ونحنا قاعدين في بيت خالتي وهي من قرية تانية كنا مجموعة من النسوان قاعدين في صالة فيها ٥سراير السرير فية اكتر من ١٠ نسوان مع أطفالهم وكلنا متلصقين في بعض وبنرجف من الخوف ماكان في غير صوت انفاسنا وضربات قلبنا وحتى الأطفال خايفين وبرجفو اي طفل منحشر في توب امو
سمعنا صوت كوراك وصراخ من الغرفة الجنب الباب
وانت داخل البيت في غرفة جنب الباب وبعدها صالة واي وحده عندها باب وبعدها مطبخ وحمام
سمعنا صوت الكواريك وزول بقول طلع دهب طلع قروش جيب تلفون وصوت البنات البكورك وسمعنا صوت ضرب بي الصوط واحد بقول تشيلي لي انا مصحف قالو ليك انا كفار ما بعرف الله وصوت الضرب الكان بي الصوط
وبعدو سمعنا صوت خطوات جايه على الصالة انا اندسيت في توب امي ورفعت الطرحة ولفلفتها في وشي الخطوات بتقرب ونحنا مع أي خطوه قلبنا بضرب شديد وانت قاعد بتسمع صوت دقات قلب الزول الجنبك صوت الباب الانفتح كانو خلاص دي النهاية
ودخل واحد اتكلم بلغة ماعربية كان زي الشيطان شعرو المضفر الطويل بشرتو المسمره من الوسخ لابس حلق في اضانو وحجاب في يدينو لابس بنطلون الدعم السريع وفنيلة سوده شايل بندقية في يد ويد فيها صوط عاين فينا وابتسم رفع الصوط وقال جيب دهب جيب قروش جيب تلفون جيييب جيب ونحنا بنقول والله ماعندنا والله ماعندنا رفع الصوط ووقع فينا ضرب ونحنا بنصرخ في صوط وقع في طفلة عندها ٥سنوات وقع في بطنها صرخت وبعد شوية استفرغت امها تبكي وتهدي فيها عاين فينا وطلع برا ضرب نار في الهوا ونحنا صرخنا رجع تاني وقال طلع طلع سريع سريع دهب تلفون قروش ونحنا نحلف ماعندنا حاجه عاين فيني وقال لي انزلي من السرير وتعالي وانا ارجف امي كوركت لا خليه والله ماعندنا والله ماعندنا حاجه كورك انزلي انزلي انزل انزل سريع ورفع الصوط وضرب امي وضربنا تاني الصوط كان بقع في اي مكان في جسمك نزلت واتحركت وانا برجف قال لي طلع تلفون وانا بتمتم قلت ليو ماعندي طلع دهب ماعندي قروش سريع
لابسه عباية وفيها جيوب دخلت يدي في جيب العباية وطلعت لي قروش ما بتفوت ١٠ الف وجدعتها في الأرض قلت ليو والله ماعندي غيرهم قال لي وهو بكورك تجدع لي قروش في الواطة تجدع لي في الواطة رفع المسدس على راسي وانا ارجف وقلبي عايز يطلع من مكانو وامي قامت خليها عليم الله مابتقصد انا برفع ليك القروش ياولدي وتكورك النسوان كوركو خليها عليك الله خليها ويبكو
قال لي بتعرفي كيكل قلت ليو كيكل منو قال لي هو السبب في الحصل ليكم قلت ليو وانا برجف الله ينتقم منو قال لي انتي زولتي وانا كنت بعرف كيكل كيكل لما طلع من الجزيرة وانضم لي الجيش هم دخلو القرى عشان ينتقمو من كيكل في الناس
ضحك وشاف شنطة في السرير وقال لي جيبيها كانت شنطتي لما طلعنا من البيت ومن القريه ختيت فيها شوية ملابس واراق ثبوتيه مديت ليو الشنطة فتحه جدع الاورق وعاين لي الملابس الكان فيهم ملابس اخوي محمد دخلهم في الشنطة رفع ليو فتيل عطر حشرو في جيبو وشال الشنطة في ضهرو وطلع
ونحنا كنا بنرجف من الخوف بعد طلع بكينا بكا وجرينا على الغرفة لقينا بنات اهلي يرجفو من البكا وحده الصوط وقع ليها في وشها وشها مورم ومحمر كان مفترض عرسها يكون بعد اسبوع انا جريت المطبخ تلفوني ختيتو في النشافة الكانت فيه عده
من دخلت بيت خالتي بعد ما سلمت عليهم دخلت المطبخ شفت العدة الفي النشافة
رفعت لي حله وختيت تحتها التلفون
اتصلت لي محمد اخوي جاني الرقم مغلق قلت ياربي احمي
يالله محمد اخوي يالله استودعتك محمد اخوي قفلت التلفون ورجعتو مكانو