طلعت وكنت داير الحقها جاني اتصال من وفاق وكانت بتبكي زاتها وقالت لي جدو تعال لي اسي دي، قولت ليها دقائق واكون معاك قفلت وقولت الحق المجنونة اول ما تقوم تعمل حاجة في نفسها طلعت بره أتقدمت خطوتين لقيتها قاعدة في السلم ومدنقرة!! حكيت راسي وبقيت محتار الزعلة الطلعت بيها ما زعلة زول حدو يصل السلم وما يمشي خطوة بعدها،قعدت جنبها وما فتحت خشمي بحرف، رفعت راسها فجاءة وقالت لي تلقاك مستغرب اني لية ما مشيت صاح!، قولت ليها لا وقومي ادخلي البيت انا ماش مشوار!، قامت وقالت لي حاضر +اعمل العايزة تعملو انا اتعودت شهر شهرين 3شهور طلقني في اليوم البريحك فيهو ما فرقت، ما حا استفيد حاجة لو احتجيت، ما حصل اصلا زول سمع رأي ولا حصل اصلا زول ختا لي سياسة الاختيارات.
دخلت بعدها وانا قعدت افكر انو البت دي ليه كدة؟؟!.
مشيت لوفاق ضمتني طوالي قولت ليها الحاصل شنو؟!، قالت لي شكلو كابوس!، صحيت مخلوعة وطوالي اتصلت بيك عارف انت الامان بالنسبة لي، قولت ليها طيب اقري وحاولي نومي! ،قالت لي طيب اقعد معاي وما تمشي ليها، قولت ليها تمام ما عندك اي مشكلة يا حبيبة قلبي.
___________________________________
بلسان وُد
كلامو نهاي ما طلع من بالي!!! وبقى يتردد لي بالرغم ليه كم ساعة! نرجسي بقيت احاكي فيهو وانا ماشة اعمل شاي ، شافني وقفت عاين لي معاينة حارة شديد وعرفتو سمعني! ، دخلت المطبخ وبقيت افتش للحاجات! ،انا كوُد بعرف بس اعمل شاي وقهوة ودة خبرتي! الاكتسبتها طول السنين!، عملت الشاي وفتشت لقيت بسكويت قولت خلاص دة عشائي اصلا انا ما عندي اكل كتير!،بعد انتيهت مظفر جاء داخل باكل! وجدعو في الطربيزة بقوة! ،قولت ليهو دة اكل ما حاجة بجدعوها بالطريقة دي ،قال لي اتسممي بيهو وانتي ساكتة احسن!، قومت وغزيت يدي في نصي وقولت ليهو ولو ابيت، قال لي اصلك عشان اوريك البحصل ليك شنو ؟؟، احسن تقعدي عاقلة والا ما بتعرفي الحا يحصل ليك مني شنو، قربت وقولت ليهو شنو البحصل؟؟!، بالرغم من انو كان ضربات قلبي بتضرب بس قولت اتشجع، رفعت ليك الإصبع حق الشمال لاني شوله وبقيت احرك فيهو وقولت ليهو قول اها حا يحصل لي شنو منتظرة!!، عاين في يدي ومسكها وقولت الله خلاص بكسرها لي. بس اكتفى بأنو قال لي اصبع القبيل دة تاني رجع اتورم عملتي حاجة!؟، قولت ليهو اي ضربتو بدون ما اقصد بس بروح، قال لي غبية ، زعلت وبقيت اعاين ليهو وقولت في نفسي غبية انا ولا غبي الانت الدخلت الخاتم بس احسن اسكت.
طلع من جيبو مرهم وقال لي جبتو عشان حسيت انو احتمال نحتاجو وطلع ظني في محلو!، ختاهو لي ومشى، بقيت واقفة مصدومة منو هو سايكو!!.
اليوم التاني من الصباح قررت امشي المستشفى بالرغم من اني ماخدة اجازة بس عياني الكنت متابعة حالتو مكدس وماف زول بعرف حالتو اكتر مني، لبست وبقيت ماشة طوالي قال لي على وين يا استاذة؟، عاينت ليهو وقولت ليهو مش قولت ما ندخل في أمور بعض شنو على وين دي زول عجيب ياخي!، قام وقرب وقال لي صرف العربي الكتير دة ما بنفع معاي سوال واحد بس وداير اجابتو والا ما بتسلمي مني!، بلعت ريقي قولت ليهو المسشفى عياني مكدس! عاين لي وسكت وقال لي طيب دقيقة امشي معاك بقيت اعاين فيه باستغراب شديد! قعدت وبقيت منتظراه جهز وركبنا العربية! ،بقيت اعاين ليهو ليه هو بمية وش!!، عايزة يجنني يا ربي ،نزلت وقال لي لمن تنتهي اتصلي بي انا بجيك!، نطتت فيهو عيوني! ووقولت ليهو حاضر لا خلاص انا اتاكدت انو هو منفصم.
دخلت وقدرت اسيطر على الحالة والحمدلله انو المريض حالتو استقرت ،فتحت التلفون وقولت اتصل ولا ما اتصل في النهاية قولت اتصل اشوف اخرو دة اتصلت ووقولت ليهو انا انتهيت ،قال لي تمام ربع ساعة واكون معاك! سمعت صوت بت معاه وهي بتضحك! قولت في نفسي دي منو!! تاني قولت مالي ومالو.
دكتور علي ودة بكون نائب اخصائي جاني وقال لي شنو المفاجات دي ما متوقع تخلي إجازات وتجي ،قولت ليهو الواجب واجب ولا شنو!، بقيت اتونس معاه تاني جاني اتصال من مظفر وقال لي انا جبت الباب، طلعت طوالي وركبت العربية!! في الطريق جاهو اتصال شغال ليهو زيد التركيز بس! اي اي ولو ما نفع مممكن نستبدلو! ،تاني قال لو تجربة فاشلة لو ناجحة المهم نصل لنتيجة يا معز! ،تاني قال خلاص لمن احصلك انتظري، تاني قال ليهو ما بقدر اغشاك المدام معاي! اوصلها واجيك!!، قفل بعدها قولت في نفسي لمن كان يحكو عن شغلو انا كنت مشغولة وبحضر وبالجد ما عارفة شغال شنو بالضبط لانو ما ركزت في الكلام وبس عرفت انو في شركة أدوية بس شنو ما بعرف!،قولت ليهو مظفر شغال شنو انت في شركة الأدوية؟! ،عاين لي وسفهني وما فتح خشمو!، ضربت البوري وقولت ليهو رد!؟؟؟، قال لي حا اخليك تشوفي بنفسك طوالي زاد السرعة وصلنا الشركة ونزل دخل اي زول سلم عليهو وشغالين ليهو دكتور وانا كنت مباريه وصل لحتة كدة قال لي حدك هنا عرفت انو دة المعمل، قولت ليهو بحماس وبصوت عالي انت صيدلي!! ،ضرب جبهتي وقال لي طلع مخك بشتغل!!، ما ركزت على كلامو وكل همو اتجاه مهنتو الكنت متمنيه ادخلها ،قولت ليهو حلمي اني اقرا صيدلية كان، قال لي المنعك؟،قولت ليهو ممكن تقول طموحات امي!، قال لي طموحات امك ولا طموحات نفسك؟ ؟؟، قولت ليهو امي... انا ما بقدر اخيب أملها ،قال لي استفدي حاجة؟؟ قدرتي تصلي للعايزاه؟؟ ،بقيت افكر و دمعت وقولت ليهو لا بس برضو امي حا تتضايق لو ما قريت ليها طب، قال لي وانتي ما اتضايقي لمن دخلتي مجال ما عايزاه ؟؟؟، ما رديت، قال لي الام حتى لو كانت صعبة بس لو شافت اصرار أولادها بتقتنع ما قصدي تتكلمي معاها باسلوب تشديد بس بأسلوب منطق، انتي ما ما بانيه شخصيتك ودافنها وراء شخصية امك للاسف والكلام دة غلط، قولت في نفسي ما عارف حاجة انا كبش الفداء امي المره التانية والمرة الأولى عندها بت وقرت طب وعندها اولاد مهندسين!!.
امي من زمان بتحب تنافسها مثلا تشوفها جايبه توب جديد تمشي تجيب واحد جابت دهب تجيب دهب بس ما اتوقعت انو تضغط علي بس عشان اقرا طب زي اولاد نورة ولا اتوقعت انو تزوجني العريس يلي اصلا مفروض يجي لاختي ولفت عقل ابوي واقتنع انو يزوجني ليهو.
قولت ليهوو
=ماوراك شغل تسأل فيني كدة ؟؟!
_ حا اشوفك حا تهربي لمتين! المهم انا حا ادخل انتظريني هنا.
انتظرت لمن خلص قولت ليهو مظفر نمشي مطعم ناكل ؟؟،عاين لي وقال لي تمام.
مشينا هو ما طلب لنفسو قولت ليهو ليه؟؟، قال لي ما بحب اكل برة، قولت ليهو ما كان تكلف نفسك...، قاطعني وقال لي احسن تاكلي وانتي ساكتة.
وصلت البيت زي 9 طوالي قعد في الكنبه وكان كانو تعبان حسيت انو بسببي عشان كدة جيت وقولت ليهو عايز شنو اعملو ليك ؟؟؟، عاين لي مسافة وقال لي اي شي وغمض عيونو ،حسيت بالندم الشديد على نفسي زول بيضة ما بعرف يعملها يعمل ليه شنو!!، استغفرت ومشيت افتش في النت لقيت وصفة مكرونة بالبشاميل وقررت اعملها!!، لكن بالجد ما اتجازفت وحرقت مرة واحدة!!، وطعمها كيف كيف!!، جبتها ليهو قولت ليهو اول مرة اطبخ انا حدي غسيل مكوة مطبخ صفر اكل وانت ساكت، قال لي البشوفك واقفة بكل الثقة يقول البت دي شيف المهم ما مجبور اكل اكل حرقان وراي اعلمك !، مشيت وراه وبقيت واقفة في نص ساعة ظبط عشاء عاينت ليهو بانبهار شديد!! قعدت جنبو قال لي تحبي تاكلي معاي!، حبيت اضوقها ضقتها وتاني عملت شاي قال لي اكلك شاي شايفك في المطعم السندويش ما تميته ،قولت ليهو دة روتين!، هبش دقنو ووقال لي روتين ولا قتل نفس بطيء، قولت ليهو انت أمس ما قولت لا تدخل فيني ولا ادخل فيك اسي دة شنو!؟، قرب وقال لي احسن قصة امس تنعاد تاني عشان بتكوني انتي الخسرانة، قولت ليهو تنعاد انت غريب امس بشكل والليله بشكل تاني ؟!، قال لي عندك اعتراض؟؟!، بلعت ريقي وقولت ليهو أبداً، قال لي طيب قومي غسلي العدة واعملي لي قهوة، قولت ليهو ابييت انا تعبانة عايزة انوم، شال الصينية وختاها وقال لي احسن تسمعي الكلام، مشيت وانا خايفة منو هراش بالجد كنت نعسانة شديد غسلت وطوالي مشيت انوم.
لمن صحيت للصبح لقيتو جاي من الجامع!، وقف وقال لي الساعة كم تصلي اسي؟ ؟،قولت ليهو لسه في وقت!، قال لي الشمس بعد كدة حا تشرق وتقولي لسه في وقت!؟؟، من بكرة ان شاء الله حا تصحي مع الأذان التاني، قولت ليهو مظفر ما بقدر، قرب وقال لي وُد كلامي واضح صاح، هزيت ليهو راسي.
بعد صليت عملت شاي وبقيت اشرب معاه ،قولت ليهو مظفر انت اتبدلت ؟،يعني يوم العرس كنت زول صعب شديد!، قال لي ما قدرت اتحكم في غضبي!، قولت ليهو ولا انا يمكن حملتك حاجة ما عندك بيها علاقة!!، قرب فجاءة ومسك يدي وقال لي ماف مشكلة بس هل انتي رافضة الزواج دة لسبب غير القولتيه ؟؟!، قولت ليهو كيف ما فهمتك، قال لي مثلا بتحبي زول وعايزة تتزوجية ،قولت ليهو لا انت اول راجل في حياتي انا بس حسيت انو حياتي حا تضيع بالشكل دة يعني تكون مسيرة بدون ما اختار براي!،لمتين اكون من غير قرار!؟ قال لي يعني ماف اي مشكلة معاي! كل الكلام الأمس دة بسبب وعيك المتأخر بانك ما صاحبة قرار ،ضحكت وقولت ليهو اي اي +ما كنت عايزة اتزوج اسي عندي حاجات في بالي عايزة اعملها قال لي الزواج ما عايق وانا حا اكون واقف معاك في تاني سبب لرفضك ؟؟!، بقيت افكر وقولت ليهو انت صعب ظاهر عليك من تصرفك الأمس، قال لي ! يعني زول عروستو قالت ليهو صعب ما اكذب بس حا تتعاودي علي وبعديين موقف امس ده تنسيه لانو انا واحد عروستة قلالت ليهو طلقني يوم العرس حا تتوقعي ردة فعلي كيف حا تكون،سكتا مسافة بعد كلامو و قولت ليهو طيب ليه غيرت رايك اسي امس مش قولت اي زول ما يدخل في حياة التاني ،قال لي انا فكرت طول الليل الزواج مهم وأساس الحياة الطلاق أبغض الحلال فانا قررت أنجح الزواج دة لانو ربنا أراد لينا الجمع دة حتى لو بدا بنكد ماف مشكلة حا اعاملك على قدر عقلك، قولت ليهو نعم نعم قاصد شنو ؟؟!، وبعدين انت برضك انا بعد اقتنعت رفضت توديني الصاله، قال لي كنت غضبان خوفت احرجك هناك عايزاني اختك في موقف صعب من اول يوم المهم عندك حاجة تانية في بالك بتخليك ضد الزواج دة ، ضربات قلبي زادت وقولت ليهو لسه صغيرة على كل المسؤولية دي، ضحك وقال لي صغيرة؟؟ ؟،عارفة في بنات فاتحات بيوت عمرهن 15سنة ،قولت ليهو انا ما بقدر اها، قال لي انتي ما براك في الزواج دة انا معاك وحا اساعدك ، قولت ليهو طيب باقي حاجة واحدة هي انو انا عايزة شريك حياة اختارو بنفسي، قال لي ياوُد ما يمكن الخير في الزواج دة ويمكن شريكك تلقيه فيني ، اتوترت شديد، شال خصلة من شعري وبقى يلفلف فيها وقال لي ما ممكن تحاولي معاي انو زواجنا دة ينجح، خجلت خجل شديد وما عرفت اعمل شنو ودنقرت راسي رفعوا وقال لي ما تقولي حاجة يا بت الناس، عاينت فيهو مسافة وقولت ليهو طيب،طيب دي موداني لوين ما بعرف بس دي قسمتي بعد كدة وانا ما عندي ضدو حاجة نهاي ما اكذب ممكن عشان كنت مضغوطة وممكن عشان هو كان جاي لاختي زعلت عليها قولت الكلام دة.
____________________________
بلسان همام
طول اليومين الفاتو ما قاعد امشي ليها لانو وفاق بقت عيانة فجاءة امي جات وقالت لي همام انت موش متزوج ليك يومين جادع مرتك براها واكان ما وديت ليها اختك كانت جنت ،قولت ليها امي وفاق كان عيانة اخليها يعني ،ما ردت لي واستغفرت، اختي التانية قالت لي بتمثل عليك! ،انت ما عايز تفهم طبيعة المرة الخبيثة دي مما جات بيتنا المشاكل ما هدت فيهو ،قولت ليها نبأ ما تخليني احصلك اسكتي، سكتت ،امي قالت لي شوفها مالها ساي اطمنت على حالها بت يتيمة ام وابو، عاينت ليها وقولت ليها يتيمة ام وابو ؟؟!، قالت لي اي وما عندها اخوات، قولت في نفسي عشان كدة قالت وحيدة.
بعد الكلام دة قررت امشي قهر اليتيم القرآن نهى عنو وصلت البيت اختي دخلت الغرفة واشرت لي اجيها سلمت على نرجس ودخلت وراء ميسم قولت ليها في شنو؟؟!، قالت لي اوريك حاجة عن نرجس يمكن تخليك تحن عليها كلمتني باي شي عن حياتها من تعذيب لخالها ومرت خالها لحدي حرمنها من القراية بالرغم من نسبتها العاليه لزواجها من واحد ومرتو يوم العرس ولماسيها بعدو!، قالت لي البت دي بعد كل الحصل ليها هل حا تعاملها بالبرود واللؤم دة دي مش مسؤوليتك في النهاية مش مرتك وربنا بسالك عنها بعد كدة هل صاح تهملها بالطريقة دي من اول يوم، قولت ليها انا غلطت في حقها بس حا أصلح الغلطة ممكن تخلينا برانا ،طلعت وانا جيت لنرجس لقيتها تعمل في الغداء قالت لي وين مشت ميسم ؟؟!، قولت ليها رجعت البيت ،قالت لي كنت عايزة تضوق الاكلة البتحبها من يدي ،قولت ليها ممكن تختها ليها في حاجة وانا بشيلها ليك، قالت لي تمام، بعد انتهت قالت لي اكلت ولا تاكل معاي ،قولت ليها باكل اتصلت بي وفاق مشيت بعيد وقالت لي الليله جاي قولت ليها حا ابيت عشان امي ما تشك، قالت لي تمام.
ختينا الاكل ولمن تضوقي اعجبت بطعمو! عاينت ليها وقولت ليها شكلك اتعملتي بدري قالت لي اي، بعد انتهيت قعدنا في الكنبة قولت ليها عمرك كم؟؟!، عاينت لي وقالت بحس هادي 20 ،قولت ليها واصلة اي مرحلة في القراية، قالت لي تالت ثانوي، قولت ليها موش 20 دي مفروض تكوني في الجامعة، الدموع جرن منها،قربت ليها ومسحت دموعها وقولت ليها ما تبكي ووريني ليه واحدة في عمرك ما في الجامعة، قالت لي ما لي سبب!، قولت غي نفسي هي ما واثقة مني ،قولت ليها رأيك شنو اقدم ليك في جامعتي البقري فيها ،بحلقت فيني عيونها وقالت لي انت جاد ،قولت ليها اي، ابتسمت وقالت لي تمام، قولت ليها مجالك شنو؟!، قالت لي أدبي جبت 90،قالت لي شاطرة! اكيد حا تكوني متفوقة في الجامعة، قالت لي بصوت عالي وبابتسامة طفولية جد؟؟؟، قولت ليها ايوا، قالت لي شكراً، قولت ليها العفووانا ممكن ما اقدر اكون زوجك بس حا اكون صاحبك اخوك وحا اساعدك عشان تاسسي نفسك ،عاينت لي وقالت لي طيب تمام، قولت ليها كدة زعلتك راحت مني بسبب اول يوم، قالت لي اي، قولت ليها طيب تمام بس حياتنا الزوجية ماف زول يكون عارف الفيها ،قالت لي ما عندك اي مشكلة انا ما كنت حابة اتزوج من الاول ،اعمل البريحك بس خليني أتم قرايتي عشان أقدر القى شغل دة شرطي للكتمان ،قولت ليها حاضر. قامت وهي مبسوطة وقالت لي اعمل ليك قهوة قولت ليها انا لازم انوم عندي محاضرة بكرة. قالت لي بتدرس شنو،قولت ليها ناس محاسبة قعدت وقربت مني قالت لي انت أدبي برضو، قولت ليها اي، قالت لي قريت شنو محاسبة ؟! ،قولت ليها اي، قالت لي مجال كويس، قولت ليها لو ابدعتي فيها أي انا مدير مالي حاليا في شركة كبيرة وريتها الشهادات حقتي وكل الإنجازات العملتها،قالت لي ما شاء الله تبارك الله عايزة ابقى زيك، قولت ليها زي، قالت لي اي موش مجال كويس خلاص انا قررت انو اخطو خطوتك ظاهر عليك زول عابر عايزة اكون عابرة كمان، ضحكت وقولت ليها حا تعبري لو عندك طموحي قامت وقالت لي أضعاف طموحك تصبح على خير.
في اليوم التاني لقيت نفسي نايم في الكنبة وشكلو هي غطتني، مشيت ولقيتها قاعدة تسرح في شعرها كان اسود طويل مما شافتني خجلت ولمتو سريع ،قولت ليها يا نرجس نمشي نسجل ليك ،قالت لي ما عندي شهادة ولا عندي حاجة اسجل بيها.
قولت ليها بطلعهن ليك مشيت معاها وقدمت في شهاداتها حق الثانوي وطلعتهن ليها ووثقتهن مشيت معاها السوق محل التلفونات وقولت ليها اختاري تلفون ؟!، قالت لي ما ضروري معاي واحد ، قولت ليها دة قديم ما بساعدك في الدراسة اختاري واحد، قالت لي ما قادرة ممكن تختار لي، قولت ليها لا مش قولتي انو ما حصل اخترتي حاجة بنفسك ؟! عاينت لي وعيونها بتعكس فرحتها اختارت وطلعنا مشيت عملت ليها شرايح وركبتها ليها فيهن كتب ليها رقمي في تلفونها وسجلتو باسم همام!!!، فجاءة اتصلت بي وفاق وقالت لي وين انت؟!، قولت ليها في الجامعة ما كنت عايز اوريها اني معاها قالت لي بقيت تكذب التفت وراك..........