السنوات بتمر والزول بكبر وبزيد وعي وببقى اكتر صلابه والأمور الكانت بتشغلتو بتبقى مجرد نقاط في بحر همومو الكتيرة!.
كان عمري 15 لمن فقدت اهلي وتاني جيت عشت مع ناس خالو!.
كنت بت وحيدة عند اهلي وفقدهم كان صدمة بالنسبة لي ما كنت باكل ولا بشرب زي الناس ولا كنت بنوم كويس !، قولت احتمال مرت خالي تعذرني الفترة الأولى وتقدر ظرفي بس طوالي بقت تنبذني من عدم شغلي في البيت معاهم واذا غلطت في حاجة تذلني ومرات عادي تمد يدها علي ! انا ما كان عندي مشكلة في الشغل والله وزولة ولوفة ومسالمة بس للاسف اسلوبها كان شين معاي وما راعت اني فقدت اهلي لي فترة بسيطة وصدمتي بيهم للان ما راحت وخالو كان ساكت بس وما بتكلم مع مرتو اصلا هو لو ما كلام الناس ما كان مسكني.
مرت الايام وبقت بعمل اي شي حرفياً اي شي! طبيخ غسيل مكوة!.
كنت زولة متفائلة ومرحة ومبتسمة بالرغم من المريت بيهو بس للاسف بقيت زولة كئيبة باهتة متشائمة شديد وما شايفة اي مستقبل مشرق في حياتي بعد خلوني ما اقرا الجامعة وخاصة اني جبت نسبة كويسة شديد وكان ممكن ادخل مجال أدبي كويس بيها.
النسبة دي جبتها باجتهادي مرت عمي ما كانت بتخليني اقرا مع بتها ولا كانت بتديني نفس زاتو للقراءة بس انا كنت صامدة وقررت أتفوق فبقيت بقرا في الفسح ومرات بمش لصاحباتي اقرا معاهم ومرات كتيرة بقرا بعد تنوم واستاذة بثينة برضو ما قصرت وجابت لي مذكرات الله يديها العافية ! المهم خالتو ما كانت عايزاني أنجح باي صورة وخاصة انو بتها ممتحنة معاي.
خالو بعد نجحت وجبت نسبه 90 وبتو جابت 80 بالرغم من الأساتذة الخاصين قرر انو ما يخلني اقرا وقال لي ما عندي ليك قروش وهو وضعو كويس وولدو في السعودية.
قررو بعدها يزوجوني لراجل ما بعرفو من قرية تانية قالو مقرش ومقتدر بس سمعت تحت تحت انو زول ما مقرش بس والله انا ما همي القروش وبس دايرة راجل يحترمني ويبعدني منهم ويبقى لي سند!، لمن جاء للنظرة الشرعية كان هادي شديد وحسيت انو ممكن اعيش معاه مبسوطة واقتنعت كامل الاقتناع بيهو بس سبحان الله في يوم العرس وهو ساير في زول فك طلق وللأسف الشديد اتصاب وطوالي وقع ميت!!.
الحادثة دي هزرتني من جوة وزعزعت روحي!، بكيت لمن حسيت انو راسي حا يتشق!، كنت زعلانة شديد عليهو والله بالرغم من انو شوفتو في النظرة الشريعة بس والله حزنت!.
سموني المنحوسة بعدها امو جات نبذت و قلعت كل الحاجات!، خالي خسر خسارة كبيرة وخت الحق علي!، انا ما جادلتهم لانو هم اصلا ما مؤمنين بالقضاء والقدر فيبقى خسارة بس الكلام معاهم منحوسة اناا!!!، فقر!!! ليه يعني بس عشان مات يوم العرس!!، انا ذنبي شنو في الحصل ليه! هل شلت المسدس ووجهتو ليهو!!، ليه ما عايزين يفهمو انو دة يومو!، ليه يهجموني يعني عشان ما عندي زول يدافع لي عشان انا وحيدة!!!، اعمل شنو وامشي وين!!! زمان على الاقل ما عندي سمعة اسي كمان بقيت شؤم ويتضرب بي المثل انا صغيرة على كل دة!، انا لسه صغيرة والله! ما قادرة استحمل يا رب فرجها علي يارب انت اعلم بالبي يارب ساعدني!، يارب انقذني من الناس السيئين ديل ،اللهم اني اسألك الصبر يارب العالمين ،استغفرت شديد وقتها.
مرت سنة وبقيت قاعدة في البيت وما بطلع نهاي!، خالو جاء ولقاني بكوي قال لي نرجس جاك عريس!، بحلفت عيوني فيه وقولت ليهو منو؟؟!، قال لي راجل مرة ما من هنا من الخرطوم!، خالتك سوسن بتعرف امو وبتعرف مرتو شخصياً وهي الرشحتك ليهم!!، زول مقتدر وشغال مدير مالي لشركة مياة معروفة ومحاضر في جامعات! وصغير عمرو 32 مناسب معاك!، قولت في نفسي فرقت 12 سنة عديل وكمان متزوج!، ليه يا خالو تختني تاني في موقف صعب، قولت ليهو ما عايزة اتزوج!، قال لي انا ما سالتك من رأيك انا هنا بكلم فيك بس العرس بعد اسبوعين!، قولت ليهو يا خالو راعي ربنا فيني! انا بت اختك في النهاية ما تجدعني!، قال لي نرجس !!، قعدي سنة كاملة في زول عتب باب البيت دايرة تقعدي لي لمتين قايلة نفسك صغيرة!!، قولت ليهو اي انا لسه صغيرة عمري 20 بس! انا ما...، قاطعني وقال لي البت مصيرة تتزوج! هدي انا متزوج سوسن دي من كان عمرها 15 وانتي يا بت مسؤولة شديد! وما بغلبك مسك بيت ، قولت ليهو ما بقدر والله انا على راجل مرة مرتو اكيد ما حا تخليني بحالي، قال لي مرتو هي زاتها الاختارتك هي ما عندها اي مشكلة معاك!!، قولت ليهو نعم!!!؟، قال لي ما تستغربي المره براها الخطبتك اسألي خالتك سوسن! ،خالتو سوسن جات داخلة شكلها كانت بتسمع في كلامنا لأنها قالت لي كلام خالك صاح مرتو وفاق موافقة هي عرفت انو عاقر وما بتجيب اولاد!، قولت ليها دا السبب يعني!، قالت لي اي عشان كدة ما حا يكون في اي مشاكل!، قربت وقالت لي حا تعرسي وحا تمشي من هنا وتبقي مرة عاقلة لانو لو جيتنا مطلقة ما بندخلك البيت!، خالو قال ليها نرجس بت عاقلة! وانا عارف انو ما حا تعمل شي يخليها تتطلق، المرة دي ما دايرين اي جوطة سريييع سريع نعمل العرس واجي همام ويسوقها،قولت في نفسي اسمو همام يعني.
بعد مرور اسبوعين لبسوني توب وردي المرة دي وبقليل من المكيب والزينة! ،عاينت لوشي في المراية كان كأني طالعة من جنازة!، بالجد انا ما عايزة اعرسو باي صورة من الصورة ما عايزة!، قالو عقدو!، ولمن قالو كدة حسيت انو قلبي عايز يقيف! مستقبل مجهول معاه! ياخ انا شكلو ما بعرفو اتزوجو ساي!!!، مرتو يا ربي موافقة ولا خالو بغش علي وانا شابكة يدي الاتنين بتوتر جات داخلة مرة صفراء متوسطة الطول ملامحها ملامح شر بس جميلة ومعاها راجل احضراني طويل عيونو بنية وبنيتو حلوة! وملامحو هادية ومريحة شديد! ،بقيت اعاين ليهم قربو علي المرة حضنتي وسلمت سلام شديد وقالت لي انا وفاق مرت جدو ! وبت عمو في نفس الوقت!، قولت ليها جدو ؟؟!، ضحكت وقالت لي اي نسيت انتي ما عارفة انو لقبو جدو لانو مسمى على جدنا الكبير الله يرحمة!، عاينت ليها وما رديت، همام قال ليها وفاق نحن مفروض نمشي بعد كدة صاح ،قالت ليهو ما عايز تتكلم مع عروسك على انفراد!، قال ليها ما عايز!، قالت ليهو طيب وطلعت طوالي وهو لحقها.
___________________________
بلسان همام
=وفاق مالك ؟؟مش اتفقنا انو ما تضعفي عشان انا بضعف.
_ما قادرة تعبت وانا بتصنع انو مبسوطة ليه يزوجوك، عارفاها امك بس دة ظلم لي اشوفك مع واحدة غيري انت رضيان بعدم الولادة مالهم ومالك.
=ديل اهلي بعد كل حاجة وامي ما بقدر اتخلى عنها ولازم اراضيها.
_عرفوك اسي ولدهم ما هم كل الفترة الفاتت كانو مهتمين بمظفر
=وفاق انا حاليا وافقت عشان دي امي وعدم رضاها غير اعكس لي طريقي ما بعمل لي حاجة ووريتك انو ما تجيبي لي سيرة للامور دي تاني وخاصة معاملة اهلي لأخوي +انتي اخترتي العروس بنفسك وامي ما كان عندها مشكلة في اختيارك واسي انا زي ما قولت ليك بمسكها بإحسان وبطلقها بعد فترة وامي حا تقتنع بعد تشوف ماف اي نتيجة لعرسي دة وكل المواضيع بتتحل.
_تمام بس لو انت حبيتها انا اعمل شنو؟؟!.
=احب ليها شنو هو انا شايف غيرك
ضمتني وقالت لي طيب ما تبعد مني نهاي وما تفكر في يوم انك تقرب ليها، قولت ليها تمام بس اوعديني انو حا تبقى قوية كل الفترة الجاية.
_حا ابقى عشان كل ناس بيتكم عايزني انهار بعرسك ،حتى اخواتك شمتانات فيني ليه بكرهوني كدة ؟ عملت ليهم شنو.
=ما عملتي حاجة ،انا ما كنت واقف معاك في اي حاجة حصلت ليك معاهم فما تشتغلي بيهم .
-اسي كان تقيف وما تتزوج الأمهات بقولن كدة بس برجعن
=عارفة يا وفاق امي المرة دي زعلها غييير والله لانو عرفت بموضوع العقم الكنا داسنو عليها.
هي زمان كانت بتسكت لو انا اتكلمت معاها لمن تشاكلك بس المرة دي انفجرت وحسيت انو دي ما امي وفي النهاية انا كاي ابن لازم اراضيها ورضاها زي ما عارفة الا بزواجي .
_طيب حا اصبر الفترة دي ،في النهاية الإنسان ما ببقى بغير اهل حتى لو هم قاعدين يسيئو لي.
=انا دايما كنت داعمك ولا برضى فيك حتى امي ما بخليها تبرر وبصدقك اعمل ليك شنو تاني؟؟، بس زي ما قولت ليك امي انا المرة دي حسيت انو بالجد حا افقدها لو ما وافقت على العرس دة.
_طيب طيب بس ليه امك قررت تسكنها بعيد مننا فاكراني حا اعمل للاسمها نرجس حاجة يعني لو سكنت معانا في البيت الكبير
=ما عارف ولا عايز اعرف بس دة لصالحي حا اخليها هناك براها بس المشكلة الأساسية تتكلم بالبعملو ليها وتشتكي
_ما تخاف انا ما اخترت البت دي عن فراغ ما بتتكلم .
=كيف؟؟!
_ما بستفيد حاجة لو عرفت المهم ادخل ليها اسي.
دخلت وقولت ليها نتعرف من اول وجديد انا همام، قالت لي نرجس عاينت ليها وقولت ليها طيب كل الاهل منتظرين برة نطلع ،هزت راسها وما قالت شي ،قولت ليها قبل نطلع عندك. حاجة في بالك عايزة تقولها لاني شايف الحيرة في وشها ،قالت لي بحس هادي وبصوت مبلوع لا، طلعنا وسلمنا على الاهل وتاني ركبنا العربات وجينا البيت بعد مدة.
طوالي انا طلعت عشان احضر عقد اخوي مظفر على واحد اسمها ودُ رشحوها ليهو ترشيح وما عارف ليه وافقت عليها لانو ما كان خات الزواج في راسو.
انا ومظفر توأم بس اي زول عندو فلسفتو في الحياة وما بنقدر نتفق نهاي ،هو شايف انو انا بقيت غير بعد اتزوجت وفاق وما قادر أنصف اخواتي ولا امي ولا قادر اتحمل مسووليتهم ومرات كتيرة بقول لي انت تبع مرتك لمن تحصل مشاكل. وكل برة نضرب بعض بس في النهاية هو اخوي.
_____________________________
بلسان وُد
اتصل ولا ما اتصل اتصل ولا ما اتصل قررت انو اتصل بيهو وانهي الموضوع قبل يبدأ شلت الرقم وطوالي رجعت ليهو اول مرة طبعا اتكلم معاة و كمان ما حصل شوفتو الا في الصورة وهو زاتو ما شافني!!، قولت ليهو دة رقم مظفر! ؟،قال لي ايوا معاي منو؟!، قولت ليهو وُد مبارك ،قال لي وُد منو؟ !،قولت ليهو باخر نفس خطيبتك منو يعني ،قال لي انا ما فاضي ليك قفل الخط في وشي، حاولت اتصل بيهو تاني الرقم بجيني مغلق رسلت ليهو واتس انو ما يعقد لقيت انو ما فاتح الشبكة ، اختي بعد مدة جات جارية وقالت لي عقدو!!!، انخلعت شديد وهبطا وبقيت ابكي بعد مسافة هديت والبت صلحت لي المكيب اختي طبعا بتكون قايلاها دموع فرح!! بقيت استغفر.
العصر كدة جات رماز وقالت لي عريسك وصل طلعو وخلو لي الغرفة فاضية!!، جاء داخل كان شاب طويل ووجية وملامحو جادة!،دمعت طوالي واتملكني الغضب جيت عليهو وقولت ليهو بزهج لشنو قفلت في وشي لو ماف حاجة مهمة فاكرني بتصل بيك ما هو طول الفترة الفاتت ما حصلت اتكلمت مع حضرة جنابك !،قال لي فهمك شنو انتي اسي ؟؟!، وكل الجوطة دي سببها شنو ؟؟!، قولت ليهو وعيوني مليانه شرار وباعلى صوتي انا ما عايزة العرس دة طلقني عليك الله انا ما حصل اخترت خيار بنفسي ودايما امي بتختار عني انا ما عايزاك وما عايز اتزوج اسي اصلا شهقت شقهة عاليه بعد قولت الكلام دة!!! ودنقرت راسي من الخجل انا اتفجرت فيهو بدون وعي وما عارفة حا تكون ردة فعلو كيف، ضحك ضحكة طويلة ورفع حنكي وقال لي ما لقيتي فرصة الا تتمردي في الوقت البدل الضايع لو قدرتي تواجهي امك ابدر انا ما كان عندي مشكلة لانو كدة كدة ما عندي ليك حاجة وعايز بس اكمل نص ديني واسكت امي وبنات حواء غيرك الف،بقيت ابكي بكاء شديد ليه لا قدرت ادخل مجالي العايزة ولا قدرت اختار مواصفات شريك حياتي.
قرب وجدع منديل في وشي وقال لي أمسحي دموعك اتنهدت ومسحتهن! ،تاني مسك يدي ولبسني الدبله بالشمال هم عاداتهم انو يجيبو الدبله يوم العقد الدبله طلعت ما قدري وهو كان مصر يلبس انا قولت ليهو حا تقطع اصبعي ما قدري يا مظفر ما اشتغل بي ولبسها اتورمت ورم وقال لي يبدو انو صغيرة ، عاينت ليهو وقولت ليهو بصريخ من قبيل بإذن في مالطا ما كلمتك انها ما قدر الاصبع، قال لي انا ما بسمع صوت زول مهزوز الشخصية وما عندو رايي، دمعت من أثر كلامو ولانو موضوع يدي هاميني اكتر من اني اشاكلو في الكلام دة قولت ليهو حا تقطع اصبعي خلاص ،عاين لي وقال لي بأربعة أصابع بتعيشي !!!، حدرت ليهو قرب وقال لي عيونك ديل لو بس لمحت فيهم النظرة القبل شوية دي بقلعهن ليك وبسلمهن ليك في يدك ، سكتا ساي ودنقرتا وبقيت اعاين في اصبعي ،قال لي حا نمشي المستشفى قولت ليهو ما ماشة طوالي جراني وقال لي هو انا سالتك دة امر وصلنا وقصو لي الدبله حتن ارتحت والورم بدا يقل وتاني قال لي نمشي الشقة انا ما عايز اي صاله وجوطة، قولت ليهو انا عايزة، ضحك وقال لي سبحان الله دي الكانت ما عايزة العرس من اساسو، قولت ليهو بعد بقى خلاص انا ما عايزة اتذكر اليوم دة بالمستشفى وعايزة امشي الصاله، جراني وقال لي ماف ليك!!، اتصل بزول وقال ليهو همام نحن ما جاين الصاله ماش الشقة طويل وقفل التلفون وقال منعا للازعاج.
وصلنا قال لي الشقة دي كلها ليك الا غرفتي خط أحمر وما تخافي مني انا زول ما عايزني ما عايزو كمان ولو ما الفضائح كنت بلحظتا طلقتك عيشي حياتك بعيد عني وانا حا اعيش حياتي ودخل.
_______________
بلسان همام
حصلت الجوطة بعد كلام مظفر وتاني الناس هدت لانو مظفر رايو َما بغيرو لزول وصعب ، واهلي مشو الصاله وقالو برقصو براهم.
المهم انا رفضت نهاي امشي هو عرس مجبور عليه كمان اودي الاسمها نرجس صالة ،جيت وقولت ليها نتحرك كانت ساكتة وما قالت حاجة واكتفت بهز راسها بالموافقة .
مشينا الشقة دخلنا قعدت في الكنبة الجو كان هادي شديد أخذنا مسافة طويله من غير اي كلام كسرت الصمت باني قولت ليها عايز اقول ليك كلام عشان من أسى عشان توضح الأمور بينا ،قالت لي بصوت باهت اتفضل سامعاك! ،بقيت اهبش في دقني وامشي واجي وتاني قعدت جنبها وقولت ليها انا لا يمكن أقرب عليك بس اسي حا تكذبي بخصوص علاقتنا وبعد فترة حا اطلقك وما تخافي كل حقوقك بتصلك ،عاينت لي بصدمة كبيرة وقالت لي بغضب من الاول اتزوجتني ليه لو ما عايزني، قولت ليها عشان وفاق !، قالت لي وطيب انا ذنبي شنو و اسي لو طلقتني بعد مدة البحصل لي شنو واقول لخالي شنو؟؟، ليه خليتني اتبلا بيك ياخي لو ما داير مرة تانيه يعني عشان وحيدة وما عندي سند تبقوني زي الكورة وتلعبو بي بمزاجكم! حسبنا الله ونعم الوكيل فيك وفيهم بكرهكم كلكم انانين انا ما دمية انا بني آدم وبحس !، بقت تبكي وصوت بكاءها كان عالي وانا ما عرفت اتصرف معاها كيف، فجاءة بعد مسافة قامت وقالت لي ما عايزة اي طلاق بعد مدة طلقني اسي دي وخليني ارتاح زاتو!،كانت بترجف وهي بتقول في الكلام دة ضعيفة مدعية القوة وليه ما عارف!!!!قربت عليها وبقيت ساكت وتاني استجمعت شجاعتي ومسكت يدها عاينت لي بعيون متسعة من هول صدمتها قولت ليها اهدي وخليني اتفاهم معاك ،اي نعم انا غلطت وانا اسف بس مرات الأنسان بجبر على حاجات ما بكون عايزها، قالت لي طيب انا ذنبي شنو ؟!، اتنهدت لاني ما عرفت جواب لسؤالها اي هي ذنبها شنو ؟؟،قولت ليها ما ذنبك حاجة بس زي ما قولت ليك الظروف الختتني في الموقف دة، انا ما عايز مرة تانية، قالت لي بغضب اوريك شي انا زاتي ما عايزك ولا ميتة فيك جبروني!!!، بقيت عاله عليهم وجدعوني ليك،بس انا بعرف بمشي وين!، طلعت وكنت داير الحقها جاني اتصال من وفاق وكانت بتبكي زاتها وقالت لي جدو تعال لي اسي دي..................