بسم الله توكلت علي الله. وهو رب العرش العظيم
خلصت حلقة امبارح علي عربية دياب وهي بتعمل حادثة وجوة منها زينه. ،،،،،،
والنهاردة هنبتدي من جوة مستشفي وزينه بتفتح عيونها بصعوبه والدكتور قدام منها وبيقول لها
حمد لله علي سلامتك.
بصت له زينه بصعوبه لان عيونها كانت مزغلله وقالت
انت مين. وانا فين
الدكتور
انتي في المستشفي.
بدات زينه تتعدل وتبص حوالين منها تستوعب المكان وقالت بصعوبه
هو اية اللي حصل علشان اجي هنا
الدكتور
انتي مش فاكرة الحادثة
زينه بصعوبه
حادثة اية.
بص لها الدكتور بتركيز شديد. وقال
الحادثة. العربية النص نقل اللي دخلت في عربية الزفة بتاعتك
زينه وهي بتحاول تفتكر اي حاجة فقالت
انا مش قادرة افتكر اي حاجة من اللي انت بتقوله دة
الدكتور
تقدري تقولي اسمك اية
زينه
اسمي.
وسكتت زينه لانها كانت مش فاكرة اسمها قال لها الدكتور
مش فاكرة اسمك.
هز زينه دماغها يمين وشمال. بعلامه معنها انها فعلا مش فاكرة. وقالت
مش قادرة افتكر
الدكتور
واضح كدة ان الخبطة اللي خديها في دماغك سببت لك فقدان في الذاكرة.
زينه
يعني اية. هعيش ناسية انا مين
الدكتور
باذن الله تكون لفترة مؤقته. انا دلوقتي هسيبك واروح اطمئن علي الشاب اللي جه معاكي في الحادثة
زينه
هو في حد كان معايا وقت الحادثة
الدكتور
شاب. وطالما كان معاكي في العربية يبقي اكيد يعرف انتي مين. بعد اذنك
وخرج الدكتور من عند زينه وراح ل دياب اللي كان بيحاول انه يقوم لكن الممرضة بتمنعه وهي بتقول
انت الحركة غلط عليك دلوقتي.
دياب اللي كانت اصابته في منطقة الظهر بيقول بعصبية
يا ستي انتي مالك انا عايز اموت. انا حر
هنا الدكتور قال
لا. مش حر طالما انت عندنا في المستشفي فلازم تسمع الكلام علشان تخرج من هنا علي خير
دياب
هو في اية انا في سجن
الدكتور
ممكن افهم انت عصبي لية كدة.
دياب
مش عصبي بس انا ما بحبش المستشفيات ممكن بقي تسيبوني اخرج من هنا
ويحاول يقوم بالعافية من علي السرير وهنا يحس بوجع في ظهرة فيتوجع ويرجع يفرد ظهرة تاني فيقول له الدكتور
كويس كدة لما الوجع اللي في ظهرك قام عليك
دياب
هو انا عندي اية بالظبط
الدكتور
كدمة شديدة في اخر سلسلة الظهر ما تقلقش هتبقي كويس بس تسمع الكلام. انما الانسة اللي كانت معاك هي اللي حكايتها حكاية
دياب باستغراب
انسة مين
الدكتور
العروسة
دياب بخضة لتكون قالت للدكتور علي حقيقته وعلي اللي كان عايز يعمله
هي لسة عايشة
الدكتور
الحمد لله عايشة بس ناسية كل حاجة
دياب
تقصد تقول انها فقدت الذاكرة
الدكتور
الله ينور عليك
دياب
بس كدة
الدكتور
يعني اية بس كدة
دياب
يعني ما حصلهاش حاجة تاني. زي كسر. في الحوض. رقبتها اتقطمت مثلا. كدة يعني
الدكتور ضاحكا
يعني لو رقبتها بقيت مقطومة هتبقي عايشة ازاي بس
دياب
انا عارف بقي.
الدكتور
هي تبقي لك اية
يفكر دياب للحظات ثم يقول
مراتي
الدكتور
مراتك.
دياب
اة اومال اية. كنت واخدها ورايح بيها فرحنا بس الحادثة بقي قلبت الحكاية
الدكتور
بس ازاي تكون عريس ولابس قميص وبنطلون عادي كدة
دياب وهو بيبص لهدومة
اة. اصل انا كنت حابب ابقي عريس كاجوال كدة. حاجة. جديدة يعني
الدكتور
صحيح اللي يعيش ياما يشوف. عريس كاجوال
دياب
مش مهم انا دلوقتي المهم سمر
الدكتور
سمر مين
دياب
العروسة بتاعتي
الدكتور
اة. هي اسمها سمر. مالها بقي سمر
دياب
ممكن الذاكرة ترجع لها تاني
الدكتور
واضح من التشخيص المبدئي ان الخبطة كانت جامدة جدا في دماغها من الخلف وبالتحديد في المكان المخصص للذاكرة ودة ممكن يخلي رجوع الذاكرة تاني ليها يكون في وقت. المهم انك ديما تحاول تفكرها باللي كان وتحكي لها كتير عن ذكرياتها وتوديها للاماكن اللي اتربت وكبرت فيها وبكدة نقدر نخلي مركز الذاكرة عندها ينشط
ابتسم دياب بخبث وقال
اوي اوي
وقال في سرة
دة انا مش هعمل الا عكس كدة. واهو حلوة لعبة انها مراتي اخدها واجهزها للشغلانه اللي كانت هتعملها البت سمر قبل ما يتقبض عليها وبعد كدة ابقي اخلص منها. اصل حرام بصراحة شغلانه زي دي تروح مني ولازم بت في الحكاية علشان تكمل القصة. واهي جت البت
ويسكت للحظات ثم يقول في سرة
بس دلوقتي اكيد ابوها هيعرف باللي حصل من جثة محمود يبقي لازم اخفي جثة محمود. ويبقي قدام الخلق محمود وزينه في السعودية. بس اعملها ازاي دي وانا مش قادر اتحرك من ظهري.
وبدأ يفكر للحظات وهنا قال في سرة
صدام التربي.،،،،،،،،،،،
ومن جوة اوضة وسط المقابر يقعد صدام والشيشة في بوقة. مع مراته نحمده وكان بيقولها وهو خربان مسطول
يا ولية قومي ارقصي خليني افتكر ايام زمان يمكن ارجع اشوفك واحدة ست زي الاول
نحمده
جسمي مكسر و بردان
صدام
اية هو اللي بردان
نحمده وهي بتاخد نفس من الشيشة
جسمي
صدام
طيب عايز افتكرك. اقول لك ارقصي بالية
نحمده
بالية زي نيلي كريم
صدام
ايوة هو دة.
نحمده
بلاش البالية. انا هفكرك بطريقتي الملعونه
ضحكت نحمده وقالت
افتكرت كدة
صدام
لا
نحمده ضحكت بصوت اعلي
هه افتكرت كدة
صدام
لا. اطرشت
نحمده
مالك يا صدام
صدام
ضحكتك عالية اوي يا نحمده. والميتين بيشتكوا منها يا ولية
نحمده
دلوقتي ضحكتي بقيت وحشة. خلاص مش دي اللي كانت بتولع في قلبك نار الشوق
صدام
قلبي خلاص بقي محمص من كتر النار
نحمده
محمص فؤاد
وضحكت تاني فقال لها صدام
وربنا لو قولتي افية تاني من الافيهات المشمومة دي لعملك بلوك من حياتي. وقومي ارقصي بقي خلي الايام الحلوة ترجع
نحمده
خلاص هرقص. بس لو ما كنتش عصبي
وقامت نحمده ترقص وصدام بدأ يسقف لها وخدها في حضنة وهو بيقول
افتكرتك يا صايعة
ولسة هيبوس رن الموبيل بتاعه قال
افصلني بقي
نحمده
ما تردش بقي
صدام
ما قدرش دة تيلفون المصالح
وطلع صدام الموبيل بتاعه ولقي رقم دياب رد وقال
اية
دياب
عايزك. ،،.،،،،،.،،،،،،،
ومن جوة الصحراء تمشي عربية نص نقل جوة منها صدام وكان معه صبي من الصبيان بتوعه اسمه خشاب. وكان صدام بيتكلم في الموبيل مع دياب وبيقول
وصلت اهو المكان وهبدأ اشوف صاحبنا دة. اهدئة علي امي بقي
ويسكت صدام للحظات ويقول
ما فيش اي حكومة والدنيا هادية.
ويسكت للحظات ويقول بعصبية
بندور يا دياب بندور
وهنا تقع عيون خشاب علي جثة محمود فيقول
الجثة اهه
وشاور خشاب ناحية الجثة فقال صدام
لقينا الجثة يا عمنا. اقفل بقي وسيبني اتعامل
وهنا يظهر راجل عجوز قدام منهم فجاة فيدوس خشاب فرامل ويقول صدام للعجوز
جري اية يا جدع انت.
راح الراجل العجوز ناحية الشباك اللي جنب صدام وقال
انتو مين وجاين لية هنا في ساعه زي دي
صدام
وانت مالك. يا حشري كنت امين عام الصحراء
العجوز
قولي بس جاي هنا لية يمكن اقدر اساعدك
صدام
جاي اصطاد بط.
وبص صدام ل خشاب وقال
اطلع يا خشاب
الرجل العجوز
احسن لكم تمشوا من هنا لان البوليس علي وصول والدنيا هتخرب
وبعد ما كان مشي خشاب بالعربية رجع تاني وبص صدام للعجوز وقال
والبوليس جاي لية
العجوز
اصلي لقيت جثة واحد مقتول فاتصلت بيهم
صدام بعصبية
يا فرحة امك بيك.
وهنا يسمع صدام صوت سرينه البوليس فبص وراء منه وشاف كذا عربية شرطة داخلة عليهم فقال ل خشاب
اطلع بينا بسرعه من هنا
ومشي خشاب بالعربية وبمنتهي السرعه، ،،،،،،،،،
وتاني يوم كانت غزل بنت خاله زينه في دوار صلاح وبتصرخ وبتعيط قدام صلاح اللي كان منهار وبيقول
ياتري يا زينه يا بنتي حصل لك اية.
غزل
كلم كل معارفك في الدخلية يقلبو عليها الدنيا
صلاح
كلمتهم والدنيا مقلوبه
غزل
يا حبيتي يا زينه كل دة يحصل لك في ليلة فرحك
صلاح
انا لازم انزل بنفسي القاهرة وادور عليها
غزل
هتدور عليها فين بس. هي القاهرة دي شارع
صلاح
يعني افضل قاعد كدة
غزل
لازم نصبر يا عم صلاح لغاية ما نشوف البوليس هيقدر يعمل اية، ،،،،،،،،،،
ومن جوة المستشفي يقعد صدام قدام دياب وكان بيقول له
ايوة الحكومة دخلت في الحكاية وعرفت من الناس اللي ليا ان ابو البت دي راجل تقيل والدخلية كلها مقلوبة ودول مش هيهمدوا الا لما يوصلو للبت
دياب
البت دي لازم تمشي من هنا
صدام
ما تمشي انت يا خويا وريحني وريح نفسك حتي لما يوصلو لبها تكون انت بعيد
دياب
وافرض رجعت لها الذاكرة توصفني للدخلية واروح في ابو بلاش
صدام
انت هتحير امي لية معاك. قولي عايز اية
دياب
البت دي هتبقي سمر وتنفعنا في سرقة قصر الجواهرجي جرجس يوحنا
صدام
انت لسة بتفكر في جرجس
دياب
ودة يتنسي دة عنده الماظ في خزنه القصر يساوي 50 مليون ج. دي الخبطة اللي بعديها اعتزل
صدام
وهتخلي البت دي ازاي تبقي سمر
دياب
عملية تجميل نغير لها ملامحها وتبقي من زينه ل سمر
صدام
يخرب بيت دماغ امك.
دياب
ماما قوت القلوب. اللي يرحمها
صدام
امك كان اسمها قولقاسة. خليتها قوت القلوب
دياب
نسيب بقي سمر ونقعد نحكي في اسم امي
صدام
طيب عايز مني اية
دياب
اخطفها ووديها عندك وانا هخرج من هنا واجي لك
صدام
سهلة وكدة حسابنا يبقي 30 الف بلبل
دياب
لية يا صدام يا حرامي
صدام
مشوار امباراح نسيتو
دياب
يا ضلالي هو تم
صدام
انا مال اهلي يتم ولا ما يتمش دة انا سيبت نحمده بعد ما افتكرتها وروحت اقضي المصلحة اعمل لك اية تاني
دياب
ماشي يا صدام يا حرامي 30 الف. بس الحساب بعد ما تخلص حكاية جرجس
وهنا يسمعوا صوت سرينه البوليس تحت في الشارع فقال صدام ل دياب
الحكومة وصلت يا ابن المنحوسة
دياب
اتصرف. بسرعه
صدام
عيني بس كدة
وجري صدام خارج من الاوضة ودياب بيقول
بتجري يا جبان
وسمع صوت الظابط والعساكر وهما بيسالو عن الاوضة المحجوزه فيها زينه وفعلا راحو ناحية الاوضة وفتحوا الاوضة علشان يلاقو،،،،،،،،،،،،،،،،