رواية بينهما الفصل السادس 6 بقلم ال زهراء
قعدت في الكنبة قعد وبقى يشرح لي فجاءة الباب دق ومشى فتحو طلع خالي ومرتو وانا هنا اتجمدت من الخوف! خالتو جات وقالت لي سلامتك لو ما كلمتنا وفاق ما كنا عرفنا!، انا هنا بقيت متجمدة وما قادرة اتكلم!، ديل ما بتذكروني بدون سبب ،بعد سلمو قعدو! ،همام طوالي قال لي نرجس مش قبل شوية قولتي لي نعسانة عاينت ليهو وقولت ليهو ايوا هو شكلو حس اني مضايقة شديد وصلني لغرفتي وقال لي ما تطلعي انا بهتم بامرهم، قال لي ما عارفة اشكرك كيف!، قال لي ابقي كويسة بس وما عايز حاجة تانية! ليك 4شهور ما قومتي من السرير!، قولت ليهو حا ابقى باقي القليل يا همو!، حك راسو وقال لي اول مرة اسمع دلع همو دة ،ضحكت وقولت ليهو جدو ملل همو احسن!، ضحك وقال لي ما فرقت الاسم العايزاهو ناديني بيهو يا ستي! جاهو اتصال من وفاق قال ليها بعد نص ساعة بكون معاك في شارع الدهب، دخلت جوة وقولت في نفسي البت دي كل فترة هي في شارع الدهب ما بتزهج!، ليه ما عايزة تدي نفس لهمام همام اكيد بدي اهلو شهرياً لانو ابوه متوفي وامو محتاجة ليه!، وبعدين اخواتو شابات واكيد بديهم براهم! ،الإخوان نعمة وياريت لو عندي اخو اتصلت بي ميسم وقالت لي كيفك؟!، قولت ليها كويسة قالت لي قاعدة ولا ما في البيت ،قولت ليها قاعدة في حاجة ،قالت لي عندي ليك هدية!، قولت ليها هدية قالت لي اي لمن اصل بوريك ليها! فرحت انو في زول اتذكرني ! ،وانا بتصفح جات مرة خالي داخلة قعدت وقالت لي حقوق ابوك نزلن يادوب عايزين توقيع عاينت ليها وقولت ليها ليه اديهم ليك ،قالت ليك زوجك سترك شكلو بس امو لو عرفت البحصل شنو!!؟، قولت ليها زي الكانت غلطتي انتي عارفة اني كنت ضحية، ضحكت وقالت لي لو كنتي ضحية ولا غيرها بقيتي معيوبة! وشوفي الولد مهما عمل البت بتتحمل المسؤوليه! لانو الولد ولد!، قولت ليها في ميزان الأعمال البترفع ماف فرق بين ولد وبت! هنا ناس الدنيا ما عادلين بس ربنا عادل واكيد لو ما اخدت حقي في الدنيا في الآخرة باخدو منكم! جيبي الأوراق وخليني اوقعهم وتاني ما اشوفكم في اللحظة دي جاء همام داخل وشافني شايله الأوراق وبوقع فيهن قرب وقال لي ديل أوراق شنو ،ردت خالتو قالت لي ما فيهن حاجة مهمة خطفهن مني وقراهن وشرطنهن قدامنا وقال نرجس ما بتتنازل عن حقها! والعندو معاها حق يمشي يشتكي... ثانية واحدة والاقاكم برة البيت دة وما المحكم تاني هنا ولا حايمين بعلي نرجس لانو والله حا تشوفو مني معاملها تانيه البت دي بعد كدة انسوها!، خالتو قامت وقالت ليه انت بعد عارفها مالها رضيان بيها يعني! ؟، همام قال ليها اي يلا اتخارجي مشت وهي غضبانة شديد! وخالو لانو خواف ما جاء تاني لي ومشى معاها.
بالجد شعور بشع الناس تمسك شي انت ما عندك اي دخل بيهو.
بعد مشو جاء وقال لي انا حا امشي واحتمال ما اجي! اقفلي الباب عليك كويس قولت ليهو تمام، انا ما حصل حاججتو على حاجة المهم ميسم جات بعدها وقعدت والهدية كانت اسدال صلاة ومعاها طقم مصحف ومصلايه!، حبيتها شديد وشكرتها!، قالت لي كان مفروض اجيبهن ليك من زمان بس الفلس!، ضحكت وقولت ليها ماف مشكلة +قولي لهمام ومظفر يزيدو المصاريف ،قالت لي بري همام ما قاعد يديني هو فاضي من مرتو لكن الله يخلي مظفر بس الفترة دي مضغوط عايز يدخل في مشروع!، وانا ما عايز اكترها عليهو القروش دي اسي جاتني من خالي الله يديه العافية، انصدمت من كلامها عن همام شديد!، وبالجد ما كنت مفكراه انو ما بدي اخواتو.
بالمساء كدة جاء بقيت مكشرة وشي ليهو قولت ليهو ما قولت مبيت قال لي اي اسي جاء اشيل حاجات واشوفك وامشي ،ما رديت والتفت منو!!، جاني بهناك وقال لي عملت ليك حاجة انا!؟، قولت ليهو لو اتكلمت هل حا تستمع لي ،قال لي قولي كلامك وبشوف! قومت وقولت ليهو لشنو ما بتدي اخواتك قروش وطول الوقت مع مرتك في السوق مرة دهب مرة عدة مرة ملابس اي نعم هي عندها حق عليك بس اخواتك برضو مفروض تديهن وشهرياً كمان ولو ما عايز انا ما عايزة قروشك برضو!، الما بدي اهلو ما فيه خير للناس يا همام اعرف!، قال لي كنت بصرف عليهن فترة طويلة بس مظفر اشتغل وبقى ما مقصر! وانا المسؤوليه كترت علي ،قولت ليهو اي مسؤوليه ؟؟!، ياها وفاق بس! ولو علي انا انت موقف مدتهن قبلي صاح ؟!، بقى يعاين لي ساي وقال لي ما كنت قايل انو قروش مظفر ما مكفياهن، قولت ليهو مظفر داك شخص براهو وانت شخص براك ما عندك شغلة بقروشو وما تقول لي كنت بصرف! لانو ما فيها حاجة زي دي صرفك على اخواتك وامك مفروض ما يتوقف لمن تموت يا همام هن عندهن منو غيرك ؟، بقى ما مركز معاي وبفكر كتير! وقال لي نرجس شايفة اني غلطت يعني؟!، قولت ليهو لو ما شايفة كنت اتكلمت معاك!، اتنهد وقال ما قاصد وهن ما حصل بعد وقفت القروش طلبن مني ،قالت لي لانهن عزيزات نفس يا همام، انت وقفت يجن يشحدنك يعني ولا شنو .. في زول بشحد اخوهو على واجبو، بان الضيق في وشو وقال لي انا ما كنت فاكر الموضوع كدة!، يعني قايل انو هن مكتفيات وعندهن اي حاجة ،قولت ليهو قول عندهن يعني شنو زيادة الخير خيرين وبعدين انت شيلت كل الحمل وخليتو على مظفر وما تقول انك كنت ماسكو وماسك اخواتك انت ربنا بس سههل ليك الشغل اول! وهو لو اشتغل اول كان مسك كل البيت حتى انت انا متأكدة، اتنهد واضايق شديد قربت ليهو وضميتو وقولت ليهو همام انت طيب بس مشكلتك انك ضعيف اتجاة وفاق وعايز تراضيها حتى على حساب اخواتك بعدني وقال لي وفاق ما عندها دخل، قولت في نفسي هي بتزرع فكرة انو ما يدي بطريقة استراتيجية احتمال كانت بتقول ليهو اخواك مالو ما يجيب! انت تعبان وهم ما مقدرين الحاجة دي وما بتكون بتشتري حاجة نظام انا بوفر ليك بس هم لا، لمن اتمكنت منو وحسستو انو هي بس العايزة توفر ليهو قروش وواما اهلو غير الاستنزاف ما عندهم حاجة، بت خبيثة تفكيرها أخبث منها راسي كل القروش بقن تحت يديها بس انا ما بخليها تفصل اهلو منو ولو أطلقت وكشفت الحقيقة!.
قولت ليهو طيب تمام ما عندها اي علاقة! بس ينفع ترجع تصرف على امك واخواتك ولا لا،قال لي بقبلن ؟؟!، قولت ليهو لو اعتذرت اعتذار صادق بقبلن! ،رقد في رجولي وقال لي نرجس انا غبي وشديد كمان بقيت ازح ليهو في شعرو وارجعو وقولت ليهو انت بتشوف الأمور ببساطة بس يعني ما بتفكر في عاقبة أفعالك ،قال لي لأنهم ما اتكلمو معاي. قولت ليهو اعيد الموضوع دة كم مرة هن لو اتكلمن ما حا يستفيدن حاجة ،المهم أسي تعتذر تمام قال لي تمام + انت عاقلة بالرغم من صغر سنك قولت ليهو شكراً ،نام وهو في الوضعية دي بقيت اعاين ليهو وقولت في نفسي هل لي ان احبك؟؟.
جاهو اتصال من وفاق! قولت ما ارد عشان ما يحصل مشاكل.
بعد شوية الباب دق عرفتها حا تكون هي! بس ما فتحت يمكن انا يادوب حسيت انو من حقي انو يبيت معاي برضو ،اتصلت بي ما رديت!، بعدها الباب هدا وعرفتها مشت.
___________________________
بلسان وُد
الفترة الفاتت كانت كلها فترة جري لي انا ولي مظفر مظفر بادي ليهو بمشروع وانا جارية وراء الشغل!، بعد يوم مرهق وتعب مبالغ فيه اتلكت على الكرسي واتنهدت!، رسلت لمظفر ايموجي😣 رسل لي الحاصل؟!، قولت ليهو مرتك مبلولة شديد!، انا عايزة اهرب!، قال لي بخلوك ؟! ،قولت ليهو ايوا نعم ما تخاف! انا بقدر دكتور علي بساعدني، قال لي علي دة مش انتهينا من موضوعو من الجراجة المرة الفاتت ،ضحكت وقولت ليهو العلاقات ما بتتنهي لكن!!، اتصل بي عديل رديت قال لي علاقتك شنو البينك وبين علي خليني افهم، قولت ليهو زملاء مهنة! بكون شنو؟!، مارد وقال لي كويس! عرفتي تداري الموقف نص ساعة واكون معاك!، فرحت شديد طول الفترة الفاتت اتعودت عليهو! وبقيت بعرفو!، بقيت اعاين للوقت! اتصل بي قال لي تعالي انا برة ركبت العربية قولت ليهو ورح نلفلف نص ساعة! قال لي تمام، بس شوفي وراء جايب ليك شنو ؟!، عاينت لقيتها بوكس فيهو ورد وشكولاتة، شلتو وانا مبسوطة وبوستو في خدو وقولت ليهو تسلم قال اي انتي تستاهلي اكتر طول الفترة الفاتت داعماني خدودي اتوردت من الخجل!، بالجد حاجة حلوة شديد انو يكون عندي راجل زي دة، قال لي اها عايزاني اوديك وين ،قولت ليهو ما مهم المكان المهم انك تكون معاي فيه، إبتسم لي.
رجعني بعد نص ساعة بالضبط وحضني مسافة وقال لي اهتمي بنفسك!، وزي ما قولت ليك اعملي كريم البعوض ! ،قولت ليهو حاضر حاضر!، نزلت وودعتو بيدي وتاني دخلت جوة!، بقيت قاعدة جنب ملفات المرضى واقلب في التواريخ لقيت تاريخ قبل 3 شهور اسم المريض كان أحمد محمد مكتوب اتوفى الساعة 1 يوم الاتنين بحادث اسم المرافق شهد عبد الرحمن ،قولت ياربي دي شهد زميله مظفر!.
في اليوم التاني من الصباح مشيت البيت واخدت دوش وطوالي نومت صحيت لقيت مظفر في البيت!، قولت ليهو مالك عيان جيت بدري ؟؟!، قال لي لا جيت اشوف الشافعة بتاعتي! ،اها يلا انا هنا فصلت جيت وقعدت جنبو وقولت ليهو والله ياخ محتاجلك كنت الحمد لله جيت بدري!، بقى يمرر في اصبعو في شعري وقال لي اها حصل ليك حاجة في يومك ،قولت ليهو لا جديد يا مظفر والله ياهو نفس الروتين وانت، قال لي اي حصلت قبلوني في بعثة وحا امشي ،انصدمت وقولت ليهو وليه اسي لكن ؟؟، قال لي تسالهم هم ،كشرت وشي، قال لي ما ماش للأبد انا كلها شهر يا وُد، اكتئبت زيادة ووقولت ليهو لو زاد الشهر ،قال لي بعوضك!، قولت ليهو ضروري تمشي، قال لي اي، اتنهدت وقولت ليهو تمام.
مر قريب كم وتلاتين يوم وانا بالجد من شوقي ليهو فقدت المنطق!!، رسلت ليهو حا تجي بعد 3 ايام ولا حا يجرن تاني ،قال لي احتمال واحتمال لا، قولت ليهو البيت ما بتتجازف من غيرك! تعال كفاك ولا اتزوجت هندية ، قال لي
_اي اتزوجت
=عرفت الحاجة دي يا ثقيل
ضحك طوالي اتصلت بيهو فيديو رد كان زي الفي عربية قولت ليهو وين انت!!؟، قال لي في دلهي ماش الفندق حا اقفل! ،قفل في وشي وانا بقيت مكتئبة.
بعد شوية الباب دق! مشيت عشان افتحو باخر انفاسي لقيتو هو نطيت فيهو وقولت ليهو اشتقت ليك يا مظفر!، قال لي وانا ،قولت ليهو لا انا اكتر ،ضماني عليهو مسافة طويله، لمن حسيت بالدفء قولت ليهو بحبك! ما رد علي بس اكيد هو بحبني كمان.
بعد كم يوم من الموضوع دة مشيت فحصت وطلع لي حمل فرحت شديد وكنت دايرة اعملها مفاجأة لمظفر فقولت لمن يجي باليل بصدمو بالورقة، مشيت لنرجس قولت اكلمها اول واحدة لقيتها مكتئبة فخليت تكليمها قولت ليها مالك؟؟!، قالت لي ليه شهر همام وبقى ما يجيني نهاي بجيب لي ولد كل حاجاتي وبدق الباب وحتى في الجامعة بتجاهلني ما عارفة مالو!!؟، قولت ليها اتكلمي معاه، قالت لي باي حق؟؟!، هو نازع مني كل الحقوق وانا رضيت بس ما قايله انو في يوم حا اندم واحبو ،قولت ليها الحب ما بنقدر نتحكم فيهو يا نرجس!، قالت لي طيب اعمل شنو هو بقى سافهني وبس برسل المصاريف وحتى برسل الشرح في الواتس، قولت ليها من متين ،قالت لي ليهو شهر مما ابيت ما افتح الباب لوفاق ولا ارد عليها ،قولت تكون دي وفاق منعتو!، قولت ليها اكيد، قالت لي بقى مهم عندي اعمل شنو؟!!، هو مش صاحبي يا وُد هو كل حاجة بالنسبه لي ولو بقى يعاملني كدة ما بقدر،قولت ليها حا اتصرف، قالت لي لا حا اشوف اخرو شنو، اتصل لي بي مظفر فجاءة وقال لي تعالي البيت ،قولت ليهو مالك جاي بدري في حاجة ضرورية ،قال لي اي ضرورية، قولت ليهو طيب جاية اللهم اجعلة خير بس ما رد لي.
مشيت وفتح الباب قعدت عاينت ليهو قولت ليهو في شنو يا مظفر إن شاء الله ما تكون حاصلة ليك حاجة قام وبقى متحرك وتاني قعد قال لي بتعرفي شهد زميلتي قولت ليهو ايوا قال لي هي ما زميلتي وبس هي كانت حبيبتي، قولت ليهو ما فهمت المعنى ،اتنهد تنهيدة عميقة وقال اتزوجت بسبب أهلها وراجلها اتوفى قبل 4 شهور ونص سكت !، قولت ليهو بصوت عالي اختصر عايز تقول شنو بعد كل المقدمات دي ،قال لي اناا عايز اتزوجها،حواسي كلها اتشلت في اللحظة دي وقلبي وجعني!، قولت ليهو بتحبها ؟؟!، عاين في عيوني وقال لي اي، شوفت الصدق فيهن زعلت ، قال لي تاني صاح انا اتقبلتك زوجة بس ما عندي مشاعر ليك فلو عايزة تبقى معاي انا ما عندي مشكلة بينا كل الاحترام والتقدير ولو عايزة تكلمي حياتك مع غيري فانا حا اطلقك!!، قولت ليهو كل امورك الكنت بتعملها كانت كذبة ؟!!، قال لي لااا كنت بحاول اكون فرحان معاك بس عمري ما حبيتك عاينت ليهو بكل برود وماسكة دموعي بالقوة وقولت ليهو طيب بختار الطلاق..............