركت على الغرفة لقيت دكتور سمؤال شايل حمودي كان نايم قلت ليو جاي ليو شلتو ودخلت ختيتو في السرير التاني الجنب أمي جا داخل مد لي كيس قال لي فيو شوربة لي خالتي واكل
شلت الكيس وشكرتو قلت ليو تسلم يدك العافيه ماقصرت يادكتور قال لي جاي تلفونك سجل رقمو قال لي لو احتجتي لي اي حاجه اتصلي قلت ليو تمام قال لي ربنا يكتب ليه العافيه وتصبحي على خير رديت عليو واتحرك
طلعت الشوربه وصحيته قالت لي الساعة كم قلت ليها ٧ مسا وقلت ليه انتي كويسه قالت لي كويسه الحمد لله قالت لي اسنديني اصلي سندتها دخلت الحمام ساعدته طلعت صلت سندتها لي السرير جبت الشوربة وقعدت اكل فيه قالت لي حلمت بي محمد اخوك يازوبه لو مت ادفنوني جنب محمد دموعي نزلو قلت ليه ماتقولي كده ياأمي بعد عمر طويل يارب ابتسمت وخت يدها في شعري وقالت لي ابقي عشره على نفسك وعلى حمودي وارجعي الجزيره اقعدي مع خالاتك عارفه مابقصرو منك قالت لي اتصلي عليهم قلت ليه اسه ارتاحي بتصل عليهم بعدين هم اتصلو وسالو منك وانتي كنتي نايمه قالت لي ارجعي ليهم رجعت ليهم قعدت تتكلم معهم وتوصي فيهم انا بكيت بكا قلت ليه أمي عليك الله ماتتكلمي كده يامي عليك الله طلعت من الغرفه وانا ابكي قعدت في المقعد البرا سامعها تتكلم مع خالاتي بعد صوته اختفاء دخلت لقيتها عايزه تنوم جات الممرضه وركبت ليه تاني درب شلت التلفون وقعدت في السرير التاني ارقب فيه ماعايزه انوم اخليه كنت خايفه شديد خايفه افقده وانا قاعده النوم غلبني نمت شويه وصحيت لقيت الدرب قرب ينتهي مشيت ناديت الممرضه فكتو نمت في السرير رفعت التلفون كانت الساعة ١٢ قمت هبشت رأسه ماكان في حمه حمد الله نمت وصحيت بصوتها اتحركت عليه قالت لي جايه مويه اتحركت جبت ليه المويه شالت مني الكباية شربت ورجعت نامت تلفوني اتصل كان رقم دكتور سمؤال رديت عليو قال لي خالتي كيف انشاء الله اتحسنت قلت ليو الحمد لله بخير وانا بتكلم معاو نادت لي وقالت لي ذوبة قمت عليه
قالت لي شايف محمداخوك ياذوبه هدا محمد جنبي ويبتسم محمد اخوك ما مات محمد قال سايقني معاو وقامت رفعت رأسه وابتسمت وهي بتقول محمد انا مشتاقه ليك يامحمد سوقني معاك انا ماشه معاك ياولدي التفت علي وقالت لي ابقي عشره على روحك وعلى حمودي مسكتني من يدي وحضنتي قوي عليه وقالت لي عافيه منك ورضيانه عليك يازوبه انا استودعك الله ياذوبه وفكتني خت رأسها على السرير وقعدت تجر في نفس بصوت نفسيها كان تقيل شديد انا قعدت اكورك امي امي امي اااااامي سامعه صوت دكتور سمؤال يقول الو الو زينب جريت برا وانادي يادكتور يادكتور وانا جاريه طلعت لي ممرضه قلت ليه أمي تعالي شوفي أمي ماعارفه ماله جات جاريه معاي لما دخلنا لقينها ممددها لا بتحرك يد ولا رجل جرت الممرضه نادت الدكتور وانا قعدت معها كانت بجر في النفس رفعت يدها كانت تقيله شديد قعدت انادي ليه امي ياامي وهي عيونها مركزه على السقف وكانه في عالم تاني جا الدكتور انا اتحركت برا الغرفة ابكي قعدت في الأرض وأبكي لا يالله أمي يالله لا لا لا يالله أمي
شايفه دكتور سمؤال جا جاري قمت جريت عليو قلت ليو انا ببكي وبرجف امي امي يادكتور أمي واااي قال لي انشاء الله خير قولي يارب زينب خلي إيمانك بي الله قويه انشاء الله مابتجيها حاجه واتحرك دخل الغرفة وقفت جنب الباب وسامعه صوته وهي بتقول اشهد ان لا اله الا الله وأشهد أن محمد رسول وانا صرخت لا ياأمي عليك الله يامي ماتمشي تخليني وجريت دخلت الغرفة لقيت دكتور سمؤال قفل ليه عيونها صرخت صرخه واظن المستشفى اهتزت من صوت اااامي لا ماتمشي واي انا ياأمي ماشه وين ياامي ماعندي غيرك يامي كيف كيف بتمشي امي قومي فتحي عيونك فتحيهم ياأمي دكتور سمؤال والممرضات والدكتور يهدو فيني وانا جريت عليه اااامي فتحي عيونك ياأمي فتحيهم ماتمشي ياأمي سوقنيي معاك يامي وقعدت اصرخ واكورك ياأمي قولي ذوبه ياأمي نادي لي قعدت اهبش فيه لا لا لا يامي رفعت يدها حاولت احركه مسكت يدها قوي دكتور سمؤال كان ماسكني وانا بس ايدي ماسكه يد امي وقول ليهم ماتشيلوها أمي مامات أمي نايمه عليك الله ماتشيلوها ماسكه يدها جروني منها جر حمودي صحا يبكا على صوتي وانا في عالم تاني صوتي راح من الكواريك سامع الدكتور قال ليهم مهدي جيبو حقنه سريع والممرضات ماسكني مع دكتور سمؤال وانا بس بعاين في امي الغطو وشها بي التوب وانا اقول ليهم كيف تغطو أمي أمي عايشه ادوها درب ادوها حقنه أمي ماماتتت ياأمي وماسكه يدها بي يدي وانا اكورك اصحي ياأمي عليك الله اصحي تعالي ياأمي تعالي محمد اخوي تعال ماتخلوني محمد يااااااامحمد ااااامي وانا اقوم فيهم حسيت بي الحقنه وبعدها يدي رخو من يد امي وانا بقول عليكم الله ماتتفنوها أمي ماماتت محمد أمي عليكم الله سوقوني معاكم وتاني ماحسيت بي نفسي
بعد اسبوع انا وحمودي وقفين في قبر أمي وقبر محمد رافعه يدي اقرا ليهم في الفاتحه بتذكر في حياتنا كانت كيف قبل مايدخلو الدعامه بتذكر هظاري مع محمد وامي لما تزهج مننا وتجدع فينا سفنجته ونحنا بنجري منها دموعي وجات جاريه قعدت في الأرض قعد ابكي بصوت واقول ليهم خليتوني برا ياأمي ويامحمد خليتوني برا كنتو تسوقوني معاكم انا اعيش كيف بدونكم حسيت بي يد في كتفي وصوت دكتور سمؤال زينب كلنا بنموت كلنا جنازات مؤقت كلنا واقفين في الصف ودي حال الدنيا انتي اسه عندك مسؤلية محمد ولدك ولازم تقوي عشانو لو حصلت ليك حاجه محمد البربي منو ياذينب استغفر الله العظيم وادعي ليهم هم محتاجين دعواتك ولدك محمد محتاج ليك اتقوي عشان محمد مسحت دموعي رفعت يدي قريت ليهم الفاتحة ودعيت ليهم شلت تراب من قبرهم ربطو في طرف طرحتي وقمت اتحركت مع دكتور سمؤال كل خطوة وانا بخطيها برا المقابر قلبي بتقطع معها يالله القوه يالله ساعدني يالله قويني يالله صبرني ان الله وانا اليه راجعون حمودي قال لي وين حبوبة دكتور سمؤال قال ليو مشت الجنه مع ابوك ومحمد خالك قال ليو كانو يسوقونا معهم انا زعلان من حبوبة تمشي لي ابوي وماتسوقني معها انا دموعي جرو مسحتهم واتحركنا ركبنا العربية رجعنا المخيم من دخلنا النسوان كلهم جو يعزو فيني صوتي راح من العبره والبكاء دخلت الغرفة قعدت في سريرها رفعت توبه الكانت لابسو قبل ما نمشي المستشفى مسكتو وحضنتو علي وبكيت
انا الحرب خلتني افقد أمي ومحمد شالت مني اعز اتنين ومسخت علي الدنيا محمد مات مظلوم وامي ماتت مقهور عليو حسبي الله ونعم الوكيل في الحرب حسبي الله ونعم الوكيل في سببب الحرب الله ينتقم من الكان السبب
(حتى وإن تجاوزت كل ما يؤلمك لن تعود أبدا كما كنت..!!💔)....يتبع