محمد جا وجاب معاو اكل عزمنا الجنبنا امي مشت لي النوبيه وعزمته رفضت عندها بنتين وولدين اكبر وحده عندها ١٢ سنه امي رجعت شالت ليه اكل وديتو ليهم وقعدنا ناكل محمد قال لي امي صحبي قال تجو تقعدو معاو امي قالت ليو انا مابقعد مع أي زول
وبكرا علاقتك مع صحبك تخرب فوق قعدنا معهم خلينا هنا مرتاحين لما ربنا يفرجها قال لي امي انا القروش المعاي كلها رسلتها ليكم عشان تتطلعو من الجزيرة واسه يادوب عايز اشتغل وانا مقرر تمشو مصر
عايزين قروش السفر على إيجار الشقه وانا مابقدر امشي معاكم بشتغل هنا وبرسل ليكم وخلي زينب تدخل المدرسة تكمل دراستها امي قالت ليو انت ركز في شغلك ونحنا قاعدين هنا مافي عوجة بتجينا لما نشوف نهاية الحرب شنو قال ليه انشاء خير قالت ليو انشاء ونحنا بناكل سمعنا صوت طفل يبكي ويتشال ليو مع طفل والطفل التاني اكبر منو التفتنا عليهم قامت ام الطفل الصغير اتحركت عليهم وضربت الطفل الكبير وقالت ليو كيف تضربو هو قدرك اسه ولا عمرك. ولا طولك
ام الطفل الكبير شافت المره وجات عليه تكورك تضربي ولدي تضربي وهو قدرك انتي قدر حبوبتو تضربيو وقامت ضربته وديك ضربته وقعدو يضاربو دقايق بس الناس كلها قامت تحجز وتتفرج نحنا كملنا اكل وقعدنا نعاين جا راجل اظن ابو الولد الكبير وقال لي ام الولد الصغير تعالي قولي ولدكم ضرب ولدي وشوفي نحنا كيف بنضرب ولدنا ماممكن تضربيو انتي وقامت فيو يا الما راجل بتدخل في مشاكل النسوان ونبزوتو ننبز هو زهج منها ورفع يدو ضربه جو اهل المره والشكله دورت انا وامي قمنا سريع من الفرشة لانو كان في حاجات بطير شي حلة وشي كمشة وشي طوب
ادخلو المشرفين وماقدور في مشرفة انضربت وضربه واحد من الرجال والشكلة دورت بين المشرفه والراجل وجابو عكاكيز وحده جات جاريه وشايله ليه عكاز وقعدت تضرب
وتقولو تضربو اختي الليلة الاتشوف ليكم مكان نحنا جرينا برا الجبلون وجوه القيامة قايمة بعد شويه جات عربية وفيه ضابط وشايل سلاح ودخل الجبلون وجا طالع سايق الاسرتين ركبهم العربية واتحركو امي دي تتتحسبن وانا لافة الطرحة في وشي واعاين الناس دي كلها طلعت الخيم فيهم اكتر من ٥٠ اسره والجبلون فيو اكتر من ٥٥ محمد قال لي امي وتعشو هنا كيف امي قالت ليو نعمل شنو الله أراد كده بعد الضابط ساقهم الوضع راق ورجعنا دخلنا الجبلون صلحنا حاجاتنا وقعدنا محمد كان جايب لينا كم صحن مع كم باقة فاضيه قلت لي امي بمشي اجيب موية واجي كان في قربة فيه موية برا المخيم جيت اطلع جات عليه وحده سلمت علي وشالت ليه باقة وطلعنا لقينا صف طويل خحتينا الباقات ووقفنا برا المخيم كان في فنادق وكافيهات كتيره شديد وفي سوق قريب مافي بيوت سكنيه في المكان اظن البيوت بعيده شويه
البنت قالت لي اسمي ساره وقالت لي ليه لون عيونك كده انتي مصرية قلت ليه لا
لون عيوني زيتي محمد وامي لون عدساتهم اسود وانا لو عدساتي زي ابوي زيتيه كتير كانو بسالوني من لون عيوني قلت ليه لا سودانيه قالت لي عيونك غريبه ضحكت وقلت ليه انتي قالت لي انا جموعية قلت ليه اول مره اسمع بي الجنس دا وقعدت تحكي لي انو كانو في الخرطوم وجو اجرو بيت وبعد قعدو فيو لقو البيت مسكون وعندها اختها جنت عديل وفي النهاية طلعو وجو المخيم وحلفو تاني ماياجرو ليهم بيت ونحنا واقفين جا واحد شايل ليو باقات ختاهم في الصف وقف على الحيطة ماسك تلفونو وركب سماعات كان طويل اخضراني رفع راسو عاين فيني ونزل عيونو كان كل شوية يعاين فيني دورنا جا وشلنا الباقات واتحركنا ساره قالت لي الموية دي مابتتشرب الا غسيل لانو جايه من بحيره مفصولة من البحر ومويتة وسخانه قلت ليه بتجيبو الموية من وين قالت لي في كولر جنب الفندق في الشارع بنجيب منو الموية ندخل ديل ونمشي نجيب منو دخلنا وشلنا لينا باقات واتحركنا قالت لي ليه بتغطي وشك قلت ليه مابعرف اتعود على كده ونحنا طالعين لقين الولد داخل رفع راسو عاين فيني واتحرك التفت عليو لقيتو لسه بعاين اتحركنا ونحنا طالعين من المخيم في كافي وكان جنبو عربات رهيبه اظن مابدخلو ليو الا العندهم قروش الكافي كان بطريقة بلديه وفيو رسومات كبيره عاينت جوه كان فيو جلسات سودانيه وأشجار وزهوره رهيبه ومظلة حديد كبيره مفتوحة فيها متسلق وفيو زهور بي الأبيض وفي غرفة مفتحه عليها كم بنت وفي شباب وبنات قاعدين وصوت الموسيقى اتحركنا لقينا فندق حرفيآ رهيب بي اللون الأبيض وفيو مدرجات وجنبو تاني كافي وبقالات وستات شاي وجنبو العبور ومكاتب التسجيل لي الموصلات ومطاعم وعربات شحن البضايع وقفنا جنب الفندق كان في اطفال شايلين باقات واقفين في الكولر في ست شاي جنب الكولر وفي شجرتين كبار فيهم مسطبة قعدت في المسطبة اتفرج في الناس الفندق كان جنبو عربات رهيبه والبدخل والبطلع ظاهر عليو مرتاح الأطفال كيف والنسوان كيف والرجال كيف وفي الفندق في مطعم وعليو شباب اي واحد انضف من التاني التقول شاردين من الجنه وانا فاتحه خشمي واعاين شلت الباقة واتحركنا على المخيم ونحنا متحركين ساره سلمت ليه على واحد وكان مابتكلم اظن ابكم شاب عندو كم و٢٠ شغال لي ساره دي منو وساره تتضحك وهو يعاين فيني وغمز لي ساره قالت لي ماتتكوني عجبتيو وضحكت هو دخل المخيم ودخلنا نحنا ساره قالت لي ديل جاين من مصر هو ومعاو اهلو هم بين سودانين مصرين وقاعدين في المخيم سامعة صوت الموسيقى من الخيم عاينت شايفة لي وحده طويله وضعيفه لونها ابيض لابسه ليه توب وخلخال في رجلها شايلة سماعة كبيره وفاتحه الاغاني وترقص معها كم وحده وكم ولد وكم طفل ساره قالت لي دي من اهل الولد الابكم وهي اسوانية متزوجة سوداني ارح ندخل الباقات ونجي نعاين ليهم اتحركنا دخلنا الجبلون لقيت امي تتونس ليه مع وحده تحس بيه مصريه وعندها طفلة اظن عمرها ٥ سنوات سارة همست لي قولي لي امك ابعدي منها قلت ليه لي قالت لي دي كانت في مصر وجات هنا عشان بتها اغتصبة الكانت متزوجة عاينت فيها سريع قالت لي رجلها الأول مات ابو البنت وقامت اتزوجت ليه واحد وقالت اغتصب بنتها واسه هي جات السودان ورافعه فيو قضية والمره دي عندها نفسيات وبتاعت مشاكل اتشاكلت مع كم وحده وفتحت فيهم بلاغ اتحركت على امي وسلمت على المره وبنتها
المره بقولو ليه ام لجين البنت حلات الدنيا عليه ختيت الباقات وطلعت مع ساره على الخيم وقعدنا نتفرج في الاسوانية البترقص ومعها كم وحده وكم شاب وكم طفل عاينت في الخيم الكانو فيهم كم نفر
ونحنا نعاين سامعين صوت كوارك
جايه من خيمة من الخيم اتحركت على الصوت ومديت راسي شايفه مره شايله ليه عكاز وراجل شايل ليو سكين وواحد ماسك الراجل والراجل يقول تقولي لي ما راجل انا ماراجل ماكان قادر يتكلم او يقيف اظن شارب ليو حاجه والمره رافعه العكاز وتنبز فيو والراجل يحجز فيهم والناس تعاين دخلو كم راجل الخيمة وساقو معهم الراجل
بعد ماشالو منو السكين والمره رفعت العكاز وضربت الراجل بيو وفي كم مره مسكوها انا مستغربه في النسوان العندهم طاقة زي ديل كانو يقعدو مع الدعامة كان الدعامة هربو منهم
نسوان قويات بياكلو شنو ماعارفه ضحكت واتحركت قلت لي ساره انا تعبانه عايزه انوم ارح نرجع ودخلنا الجبلون لقيت امي معها مشرفة وقاعده تسجل قالت بكرا جاين منظمة الهلال الأحمر وجايبين مساعدات نحنا في جبلون طويل جنبا مره معها راجله عندها طفلة عندها كم يوم
وتانين بنتين اظن اخوات واحده اليوم كلو تقرا في قران واتسبح وتاني أسرة معاهم راجل كبير حركتو بسيطة وتاني ام يقين وتاني اسره ام وابو واطفال اكبر وحدها بكون عندها ١٥ سنه ديل من الجزيرة اهل ساره كانو في نهاية الجبلون والباقي ديل ماعرفتهم....يتبع