رواية حظي الفصل الثامن 8 بقلم سلوى اسماعيل
عامر رجع اتصل لي تاني رديت ..
معليش ي دكتور انا والله م عندي حيل للوجع ولا بقدر احب
واتحملت في الدنيا دي مافيه الكفايه لا عندي طاقه ولا قلب احب بيهم زول تاني كل الباقي من محبه دايراهو لرويحتي دي بتمنى تعزرني وربنا يديك بنت الحلال التسعدك وقفلت الخط .....
قفلت الخط بآخر نفس عندي وقعدت في بنش فاضي على الطرف وبكيت بكيت كده ماشايفه سبب للبكاء وحاسه بي وجع قلب عديييل ..
لكن معليش اتوجع هسي م بقدر اتحمل افقد زول تاني
حياتي كلها عباره عن ناس تمشي م تجي بس ..
بعد خلصت تفكيري رفعت راسي لقيت عمار فوق لي راسي
قشيت دموعي وبقيت ساكته
قال لي : قومي ح تطلعي من هنا وح تركبي معاي العربيه وانتي ساكته وم اعيد كلامي
عاينت ليه مخلوعه من طريقته طبعا
قمت وانا ساكته ركبت العربيه ولقيت مناديل قشقشت دموعي كوييس وانتظرته ..
ركب وربط حزام الامان لي وليه من غير كلام ودور تلفوني كترت فيه الرسايل فتحت الواتس لقيت في اسكرين فتحتو لقيت عامر مرسل لامي انا زول م عندي صبر وبنتك دي كملتك صبري ح اخطفا مشوار م تسألوني منها وامي بتضحك واخواتي يتريقو ومهاد قالت لي مهيد بدعي ليك من قبيييل لانو هو كلمو برضو ..
احساس انو عندك اهل بتنتمي ليهم ده حلو خلاص ابتسمت وانا بقرا في رسايلم ..
وقف قريب من البحر في شارع النيل قال لي انزلي
نزلت كان المكان هادي والساعه زي 11 صباحا الجو خريفي رهيب عديل اتربعت في الارض جا قعد قصادي ..
شوفي يابت الناس انا م بحب الشي الوسط خااالص
ومابحب الانتظار وم بحب حاجه حبيتا اتحجج بالظروف عشان م اخدتها وبكره اللون الرماد ابيض او اسود م عندي تالت .. ف شوفي انا حبيتك وخطبتك من اهلك الهم اخوك وامك ووافقو باقي انتي الجمعه البكره دي عشان خاطر انك م عارفه ح افوتا لكن الجمعه البعدها ح اعقد عليك اسبوعين بالكتير وح اتزوجك واتزفتي حبيني في بيتنا ..
بتكلم معاي وانا عامله كده 😳😳😳
قلعت النضاره وبقيت مبحلقه عيوني ..
قلت ليه طيب مادام حاسم امرك مكلمني ليه ؟!
قال لي والله شكليات ساااي وعشان م تقولي م كلمتك
قلت ليه : من يومي حاساك مجنون لكن الليله اتأكدت
شوف انا زولة واااضحه وصريحه وم عندي زول في حياتي عشان ارفضك لكن انا م بقدر على الخذلان تاني م بقدر افقد زول م بقدر اضمن غير نفسي ..
عامر : اتأكدي لو خزلتك نفسك انا م ح اخذلك انا راجل تملي بيه شمالك قبل يمينك ياجود الناس وامونتي انا
بقيت اغمض في عيوني وافتح فيهم زي الهبله وقلبي شغال دق دق دق واصل : انتي ماممكن تقفلي قلبك عشان حاجات حصلت في حياتك زعلتك .. وليه م اكون انا عوض ربنا ليك ليه م يكون انا حظك العظيم .. وصدقيني انا ح احبك بي طريقه تخليك تقولي ياريتني لو عرفتك من زمان عندي ليك مشاعر تكفي انها تنسيك وجعك العشتيه وزياده ..
قال كلامه ده ومسك يدي اتنفس بعمق وعاين في عيوني
انا ياامونه متمنيك متين تخشي بيتي بس وح اشيلك جوه عيوني ..
سرحت في عيونو زي دقيقه كامله وانا بعاين في عيونه وملامحه .. قلت ليه :
طيب ليه اخترتني انا ؟!
عامر : القلب ومايريد
جريت يدي ورجعت لبست النضاره استعدادا لاني اقوم ..
قال لي دي معناها زمنك انتهى مش ارح اوصلك مكان ماشه
بعد كلامه حتى اتزكرت الحجز والعروس ..
قربت اجري لقيت منها كم اتصال قلت ليها قريبه منك انا وفعلا دقايق ووصلوها خلصت ليها الساعه كانت 4 طلعت منها لقيت عامر واقف جيت عليه قلت ليه : انت لسه م مشيت ؟!
قال لي مشيت وجيت وجبت معاي اكل ارح ناكل ونطلع اوصلك الداخليه قلت ليه اكل انت وانا باكل لما اصل م سالني تاني وصلني الداخليه واداني الكيس لقيت مهاد في وشي واستلمتني اسئله مشيتو وين وقلتو شنو وعملتو شنو ومالك قال طولتي ؟؟!!!
اديتا الكيس وقلت ليها مهااااااد ارح ننحشي عارفاك من تكتري كلامك بتكوني جعانه ..
اكلنا وحكيت ليها وكل مره تعلق لي وااااااي بالله الدكتور اب وشا جامد ده طلع بحبك ؟! وبضحك ياجود بضحك بعرف ؟!
قلت ليها بري ماحصل شفتو ضحك ..
بتاكل فجأه وقفت اكل وقامت تنطط !!!!
يابت مالك جنيتي قولي بسم الله
جبت ليها مويه مالك ؟! حرقتك شطه ..
شطة شنو يابت حسب كلامك ده معانا ح يكون عندنا عقد الجمعه الجااايه ووووووب م انحبست ولا ظبطت شعري ولا عملت شي عايني ارح نجيب كريمات وله اقول ليكي ندخنك نحفر ليك حفره هنا ..
عاينت ليها من فوق لتحت ..
عايني كملي اكل وامشي اتخمدي بلاوكلام فارغ معاك
بقت ترغي ركبت سماعتي ومشيت منها وانا داخله على الحمامات مريت بي غرفة مياده ..
فتحتها لانه مازال المفتاح عندي ..
الدنيا خربف والمطر شغال بره كان
اول مادخلت قلت بسم الله السلام علينا وعلى عباد الله الصالحين كل الناس لو قالو انك م كنتي موجوده انا ح اقول ليهم العكس لانك كنتي موجوده معاي وياما طمنتيني واكلنا سوا ونمنا سوا غض النظر عن انتي كنتي شنو انا بعتبرك صديقه وصديقه صالحه كمان .. جايه الليله اقول ليك انو انا اتحدد عقدي وقصتي نفس قصتك بس يمكن انتي كنتي بتحبي استازك بس انا لا بحبه ولا بكرهه ولو كنتي موجوده كنتي نصحتيني ابعد من البنات وفعلا انا بعيده منهم ومالي غير باخواتي عارفه ح تكوني سامعاني وح اتصدق عشانك كتيييير ولو ربنا هونا ولقيت عندي امكانيه ح اعمل اوقاف باسمك وقفت مسافه وانا ببكي كده من غير سبب وطلعت قفلت الباب مشيت الحمام وجيت صليت ونمت ..
عمار متواصل معاي صباح الخير ومساء الخير بس
مر الاسبوع عادي حتى اخواتي كانو بقولو لي انهم مشغولين ومهاد زاتا بقت تطلع كتير كتر خير مُهيد البجي يفرق لي بين فتره والتانيه مافي زول جاب لي سيرة عقد تاني ولا حاجه
يوم الخميس مهاد قالت لي ياجود تعالي حنني لي يديني جربي فيني شخابيطك دي ..
قلت ليها مادام شخابيط عايزاها ليييشنو ؟!
مهاد: يختي هي متفتري علي كان ماعقارب ودبايب متباخله بيهم كده ارح ارح انا منتظراك
مسكت يدها وقلت ليها الا تغمضي لانه ح ارسم ليك رسمه ماحصلت جاتني وغمضت فعلا ومسكت يدها رسمت ليها عقرب وثعبان على شكل تاتو وزخرفتهم ليها وبقيت بهب مع المروحه لحدي م نشفت الرسمه قلت ليها فتحي غسليهم
بقت تكورك انتي ده شنو ده الواحد مايهظر معاك !!
قلت ليها بري رسمت ليك عقارب ودبايب
بعد شويه جو بنات الغرفه كلهم ويشكرو في الرسمه وعجبتم
واليوم داك الغرفه كلها مليتا عقارب ودبايب ياقول مهاد
وحده فيهم قالت لي الا تحي ارسم ليك يديك قلت ليهم لالا ماعايزه
مهاد قالت لي لييييه يختي يقولو باب النجار مخلع !!
البشوفنا يقول البتحنن م محننه !!
قلت ليها حسستيني نحن في بيوتنا وبنتنافس ..
مسكوني حننو لي يديني جدعات بنوتيه بسيطه وماخليتا نشفت غسلتها بنيه ..
الساعه بقت 8 مساء اتصل لي رقم غريب ....