قولت ليهو مظفر اهدى مسك يدي وقال لي انا هادي انتي بس ما تتدخلي تمام ،قولت ليهو مظفر ما تلعب باعصابي عليك الله ،قال لي شنو مظفر مظفر قولت ليك هادي انا بس عايز اقول كلمتين لهمام وانتي زي الشاطرة تقعدي هنا ،قولت ليهو لا ما بعقد، قال لي لا اله الا الله، قولت ليهو محمد رسول الله ،قال لي اقعدي هنا!، شديت على يدو! وقولت ليهو ما عايز تحصل مشاكل بين الإخوان بسببي الزول ما عندو غير اخو عاين لي وقال لي اخليه يهينك وانا قاعد بعاين ليك؟ ؟!، قولت ليهو انا اخدت حقي بيدي منو!!!، قال لي لا دا كمان موضوع براه!، لمن نمشي البيت نتناقش فيه!، بلعت ريقي وخوفت! ،قال لي انتظريني هنا تمام ،قولت ليهو اوعدني من غير ضرب!، ما رد وفكا يدي وعاين لي وقال لي في حاجات كتيرة بتدسيها علي بالرغم من اني انا بسالك منها، يبدو انك لسه ما عندك الثقة الكافية فيني مع انو انا أظهرت ليك كل جوانبي وما دسيت منك حاجة وكنت صريح في حكاية تحسين زواجي منك وبسعى للموضوع دة لكن انتي ما مدية الموضوع أهمية ،قولت ليهو لا والله انا بحترمك وزاتي ساعدة في اني اعرفك وزوجنا دة يستمر طول الدهر بس في حاجة صعبة احكيها ليك وعايزة وقت! وانت لازم تتقبل الحاجة دي!، ما رد وبقى ماش وانا قلبي وجعني!، بقيت لاحقاة لمن وصل ليهو ما قال كلمة وطوالي اداهو بنية ،قال ليهو يا زول مالك؟ ،قال ليهو انت ما عارف نفسك عملت شنو ولا بتتظارف، همام قال ليهو عملت شنو؟؟!، قال ليهو وكمان بتسال بوريك عملت شنو بعد اكسر ليك راسك وقفت بينهم قولت ليهو اهدى! عشاني دة مستشفى، بقى يمسح في وشو بغضب كبير وتاني قرب وقال لي وهو بضغط على أسنانو اخليه عشان تاني يسيء ليك ولا شنو، قلت ليهو انت قولت شنو مش قولت باخد حقي بيدي عشان كدة ما بخاف عليك، قال لي وُد بعدي عليك الله وخليني اشوف شغلي!، عايز بس اوريهو البحاول يمد يدو عليك بحصل ليه شنو!، مسكت يدو وقولت ليهو مظفر امك اسي بتجي عايز تشوفكم وانتو متشاكلين ،قال لي امي متعودة زحي على جنب، قولت ليهو حتى لو متعودة قايل قلبها ما بوجعها وكمان انتو تؤام يرضيك يبدر عنكم سلوك زي دة ،قال لي لو في نفسي ممكن اسامح بس تجية الجراءة يتكلم معاك ويحاول يمد يدو عليك والله ما اسامحوا، قولت ليهو لو قولت سامح عشاني! ضغطت على يدو، همام قاطعنا و اعتذر في اللحظة دي وقال لينا انا غلطت في حق مرتك وتاني ما ببدر مني تصرف زي دة، مظفر قال ليهو لو بدر جهز حفرتك بيدك + احمد ربك انو وُد هنا لانو والله لو ما كان هنا ما كنت سلمت مني!، وتاني مرة لو فكرت تعاين لمرتي معاينه ما ياها حا اقدد ليك عيونك الاتنين واسلمهم ليك في يدك! وانت حر بعد داك، همام قال ليهو اعمل الداير تعلمو بس لو سمحت انا حالياً ما رايق وبالي مشغول، قال ليهو ما يخاف لانك انت الاذيتها يا كلب! همام هنا ملامحو اتغيرت وبقى قاعد احتمال هو زول طيب بس وفاق ابعدو وملت راسو من الناس الحوليهو.
قولت ليهو طيب خلاص يا مظفر ورح نقعد بعيد وننتظر، مشى معاي وقعد بقى يعاين لي وهو ساكت، قولت ليهو اها في شنو؟؟!، قال لي اخد حق يدك دا ما معناتو تواجهو اي زول براك، قولت ليهو اسفة بس ما عايزة اعمل ليك مشاكل مع اخوك بسببي، قال لي كان تعمليها!، قولت ليهو لالا والله مستحيل دي فتنة انتي عايزني ابقى فتانة! ،اتنهد ومارد، جات امو واخواتو وباين على امو التعب! جات طوالي لولدها همام وادتو كف وقالت ليهو الكف دة مفروض اديك ليهو من زمان بس قولت ولدي ما عايزة اخرب عليهو.
انا اتعرضت لاساءات كتيرة من مرتك وكنت ساكتة عشانك انت كنت بتجي تصرخ فينا على اغلاط ما عملناها وبرضو بسكت عشان السترة بس والله بعد كدة ما اسكت بعد وصلت معاك تاذي بت الناس ، انا ما ربيتك كدة والله ما تربيتي البتخليك تعمل كدة وعشان شنو عشان مرة!، مظفر جاء لامو وقال ليها يا أمي اسي ضغطتك برتفع تعالي معاي دة عمرو ما بفهم!، ساقها ومشى وانا لحقتهم امو دي الدموع نزلت منها ،هو مسحهن ليها و باس راسها وجاب ليها موية وقعد جنبها ومسك يدها وقال ليها نطردهم من البيت وكدة نرتاح كلنا ،قالت ليهو المرحوم وصاني عليكم كلكم وبعدين دا ولدي كيف ابعدو مني هو في البيت بقى بعيد فاكر لو طلع برة حا يجيني والله ما المحو بعيني! ،زعلت على حالها أعوذ بالله من مرة زي وفاق ياخي دي ممشياه زي الخط المستقيم وحتى امو خربت العلاقة بينهم، مظفر كان عايز يتكلم أشرت ليهو بعدم الكلام سكت، قعدت معاهم وبقيت اونس فيها عشان تنسى!، تاني قامت وقالت امشي اصلي هنا موش في حتة للصلاه قولت ليها اي ورح بمشي معاك مشينا وخليتها تتوضى وانا لاقيت زميلتي وبقيت أدي واخد في الكلام معاها مدة ما تتوضى خالتو عشان اتوضى بعدها جات وفاق ومن وين ما بعرف ووقفت جنب خالتو!، انا طوالي اتحركت بعليهن كانن مدياتني ضهرهن ،قربت سمعت قالت ليها يا عجوز دي لو انا كنت عاملة العمليه ما كنتي جيتيني!!، ولا عشان بتحبي ديك اكتر!، نفسي اعرف انا اساءت ليك بشنو عشان من اول ما دخلت البيت بقيتي ضدي،قالت ليها انا ما بقيت ضدك ولا حاجة انتي براك القلبتي علينا خليتني اسلمك ولدي وتاني حرشتيه علينا وبرضو سكتا عشانو! لكن المرة دي لو بس قربتي على نرجس دي والله ما اسكت بقى تخت اصبعها في كتف خالتو وتقول بتعملي لي شنو بقلة احترام كدة ،بالجد ما كنت قايله انو دة الساكتة عنو خالتو!، جيتها ومسكتها ليك من شعرها وشلختها ليك ودقيتها عشان تتأدب وقولت ليها لو خالتو مسكينة ومسكتة بناتها انا ما بسكت ليك والله بس تاني تقولي كلمة ليها الا تشوفي مني حاجة ما بتعجبك!، هي طوالي غضبت وهجمت علينا بقينا نضارب لمن فكونا من بعض!، قالت لي والله اندمك، قولت ليها تعالي ندميني كان تقدري علي قايلاني هينة!!!!، عاينت لي وقالت لي اصبري بس! ومشت!، خالتو قالت لي ما كان تحصلي معاها مرحلة زي دي ،قولت ليها ما بخليها تسيء ليك انتي كويسة؟؟! وليه بتسكتي ليها كدة، قالت لي لو عملت اي حاجة تمشي تشتت دمعاتها لولدي وهو يصدقها ،قولت ليها لا حول ولا قوة الا بالله العلي العظيم طيب ليه اصلا رضيتي بالزواج دة وعارفها كدة ،قالت لي الوش دة ما اظهرتو الا بعد العرس!، قولت ليها منافقة كمان حسبنا الله ونعم الوكيل عملت شنو تاني ليكم، قالت لي هي الما عملتو شنو!؟، خلتو ما يدينا ولا يجي بعلينا وترت علاقتو مع اخوانو كلهم! ومسيئة لي ولبناتي وبرضو تطلعنا غلطانين! كنا كلنا بناكل سوا وحالتها حاجة ما بتعملها معانا بس بقت تنبذ الاكل فمرة كدة بتي قالت اطبخي انتي قعدت تتبكى لمن فصل ليها عيشتها براها ومرقنا كعبين وانو مشغلين ليهو مرتو ما عارفة كيف زرعت ليهو الفكرة دي في راسو، قولت ليها خالتو انتي لو طردتيه بتادب زي ما قال مظفر!، قالت لي بتي هووي اسي ما شغال بي لو خليتو يطلع من البيت والله افقدو دة ولدي.
زعلت عليها شديد اكعب نوعية من النسوان البقلبن الراجل على اهلو! والله حتى لو النسيبة كعبة ما صاح مرة تبعد راجل عن امو في النهاية الجنة تحت أقدام الأمهات وهي لو صحي بتحب راجلها ما اظن تعمل كدة.
عاينت لوشي وقولت في نفسي أواجه مظفر كيف!؟، بقيت قاعدة في الاستراحة وقولت لخالتو لو سالك مظفر قولي ليهو نامت في الاستراحة من التعب قالت لي تمام.
بعد مسافة لقيت اتصال ما رديت!، مرت 3ساعات وبرضو ما رديت قررت انو امشي من هنا!، طلعت وبقيت متحركة لمحت مظفر من بعيد!، بس ما اشتغلت بيه، طلعت ركشة جاني اتصال منو رديت قال لي ماشة وين؟!، قولت ليهو بيت امي ،قال لي السبب شنو البخليك ترجعي وحتى نرجس ما تشوفيها، قولت ليهو ما عندي اي سبب عايز تمنعني من بيت اهلي كمان مع السلامة ،قال لي جاية متين ،قولت ليهو حا ابيت قفلت ،رجع اتصل ما رديت.
وصلت بيت امي ودخلت لقيت معاها رماز توري فيها في صور!، وامي شغاله دة جابتو من وين ؟؟! عامله خلقتها زي خلقة امها ،سلمت وقعدت قالت لي شوفي عريس اختك !!! ولا سال في الممثلين!، قولت ليها ربنا يسعدها!، قالت لي محظوظة في اي حاجة ،قولت ليها دة نصيب بس ،قالت لي ماف مشكلة مظفر زاتو بنافسو! يا يمة صيدلي واخلاقو عاليه وسمح! ،قولت ليها يا أمي تنافس شنو ؟! هو نحن في لعبة!!، قامت وقالت لي يا بتي لعبة شنو بس الناس ديل عندهم الشماته اسي ضاحكة فيني عشان ما جبت اولاد بس والله بضمن ليكن حقكن وباخدو قوة تاني قربت وقالت لي العمل كدة منو في وشك ؟!، قولت ليها اتشاكلت مع بت، قالت لي دكتورة وتتشاكلي، قولت ليها الدكاترة ما بشر زاتهم يا أمي ولا كيف.
دخلت منها ورماز كمان امي حياتها كلها حا تكون كدة ما اظن في يوم تنبسط هي لو ما عايزة كدة من الاول ما كانت تتزوج وتدخل في دوامة زي دي، مرتو الأولى دي ما عندها شغله باي حاجة وفي حالها وهو بحترمها وبقدرها! وهو اتزوج امي بس عشان هي مرت اخوهو الاتوفى.
رقدت رماز جات وقالت لي وشك دة الحصل ليهو شنو؟!، قولت ليها اسكتي بس اتشاكلت مع حماتي!!!، قالت لي لشنو؟!، قولت ليها قصة طويلة شديد بحكيها ليك لمن انوم.
بالمساء كدة صحيت جات رماز وقالت لي مظفر برة منتظرك ،قولت ليها قولي نايمة!، قالت لي هو قال لو نايمة صحيها، قولت في نفسي متوقعة شنو اكيد ما حا يخليني بحالي، قولت ليها تمام خليهو يجي بقيت مغتطية منو جاء وقال لي ارفعي البتاع دة واتفاهمي معاي ،قولت ليهو بردانة، قال لي عرفت في حاجة!، قعد جنب راسي وحاول يزح الغطاء قولت ليهو مظفر بعد مني لو سمحت!، مااشتغلت بي وزحها طوالي دفنت راسي حاول يقومني رفضتا تاني قومني بالقوة وعاين لي في وشي، قال لي يبقى دي القصة!!!!!!، اتشاكلتي مع منو ؟؟!، قولت ليهو وفاق!، قال لي لشنو؟!، قولت ليهو اسباب تافهه، قال لي قدري عليها ولا قدرتك، قولت ليهو تقدرني انا انا شلت شعرها في يدي!! كان لازم اوريك ليهو صورة التخرش دة جاني في لحظة كنت فيها ما منتبه بس ،ضحك وقال لي في زول بعدها سالك قولت ليهو زي منو؟!، قال لي همام!؟، قولت ليهو لا لا، قال لي طيب انا ما حا ادخل في مشكلة بتخص النسوان!، قولت الحمد لله ،قال لي عايزة تبيتي هنا، قولت ليهو لا ماشة معاك بس اول شي نمشي لنرجس، قال لي الوقت اتأخر بكرة من الصباح تمشي ليها، قولت ليهو للصباح بعيدة لازم اعتذر، قال لي وانا قولت للصباح، قولت ليهو بس صباح بدري تمام !، قال لي طيب بس لملمي شعرك دة وتعالي، بقيت الملم واختي دي جات ختت لي مكيب وجابت لي فستان قالت لي جعفر الجواك دة لازم يطلع انت عروس راجلك مفروض يشوفك في أحسن حالتك، سريع سريع جهزتني وطلعت.
طول الطريق ما علق قولت ليهو هااا ما شايف في حاجة متغيرة عاين لي بالجنبه وقال لي لا ،حدرت ليهو والتفت منو.
في البيت قعدت في الكنبه جاء وقعد جنبي وعاين لي وانا بقيت صارة وشي ،قرب وقال لي طالعة قمر بس إبتسمي لي انا كنت عايز اشوف ردة فعلك كيف، قولت ليهو ثقيل بيخت ام اللحظة ،ضحك وانا ضحكت معاه ختيت راسي في كتفو وحكيت ليهو يومي وقولت ليهو صادفتني واحدة اسمها شهد، قال لي بصوت متغير شهد ؟؟!، قولت ليهو اي شهد قالت انو انتو كنتو زملاء شغل، قال لي اي، قولت ليهو متين ،قال لي عايزة تعرفي ليه؟!!، قولت ليهو ساااي، قال لي النسوان كلمة ساي ما بقولها من فراغ، ضحكت وقولت ليهو خبرة لكن كان عندكم كم حبيبه زمان ؟؟!، قال لي ما متذكر؟!، قولت ليهو على منو، قال لي البشوفك انتي تاني بتذكر بنات، فصلني الغياظ وقلبي اشتغل زي الدلوكة، خجلت شديد وما عرفت ارد بشنو! زحيت راسي براحة من كتفو، وقولت ليهو نعمل قهوة، قال لي لااا اقعدي جنبي بس.
في اليوم التاني مشينا لنرجس لقيناها كويسة الحمد لله اعتذرت ليها على اني ما انتظرتها للعمليه وقولت ليها بحكي ليك السبب بعدين!!!. المهم همام ظاهر انو كان مساهر طول الليل معاها وظاهر انو ما عارف عن مشكلتي انا ووفاق.
بعدها ساقني مظفر المسشفى الشغالة فيها بعد وصلنا قولت ليهو سوق كويس، قال لي تمام ضمتيو مسافة ونزلت وهو ابتسم لي ومشى
يوم الديوتي كان يوم ضاغط عديل كدة ونفس ما كنت قادرة اتنفسو باليل كنت واقفة مع علي وبناقش في حاله معاهو ، بعد انتهينا قال لي المخيمات ألفي... محتاجة دكاترة وانا فكرت امشي ،قولت ليهو الله حاجة كويسة تساعد الناس لو بقدر كنت مشيت بس ما ظنيت مظفر يخليني، قال لي لو كنت اتزوجتك كنت خليتك، عاينت ليهو وضحكت لانو بحب الهظار! ،هو إبتسم بس ومشى.
المهم بعد فترة اتصل بي مظفر وقال لي اشوفك دقيقين ممكن ،قولت ليهو اي! وين انت، قال في باب المستشفى مشيت ليهو لقيتو جايب معاه اكل وقال لي اهتمي بنفسك وما تكتري من شراب القهوة! قولت ليهو تمام في تاني اي تعليمات، قال لي لا بالتوفيق في شغلك، قولت ليهو حاضر.،قال لي حا امشي بعد كدة، قولت ليهو ما ممكن تقعد اكتر، قال لي لا انتي موش مشغولة ،قولت ليهو اي طيب مع السلامة ،ركب عربيتو واتحرك بقيت اتبسم براي اكتر اختيار صاح الراجل البحس بيك والبحس بتعبك ،بقيت ماشة سمعت صوت بت بتنادى التفت قولت ليها شهد ،قالت لي اي كيفك؟؟!، قولت ليها تمام الحمد لله شايفاك مرة تانية هنا عندك زول مرقد، قال لي زوجي!، قولت ليها يا لطيف مالو؟ ؟!، قالت لي حادث، قولت ليها لا حول ولا قوة الا بالله العلي العظيم ربنا يرفعو وضعو كيف ؟!، قالت لي لسه ما قادرين يحددو، مشيت معاها راجل كلو اجهزة قولت ليها الله يرفعو قالت لي امين امين.
________________________
بلسان نرجس
مرت الايام وانا اتحسنت وبقيت اتحرك بعصا ووُد أصرت امشي معاها بس رفضت لأنها شغالة فبقى همام هو القاعد طول الفترة الفاتت وكان يساعدني كتير، ووفاق بقى ما عندها ظهور في حياتي لانو ضمنت ورقتها البتربحها ضدي ،رسلت لهمام وقولت ليهو قررت بكرة امشي الجامعة، قال لي لمن اصل ليك بنتفاهم!،قولت ليهو تمام!، عاينت لوشي في المراية غسلتو وعملت لي مرطب وروج وسرحت شعري وبقيت قاعدة ما عارفة ليه عايزة يشوفني سمحة!؟؟، احاسيسي طول الفترة الفاتت كانت ملخبطة اهتمامو بي كدة مشكلة بالنسبه لي، بديت اتعلق بيه.
جاء وقعد وقال لي اها الليله كيف، قولت ليهو الحمد لله بكرة لازم امشي الجامعة بعد بقيت كويسة ، قال لي لا انا بشرح ليك، قولت ليهو زهجت من البيت انا!! عايزة ارفه عن نفسي قال لي تمام البسي عبايتك وخليك جاهزة، قولت ليهو ماشين وين!! ،قال لي مكان نرفه فيها، قولت ليهو ترفيهي الجامعة بس ،ضحك وقال لي ماف ليك، لبست وبقيت متحركة ببطئ شالني وقال لي كدة ساعة ما بتصلي للباب ضربات قلبي ارتفعت ونفسي كتم! ،ثبتا فيهو بقى يلفلف بي وتاني جابني، قعدت في الكنبة قعد وبقى يشرح لي فجاءة الباب دق ومشى فتحو طلع خالي ومرتو وانا هنا اتجمدت من الخوف...............
اللهم صل على محمد عدد ما ذكره الذاكرين وغفل عن ذكره الغافلين..❤
__________________________
*اللحظة اللي صوتك وملامحك بيتغيروا فيها وتاخد نفس طويل عشان متعيطش، لما حد يفكرك بحاجة انت بتعاني علشان تنساها .*