رواية بينهما الفصل التاسع 9 بقلم ال زهراء
إن شاء الله ما المحك في حياتي تاني للأبد يا همام!،قريت الرساله الف مرة! الخط بشبها اي بس مستحيل تكون هي! لانو انا بعرفها حق المعرفة! دا ما كلامها ولا اسلوبها نرجس مستحيل تخت لي قروش وتكتب كلام زي دة السر شنو في الموضوع!! بقيت محتار ومشيت افتش لدليل عشان بس اصل ليها واعرف الحاصل عليها شنو بس ما كان في طرف خيط واضح، نرجس ما عندها زول انا متأكد بس اكيد حا القاها واعرف الرساله دي كتبتها لشنو!!.
رجعت البيت ولمليت شوية ملابس لقيت وفاق صحصحت قالت لي ماشي وين؟!، قولت ليها نرجس مختفية ماشي افتش ليها ،قالت ليه اختفت فجاءة ولا كيف ،قولت ليها اي وخلت لي رساله بس دي ما منها هي مستحيل تكتب الكلام دة!، قالت لي ممكن اقراهو قولت ليها طيب قرتو وقالت لي هي كلامها واضح معاك وما شايفة في غلط في الموضوع البت بقت بتح.. َ،قاطعتها قولت ليها انا البعرف نرجس كويس وبعرف اذا الرساله دي منها ولا لا، قالت لي افهم شنو يا همام من كلامك؟!، قولت ليها وفاق نرجس بت نقية تحب شنو لو قالت اي حاجة تانية ممكن أصدقها بس تحب وتخلي لي قروش مستحيل! انا بعرفها!، لي قريب السنة بتعامل معاها مستحيل يبدر منها تصرف زي دة ما لم يكون في غلط!، قالت لي همام لو طلعت من هنا وبقيت تفتش ليها اعتبر البينا انتهى ،قولت في نفسي نرجس بت وحيدة انا بالنسبه ليها اسرتها فمن واجبي افتش ليها ،قولت ليها وفاق المرة دي انا ما حا اختارك اسف!، هي ما عندها زول حا يفتش ليها ولو اختفت مية سنة ماف زول بفقدها فمن واجبي القاها،بقيت طالع وهي كانت بتصرخ وتاني بقت تشد فيني من يدي نظام ما تمش فكيت يدها وقولت ليها ربنا حا يحاسبني انا حا القاها واعرف منها الحاصل فلو طلعت بتحب واحد ولا ما عايزة العيشة دي حا اخليها بس اسي انا ما متأكد اذا دي هي ولا لا لانو مستحيل نرجس تكتب كلام زي دة، طلعت العربية ووقولت زولة زي نرجس ما حا تختار حتة بعيدة لأنها خوافة شديد! ،اول حاجة مفروض اشوف الرحلات للمناطق القريبة من محيطهم!، يعني في كم قرية قبل ما تنزل قريتهم وفي كم قرية بعد قريتهم فانا لو بعرفها كويس ما حا تفوت الحتات دي ،اول شي اشوف الحجز للمدينة الجنبها قريتهم مشيت عشان اشوف اسمها كان ماف في كل السجلات، قولت لروحي معقول انا حللت غلط ولا يمكن زول استغلها، اي يمكن لأنها هي ما فاهمة للدنيا حاجة بت كانت مقيدة في البيت وما عارفة المجتمع القذر عامل كيف، بقيت متوتر وقولت احتمال شبكة اجرامية كتبوها الرسالة دي! هي اصلا قاعدة في البيت براها!، بقيت افكر لمن حسيت انو مخي عايز يطرشق!.
انا بكرة نفسي عشان طول الفترة الفاتت كنت بعيد منها وما عارف ليها اي حاجة!، ولا عارف حياتها طول المدة الكنت فيها ما شغال بيها!، ركبت العربية وبقيت اضرب في الدركسون بغضب ماف اي طرف خيط غير الرساله دي، التلفون حقها مقفول!!، فكرت وفكرت وقولت حا امشي لوُد احتمال عارفة عنها حاجة لمن مشيت لقيتها في المستشفى ماف وعرفت انو خرجوها صادفني مظفر داخل المستشفى قولت ليهو لو ماش لوُد اتخرجت ،قال لي ايوا تمام وكان متحرك لحقتو وقولت ليهو ساعدني ؟! ،عاين لي في شنو؟!، قولت ليهو نرجس ماف ليها اي أثر!، قال لي عملت ليها شنو!؟؟؟، قولت ليهو ما عملت ليها شي، قال لي متأكد في زول بخلي البيت ويمشي بدون اي سبب ! ،قولت ليهو مظفر من الاخر كدة لاني ما فاضي عايز تساعدني ولا لا، قال لي عشان نرجس ما عشانك!، قولت ليهو طيب تمام بس كيف بنقدر نلقاها ،قال لي حا ننشر منشور ،قولت ليهو بغضب لااا،قال لي البلد واسعة تعرفها كيف ؟!!، قولت ليهو بفتش لي اي طرف خيط وبلقاهو، قال لي طرف الخيط دة أسهل بوسائل التواصل! ،قولت ليهو لا، قال لي لا انت بتغار عليها ولا شنو ما عايز زول يشوف صورها ؟؟!، قولت ليهو مظفر المواضيع ديل ما وقتهن انا مرتي ضايعة ما لاقي ليها اي مكان لو كنت مكاني كنت حا تعمل شنو؟؟!، قال لي وُد اعقل من انها تعمل عملة زي دي تاني ارتبك وقال لي اسمع انا عندي صاحبي شرطي حا نشوف لو بنقدر نشوف وينها من شريحتها، قولت ليهو دا حا ياخد وقت لازمنا حل سريع زي وُد مثلا، قال لي وُد لو عارفة صدقيني ما حا تكلمك انا بعرفها ،قولت ليهو الحل شنو ؟!، قال لي بس ما تخلي نطاقك ضيق واتوقع الما متوقع وبتلقاها، قولت ليهو يعني اتوقع انو هي اتمادت ومشت حتة ابعد قال لي اي بس دا المطلوب مع السلامة وراي شغل، قولت ليهو شكراً، قال لي العفو بس لو لقيتها حاول تحافظ عليها خسارة الزول البتهتم بيهو صعبة، قولت ليهو انا ما مهتم بيها انا بس عايز اطمن عليها ضحك وقال لي نفس الحاجة المهم انا بساعدك فلو لقيت أي خبر حا اكلمك يا همام وانتي زاتك كلمني بالحاصل ،قولت ليهو طيب.
مشيت تاني الميناء البري وبقيت افتش في كل المدن تقريبا ما لقيت ولا حاجة! في النهاية قررت امشي لاخر مدينة وقولت في نفسي لو ما لقيتها هناك بكلم الشرطة خلاص، بقيييت اقرا الاسامي واحد واحد لحدي ما صادفني اسمها، مشت القضارف ليه ؟؟! هل عندها زول هناك ولا حا تنزل قبلها اها انتي يا نرجس فوتي المتوقع ومشتي لغير المتوقع راسي شطب وما قدرت اجمع الأحداث!، القضارف طرف الخيط بس وين بالضبط ما عارف!.
فتشت ليها قريب الشهر في المدينة زاتها بس ما لقيتها نهاي، قولت معناتو نزلت في حتة قبلهاا!، بقيت مستاء شديد وما عارف اعمل شنو الخوف من انو حاصلة ليها حاجة بقى مسيطر علي وخاصة بعد عمليات الخطف البقت منتشرة، بقيت اتصفح في الفيس على أمل المح منشور ولا حاجة توصلني ليها.
صادفني بوست مسابقة وبالغلط انفتح وكان في القضارف زاتها لناس ابو مؤمن اسمارت.
شوفت نرجس وراء الراجل الكان ربح الجائزة ،شوف التعليقات لقييت اسم الحي!!، قلبي طار من الفرح وقولت في نفسي دي دعائي استجاب الليله! ،بقيييت لاف الحي بيت بيت وبسال وجاء مظفر معاي اليوم التاني واتقسمنا على الحي في النهاية اتصل بي وقال لي لقيت لي مرة قالت بتعرفها!!، وصف لي المكان مشيت ليها قالت لي البت دي جات مع قريبتي في قرية ... عشان يشترن سعف وبيتن وفاتن ،قولت ليها قريبتك اسمها منو ؟!، قالت لي اسمها آمنة، قولت ليها امنة زكريا ،قالت لي اي بتعرفها من وين ؟؟!، قولت ليها دي كانت شغالة هنا في الجامعة بس اخدت معاش في الفترة الفاتت، قالت لي اي! هي كانت محتاجة الشغل لدرجة اتغربت ليهو وقعدت مع الموظفين هناك! بس طلعوها معاش مبكر عشان حالتها الصحية واسي جات تعمل ليها مشروع وقالت ما بقعد ساي، قولت ليها طيب القرية دي وين بالضبط ،قالت لي والله ياخ نص ساعة من هنا قريبة شديد ،قولت ليها تمام.
مظفر قال لي حا ارجع اناا بعد كدة انت لقيت مرتك بس احلق دقنك واتعلم حافظ على الحاجات المهمة ليك ،قولت ليهو انا ما عايز نصيحة من واحد ما مطبق الحاجات دي ،قال لي قصدك شنو يا زول!؟؟!، قولت ليهو وُد ما مهمة بالنسبه ليك وخليتها وما قدرت تحافظ عليها ،قال لي موضوع وُد دا انا قفلتو خلاص! بس ابوها مصر اديها فترة وانا كنت عايز اتكلم معاها بس حصلت الحادثة فكنت عايز اخليها تاخد راحتها وافتح الموضوع تاني ،قولت ليهو والله يا مظفر ما كنت متوقع انك تتخلى عن حاجة بالسهولة دي، قال لي هي الاختارت الخيار دة وانا ما حا اجبرها،قولت ليهو خايف تكرهكك! اتنهد وقال لي أصلها بتكرهني بقت شوفت الحاجة دي في عيونها، جاهو اتصال طلع منها!! حسيت انو ملامحو اتغيرت شديد ورد سريع وقال الووو ودُ ،ما كان في رد نهاي وقفلت الخط في وشو رجع اتصل الرقم مغلق تاني اتصل الرقم مغلق، قال لي وُد اكيد حصلت معاها حاجة ،ركب عربيتو وكشاها ،قولت في نفسي مفروض يعرف انو الاهتمام جزو من الحب.
انا اتحركت طوالي للقرية وبعد مسافة وصلتها نزلت شفع الحلة كلهم اتلمو فيها! ،قولت لواحد فيهم بتعرف بيت واحدة اسمها آمنة، قال لي آمنة منو، قولت ليهو زكريا، قال لي اي هناك ،لمن وصلت البييت كان مبنى من طوب أخضر فيهو غرفتين وغرفة مفصولة براهو! ،الخالة آمنة ضيفتني الشاي طوالي سالتها من نرجس! عاينت لي وقالت لي ما اكذب عليك يا ولدي هي ما عايزة تشوفك وشوفت مما لمحت عربيتك برة ادست في الغرفة التانية، قولت ليها انا عملت ليها شنو ،قال لي الحاجة دي يا ولدي بتعرفها انت ما بعرفها انا، قولت ليها ما حكت ليك، قالت لي بري والله ما حدثتني باي كلام، قولت ليها اسي في اي غرفة شايف في غرفتين، قالت لي المفصولة براها بس لو كوركت فيها وقسماً بالله العكاز دة بجيك في نص راسك ضحكت ومشيت وفتحت الباب كانت مسرحة ضفرتين ومتلفتة فجاءة حركت راسها باتجاهي عشان حست بالباب فتح لمن لقتني انا طوالي اتلفت مني! ،ما عرفت اعمل شنو ولا اقول ليها شنو حمدت رب العالمين في سري انو لقيتها!!، اتنهدت تنهيدة كبيرة وجيت بعليها بهناك وقعدت في الأرض وهي كانت فوق السرير مسكت يدها وبوستهن قولت ليها نرجس عارفة قلقتي بي قدر شنو!، الدموع كانن بجرن منها ،تاني قالت لي ما تمثل علي انت موش قولت ما ترجعي نهاي انا زهجت منك، قولت ليها قولت متين ما قولت اي حاجة ،ورتني الرسائل قولت ليها احلف ليك بالله الاعظم انها ما مني!!!، قومتا وقعدت جنبها ولفتها علي وقولت ليها ليه انا اعمل في طفلتي كدة!!، قالت لي لو انت معتبرني طفلتك ما كنت سفهتني يا همام،قولت ليها انا ما قاصد اسفهك بس ما شوفت من الضرورة اني اجييك ،قالت لي وهي بتتنهد يلا انا ما عايزة العيشة دي كل مادياتك ما بتغنيني عن شوفتك صاح زواجنا بالاجبار بس انت خليتني اتعلق بيك وبقيت ما عايزة قرايه بقدر ما عايزة منك اهتمام انت اسرتي كلها اعرف.
صاح دي انانيه مني بس دة قلبي اعمل ليهو شنو واسي اخترت ابعد عشان مشاعري دي تهدأ وعشان انا الضغط علي كتر!!!، قولت ليهو دة سببك الوحيد قالت لي اي انت ما قريت الرساله الرسلتها ليك ،قولت ليها قصدك اي رساله، قالت لي دي، قريتها كان مذكور فيها انو هي بتحبي!!، قولت ليها الكلام دة حصل متين يا نرجس، قالت لي ما عارفة انا اسفة شديد ما من حقي....، قاطعتها وقولت ليها لا من حقك يانرجس انا اسف اني قسيت عليك طول الفترة الفاتت ضميتها علي وقولت ليها اكيد بتكوني حسيتي بالوحدة وكل شعورك الزمان رجع ليك! انا بعتذر انو كنت اناني معاك! غلطان اني خليتك براك!، انتي خاته لي مكانة كبيرة وانا ما كنت شغال بيك.... انا اسف تابعت انتي بالنسبه لي يا نرجس ما بس مسؤوليتي انتي طفلتي الصغيره يلي انا بنسبط بشوفتها وما بتحمل فيها حاجة،قالت لي عارفة بس خجلانة من نفسي لاني ما مفروض احبك، قولت ليها الحب ما عيب يا نرجس وحبي انا ما خطيئة في النهاية انا زوجك وكونو تحبيني دة حاجة طبيعية لانك شوفتي الاهتمام مني وبعد تتخرجي وتشوفي حياتك حا تفهمي انو دة مجرد شعور عابر....، قالت لي بغضب لا انا شعوري ما عابر حا افضل احبك لو حبيتني ولا لا ما فرقت، عاينت ليها وقولت ليها طيب حا نتناقش في الموضوع في البيت ،قالت لي ما عايزة امشي معاك دة بيتي وانا شاعرة للانتماء هنا ،قولت ليها لالا بيتك معاي، قالت لي صعبة يا همام بقت لو سمحت خليني قامت وبقت متحركة وطلعت حسيت بشعور غريب! كان اسي معاي وحالياً بعدت! اعمل شنو؟؟!.
بالمساء كدة جاب لي خالتو العشاء وقالت لي انتو مالكم؟!! حكيت ليها اي حاجة ،قالت لي اها انت متأكد ما عندك مشاعر ليها ؟؟!، قولت ليها لااا، قالت لي طيب طلقها في واحد من الناس الهنا...، قاطعتها وقولت ليها ما تتدخلي ليها الأفكار دي في راسها انا حا اسوقها معاي! وما بطلقها لاي سبب. ضحكت وطلععت اتصلت بميسم اختي وحكيت ليها عشان هي حكيمة ،قالت لي طيب يا همام ما تحاول تتقربو من بعض انت جيت كل المسافة دي عشانها فاكيد عندك مشاعر ليها، انت موش حسيت بالضيق لمن كانت ماف، قولت ليها اي، قالت لي واسي لمن لقيتها اكيد حسيت انك ملكت الدنيا ،قولت ليها ايوا، قالت لي يبقى دة الحب، قولت ليها تفتكري انو ما حا اندم عشان خنت وفاق ،قالت لي دي ما خيانة نرجس زوجتك ودي من حقوقها عليك لو دايرها ترجع حسسها انك مهتم بيها واتقربو من بعض وانت معاها، قولت ليها طيب مع السلامه.
بالمساء كدة وانا بفكر خالتو جابت لي العشاء وقالت لي نرجس برة نايمة والحوش دة حوش مفصول حق اخوي وهو ماف حاليا فاخدو راحتكم ، بعد مصارعة مع نفسي مشيت ليها وحاولت اتكلم معاها ما اشتغلت بي رقدت جنبها التفت مني قولت ليها نرجس انا بعتذر على كلامي القبيل!، انتي غاليه علي وجيت كل المسافة دي عشان بس القاك فيبقى انتي كمان مهمة عني واحتمال انا زاتي كمان بحبك!!!!!، اتلفت علي وهي مصدومة قربت منها شديد بس خجلت و بعدتني منها وقالت لي يا همام في حاجة مهمة لازم تعرفها عني.........
________________________
أنا وانت ...
نشبه الحرب والسلام ٠لا نلتقي ولا نفترق...
كلانا يبحث عن الآخر وكلانا عشقنا بجنون...
الهدنة بيننا حفنة أحلام وأغاني وقصائد لا تنام...
اختصارها سنبقى معلقين..
انا بداخلك وانت بداخلي...
انها الأقدار من خطت أمرنا...فضاق على وسع الزمان لقاؤنا
لا القدر يجمعنا ولا البعد يفرقنا...
ما كان البعد زهدا بيننا وكيف أزهد فيك وأنت أنا...
هو حب خلق ليبقى رغم البعد...
رغم إستحالة اللقاء .! رغم وجع البعاد ...
رغم الكبرياء ... ورغم الأمل المفقود ...
يبقى فقط لأنه خلق ليبقى ...
وسأبقى أحبك دائما...🌸✨