شلت لي ابريق ومشيت الحمام طبعآ في ٦ حمامات تلاته لي الرجال وتلاته لي النسوان وانا شايله الابريق وصلت لقيت صف نسوان بعد ساعة حتى دخلت طلعت اتوضيت وصليت ونمت صحيت الصباح وامي كانت خاته ليه كانون تعمل في الشايي
طلعت اتسوكت لقيت كم مره على كم راجل يتسوكو والحمام صف الشفع يجارو يكوركو والموسيقى شغاله في شاب شايل ليو سماعة في يدو ومعاو كم واحد اتسوكت ودخلت شربت الشاي لقيت محمد اخوي قاعد سامعه صوت عربات طلعت برا الجبلون لقيت ديل منظممة الحلال الأحمر جايبين حاجات وقفت اعاين فيهم كنت لافة الطرحة في وشي وانا واقفه اعاين في واحد كان مركز معاي
انا ماعارفه ليه دايمآ الناس بتركز مع عيوني من نظرات الشاب زهجت ودخلت ساره قالت لي زينب تعالي نشوف ناس المنظمة قلت ليه ماشه قالت لي اسه بتشوفي الدرمات والاكشن ونحنا واقفين نتونس جات المشرفة شايلة ليه ورق وقعدت تنادي في الأسماء امي قالت لي شيلي الأرقام الوطنيه وامشي اقيفي في الصف كانت قاعده مع ام يقين يتونسو اتحركت مع ساره كان في صوان كبير وفي كم بنت وكم ولد يوزعو في الحاجات كانت دقيق وعدس وملح وزيت طبعآ الحاجات بقسموها على الأسر العدد افراده زوجي بياخدو من غير تقسيم والفردي بتشوف اسره تانيه فرديه وتتقاسم معها الزيت والدقيق والعدس وانا واقفة في الصف وعاين في النسوان البكوركو دا حقي ودا حقك دا دقيقي لا قسمتك ماصح ويتشاكلنا في البحجز وفي البتفرج انا اعاين واضحك جا دوري ونحنا عشان اسره فرديه انتظرت أسرة تانيه تكون فرديه لقيت لي وحده واشتركت معها شلنا الدقيق والزيت والعدس قلت ليه تعالي جوه الجبلون نقسمو دخلت معاي لقيت محمد اخوي قاعد مع امي وفي ام يقين ختيت الحاجات والمره قالت لي قسموهم وجيبو لي نصيبي انا قلت ليه تمام محمد قال لي خليها تقسم معاك قلت ليو ماضروري قام نهرني وانا اتزهجت فيو
قام قال لي المره تعالي شيلي العايزه ونحنا عافين ليك امي قامت قسمتو المره شالت حقها وفاتت محمد اخوي قال لي الناس ديل انتي مابتعرفيهم لو ماحضرت التقسم بتجي راجعه وبتقول اكلتو حقي وامكن تعمل مشكلة قلت ليو مالدرجه دي وهو دقيق وولا حاجه تانيه قام نهرني تاني نمت في الفرشه وزهجانه منو كيف ينهرني قدام الناس صحيت بعد كم ساعة بصوت المره قالت لي امي ظلمتوني في العدس قسمتك ماعادله امي قالت ليه ماقسمنا مع بعض قالت ليه هوي يازوله انتي عايزه توريني القسمه محمد قام اعتزر لي المره وشال العدس وقال ليه تشيليو كلو المره شالتو وفاتت محمد قال لي ماقلت ليك عشان تاني تسمعي الكلام حاولو ماتحتكو بي الناس دي كتير وقام فات
جات ام يقين تتونس مع امي وهي بتتونس انا قلت ليه كلمة ماكنت بقصده والساعة القامت فيني وكوركت وقالت لي انتي اسه ماكورك فيك اخوك قدام الناس واحرجك واهانك وحده متخلفه قلت ليه انا عندي اخوي ومعاي امي مامقطوعة من شجره وقامت فيني انا مقطعوعه من شجره كيف تقولي لي كده امي تهدي فيه قلت ليه اي وعندك مرض نفسي وطاير ليك في راسك
قالت لي تقولي لي عندي مرض نفسي كويس انا بوريك المرض النفسي لما اجيك بي السكين وانتي نايمه ماتكوركي كويس مش قلت عندي مرض نفسي يلا انا مجنونه والقانون مابحاسبني واصبري لو ما ضبحتك مايكون اسمي ام يقين امي خافت خوف وقامت تهدي فيه والمره حالفه الا تقتلني انا بلعت ريقي ٥٠ مره واضح المره عندها نفسيات سكت ساي واعاين في امي البتهدي فيه جات ساره تضحك وجرتني وقالت لي نهاي مابسالك انا ماحذرتك المره دي والله مجنونه وبتعمله ماشوفتي لما تجيب الاكل تدسو من الناس كيف مره جيت ماشه بي سريره لقيتها تقطع ليه في دجاج وداسه من الناس وتلفت ساي عشان زول يشوفها مافي ضحكت ضحك عليه قالت لي خليها تهدأ وامشي اعتزري ليه لانو بتقتلك بتقتلك انا ارجف من الخوف قعدت اعاين فيه وهي تعين فيني وتحمر المغرب اذان طلعت برا الجبلون عشان امشي الحمام لقيت وحده من البنات القاعدات جنبي البتقرا القرآن قالت لي كنت عايزه اقول ليك اعملي حسابك من المره دي وامشي اعتزري منها قلت ليه تمام قالت لي اسمك منو قلت ليه زينب وانتي قالت لي اسمي ايه اتونست معها اتوضيت ورجعت الجبلون صليت وطلعت مع ساره نجيب مويه لقيت الولد الاخضراني شايل ليو تلفون وسماعه وقاعد مع كم واحد يتونسو شافني رفع عيونو علي عاينت فيو واتحركت سامعه واحد من القاعدين معاو قال ليو النينجا دي جديده ولا شنو وضحك والمعاو ضحكو جبنا الموية ولقينا يعملو في صوان ساره قالت لي دا عرس وحده من بنات الفاشر سامعه صوت الاغاني قالت لي ندخل المويه ونمشي عليهم قلت ليه تمام وانا داخله لقيت ام يقين شايله السكن وتقطع ليه في سلطة من شافتني رفعت السكين انا قلبي ضرب شديد ختيت الباقه واتحركت مع ساره وصلنا خيمة العروس سلمنا ودخلنا باركنا لي العروس كانو معها كم بنت وكم مره وفي وحده تعمل في شاي ووحده تغني بي الدلوكة وبنات يشيلو معها قعدنا معهم قامت وحده ترقص عندهم رقصه كده حلوه مابعرف اسمها شنو وقامو كلهم يرقصو فيه وانا اعاين فيهم واضحك رقصه غريبه جا الولد الطويل الاخضراني من شافني انخلع ورجع لي ورا الماسكة الدلوكة من شافتو غنت ليو الاخضر العالي يمه
والمعاها يضحكو هو جا عليها وقعد يبشر دخل معاو كم واحد وقعدو يرقصو وكل شويه بعاين فيني وحده قالت لي الا تفكي الطرحه من وشك وترقصي قلت ليه مابعرف ارقص الماسكه الشاي قلت ليه قومي ارقصي انا بكمل الشاي وقعدت اعمل فيو جا الولد قال لي ممكن كباية شاي حركت راسي عملتو ومديت ليو الكباية قال لي تسلمي يانينجا وابتسم انا اتوترت لانو ماحصل اتكلمت لي مع ولد
قلت لي ساره يلا نطلع قللت لي دقيقة بس شالت الدلوكة وغنت شيلو معاي ااااي غنو معاي ااااي صفقه قوية ااااي النوبية ااااي والعربيه ااااي والبنات يشيلو معها الاغنيه كانت ظابطة انا من غير ما احس اندمجت معهم وغنيت طلعنا منهم ساره قالت لي ماتنومي الليلة ام يقين بتقتلك وضحكت
دخلت صليت العشا ونمت في الفرشة جنب امي الليل كلو مانمت خايفة مانمت الامع اذان الصبح قمت الصباح بعد ما اتسوكت مشيت اعتزرت منها وهي قعدت تبكي وتتكلم كلامه كان مامرتب تحس انو عندها مرض نفسي فعلا بعد ما اتحركت منها امي قالت لي تاني امسك خشمك عليك اوع تشاكلي ليك زول قلت ليه توبة وضحكت وهي ضحكت قالت لي اشربي الشاي خلينا نمشي نشوف السوق فيو شنو نفرج عيونات ضحكت قلت ليه تتذكري لما مشينا السوق لي الشبكة قالت لي الله لا جاب الايام ديك الجنجويد مرض الله يشفينا منو اتذكرت الولد الدعامي الفي الشبكة رفعت تلفوني فكيت الحظر ونبزتو ليك نبز ماخليت ليو حاجه ورجعت حظرتو
شربنا الشاي لبست لي عباية سودا وطرحة وشرابات ولفيت الطرحة في وشي وطلعنا السوق كلو يعاين فيني وانا اتوتر من النظرات ماعارفه ليه بعاينو فيني مع انو ماظاهر غير عيوني نظرات الناس زهجتني ماعرفت اتفرج على الحاجات او اشتري لي حاجه رجعنا المخيم لقينا في اسره جديده داخله كانو بنتين في عمري ومعهم مره وراجل وولد نظرات الراجل ماحبيتها يعاين في النسوان من فوق لي تحت دخلو الجبلون وفرشو فرشه جنب فرشتنا جو عليهم كم مره سلمو عليهم وجات المشرفه سلمت عليهم الراجل نظراتو ماحبيتها قعدو فطرو وشربو الشاي وانا ارقب فيهم والراجل نهاي ماقام حاسه نفسي مقيده شديد قمت مشيت لي المشرفة قلت ليهم مفترض الرجال مايقعدو طوالي في الجبلون الواحد لو عايز ينوم مابقدر ولو عايز يصلي مابقدر الناس الجو جداد ديل قولي ليهم الرجال مايقعدو طوالي في الجبلون وانا بتكلم معاها سمعتنا وحده من النسوان السلمو على النا س الجداد جات وقفت جنبي وقالت لي حسبي الله فيك وفاتت على الناس الجداد المشرفة قالت لي اسه دي مشكلة جديده انتي قايله نفسك في فندق واتحركت على الاسره الجديده انا اتحركت لقيت المره الجديده تبكي ومعها المره السمعتني والبنات يحمرو فيني ساي والراجل معاو الولد طلعو فاتو
والمره السمعتني شغاله حسبي الله ونعم الوكيل امي قالت لي عملتي شنو وبي نهره حكيت ليه قالت لي نهاي مابتتستري قامت علي الناس الجداد وقعدت معهم وانا اعاين ساي قالت لي اعملي الزلابية العجين دا فار ماشايفه ولعت الكانون وعملتها شلت صحن وانا ابلع في ريقي وديتو ليهم امي قالت لي جيبيها كلها وتعالي اقعدي معانا وتحمر لي جبتها وقعدت اكلنا
المره حكت لينا انو كانت قاعده مع اخته وراجل اخته طردهم وجو المخيم وكانت تبكي وتحكي وحكت لينا انو الله مارزقها بي الأطفال وانو البنتين ديل بنات راجله هي ربتهم من صغار وحتى الولد
البنات كانو في اعمار ١٧ و١٩ والولد كم وعشرين هي فلاتيه والراجل زغازي وأم البنات امهم كانت حبشيه هربت وخلت البنات صغار والولد من مره تانيه امو اتوفت
سبحان الله اندمجت معهم في الونسه المره ظريفه شديده ووناسه ونحنا قاعدين نتونس الراجل المعاو مرتو العندهم طفلة
جاب ليو مشمع وشوية عصايات ووقام فصل وعمل نظام غرفة بعد ما خلص جو المشرفين وشاكلو قالو ليو الا تفك المشمع قايل نفسك وين ونحنا نضحك عليو يحليلو بعد ما تعب قال ليهم الصباح بفكو كان عامل فيو نظام باب قمت عاينت لقيتو ظابط عندهم سريرين وعندهم عده وهيتر ومروحة غرفة عديل المره قالت ليهم بتي صغيره مابتتحمل الغبار وجري الشفع في الجبلون ونهاي مابفك المشمع ربطة الباب عليه مع الوونسه ودرامات المره. الراجل نمنا وماحسينا بي نفسنا
صحيت الصباح والنسوان الجنبنا يضحكو ساي على الراجل الفصل ليو غرفة ويتكلمو فيو ويتهامسن مشيت وقفت في صف الحمام لقيت ساره تتشاكل ليه مع واحد عمرو بكون ١٩ طويل شعروو مفلفل اخضراني وتنبز فيو قلت ليه بتين أصبحت الدنيا
قالت لي مؤيد اخوي دا شيطان عديل هو ضحك وضربه بي الابريق في وشها وهي جرت عليو انا اعاين فيهم واضحك جات راجعة قالت لي دا مؤيد اخوي وعندي تاني مصطفي وعلي وتلاته اخوات متزوجات وقالت لي على عندو ١٥ سنه اخر واحد ونحنا بنتكلم جا واحد شعرو مفلفل نازل في وشو عمل زي الجنجويد قالت لي علي اخوي سلمت عليو شال الابراق فات لحظت لي وحدها عمرها زي عمرو تعاين فيو وتضحك وهو يضحك معاها
اتسوكت ودخلت الجبلون لقيت القيامة قايمه في الراجل الفصل بي المشمع ومعاو المشرفين في النهاي فكه المشمع قعدت مع امي شربت الشاي البنت البتسبح الاسمه ايه قالت لي البنت المعاها انا الحمام الاخر دا بخاف منو حاسه بيو مسكون عديل قعدو يتكلمو انا اتحركت قعدت معهم عرفت جنسها .....من قالت لي انخلعت وقلت ليه وانا من غير ما أشعر ديل البقومو بعاعيت ماتكوني بعاتيه امي جات جرتني من طرحتي قالت لي نهاي مابسالك والله عايزه ليك ضربه في خشمك دا
سمعت البنت الاسمها ايه تتكلم عن الظار وماظار وانو هي بتشوف وقالت انو كل ماتخت ريحة بتلاقها ناقصه وخاصه لو كانت ريحة بنت السودان
انا بحب القصص الزي دي رجعت تأني قعدت معهم جات ساره وقعدت. وقالت انو اخواتها عندهم الظار وبشوفو عندها ٣اخوات متزوجات والقصص دورت بي الظار ومااظار وانا اسمع فيهم ساي اليوم انتها بي الونسه والضحك صليت العشاء ونمت كان في برد خيالي صحيت بليل ماشه الحمام قلت مابصحي امي بمشي سريع وبجي شلت الابريق لقيت الحمامات كلها مقفله اظن فيه ناس الا الحمام الاخير الباب مافاتح لي النهاية واللمبة شغاله قلت مابكون فيو زول مديت يدي على الباب سمعت حركة عاينت شايفة حاجه زي الريش لونها اسود خوفته عايزه ارجع الباب فتح طلعت وحده لابسه ليه قميص اسود من غير توب شايله ليه قارورة مويه فاضيه مدت لي القارورة ومااتكلمت انا الخوف عايز يقتلني كبيت ليه شوية مويه عايزه اتحرك قامت. طلعت وانا قلت كده اتكلم معاها قلت ليه برد خيالي ما ردت لي انا خلاص قربت اعمله في نفسي شلت ابريقي وجريت جري اتكرفست جنب امي ارجف...يتبع