رواية حظي الفصل الثاني 2 بقلم سلوى إسماعيل
اتلفت على الباب اشوف عماتي الاثنين بشاير ومروه وبدموعي ديك جريت عليهم اللاقيتا اول فيهم حضنتها وبقيت ابكي والاثنين بعاينو لي بس ..
فكيت عمتي بشاير وبقيت قالده مروه ويحليلا بكت معاي ولي منهم 4 شهور ماشفتهم بقيت واقفه معاها وبسأل فيها مالكم طولتو مني ان شاءالله عافيه ؟!
عمتي بشاير خلتنا في وقفتنا وبقت تقول اهل البيت سلااااام عليكم جوها طالعين خالاتي سلمو عليها وجات امي تلفح في توبا وسلمت عليها وعاينت لي لقتني متشعبطه في عمتي مروه وفي نص كلامي معاها جات امي سلمت على عمتي وانا مشيت على عمتي بشاير وقلت ليها تعالي اتفضلي ما خشت جوه جات معاي طوالي ..
دخلتهم برندتي قعدو وانا مشيت قلعت لبسي وجيت لقيت اخواتي وامي قاعدين معاهم بقو كلهم بيعاينو لي عملت نفسي ماشايفاهم دخلت اتجاه عماتي ..
ويحليلم كانو جايبين لي عبايتين وشبط اسود وطرحتين وشنطه صغيره فرحت بيهم فرح اول مره في حياتي البس عبايه كنت بحوم بي قميص البيت معاهو طرحه
اخدو قعدتم واتغدو وطلعو قريتم ماقريبه مننا وسبحان الله عماتي الاثنين ديل هم بس اخوات ابوي وماعندهم اطفال وحده اتزوجت واطلقت بسبب عدم الخلفه والتانيه لما عمرا عمل 30 م اتزوجت وياهم بقو براعوني انا طالبو بي كم مره واهل امي رفضو ماعارفه ليه مع انهم بكرهوني ..
جاء المساء كنت بجرب في عباياتي ومبسوووووطه جو داخلين اخواتي ال2 سلمو علي قلت ليهم اتفضلو قلعت العبايه وطبقتها مع اختا ورفعت الملايه من تحت السرير ودخلت الملابس في شنطتي وطبلتها رجعتها تحت السرير وهم بعاينو ..
اخواتي ( لين وليان ) وانا امنه عليك الله م ظلم حتى في الاسم 💔
قعدو مسافه ساكتين وانا مدنقره بس م عاينت في وجوهم زاتو ..
الكبيره فيهم لين قالت لي م حددو ليكم الامتحانات
قلت ليها : حددوها يوم 18/2
ليان : ماشاءالله اها ان شاءالله مجتهده عندكم اساتذه خصوصيين ؟!
قلت ليها : لالا في دروس عصر
لين: برضو كويس الحصص دي بتقوي ليكم الفهم
ليان : شدي حيلك كده وكملي الثانوي وتعالي لينا القرايه هناك افضل ..
قلت ليها : ان شاء الله
بعدها سكتنا ولا انا ولا هم ماقادرين نفتح موضوع للحظه حسيت انهم قراب مني بس تاني نفضت الفكره وقلت هوووي يا آمنه م تتعشمي ساي باكر برجعو وبترجعي ياكي زاااتك امونه القديمه ..
لين : جيبي تلفونك اسجل ليك رقمي
قلت ليها ماعندي تلفون
ليان : معقووول ؟!
لين : انا مرسله ليك تلفونين في الحاجات الاخيره الرسلناها ليك !!!
قلت ليها لا وصلتني حاجات اولى ولا اخيره ولا تلفون اول لا تاني لكن هاك مديت ليها كراس قلت ليها هاك اكتبي رقمك هنا ان لقيت تلفون من صحباتي برجع ليكم ..
سجلت الرقم وبقو بعاينو لبعض حسيتو اضايقو ..
في قعدتنا ديك جات خالتي البعد امي طوالي بناتا اكبر مني ووحده قدري ..
قالت لينا بتتوسوسو في شنو ؟!
بعدها جات بنت خالتي اسمها مريم لابسه عبايه وطرحه
اخواتي عاينو لبعض وقالو لخالتي دي بنتك ؟!
قالت ليهم اااي بنتي دي في عمركم ورايقه وبتعرف للونسه السمحه قلت تونسكن ماتزهجن جات سلمت وقعدت معانا ..
ليان قالت ليها : عبايتك حلوة يامريم اشتريتيها من وين ؟!
مريم : جابتا لي امي
لين : جبتيها من وين ياخالتي ؟!
خالتي بي نهره كده قالت ليهم جبتها من السوق السوق ده ماصنع الا ليكم انتو وضربتني في راسي لمن ميلت قالت لي قلتي ليهم شنو انتي شنينه تنتهي منك
انا مافاهمه شي نهائي وقاعده في نصهم زي الطيره ..
جات امي داخله ماسلمت علي برضو وده اكتر شي موجعني ..
قالت ليهم مالكم يابنات ؟!
لين : ي ماما لينا 3 سنه بنشيل من مصاريفنا وبنحوش بالجمبه سنه كامله وفي النهايه بنشوف منو من الاهل جاي السودان وبنمشي المولات نشتري الكريمات وزيوت الشعر والعبايات والبجامات بنقول اختنا كبرت ماعايزنها تحتاج حاجه بنرسلا هنا واخواتك سيادتم بيشيلو اي حاجه وم بكلموها زاااتو
ليان: شوفي ياماما العبايه اللابساها مريم دي اشتريتا انا كان مفروض اغير تلفوني بس قلت لا اختى اولى جبتها معاها كم حاجه وهم بي كل بجاحه شالوها ..
امي بقت تعاين ليهم ..
انا طوالي وقفت ..
قلت ليهم انا مامزعلني انهم شالو الحاجات ولا مزعلني انهم شايفين انا مابستاهل انا المزعلني انو طول الزمن ده وهم بيربوني على اساس انا الزوله المكروهه الزول دايرني ماف
ياخ شيلو اي شي بس وروني انو في بشر بسأل عني وروني اني مامكروهه من امي واخواتي زي م انتو بتقولو م هديل اخواتي مابعرفوني زاتو وياهم بتزكروني وكمان مرسلين لي تلفونات كنتو تخلوني اتواصل معاهم ياخ ..
قلت كلامي ده ولأول مره ابكي بي حرقه
امي قالت لي خالتي مادام الصغار بقو احسن منك مالك ساي كان كلمتيها ؟
خالتي: يختي هيي انتي وحيييدك ماتنضمي لانك ماك دايراها ولا بتريديها م تعملي نفسك الشريف الرضي ..
امي: في النهايه دي بنتي ادورا وله لا مابخصك وانتي مامن حقك تشيلي حاجه مرسله لي غيرك ..
خالتي : يختي بتك الخنيته دي زاتا مابتستلهل شي كان ادوها ليهم مابتعرف تستخدمم
ومرقت خلتني مع امي واخواتي
امي قالت لي دي حالتك يوميا ؟!
ليان : وكمان خالتي ضربتا على راسا ياماما حرام البحصل ده ..
ضحكت وقلت ليهم ماتشغلو بالكم انا ربنا كريم علي ..
امي طلعت وخلتني مع اخواتي بقو يتونسو معاي وبتحاشو يتكلمو في المواضيع القديمه ..
اخواتي ظريفين شديد لين في الجامعه وليان ممتحنه الشهاده الثانويه ..
طلعت تاني يوم وجيت لقيت البيت كلو ينضم والدنيا مولعه ماااالكم ؟!
قالو لي ....