رواية اعتراف قبل الموت الفصل الاول 1 بقلم ياسر عوده
-اسمعيني يا دكتوره انا عاوزه اعترف بحاجه ضروري.
-انا مش عاوزاكي تتكلمي خالص يا مدام هدي، عوزاكي ترتاحي وتسبيني اشوف شغلي.
-مافيش وقت يا دكتوره خلاص، انا عارفه ان دي النهايه، علشان انا عارفه اني بيتحطلي السم من فتره، مافيش فايده مهما تعملي، والافضل تسمعيني وانا بعترف علشان يمكن لو اعترفت اخفف من الحساب اللى هتحسبه لما اقابل ربنا.
-انتي عارفه نوع السم اللى خدتيه ايه؟
-يا دكتوره خلاص مافيش فايده، ده سم صناعي ومش هتقدري تعملي حاجه يبقى اسمعيني انا تعبت.
اتنهدت لما هي قالتلي الكلام ده واخيرا استسلمت ل ألحاحها عليا، وقولتلها:
-طيب اتكلمي وانا سمعاكي وفي نفس الوقت هديكي عقار يمكن يقدر يقلل من تأثير السم اللى وخداه ونقدر نلحقك.
-انتي بردوا مصممه يا دكتوره، على العموم اعملي اللى تعمليه، المهم انك تسمعيني وخلاص، علشان الكلام اللى انا بقوله دلوقتي هتقوليه للشرطه لما تحضر.
-اتكلمي انا سمعاكي.
-انا هحكيلك على حكايتي كلها، وهعرفك مين اللى قتلني وحطلي السم في العصير علشان يخلص مني.
-انتي تعرفيه، طيب قوليلي اسمه علشان ابلغ الشرطه عليه يمسكوه.
-مافيش داعي يا دكتوره اصله مات فعلا.
-ازاي يا مدام هدي، لو هو مات ازاي هو اللى سمك؟
-علشان تفهمي كل حاجه انا هحكيلك حكيتي من البدايه، وارجوكي ركزي علشان تحكيها زي ما انا قولتها قدام الشرطه.
-طيب قولي انا سمعاكي ومركزه اوي كمان.
-الوحده مننا لما بتستمع للشيطان بتبقى اخرتها زي اخرتي، اهو انا نايمه على السرير في المستشفى ومستنيه ملك الموت في اي لحظه، وكل اللى حصل ده كان بسبب اني استسلمت لرغباتي وفرطت في شرفي، والبدايه كلها لما كنت شغاله في صيداليه في القريه اللى عايشه فيها، انا كنت لسه صغيره يدوب خلصت الاعداديه ودخلت مدرسه ثانوي تجاري، ووقتها طلبت من ابويا اني اطلع اشتغل، وعلشان احنا من الارياف رفض اني اشتغل خالص، بس قدرت امي تقنعه يوافق لما عرف اني هشتغل في صيداليه، وفهمته اني هتعلم ضرب الحقن وكمان اسامي الادويه واكيد الحاجات دي هتفدني بعدين، وكمان قالتله ان الفلوس اللى هخدها هساعد في تجهيز نفسي علشان لما يجيلي ابن الحلال ساعتها اكون جاهزه من كل شيء.
وافق ابويا لما امي قالتله الكلام ده، وفعلا روحت اشتغلت في صيداليه دكتور كبير في السن عندنا في القريه، وعلشان انا كنت حابه الشغل فكنت شاطره اوي وقدرت اتعلم حاجات كتير في وقت قليل، ومرت الشهور وابتدى الناس تعرفني، وكمان كان في ستات كتير بتطلب مني اروحلها البيت اديهم حقن علشان بيتحرجوا يجوا يخدوها في الصيداليه علشان الدكتور موجود، وكان الدكتور عزيز صاحب الصيدليه بيسبني اخد حق ضرب الحقن دي وكان بيقولي انتي شاطره وتستاهلي كل خير.
انا كنت بقعد مع الدكتور عزيز وقت طويل اوي وعرفت منه حاجات كتير في الشغل وكنت بشوفه اوقات وهو بيعمل تركيبات سم صناعي للكلاب السعرانه لو حد جه وطلبها، اصلنا في الوقت ده كان منتشر عندنا موضوع الكلاب اللى كانت بتخطف الطيور من العشش، ده غير القطط وكمان العرس، فكانوا بيجوا يطلبوا منه يعملهم سم صناعي مالهوش لون او طعم او ريحه علشان الحيوانات دي ماتشمهوش وتاكل من الحاجات اللى محطوط عليها السم، وماكنتش عارفه ان هيجي عليا يوم من الايام هستعمل الى اتعلمته من الدكتور عزيز.
بعد حوالي سنتين انا قابلت رمزي اول مره، وده كان صنيعي فاتح ورشه لصناعه المطابخ الالمونتات، واول مره شوفته فيها كان جاي الصيدليه وكان الدكتور عزيز مش موجود، ماكنش جاي ياخد علاج معين لا كان جاي بيشتكي من حاجه وجعاه وعاوز الدكتور يديله اي علاج للوجع ده يريحه، ولما شافني اشتكالي من الوجع وطلب مني اشوفله اي علاج عندي، ومش هخبي عليكي، اول لما شوفته عجبني، وعلشان كده اتحرجت اقوله استنا الدكتور عزيز، اصله كان بيتوجع اوي وقتها، وانا كنت شغاله من فتره وكان عندي خبره في الادويه، وفعلا جبتله علاج وطلبت منه ياخده، وخد العلاج ودفع تمنه ومشي.
في البدايه افتكرت اني مش هشوفه تاني، بس تاني يوم جه الصيدليه، وكنت لوحدي بردوا، وساعتها لقيته بيشكرني على العلاج اللى ادتهوله، ولقيته بيفتح معايا كلام، وعجبني كلامه وفتحت معاه الكلام انا كمان وضحكنا مع بعض ومشي، ولقيته بيجي بشكل يومي، والغريبه انه كل مره بيجي فيها بيبقى الدكتور عزيز في بيته بيتغدا، بس اللى عرفته منه بعد كده انه كان بيستنى لما يمشي الدكتور عزيز وساعتها كان بيجي الصيدليه ويتحجج باي حاجه او ياخد اي علاج علشان يقف ويتكلم معايا، وهو بنفسه اعترفلي بالكلام ده، وعجبني اعجابه بيا، وخدت رقمه وخد رقمي ومن يوميها واحنا على اتصال، وعلشان سني كان لسه صغير شويه كان عندي 16 سنه بس فضلنا علقتنا ببعض لمده سنتين، وبعد السنتين طلب انه يتقدملي ويتجوزني، ولما راح اتقدملي اهلي وفقوا عليه، اصله كان عريس مايترفضش، احواله الماديه ممتازه وكمان شكله حلو ومقبول، ووفقوا اهلى وانا كنت فرحانه بيه، واتقدملي وخطبني، وفي وقت الخطوبه كنت حريصه اني ماتجوزش معاه علشان يعرف اني محترمه ويتأكد اني استاهل ابقى مراته ويأمني على شرفه وعرضه، ومرت فتره الخطوبه واللى ماكنتش كبيره، كانت اقل من سنه، ولما اتجوزنا انا اتصدمت اكبر صدمه في حياتي، وكانت من ليله الدخله، اصل رمزي ماكنش كويس من نحيه العلاقه الزوجيه، ماكنش بالشكل اللى تتمناه اي وحده، وفي البدايه افتكرته مرهق وتعبان من الفرح، بس الموضوع اتكرر اكتر من مره، وكل مره ماكنتش مبسوطه معاه، بس هعمل ايه قبلت بنصيبي.
بعد كده انا طلبت من رزي يستخدم المنشطات، وهو وافق وكان بيستخدمها وبقت تعمل مفعول كويس اوي، بس بمرور السنين موضوع المنشطات مابتبقاش بفاعليه زي الاول، وده بسبب ان الجسم بتتعود عليها وبيكتسب مناعه منها، وعلشان كده المنشطات مابقتش زي الاول معاه، ومع الوقت كانت عديمه الفايده، بس وقتها كنت خلاص خلفت منه اتنين، وكنت ديما بحاول اقنع نفسي ان ده نصيبي، وكمان بقول اني لازم اهتم بالبيت والعيال وافكر في مميزات رمزي، اصله الحقيقه كان شخص كويس اوي، ماكنش مخليني محتاجه حاجه ومكفي البيت من كل الطلبات، وفضلت اقنع نفسي بكل الكلام ده لغايه لما لقيته في يوم جاي وجايب واحد صحبه معاه، الشخص ده كان اسمه احمد، وعلى فكره رمزي عمره ما فكر يجيب حد معاه البيت ابدا، ومش عارفه هو ليه جابه، والمصيبه انه ماقليش انه جاي ومعاه ضيف، واللى حصل انه دخل مع الضيف الشقه وكنت لابسه لبس البيت وشعري باين، وصحبه شافني وقتها، طبعا انا جريت ودخلت اوضه استر نفسي، بس انا عارفه انه شفني، وبعد ما غيرت هدومي وخرجت لقيت احمد ده بيبصلي بصي خلت كل جسمي يترعش من بصيته، ورغم ان دي حاجه المفروض تضايق اي وحده ست متجوزه ومحترمه، بس انا مش عارفه ليه ماحستش بده، بالعكس حسيت ساعتها بنفسي وبجمالي، المهم ان احمد ده مانزلش عينه من عليا، وجوزي رمزي ولا كان هنا، ماكنش منتبه خالص لنظرات صحبه احمد، واللى خلتني انشغل بيه ومش فاهمه السبب، وعلى فكره انا وقتها كان عندي 30 سنه، واحمد ده وقتها مايكملش 20 سنه، يعني كان اصغر مني ب 10 سنين، بس نظرته وعينه كان يندب فيها رصاصه زي ما بيقولوا.
لما احمد مشي حسيت اني مش طبيعيه، انا افتعلت خناقه مع رمزي جوزي، وماكنتش عارفه ايه السبب، انا اتخانقت معاه وخلاص.
زياره احمد مع رمزي كانت بتكتر، وكل مره كان بيجي فيها لازم اتخانق مع رمزي جوزي، اعمل ايه انا اول لما بشوف احمد ونظراته ليا كنت بحس باني مش طايقه رمزي وعاوزه اتخانق معاه، وفي يوم اتكلمت مع رمزي عن احمد، طبعا بطريقه غير مباشره، كنت عاوزه افهم ايه طبيعه الصداقه بنهم، وليه بيجيب احمد ده البيت، يعني رمزي عمره ما بيدخل اي حد بيته، اشمعنا احمد ده يعني دون عن الناس كلها، ووقتها عرفت منه حاجه عمري ما كنت اتخيلها، احمد ده قدر يقنع رمزي انه ليه في موضوع السحر والاعمال، ومش عارف هو قدر يقنعه كده ازاي، رغم سنه الصغير بس كان بيقدر يتكلم كويس، واقنع رمزي انه معموله عمل، وطبعا العمل ده هو سبب الضعف اللى عنده، وفهمت ان رمزي لجأله علشان يشوفله علاج للضعف اللى عنده، ووقتها فهمت ليه رمزي بيدخله البيت ومش بيغير عليا منه زي ما بيحصل مع كل الناس.
ولما صارحني رمزي بكل حاجه، لقيته طالب مني اسيب احمد يرقيني يمكن في حد عاملي عمل ومخلي جوزي مش طبيعي معايا، طبعا كل التخاريف دي انا ماكنتش مقتنعه بيها، وفهمت ان رمزي مصدقها علشان مايبنش انه عنده ضعف وكمان يحس بانه مش راجل، وكمان فهمت ان اللى اسمه احمد ده قدر يضحك عليه ويخليه يصدق التخاريف اللى اقنعه بيها، ورغم اني مش عارفه هو عاوز فلوس ولا ايه اللى احمد هيستفاده، بس لقيت نفسي موافقه على اللى رمزي قاله واني اخلي احمد يرقيني، ومش بس كده انا بينتله ان اكيد تفكيره صح، ومش عارفه وقتها انا ليه كنت بعمل كده، يمكن كنت عاوزه اقرب من احمد، مش عارفه بس ده اللى حصل.
وحدد رمزي يوم وجه فيه مع احمد، ولقيت احمد ده حط ايده على راسي وفضل يقراء قرأن، ومعرفش ليه انا كنت مرتاحه لوجوده جنبي، وبعدها لقيته بيتمتم بكلام بصوت واطي، انا كنت عارفه انه بينصب على رمزي، ووقتها لقيت نفسي عجباني الحكايه، وعلشان كده روحت مثلت اني فعلا ملبوسه، وعملت شويه حركات من الى كنت بسمع عنهم للجماعه الملبوسين، وفهم احمد اني فهمت انه نصاب، وكمان فهم اني بسعده، وساعتها هو كمل التمثيليه بتعته، وبعدها طلب من رمزي يروح يجيب مايه سخنه، وقام رمزي وسبنا، وساعتها لقيته بيلمس جسمي بطريقه فهمته فيها، وساعتها سكت كنوع من الموافقه مني على اللى هو بيعمله، ووقتها قالي بصوت واطي:
انا كتبت رقمي في ورقه، خلي الورقه معاكي وكلميني.
واداني الورقه اللى خبتها بسرعه، ولما جه رمزي، هو قاله اني معمولي عمل شديد وهياخد وقت لغايه لما اخلص منه ويتفك العمل، ورمزي صدقه طبعا، وبعد ما احمد مشي انا اتعاملت مع رمزي حلو اوي، كنت عاوزه احسسه اني اتحسنت شويه من الجلسه اللى حصلت، ومن وقتها واقتنع رمزي اكتر ان احمد هو حل كل المشاكل اللى كانت بتظهر بنا.
ومن يومها وكان بيني وبين احمد اتصالات، وبعد فتره قليله لقيته عاوز يقابلني لوحدنا، طبعا هو كان عارف مشكله رمزي، ولقيته بيقولي انه مختلف عنه خالص، وفكرت في كلامه ووافقته بس قولتله اني مش هروح في حته، وفكرتله في فكره ممتازه هتخلينا نتقابل لوقت طويل اوي، وفهمته انه كل مره هيجي هتصرف بطريقه تبين اني ملبوسه وبعد جلسته برتاح، علشان تبقى حجه انه يجي البيت باستمرار، وده اللى حصل فعلا، وخدت رقم احمد قدام جوزي علشان لو حسيت بتعب وجوزي مش موجود اتصل بيه، ورمزي كان واثق من احمد اوي وفعلا ابتديت اتقابل انا واحمد، وفضالنا عايشين مع بعض لفتره طويله، بس لما لقيت رمزي بيقولي ان احمد بيعالجني من شهور ولسه ماخفتش، ساعتها فكرت اني لازم اشوف فكره تانيه بعيده عن موضوع المس ده، وده اللى حصل فعلا علشان بعد جلستين خليت احمد يقول ل رمزي اني خلاص خفيت، وفعلا انا بطلت اتصرف اي تصرفات بتاعت المس، وفكرت في فكره تانيه، اني اجيب منوم واحطه ل رمزي ولما ينام احمد يجي، وبالنسبه لاطفالي كنا بنقفل عليهم الباب في اوضتهم ومافيش حد فيهم كان بيخرج، وكنت بقضي الليل مع احمد وبيمشي قبل ما رمزي يصحي، وفضلت العلاقه بيني وبينه اكتر من خمس سنين.
بس في يوم حصلت حاجه ماكنتش في الحسبان، واحد من الجيران اتكلم مع رمزي وقاله ماينفعش تجيب صديقك كل يوم عندك البيت، ساعتها رمزي استغرب كلامه وحصلت بنهم مشاده، وفهم رمزي منه ان احمد بيجي كل يوم، وجه واجهني بالكلام ده، وطبعا اتخانقت مع رمزي جوزي وقولتله ان اللى قاله كده بيضايقني في الرايحه والجايه علشان انا حلوه وعاوز يخرب بنا علشان هو عينه مني.
مش عارفه ان كان رمزي اقتنع ساعتها بكلامي ولا لا، بس هو ماتكلمش خالص وسكت، اصلي قولتله انه ماينفعش يشك فيا واني لو كنت عاوزه اسيبه كان الموضوع سهل اروح ارفع قضيه وفي المحكمه اقول انه عنده مشاكل في العلاقه الزوجيه، وعلشان كده سكت رمزي خالص وماتكلمش.
بس اللى عرفته بعد كده من احمد لما هو اتصل عليا، لقيته بيقولي ان رمزي قابله واتخانق معاه واتهمه انه بيحاول يشاغلني، وقالي ان رمزي طلب منه انه مايحولش يعرفه او يجيله البيت تاني.
كان واضح وقتها ان مافيش غير حلين الاول اني انفصل انا واحمد ونقطع العلاقه، وانا ماكنتش اقدر اعمل كده، كنت بحبه اوي وقتها ومستحيل اوافق اني اقطع علاقتي بيه، والحل التاني اني اخلص من رمزي خالص، والحقيقه انا مافكرتش اتطلق منه، اصلي لو اتطلقت ساعتها هخسر كل حاجه فلوسه وكمان اطفالي انما لو خلصنا منه ومات ساعتها هورث كل حاجه وكمان وقتها هقدر اتجوز احمد والعلاقه اللى كانت بتحصل في السر هتحصل في العلن وقدام الناس كلها لما نتجوز.