رواية بينهما الفصل السابع 7 بقلم ال زهراء
قال لي لااا كنت بحاول اكون فرحان معاك بس عمري ما حبيتك عاينت ليهو بكل برود وماسكة دموعي بالقوة وقولت ليهو طيب بختار الطلاق!، قال لي تمام حا اديك وقت تكلمي امك فيهو وابوك ، قولت ليهو اسي بكلمهم بكره سلمني ورقي وطلقني ،قومتا سريع ودخلت الغرفة لملمت كل ملابسي بقيت افكر دة شنو الحاجة الكنت عايشاها معاه واسمها شنو ؟؟!، معقول بس يبعيني بالساهل عشان حبيبتو جات!، بالجد انا ما انخذلت في حياتي اكتر منو! لو عايزة أوقف العرس دة كنت وقفتو بحملي لانو عارفة مظفر حا يتراجع لكن حا يضغط على نفسو عشان يعيش معانا زي ما كان طول الفترة الفاتت كدة فمستحيل اكلموا اسي !، بقيت ارتب سريع سريع وما خليت حاجة طلعت لقيتو قاعد وتاني عاين لي جيت ومديت ليهو مفاتيح البيت!!، وما قولت ولا كلمة تانية!، بقيت اجر في الشنطة!، جاء وحاول يجرها قولت ليهو استاذ مظفر ما تتعب نفسك براي بجر شنطتي وبشكرك انك اجبرت نفسك كل الايام الفاتت وعاملتني بكل الود والاحترام!، قال لي انا ما اجبرت نفسي انا كنت عايز أنجح الزواج وكل حاجة عشتها معاك حقيقة بس ما بحبك! وبحبها للان!، نحن بينا كل المودة يا وُد بس ما قادر انسى شهد، قولت ليهو انا بحترمك انك واجهتني بس على الاقل ما كنت تقولها لي بالطريقة القاسية دي! ،طيب انا الحبيتك شعوري بكون شنو ،قال لي عارفني بحب اكون صريح معاك وما بحب اغشك لأنك مهمة عندي!، قولت ليهو يعني ما كنت بتغشيني الفترة الفاتت ؟؟!، قال لي اي انا ما حصل جبت ليك سيرة الحب، قولت ليهو غبية انا طيب مع السلامة، جريت شنطتي وركبت ترحال قولت ليهو لو سمحت وديني باطول شارع وبديك الدايرو وما تسالني من حاجة بقيت ابكي وابكي لمن حسيت دموعي نشفت زول بقول الحقيقة وما بلف ولا بدور وصريح! بس ما عارف انو صراحتو كانت سبب في اذيتي!، اتنهد سواق الترحال مد لي موية وقال لي يا بتي استغفري!، بقيت استغفر لمن وصلت البيت دخلت ما لقيتي زول اخدت نوما صحيت وطلعنا برة لقيت امي قاعدة ،قالت لي جيتي متين؟!، قولت ليها من قبيل عايزة اقول ليك شي ممكن تقعدي قالت شنو ما تخوفيني، قولت ليها عايزين نطلق انا ومظفر!!، انخلعت ونططت عيونها فيني وقالت لي السبب؟؟!،قولت ليها هو عايز يتزوج!، قالت لي وبعلي مظفر الواحد دا داير يتزوج فيك؟! عملتي ليهو شنو؟؟!، قولت ليها وليه انا اكون العملت عشان يفكر بالعرس ؟، قالت لي لا لا الراجل عاقل انا بعرفك انتي اكيد تصرفاتك ما عجبنو ماف راجل بفتش مرة تانية الا يكون في عيب في الأولى !، دمعت وقولت ليها يا أمي ليه ما عندك ثقة فيني بعد كل العملتو ليك، ياخ انا كنت ما برفض ليك اي طلب حتى مستقبلي خليتك تحددية وتجي تقولي لي انا السبب في عرسو ،مسكت يدي بغضب وقالت ليه طيب اسي قرر يتزوج فيك منو ، قولت ليها حبيبتو راجلها اتوفى وهو شاف دا انسب فرصة وقرر يتزوجها ؟؟!، قالت لي والله ما اخليها ولا اخلي العرس دة يتم اسي دي بتصل بامو واكلمها بعمايل ولدها! ،قولت ليها اسمعيني انا بعرف مظفر اكتر منك هو ما بتراجع لا لامو ولا لاي زول في حاجة مقررها وفي النهاية هو راجل ومن حقو يتزوج أربعة بس كمان من حقي انا اختار اذا عايزة اكمل معاه ولالا، المهم يا امي لو سمحتي ما تتدخلي في قصة زي دي ولا اشتغلت بي الشغلة ولفحت توبها وقالت الاتصال ما بفشني ، عندي كلام كتير في قلبي، طلعت وانا طلعت وراها بقيت انادي ليها ما اشتغلت بي ركبت ركشة وانا ركبت، لمن وصلنا البييت لقينا امو راقدة وباين عليها تعبانة وبناتها جنبها!!، امي جات وكانت دايرة تتكلم بس ميسم قالت ليها لو في موضوع مظفر لو سمحتي ما تجيبي ليها السيرة دي هي اتشاكلت معاه شكلة عريضة وهو مصر يعقد عليها! وعقد!، انا قعدت في الأرض وقولت هو اصلا كلمني وهو ماش يعقد! ليه ما كان صريح طول الفترة الفاتت معاي حتى خالتو البحبها ما سمع كلامها ،نبضات قلبي كانت عايزة تطلع وحسيت بكتمة بقيت اشهق وازفر عشان الجبل دة يزح من صدري واتمنيت انو يطلع حلم جابت لي ميسم موية شربتها حتن ارتحت ،امي بقت ساكته وتاني قالت لي بهمس ورح ماف فايدة من ولد عاق ما بسمع كلام امو!، عاينت ليها وقولت في نفسي حتى امي بطنها طمت منو طلعنا قالت لي حا تتطلقي بس عندي كلام لازم اقولو ليهو، قولت ليها خليهو يا أمي عليك الله ،قالت لي ليه اخليه؟؟، قولت ليها ما من حقك تنبذية عشان عايز يعرس، قالت لي كلمة واحدة ما عايزة اسمعها كمان تعارضي امك، حقك باخدو ليك منهم والله لا هو ولا هي يعيشو مبسوطين وحا تشوفي بعينك ، خوفت شديد من الكلام دة عايزة تعمل شنو؟؟!، قولت ليها امي عايزة تعملي شنو؟!، قالت لي مالك ومال البعملو والله بشهر واحد الا اخليه هو وهي يلقطو بالشوارع ،قولت ليها لالا يا امي اكيد كلامك دة من زعلك، اترعبت شديد وقولت في نفسي هل كلام مرت عمي بأنو امي زولة بتاعت كتابه صاح، قولت ليها عشاني ما تعملي شي والله لو جاتو اي حاجة بخت الحق عليك وما بسامحك نهاي، قالت لي يا بتي صدقتي الكلام دة قولتو بسبب اني غضبانة ورح ليهم اسي، قولت ليها ما ماشة اتصلي بس بابوي كلميه عشان بكرة يجيب ورقتي ويسلمني ليها بحضورو اتصلت بيهو وقال ليها جاي البيت مشينا وانتظرناه جاء وقعد وقال لي تقعدي مع راجلك دة ما عذر للطلاق لو ضربت او اساء ليك ممكن...، امي قاطعتو وقالت بتي ناقصه شنو عشان تكون ضرة، قال ليها ما تزرعي ليها الأفكار دي في راسها لانو وقسما بالله اطلقك وارجعك من الحتة الجبتك منها!، البت ترجع بيت راجلها وتجيني في حاله واحدة لمن يسيء ليها! او يضربها والكلام لحدي هنا وانتهى وما تفتحتي خشمك معاي بحرف،قام وبقى ماش في اتجاة الباب امي لحقتو وبقت تحنس فيهو! بس هو ما اشتغل بيها، قولت في نفسي حا اكون زيها لو استمريت في الزواج دة ابوي ضغط على نفسو عشان يتزوج امي ومستمر معاها عشان بس وصية اخوه الوصاهو عليها!.
دخلت جوة امي جات وبقت تهدي فينا وقالت لي لو أطلقت ما بخليه يرجعك ليهو تبقى زي!!!، حارة شديد يا بتي المعاملة البعاملني ليها ابوك وما عايزة تمري بالمريت بيهو! ،اول مرة اشوف الصدق وحب امي لي!،ضميتها وبقيت ابكي ،قالت لي ما تخافي من اي حاجة انا معاك،قولت في نفسي ماف ام سيئة بس كل ام ليها طريقة في حب أولادها بيها.
_________________________
بلسان مظفر
بعد العقد دخلت عليها وبقيت متحرك ناحيتها! ،كانت بتبكي بكاء شديد ومما شافتني قامت وضمتني وقالت لي ما كنت متوقعاك حا تحارب عشاني ، قولت ليها لو فقدتك المرة دي ما كنت بسامح نفسي!! شكراً انك اتصلي بي وريتني باي حاجة!، قالت لي العفو يا حبيبي بس وُد ! قولت ليها وُد انا جرحتها بس احسن مما تعيش في حب مزيف معاي ،قالت لي معقول بعد كل العشرة دي ما قدرت انك تحبها ولو شوية، قولت ليها لا ما قدرت شعوري بالمسؤوليه اتحاهها اكتر من شعور الحب، قالت لي طيب حا تعمل شنو بالخصوص دة ؟!، قولت ليها حا نطلق! ماف اي حل غير الطلاق،قالت لي متأكد ما حا تندم!، قولت ليها اندم لشنو شوفتيني اتخذت قرار ندمت عليهو في حياتي ،قالت لي ابداً، قولت ليها طيب يا حبيبة قلبي ما تجيبي لي سيرة الموضوع دة تاني، قالت لي امك طيب، قولت ليها امي زعلانة مني انا المرة دي اخترتك انتي على حساب اي زول! لاني ما قادر اخسرك! ! واحتمال هي ما تجيك ولا تجي تبارك لينا بس انتي وانا حا نعمل اي شي عشان نصالحها واسي انا بمشي ليها، قالت لي تمام انا منتظرة مكالمة منك.
في الطريق فتحت درج العربية لقيت استيك نوت مكتوب فيها سوق براحة يا مستعجل وما تنسى تجيب معاك االللحمة، هي طوالي دي حركاتها ماليه البيت بيهن لمن تمشي بدري المستشفى بلقى استيك نوت في التلاجة في اي حتة وما عارف السر شنو فيهن!، احتفظت بالورقة ووقولت في نفسي مالو اخر ذكرى، رجعت البيت لقيت امي لافة راسها مماجيت بعليها رفضت تعاين لي، قولت ليها يا امي اسمعيني لاخر مرة ،قالت لي ما بسمع لزول خرب بيتو واتزوج ومرتو ما فيها كلمة، قولت ليها صاح ما فيها كلمة بس عارفة من الاول وُد ما خياري انا ما قدرت احبها ،قالت لي الحب دة شنو؟؟!، القرآن الكريم ذكر المودة والرحمة وانت وهي كان في بينكم كل المودة بس كفيت نعمتك بيدك! بكرة تندم، قولت ليها انا والله يا امي شهد دي كنت دايراها من زمان لا من الليله ولا من امس!، قالت لي موش دة قرارك خلاص انت حر! قولت ليها طيب قولي لي عافية ليك وما تعامليني دي الارتكبت جريمة اي راجل ليه الحق يتزوج عاينت لي واتنهدت وقالت لي مرتك كانت محترماك ومقدراك وانت كنت نفس الشي وما كنت متوقعة تعمل عمل زي دي نهاي بس بعد بقى البقى إن شاء الله انت بس تقتنع بي العرس دة ،قولت ليها بقول ليك انا بحبها واكيد مقتنع وما تخافي ما حا تحصل مشاكل ، ميسم ردت بالنيابه عن امي وقالت الحب ما اساس الزواج في حاجات تانية بتنجحو وإن شاء الله تكون عنها الصفات دي ،وُد انسانة متفاهمة داعمة بتقيف معاك في اي حاجة ،وإن شاء الله تلقى في الاتزوجتها الصفات الكانت وُد عندها لانك لو ما لقيتهن عندها حا تحس بالفراغ +الحب براهو ما بخليك تستمر معاها الراجل ما محتاج الحب في حياتو والله بقدر المره القوية البتقدر تفهمو وتقيف معاه وتعرف تزح همومو وتطمنو وتكون ليه ركن امن .
قولت ليها يا ميسم ماف زول عايز راييك ،قومت وقولت لأمي اعفي لي قالت لي ببرود عافية ليك يا ولدي لله والرسول إن شاء الله ربنا يسعدك بس.َ
مشيت البيت وقعدت في الكنبه ناديت وُد من غير ما احس لانو اول كلمة كنت بقولها وُد لمن اجي من الشغل، قولت في نفسي اكيد دي ذلة لسان بس !!!، اتصلت بي شهد اتونست معاها وقولت ليها امي رضت العرس حا نعملو بعد اسبوع ،في اليوم التاني كنت ماش اودي القسيمة واتصلت بي عمي ابو وُد عشان يلاقيني هناك قال لي البت ما بتطلق انت موش مقتدر تفتح بيتين اديها فترة وما تطلقها احتمال براها ترجع ليك ،قولت ليهو لكن هي ما عايزة، قال لي حا ترجع انا متأكد اديها وقت، قولت ليهو يا عمي ما معقول تجبرا، قال لي ما بجبرا بس العرس التاني دة عادي وما شايف فيه حاجة المهم يا ولدي لو محترمني ادي بتي وقت ،قولت ليهو تمام واتنهدت.
بعد اسبوع من الكلام دة كان عرسي كنت مبسوط وطاير السماء بيها طلعت جميله شديد قربت عليها وضميتها علي مسافة وسوقتها.
______________________
بلسان شهد
كنت أنانية شديد َكذبت عليهو في حكاية العريس واني حا انتحر لو اتزوجت مرة تانية وما اتزوجتو هو ،بس انا عايزاهو لي بعد اهلي وافقو وكان لازم استعمل اسلوب الضغط دة وهو اختارني انا على حسابها فمعاناتو ما بحبها نهاي وزي ما قال دي مسؤوليتيو لا اكتر ولا أقل واكيد بعد فترة ابوها بقتنع وبطلقو .
وصلنا الشقة قولت ليهو دي الكانت فيها وُد معاك قال لي لا!، قولت ليهو طيب، قعدت وهو قعد قال لي جيعانة قولت ليهو اي حا اعمل ليك اكل، قال لي بتعرفي ؟! ،قولت ليهو اي دا كلامك يا مظفر!!، ضحك وقال لي وُد ما كانت بتعرف حاجة، عاينت ليهو وقولت ليهو وليه يعني ،قال لي ما عارفة ممكن عشان مدلعة، قولت ليهو وانت كنت موافق، قال لي اعمل شنو المهم ما تخلينا نجيب سيرتها تاني!!، مشينا المطبخ وعملت ليهو احلى طبخة وجهزتها ليهو لمن ضاقها قال لي ماف كلام والله مرتي شاطرة، إبتسمت ليهو إبتسامة حلوة وقولت في نفسي اخير بقى لي براي ما كنت قايله انو ممكن يرجع لي نهاي، القسمة قويه بينا.
في اليوم التاني قولت لمظفر امشي شوف رايي وُد انت احترمت ابوها واديها فترة اسبوع دة بعد كدة خليها تقرر هي ،قال لي بشوف.
____________________________
بلسان وُد
كنت قاعدة في البيت براي ومكتبئة قولت ليه اكتئب عشانو!!، ولعت بخور وبقيت لافة بيهو في البييييت، دخلت الغرفة وختيتو وقررت انوم شوية!!.
__________________
بلسان مظفر
لمن دقيت الباب ما كان في اي إستجابة فجاءة اختها رماز جات وقالت لي عايز شنو؟!، قولت ليها عايز اتكلم مع وُد قالت لي هي ما عندها اي كلام معاك، قولت ليها رماز الحاجة دي ما عندك علاقة بيها افتحي الباب دة وخليك ساكتة! ،خافت من نظراتي وفتحتو وقالت لي تقعد معاها بس نص ساعة لا اكتر ولا أقل ،قولت ليها احسن ليك تركزي مع نفسك وما تهتمي بأمور ما بتخصك لوت لي خشمها .
البيت داخلي شميت ريحة دخان قولت لرماز ناسين حاجة في النار ولا شنو؟؟!، قالت لي باخر انفاسها لا لا، قولت ليها الدخان جاي من وين طيب!!!، قالت لي ما عارفة والله احتمال في زول نسى الشباك فاتح وجانا من برة، قولت ليها احتمال طيب وُد وين ؟!! ، قالت لي في غرفتها بتكون بس ما تطول معاها يا مظفر بحذرك!، قولت ليها امشي شوفي قرايتك على وين وما تتدخلي !!، بقيت ماش على اتجاه الغرفة لقيت الدخان منها............