رواية حظي الفصل التاسع 9 بقلم سلوى إسماعيل
جاني اتصال من رقم غريب يوم الخميس الساعه 8, مساء
الرقم سوداني فتحت الخط جاني صوت امي !!
من الخلعه قفلت الخط ..
رجعت اتصلت تاني رديت وم اتكلمت
امي : اطلعي باب الداخليه نحن بره في الرسيبشن
مهاد تعاين لي : مالك ؟!
قلت ليها امي بره
انا مخلوعه وهي ولااا على بالا شالت ليها شنطة ضهر وكم كيس ولحقتني جيت الاستقبال لقيتا هي واخواتي ومهيد بره وعامر معاهم قلت ليهم بسم الله انتو مالكم وجيتو متين !!!
اخواتي حضنوني وبقو يباركو لي ومهاد واقفه بعيد تعاين لينا جو عليها لين وليان بقو يسلمو عليها وانتي احلى من الصور وطلعتي حلاااتك ليان قالت ليها واااو انتي في عمري
امي انتبهت ليهم سالتني دي منو ؟!
9ك ممكن عن : يعني اختي بنت ابوي !!
امي: وانا اقول وشها مألوف ليه !! وانتي بتعرفيها من وين ؟؟!!
قلت ليها : امي انا م بحب افتح الجروح القديمه خلاص انسي انتي حاليا ماشاءالله متزوجه وعندك اطفال وديل اخواني زي لين وليان اخواتي ..
امي : واخواتك عارفين ومالكم ماكلمتوني
ليان : مفاااجأه ياامي ونحن م كنا عارفين نجيبا ليك كيف زاتو كويس انك عرفتي براك
مهاد جات تسلم على امي امي رفضت تسلم عليها كانت ح ترجع الداخليه قلت ليها لالا م ترجعي ارح معانا البيت مأجرين شقه والامور شويه شويه ح تتصلح وانتي اكيد م لايماها لانو العملو فيها اهلك م هين
مهاد : ولو اني م عندي ذنب لكن اسوي شنو ح اتحمل عشانك بس لانو انا زاتي بعد عرفت زعلت من امي وابوي وخيانتم ..
ركبنا انا والبنات مع عامر ومُهيد طلب يمشي مع امي ساقت معاها اخواني الاولاد واكياس مهاد
وصلنا الشقه نزلو بس عامر قال لي انتي خليك ماتنزلي
خليناهم في وقفتم مادخلو واتحركنا نحن مشينا مسافه م طويله ونزلنا في مطعم ..
طلب عشاء وقال لي : مالابسه نقاب مالك ؟!
قلت ليه : جيت مخلوعه وانت شايف انا لابسه عبايه كيف كيف وسفنجه وهم قالو م ارجع اغير ملابسي ..
يادوب انتبه لشكلي طبعا ضحك لما الحوالينا انتبهو وهو زاتو بقى يحمر ليهم واحد واحد ربعت يديني في التربيزه وقلت ليه : عامر م سمعني طبعا يمعني متأخر
عامر : عيون عامر
_ تصدق ضحكتك حلوة
عامر : اعتبره غزل صريح
_ لالا اعتبره دعوه للضحك وماتكشر وشك تاني
بقى يضحك زياده وبعاين لي وانا قربت اسيح والحمدلله الاكل وصل وانتبه مع الجرسون بقيت منتظره متين نرجع
اتعشينا ورجعني البيت الشارع كله م كان بتكلم بس بتلفت ويعاين لي مرات يبتسم ومرات يغني مع الاغاني المشغله ..
قلت ليه : صوتك حلو م قاعد تتلو قرآن ؟
عامر : أكيد ومسجله كمان تحبي تسمعي ؟!
قلت ليه : ياريت
فتح تلفونه ووصله وبدأ يشتغل ياااااه على سورة يوسف بي صوتو م اتمنيت اوصل قبل تخلص مع انه كان مهدي السرعه انا بس متكله على الكرسي ومغمضه وبسمع فتحت بعد مسافه واكتشفت اننا واقفين من فتره وهو بس بعاين لي ..
_ اححم مالك م قلت لي وصلنا
عامر : منو القال وصلنا ارجعي نومي
_ مانايمه خلاص هاك حول لي
عامر : شيلي التلفون معاك واسمعي براحتك وحولي العايزاه وبجي اشيلو منك بكره ان شاءالله
شلته وفتحت الباب قلت ليه تصبح على خير وصباح الخير لانه ماعندك تلفون
عامر : دي احلى صباح الخير باليل ..
دخلت لناس امي ولقيتم نومو اخواني الصغار وامي زاتا نامت اخواتي صاحيين ومهاد تنضم سااااي م خلت شي اظن حكت ليهم من وهي بتحبي ..
انا قعدت معاهم شويه ومشيت فتحت تلفون عامر وشغلت سورة يوسف من البدايه وبقيت بقلب في التلفون والصور
عندو فديوهات رهيبييبه واتاريه من المشاهير في تك توك
قفلتهم والقران شغال كنت ح انوم ..
جات داخله مهاد : الناس بنومو بالبقره لكن سورة يوسف دي جديده علينا ..
_ مهاد بطلي سجمك ده انا نعسانه
مهاد: يختي قولي عاجبك صوت القاريئ بس
_ مهاااااد بطلي
مهاد : بناااات اجررو
جوها جاريين لين وليان مالك يابت ؟!
مهاد : اسمعو الصوت ده منو ؟!
لين وليان في نفس اللحظه : عامر !!!!
خلاص تاني ماسكتو وبقو يتكلمو وصوتو حلو وحظك وبتاع
تلفوني اتصل سكتم الحمدلله
رديت : وعليكم السلام
جاني صوت عامر تفتكري ح يجيني نوم وم سمعت صوتك قبل انوم
قلت ليه : اعتبره غزل
عامر : لا انتظريني كم ساعه بس
قلت ليه : ليه في شنو بعد كم ساعه ؟!
عامر : ولا شي ح اتغزل فيك غزل فاحش
قفلت الخط وصمت التلفون ودخلتو تحت المخده ونمت طوالي ..
صحيت تاني يوم لقيت اخواتي صاحيين اصلا وم مخليين شي فواكه وشي خبايز !!
قلت ليهم ياخ ماتتجمعو طوالي حقيقه جمعتكم حلوة وفيها اكل وخبايز اتسوكت وجيت اكل من طرف واخواتي تقول مشاكلاهم ولا وحده فيهم م اتكلمت معاي ..
شربت الشاي ومشيت الغرفه بقلب في تلفون عامر م خليت مكان فضول ساااي ياخ حتى الايميل فتحتو
الساعه بقت 11 نادوني الفطور مشيت فطرت وامي قالت لي جووود ؟
قلت ليها نعم !!
امي : يابت مالك لا ماسك لي وشك ولا لفيتي شعرك
لين جنيتي مالك ماعرستي ماتقومي على البنت دي
لين : امي اسكتي
امي : اسكت شنو مافي زمن زاتو باقي اقل من نص ساعه
والارتست توصل !!
طبعا جاء في بالي كلام عامر وحركاتم دي
قلت ليهم امممم وعاملين انكم م مكلمني خلاص براي بلف شعري بقو يضحكو فيني قالو لي امي بوظت المفاجأه ..
قلت ليهم فالحين والله وح تستمرو لحدي متين بعد تجي الارتست ح تمكيجوني كيف نايمه ؟!
قامو يفتشو في فساتينم وجابو لي فستان امي قالت لا انا جايبه ليك توب طلعته لونه كبدي مشغول بي ذهبي خفيف قريب من البيج والتاج في طليع حاجاتم ديك جات الارتست
قالت ليهم ببدأ بالعروس وم طولت كانت ظبطت وشي والتسريحه ولبسوني طوالي وانا اكتر شي باسطني لمة اخواتي حوليني احساس اتمنيتو طول عمري ..
كويت لمُهيد جلابيتو بي ميكبي ركوب راس بس
وطلع الصلاه بعد الصلاه اتصل لمهاد وبقو يزغردو وكده عرفت انهم عقدو 10 دقايق وجونا عامر ومُهيد واصحابم
دخلو اول مُهيد واصحاب عامر باركو وطلعو بعدها البنات وامي جو باركو لي وطلعو كلهم خلوني برااااي
اقل من دقيقتين وكان عامر في الباب 🙈