رواية ضماد جرح الفصل السابع عشر 17 بقلم نوسه حمد
ام ميار كانت بتبكي وما عارفه بتها وين رجعنا من غير فايده وماشين علي بيتنا لقيت ابوي مخلوع قلت ليهو ابوي فشنو قال لي ميار ابوها لقاها واقعه ورا البيت وجرو بيها المستشفي خالتي بقت تكورك وجرينا علي المستشفى لقينا ابو ميار متجرس واول ما شافنا قال لي ميار ماتت يا بتي صاحبتك ماتت انا قلبي وجعني وبقيت اكورك جد م مستوعبه الحاصل وامها م شاءالله رغم إنهآ كانت متجرسه بس بقت تقول انا لله وانا اليه راجعون ربنا يلزمني الصبر وبقت تسال فيهو بتي وين وصفها لي الممرضه قالت ليها تعالي وانا مشيت وراها لقيناها مغطينها بي ملايه المستشفي والملايه ملانه دم امها بقت تلمس في وشها ودموعها نازله وتقول ليها عافيه منك ي بتي ربنا يتولاك بي رحمتو مشيتي للاحسن مننا وكانت بتقول ليها في كلام يوجع القلب وبكت الناس كلهم وانا بقيت كرهانه نفسي وجاتني نفسيات ولحظات وشالو ميار جنازه وانا السبب وماف زول عارف الحقيقه غيري وما قادره احكي حسيت نفسي دخلت حياه واحده ودمرتها م قدرت اسامح نفسي ودخلت في نفسيات عديل ورجعت البيت ببكي ليل نهار ونهاي م دخلت بيت ناس ميار والكلام كتر والناس كلها عرفت انو ميار حملت بالحرام واجهضت وماتت في عمليه الاجهاض والكلامات كترت شديد لغايه م اهلا رحلو ولمن رحلو انا م مشيت ليهم كنت حاسه بالذنب شديد وما قادره افتح خشمي وخليت المدرسه وبقيت بس قاعده في البيت يا بصلي يا نايمه ولا ابكي وبعدت من التلفون ومن اي شي كل حاجه في حياتي كانت بتزكرني بميار وبقيت كرهانه الدنيا وبعد كنت بسعي لي اني اكون علي قدر م اقدر صالحه بس بدت تجيني افكار شيطانيه بالذات اتجاه ياسر وحمدت ربي انو م ولدني بالحلال وكان هو ابوي وقدوتي رغم انو ابوي خالد م ابوي ولا ولدني بس اتمنيت اكون بتو حقيقه وماف حاجز بفصلنا كنت فخوره بيهو شديد بيني وبين نفسي علي الاقل م مشا ورا نزواتو ولا هتك عرض بقيت افكر انتقم من الراجل الاسمو ياسر دا انا بقيت م حاسه انو ميار ماتت وبس ميار شالت كل امل وعزيمه انغرست جواي موتها خلاني اقنع من اي شي حتي القرايه السعيت ليها ابوي قال لي مالك انتي م طبيعيه كنت بقول حزن علي فراق صاحبتك بس انا ابوك بعرفك كويس انتي القرايه البتحبيها خليتيها وقنعتي منها قلت ليهو م عايزه اقرا اقرا عشان شنو انا هو زول عشان اقرا وانجح ولا انا محسوبه مع الناس ابوي قال لي دا كلام شنو ي بتي قلت ليهو انت ليه اتبنيتني ليه م خليتهم قتلوني وارتحت قال لي قولي بسم الله فشنو ي بتي انتي زعلانه عشان انا شيلتك وبقيتي لي بت قلت ليهو انا فخوره اني بتك بس ي ابوي انا سبب في موت ميار ابوي انخلع وبقا برجف لمن مسكتو قال لي فشنو ي بتي حكيت ليهو بالحاصل ابوي بقا يبكي زي الشافع وما مصدقني قال لي بت الناس قلت ليهو ابوي انا حزرتها هي م عارفه انو دا ابوي طمعت في القروش لمن شافت وضعو والحرس جنبو ابوي بقا يتحسبن عليهو وقال لي لازم نرحل الزول دا م بخليك بقتلك قلت ليهو ياريت ي ابوي دا لو م قتلتو انا وخلصت حق ميار ابوي بقا يترجا فيني قال لي عايني لي انا م نفسي اخسرك م صدقت لقيتك وعوضتيني ومليتي حياتي قال لي لو م اتراجعتي من كلامك دا انا والله اطلع وتاني م تلمي فيني خلاص الحصل حصل انتي م سبب في موتها هي قسمتها كده ي بتي الليله لو انتي قلت ليها امشي لي وعرسي كان اقول ليك انتي سبب وبقا يحنس فيني ويتكلم معاي ويطبطب علي وانا كنت عباره عن جنازه حتي صلاوتي بقيت اقطعها وابوي بجي ينبهني ومرت الايام وابوي حنسني اني انزل المدرسه وبصحيني وبنتظرني لغايه م اجهز بسوقني المدرسه وبقا قريب لي شديد خفف علي حقد جواي يشعل السودان بي حالو بس عشانو هو انا مستعده اموت وربنا هداني من الافكار الكانت بتجيني ومن يوم ميار ماتت م فتحت تلفوني وفتحتو عشان انزل الحصص الفاتتني فيهو واول م فتحتو جاتني رسايل من عباده واتصل علي ف الاول اترددت بس تاني رديت عليهو وكان متجرس لي موت ميار وبقا يسال فيني غلبني اتكلم قلت ليهو جد انا م بعرف اي شي قال لي مستحيل تكون م حكت ليك قلت ليهو لو حكت لي كان قلت ليك ي عباده بس جد م عارفه عنها شي وخلاص فاتت مكان احلي من الدنيا وربنا يرحمها ويغفر ليها قال لي انا امس عملت ليها عمره وكل جمعه ح اعمر ليها وادعي ليها ميار كانت روحي ونفسي بس ربنا م قسم لي حبها والحمد لله كان متجرس شديد حاولت علي قدر م اقدر اطبطب عليهو بس كان متجرس قال لي نوسه بتزكرني ميار ممكن تردي علي وما تقفلي تلفونك قلت ليهو عباده مع احترامي الشديد ليك بس جد اعزرني انا والله م بقدر اتكلم معاك وانا م بحب اتكلم مع الاولاد نهاي وانا لمن اتكلمت معاك عشان تتزوج ميار بس حصل الحصل قال لي م تكسري خاطري انا جد نفسيا تعبان وخليت الشغل مفكر ارجع السودان م عندي هدف ف الحياه قلت ليهو كيف استهدا بالله انت عندك اهلك تخلي الشغل كيف اتشجع وارجع شغلك وانسا ميار عشان تقدر تعيش قال لي م تقولي لي انساها لو بقدر كان نسيتا وانا راجع البلد وقدر الله زول اجيب سيره ميار بي شين عشان غضبي دا افرقو فيهو قلت ليهو عباده القول ما بكمل بس الناس م تركز معاهو وخففو عليها والله اي زول جاب سيرتها خفف عليها قال لي نوسه تعرفي ود الحرام العمل في ميار كده قلت ليهو عباده م بعرف بجد قال لي طيب تلفون ميار وين قلت ليهو م بعرف قال لي ميار عامله واتساب بي شريحتي وح اكلم صاحبي يطلعها لي بدل فاقد وح اعمل استرداد للرسايل وح اعرفو وم ح ارحمو انا بقيت خايفه ميار تكون جابت سيرتي في دردشاتها قلت ليهو عباده دا ماضي م تبحت الماضي خليك في الحاضر قال لي لا دا تار وانا باخدو قلت ليهو خلي الخلق للخالق قال لي لمن الخلق تبطل البتعمل فيهو نحنا بنخليها حسيت انو جواهو غضب م طبيعي نفسي الحاله الكنت فيها انا وقدر م حاولت امتص غضبو م قدرت قال لي م قادر ي نوسه وانا بقيت خايفه بعد قلت ليهو م بتكلم معاك قلت ليهو خلاص متي م تحس نفسك مضايق وزهجان رسل لي ودا كلو عشان م يتهور ويكشف الحقيقه ويقول انا سبب في موتها م صدقت انا طلعت من الانا فيهو ونفسياتي اتصلحت مرت الايام وبقيت متواصله معاهو بحكي لي بي ميار وقصتهم وحبو ليها شكلو حباها شديد بس هي م حبتو ربع الحب الحباهو ليها وبعد خسر شغلو ربنا عوضو بشغل بي وظيفتو وشغل كان بحلم بيهو حلم قال لي انتي وشك وش خير علي وشغلو الجديد كان ضاغط وحمدت الله انو ضاغط عشان م يفكر يعرف الحقيقه وكان بساعدني في قرايتي شديد كان بقول لي عاوز ارد جمايلك علي ووقفتك جنبي رغم اني م عملت ليهو حاجه بقا م بجيب لي سيره ميار وبقيت اتونس معاهو شبه ونسه يوميه حتي لمن م ارسل بلقا نفسي بتحجج بي القرايه واتصل عليهو ومرات بتكلم معاي فيديو كول وبشرح لي كل حاجه واقفه علي وبالذات انا بعد موت ميار والنفسيات الدخلت فيهل فاتني كتير وكنت ممتحنه الامتحان التجريبي وعباده ساعدني شديد حبيت طريقه شرحو بوصل لي المعلومه في ظرف ثواني بقول لي انتي ذكيه بتفهمي سريع ما بتتعبيني زي اخواتي وكان بحكي لي بي اخواتو وانو كان بزاكر ليهم وفيهم واحده دخلت طب وعرفني بيها وقال لي ممكن تتلاقو بس انا جاتني فوبيا من الصحبه بعد الحصل لميار عاوزه اكون بعيده من الناس عشان م معروف الظروف بس كنت بمشيهو ومرات بنتكلم التلاته فيديو وكنا مبسوطين شديد حسيت نفسي بديت اتعلق بي عباده م عرفتو دا حب ولا تعويده لانو هو كمان بدا يلمح لي انو يومو بكون ناقص لو م اتكلم معاي وكان حتي في تعبيرو لي وكلامو كان محترم جداااا وانا كل م احس نفسي اتعلقت بي زول عشان م اعلقو ببعد منو زي م حصل لي مع نزار وفادي بس كنت واضحه معاهم شديد م علقتهم وكل م احاول ابعد منو بظهر لي كان بقول لي حاسس انو حياتي بقت حلوه وربنا فتحها علي بعد عرفتك انتي م تخليني اخسرك انا مستعد ابيع الدنيا واشتري وجودك جنبي انتي مكانتك عندي غاليه كنت بتأثر لمن يقول لي كده وبحس بالنقص الدمرني ودمر حياتي وبكون نفسي اقول ليهو انت ولد ناس وانا ناقصه م ينفع اكون في حياتك بسم ما قدرت اقول ولا قدرت ابعد منو مرت الايام وانا متواصله معاهو بس مره يومين وما برد علي ورسايلي كانت بتصحح اتنين وبقراها بس ماف رد كنت مقلقه عليهو شديد دخلت علي اختو قالت لي انا كمان م برد علي خليهو ح ارجع ليك وكل يوم بمر علي اصعب من اي يوم في حياتي الوحيد الما قدرت اتجاوز غيابو سريع وكل م افقدو بدخل اكتب ليهو احساسي وبلومو انو خلاني اتعلق بيهو وحطمني بعد وثقت فيهو يوم الصباح صحيت لقيت منو رسالتين ولمن شفتهن قلبي لمن قال شحح وكنت طايره من الفرحه فتحت الشات بتاعو لقيتو مرسل لي صوره ياسر وعامل اسكرن لي وشي لمن كنت بتكلم معاهو وعامل مقارنه بيني وبين ياسر وعلق علي الشامه العندنا الاتنين قال لي ردي بصراحه دا منو حسيت بي طمااام والدنيا دارت بي ياربي اكون عرف شنو …….يتبع