بقيت ماش على اتجاه الغرفة لقيت الدخان منها! جريت ووصلت الباب في ثانية! قولت في نفسي إن شاء الله تكون ما جوة بس!، فتحت الباب وانا على اعصابي لقيتها نايمة والنار لسه ما وصلتها بس قربت للسلوك واكلت كل الستائر والدخان كان كتير وكنت خايف انو رئتيها تكون اتضررت ، شلتها سريع ، جات رماز جارية ومخلوعة بعدي، شكلها لاحظت! قولت ليها افصلي الكهرباء مشت عشان تفصلها وانا طلعت وُد كانت زي الجثة لا بترد ولا بتصد قولت اكيد من الدخان ما تألف سيناريو من راسك اكيد حية شوفت نبضها لقيتو ضعيف شديد في اللحظة دي كل الدنيا اسودت في وشي ، ما كنت قادر اتصرف وحسيت بالعجز! حتى العربية ما كنت عارف اسوقها كيف!، رماز قالت لي حا تموت بالطريقة دي لو ما عايز تسوق خلينا اجيب زول! وانت اتوكل!!! استجمعت شجاعتي قعدتها بوراء قوولت ليها خليها تتكل عليك عشان تقدر تتنفس!، قالت لي تمام بس اسرع!، في الطريق شكلو رماز اتصلت بامها! ،لمن وصلنا دخلناها!! عملو ليها تنفس كم مرة!! وقالو تبقى تحت المراقبة لمدة يوم لانو رئيتها اتضررت شديد! ،امها جات وطوالي قالت لي بغضب الجابك شنو!؟! وباي صفة ؟! ،قولت ليها دي مرتي!، قالت لي ما مرتك نحن منتظرين بس تسلمنا القسيمة! اتخارج من هنا والا قسماً بالله آلم فيك كل الناس ديل واخليك تندم، قولت ليها انا ما... ،قاطعتني وقالت لي يا ود الناس احترم نفس وامشي بقول ليك!، كانت زعلانة زعل شديد وانا عشان هي أم ومقلقة ما كنت عايز اقلق بيها زيادة! فمشيت بس قلبي كان مع وُد في النهاية عشت معاها قريب السنة.
لمن وصلت البيت قالت لي شهد الحصل شنو؟! ومالك عامل كدة؟!، طمني انت كويس!، قولت ليها اي كويس بس وُد ما كويسة ،قالت لي مالها حكيت ليها، قالت لي لاحول ولا قوة الا بالله العلي العظيم نست المبخر ولا شنو ،قولت ليها اي هي اصلا ما مباليه لاي حاجة ،قالت ليها أسي كيف؟!، قولت ليها ما عارف وضعها امها طردتني! ،قالت لي شكلو بقت بتكرهكك بس انت بحق ليك انك تتزوج!، المهم ما تشيل هم اكيد بنعرف عنها خبر!، قعدت وبقيت اتذكر في المنظر! قررت اتصلت بنرجس عشان تجيب لي أخبارها اتصلت وكلمتها انخلعت وقالت لي حا امشي ليها، قولت ليها طمنيني على أخبارها ،قالت لي ما بطمنك ما عندك اي حق تسأل منها بعد كسرتها اي نعم عرفناك ما بتحبها بس ما تكون وقح للدرجة دي معاها على الاقل كان تمهد ليها بس انت بعد جهزت نفسك وكنت داير تعقد جيت كلمتها لا احترمتها ولا احترم عشرتها ،قفلت في وشي!، قولت لروحي انا العقد دة ما كنت خاتو في حسابتي في يوم تكلميها بس والله جاء غضباً عني لانو هي قالت لي ابوي حلف وقال لو ما جيت الليله عقد بكرة بعقد ليها على زول.
______________________
بلسان نرجس
وصلت المستشفى وشوفت امها واختها مقلقات جيت وسلمت عليهن وقولت لي رماز اها كيف ؟!، قالت لي طلعت حامل وقالو احتمال الجنين ينزلو ليها! ،قولت ليها حامل!!! إن شاء الله ما بتجيها عوجة وكلن امركن لرب العالمين!، امها بقت تمشي وتجي، ابوها جاء وباين عليهو انو مضايق شديد قال ليهن لشنو ماف واحدة فيكن كلمتني ،قالت ليهو لانو انت طول عمرك ما عندك شغلة بيها، قال ليها دي بتي من لحمي ودمي ما عندي بيها شغلة كيف!، قربت ليهو وهي مدمعة وقالت ليهو اي ما عندك شغلة حصلت سالت منها ولا من حاجة بتخصها! بناتي ديل ربيتهم براي وتعبت فيهم رماز قالت لأمها كفاية!، ابوها ما رد وبقى قاعد!، موضوع صعب انو ابوك يكون عايش بس تحس انو ما عندك ابو!،
اتصل بي همام رديت قال لي الولد دة جاب ليك حاجات بس لاقاك ماف مشيتي وين في الوقت دة، قولت ليهو في المستشفى؟؟!، قال لي بصوت قلق مالك الحاصل؟؟!، قولت ليها وُد غرفتها حرقت وكانت فيها المهم هي كويسة نوعاً ما حالياً ،قال لي طيب حا اجي عليكم عشان اسوقك، قولت ليها لا ما تجي برجع براي، قال لي تمام انتبهي على نفسك، قفلت الخط وبكيت بكاء شديد هو صاح ما من حقي اسالو بس تعاملو كعب عديل ،هو قال حا ابقى اخو وصاحب وانا ما شايفة اي من دة اسي.
___________________________________
بلسان همام
بعد نومت في بيت نرجس وفاق زعلت شديد وقالت لي عايزة اطلق لانك بقيت ما زي زمان وبقيت ما بتوفي بوعدك مش قولت حا تجي بس ما جيتيني واخترتها هي علي بررت ليها بس كانت مصرة اصرار عجيب! في النهاية راضيتها باني ابعد من نرجس وبقيت بصرف عليها وبرسل ليها كل احتياجاتها وكدة ما بكون ظالمها في النهاية هي ما عايزة حاجة غير تقرأ.
________________________________
بلسان نرجس
بالمساء كدة قالو ماف داعي انو ينزلو الجنين والوضع استقر وصحت! جيت وسلمت عليها وقولت ليها الحمد لله انك انتي والجنين بخير ،قالت لي بصوت باهت عرفتي كيف اني حامل، قولت ليها كل الناس عرفو! ناسيه انك في مستشفى قالت لي الناس منو؟!، قولت ليها امك واختك بس ،ثالت لي طيب ما عايزة يعرف زول بحملي غيرك انت وامي واختي وخاصة مظفر لو سمحتي، قولت ليها تمام ،طلعت برة وبقيت متحركة عشان امشي حسيت بأنو في زول ماش وراي التفت لقيتو مظفر ،قولت ليهو ليه متابعني كدة خوفتيني ،قال لي لو ناديت عليك كنت حا تقيفي، قولت ليهو لا طبعاً ،قال لي اها الوضع كيف؟؟!، قولت ليهو كويسة شديد!، قال لي متأكدة، قولت ليهو اي وصحت كمان ،قال لي الحمد لله رب العالمين،قولت ليهو بعد كدة امشي لمرتك الجديدة ،قال لي انتي مفروض تتتفهمي زواجي من شهد لانك عارفة قدر شنو بحبها ،قولت ليهو انت متأكد حا تنبسط مع شهد بمجرد انك بتحبها ،قال لي اي!، قولت ليهو يا ما ناس كانو بحبو بعض اتطلقو بعد العرس عشان ما قدرو يتفاهموا ،قال لي بقدر اتفاهم معاها، قولت ليهو إن شاء الله بس ما تندم، قال لي ماف ندم! بحبها، قولت ليهو طيب بعد عن وُد. قال لي لو ما كانت اسي عيانة كنت بعدت،اتنهدت وقولت ليهو يا مظفر انت كنت بتاذي فيها، زول اختار واحدة تانيه غيرها متوقع انها عايزة تشوفك ولا تلمحك ،قال لي بعرف أخبارها من بعيد لبعيد بس ودة حا يكفيني.
رجعت البيييت وبقيت قاعدة براي حسيت بالوحدة الشديدة! ،اي انا اخترت قرايتي على حساب اي حاجة بس هو طول الفترة كان واقف معاي واتعودت عليهو وصعب علي يخليني كدة! ما عايزة اكون عاله عليهو اكتر انا أعلنت الاستلام!، التغير في المشاعر صعب شديد وبعد اتغيرت مشاعري اتجاهو خلاص حتى القراية بقت ما مفراحني بقدر هو يبقى جنبي هو اسرتي الوحيدة بس اتخلى عني في نص الطريق انا ما قادرة استمر في الوضع دة اكتر.
___________________
بلسان مظفر
كلامي القولتو لنرجس ما نفذتو وقررت اشوفها عشان قلبي يطمن شوفت امها ومعاها اختها رجعو البيت شكلهم عايزين يجيبو حاجات ويجو طوالي دخلت المستشفى لقيت معاها صاحبتها مما شافتني طلعت قعدت جنبها وقولت ليها كيفك؟!، قالت لي بخير يا مظفر تسلم على المساعدة، قولت ليها :
=دا الواجب المفروض تكون منتبها
_انا منتبها بس نعست ونومت
=تاني ما تتكريها
_ما تامرني انا لو موتا ولو حيت الموضوع بهمك في حاجة
=كيف ما بهمني انتي غاليه علي
_اي غاليه لدرجة كسرت قلبي
بقت تكح كحة شديدة وانا طوالي قومتها وشربتها موية ،قولت ليها خلاص ما تتكلمي، قالت لي بسببك يا مظفر انت لو ما جيت ما كنت كحيت، قولت ليها حاضر انا اسف حقك علي!، قالت لي يلا زح مني! رجعت ليها شعرها لوراء وقولت ليها خلي نفسك يهدا اول وبزح! ثبتها علي وقولت ليها ما بفكك، ماردت لأنها كانت تعبانة شديد ،بقيت خات يديني في ضهرها وتاكلها علي لمن ارتاحت رقدت ختيت ليها ماسك الأوكسجين للجلسة وبقيت منتظر! تاني قررت امشي بقيت اعاين فيها مسافة وتاني مشيت .
رجعت البيت متاخر ضمتني شهد وقالت لي اتأخر شديد ودي شنو ريحة المستشفى دي قدرت تلاقي وُد قولت ليها اي، المهم هي كويسة الحمد لله ،قالت لي الحمدلله العشاء جاهز!، البيت كان مرتب بطريقة انا زاتي مستغرب منها!، مشيت التلاجة وعاينت تلقائياً وما لقيت اي استيك نوت اتنهدت وقولت لشهد تعالي نتعشى انا جعت قالت لي جاية.
________________________
بلسان نرجس
في الصباح بدري رسلت ليهو رساله مكتوب فيها انا بشكرك يا همام على كل القدمو لي بس انا ما عايزة منك ماديات وما عايزاك تضغط على نفسك!، انت كنت كويس معاي شديد لمن رجعت ثقتي بالناس وما حا اقدر على جزاتك، القرايه انا بحبها بس ما قادرة اتحمل اكتر معاملتك لي بالرغم من انو من الاول كنت واضح معاي بس تقول شنو دة قلبي الغبي الحباك، لهنا وحكايتنا بتنتهي وانا حا اخلصك من المسؤوليه دي وتاني وشي ما حا تشوفو رسلت الرسالة والباص اتحرك.
_______________________
بلسان وفاق
همام كان نايم والتلفون كان معاي شوفت رساله من الاسما نرجس قريتها واتبسطا شديد مسحتها طوالي ورسلت ليها زي ما قولتي اني كنت واضح معاك وما عشمتك يا نرجس فيبقي ما عندي ذنب امشي محل ماشة وعليك الله ما ترجعي نهاي انا زهجت منك كنت بساعدك بدافع الشفقة لا اكتر ولا أقل ، لبست ومشيت لصاحبتي خليتها تكتب لي رساله مشيت بيت نرجس وفتحتو بالمفتاح الاحتياطي! ،ختيت الورقة قولت حا نشوف ردة فعل همام كيف!!، وكدة حا اكون اتخلصت من نرجس للأبد، اتصل بي وقال لي وين انتي؟!، قولت ليهو ماشة اشوف عروس مظفر في النهاية يا همام هو اختارها موش، قال لي تمام انتي يا وفاق بعد اساء ليك مقررة تقيفي معاه ،قولت ليهو دا ود عمي ومن زمان بحبها ما مفروض يزعلو منو عشان اتزوجها، قال لي اي المهم اتصلت بيك عشان الكرفتة البيضاء وين ،وصفت ليهو وقفلت قولت في نفسي حا امشي اشوف شهد دي عاملة كيف هل حا تكون زي وُد معاي ولا تكون طيبة، مشيت ولقيت الباب فتحت لي مرة صفراء وسمحة قولت ليها انا مرة همام اخ مظفر قالت لي اتفضلي اتفضلي اخيرا جاني زول من اسرتو اتفضلت وبقيت اتونس معاها ،قولت ليها ما كنت متوقعة انو مظفر يتزوج في وُد ،قالت لي ليه؟؟!، قولت ليها شخصيتها قوية وما كنت قايلة انو ممكن تخليه، قالت لي ما أقوى من شخصية مظفر، ضحكت وقولت ليها والله شخصيتهم واحدة! بس المهم هو حا يطلقها موش ،قالت لي ما عارفة امس قالو انو غرفتها حرقت وكانت فيها ،قولت ليها معقول ؟؟! ليه انا ما عارفة!، قالت لي همام ما كلمتك ولا يكون ما عارف، قولت ليها بكون ما عارف، وضعها كيف، قالت لي كويسة ،المهم تاني اطرقنا لكم موضوع وفي حاجات كتيرة مشتركة بينا،مشيت بيتنا وقعدت قال لي امي اها نسيبتك الايام دي معاك كويسة ،قولت ليها ما فاضية لي همها مع ولدها التاني، قالت لي بعد كدة خلي همام يمشي السعودية ويسفرك معاه ،قولت ليها انا كنت ناوية بس خربت لي امو بأنها زوجتو من نرجس.
طلعت منها ومشيت البيت لقيت ميسم تنضف طوالي جيت ولا هاميني، قالت لي لسه لين قولت ليها تعبانة انتظرك لمتين وقعت وانا ماشة وبقيت ابكي همام جاء في اللحظة دي ولاقاني على الأرض قال لي مالك؟!، قولت ليهو اختك دفرتني قاصدة!!، قرب لمسيم وقولت في نفسي حا اشوفك حا تعملي شنو بس فاجني بأنو قال الكلام دة صاح ولا غلط ممكن تحكي لي الموقف، قالت ليهو ما سالتها نهاي والله جات داخلة الأرض لينة وقعت ختت الحق لي وحتى شوف آثار الاقدام ،عاين لي وقال لي الكلام دة صاح، قولت ليهو تصدقها هي علي ،قال لي انا شايف يا وفاق بنفسي الحقيقة! ليه كذبتي؟ ؟!، قولت ليهو اناا...، ما قدرت ابرر لنفسي فعملت نفسي انو اغمى علي، لازم احسب تصرفاتي! هو زمان كان بصدقني يا اما بقيت ما شايفة شغلي ولا في زول عمل ليهو غسيل مخ، لازم استعمل معاه سياستي وزي ما بتقول امي المرة المحكنة هي البتقدر على الراجل وانا بقدر عليهو وبقدر ابعدو منهن .
____________________________
بلسان همام
الخوف الشوفتو في اختي مني وقت سالتها خوف ما طبيعي واستئت شديد من نفسي اني زرعت فيها الشعور دة من غير ما اعرف.
نرجس قالت لي انو انا لازم اسمع للطرف التاني ووممكن اكون قي مواقف كتيرة حكمت عليهن بغير ما اسمع ليهن بس هن لو اتقبلن وفاق ما كنت وقفت في صفها وكنت انصفتهن بس دايماً بشوف الكره منهن ليها.
كنت منتظر وفاق تقوم عشان افهم الحاصل منها اتصل لي سيد البقالة وقال لي رسلت ولدي الصغير يودي لي مرتك حاجات قال ماف زول فتح ليهو الباب، اتصلت بيها ماف اي رد تاني اتصلت ما لقيت رد.
قولت امشي اشوف الحاصل عليها شنو!، فتحت الباب بالمفتاح الاحتياطي ودخلت البيت كان فاضي دخلت الغرفة ما لقيت زول فتحت الدولاب لقيت كل الملابس ماف وفي رساله مكتوب فيها همام لمن تقرا الرسالة دي انا حا اكون بعدت انا ما قادرة اعيش معاك اكتر من كدة! انا ضغطت على نفسي بس والله بقيت ما قادرة اتحملك! انت مقيدني زي خالو وواحد وانا عايزة اكون حرة واعيش حياتي وما تخاف علي انا عندي قروش معاش ابوي وحا اقرا واشتغل واتعلم ولو سمحت ورقتي وصلها لي وطلقني لاني لقيت زول وحبيتو + حا تلقى قروش تحت ومعاهن زيادة واعتبر انو ديل مجهوداتك في مساعدتي وإن شاء الله ما المحك في حياتي تاني للأبد يا همام........