رواية بينهما الفصل الثامن عشر 18 بقلم ال زهراء
اتصلت بي رماز اخت وُد وقالت لي الجماعة ديل اسي في بيتنا وقالو دايرين يعقدو ،قولت ليها كيف الكلام دة ابوك موافق، قالت لي لسه ما رد بسس مصرين يعقدو تعالي لو بتقدري ساعديني!!، قولت ليها انا عملت عميلة اجهاض ما بقدر والله بس ليه مستعجلين!، قالت لي ما عارفة علي دا مستعجل لشنو، قولت ليها طيب تمام إن شاء الله يتم على خير ،قفلت وعاينت لمظفر وقولت ليهو وُد عايزين يعقدو عليها ،ميسم كانت ضمن الحضور وقالت اسي تلقاهم عاملين عمل تفريق عشان كدة مظفر طلقها ،عاينت لمظفر وقولت ليهو انت بقيت تكرة البيت وتشوفها شينة وبقيت دايماً معاها في مشاكل في اتفة الأسباب، قال لي لااا. قولت ليهو يبقى دة ما سحر تفريق ولا حاجة!، قال لي بسس ديل اعراضو احتمال....، قاطعتو وقولت ليهو مظفر حتى لو سحر تفريق ماف زول عمل ليك سحر عشان تتزوج!!، يبقى انت براك الاخترت الخيار دة ،الزول ما يرمي اي حاجة على السحر صاح بأثر فيييك بس ليه اعراض واضحة ولو ما عندك معناتك لا مسحور ولا حاجة وعملت اي شي بارادتك ،انت غالبا بكون معمول ليك سحر تعطيل من السرقة ومن خسران كل حاجاتك بس لشنو انا ما عارفة، قام وقال لي خلاص لو ما مسحور انا ندمت!!!، انا عايز وُد، قولت ليهو الخيار خيارها ماف زول بقدر يجبرها هي واعية وعي كافي وبتعرف الأحسن ليها منو، بس انا لو كنت مكانها كنت يا مظفر اخترت علي عارف لشنو لانو احسن لي راجل يحبني من راجل احبو!، قال لي بغضب نرجس انتي بس ما تكوني..، قاطعو همام وقال ليهو احترم نفسك وانت بتتكلم مع نرجس هي ما قالت الا الحقيقة!، قعد وهو محسور وقال لينا انتو كلكم ضدي لو بس في زول وقف معاي ،ميسم قالت ليهو لانك انت غبي وطول عمرك غبي حياتك كانت مستقرة ما ناقصاك اي حاجة بس انت كفيت نعمتك بيدك.
طلع وهو معصب همام قال لميسم ما تلحقيية.
________________________
بلسان مظفر
قررت امشي لمركز رقية عشان احتمال نكون مكتوبين وما اكون خسرت فرصتي معاها ،مشيت وقعدت الشيخ قال لي كاتبنك أربعة انفار واحد صاحبك والتاني مرة قريبة منك والتالت برضو مرة قاعدة معاك في نفس البيت والرابع مرة غربية وكلو في رزقك، قولت ليهو ماف سحر تفريق!!!، قال لي لااا، قولت في نفسي يبقى انا براي شيطان ودمرت بيتي ،كنت مامل اكون مكتوب بس طلع دة مني براي، صحي الأنسان عدو نفسو انا كنت ضعيف عشان حبي القديم رجع لي وكنت عايزاها وما شايف اي حاجة تانية واسي عايز اخت الحق على السحر مع اني عارف انو ما عندي اي اعراض منو، اتنهدت وقولت ليهو طيب انا اتعالج كيف، قال لي حا نبدأ جلسات وبإذن الله حا تتعالج فتش ببتكم كويس وجيب الورق.
_________________________
بلسان شهد
احمد كان هو الحبيتو من زمان بس مما جاء كان متزوج وكان تقيييل شدييد وبعدها ارتبطت مع مظفر، ومما ارتبطت الزول دة بقى يهتم بي وانا عرفت انو هو بغار من نجاح همام وما معتبرو الا منافس ليهو لانو مظفر اثبت وجودو مما جاء واترقى قبل احمد الليهو 4سنين شغال في الشركة.
المهم اهلي بعد عرفو بعلاقتي براجل متزوج قررو انو يزوجوني قريبي ورفضو مظفر بحجة انو انا ما بدوني لغريب وانا مشيت القصة دي معاهم وكدة تم العرس واحمد اختفى من حياتي هو بس شكلو كان همو انو يشيل اي حاجة منو وومما شافني بقييت ما حبيبة مظفر اتخلى عني.
احمد ما حصل حباني وبحب بس مرتو واسيي بعد اتزوجت مظفر رجع لي وانا لاني بحبو وافقت طوالي ،بس ما قايله انو مظفر حا يقبضني وحا يتكسر كدة.
انا ما كنت عايزاهو ينخذل فيني بعد ما اقتنع بي ورضا انو يتزوجني بس انا زعلتو وما اظن بقدر اسامح نفسي لكن دة الحب العمل فيني كدة واسي لازم احمد يرجع لي.
احمد مما مظفر طلقني هو ما اشتغل بي وبقى بس همو مرتو ما خلا حاجة عشان يراضاها وفي النهاية رضت عشان أولادهم وبقى زول تاني، بس والله ما اخليهو لاني خسرت بيتي بسببو.
انا عارفة حاجات كتيرة عنو وهو براهو كلمني بيهن هو كتب مظفر وانا لو كلمت مظفر اكيد ما بخليهو.
الكتابة دي ما اتعلمتها الا من امي يلي كل الناس بقت متحاشياها وبتنفر منها بالسبب دة ،وانا كدة سمعت صوت صرخات عاليه مشيت اشوف منو لقييت امي واقعة.
لمن مشينا بيها للدكتور و امي شكت ليهو الأعراض كلها ،حولها لدكتور نساء وتوليد طوالي مشينا ليهو فحص ليها وعمل ليها موجات وصورة اشعية قال انو في كتله في الرحم بس للان ما معروفة خبيثة ولا حميدة حا يعملو عمليه إزالة ويشيلو عينة عشان يعرفو الورم دة خبيث ولا حميد انا خوفت وانخلعت خلعة شديد وما عرفت اعمل شنو.
طلعت برة وحاولت اتنفس واقول اكيييد حميييد اي ماف حاجة بتخوف!!!.
بقييت اقلب وابحث عن السرطان دة صادفني بوست فجاءة انو سرطان الرحم والسرطانات في الأماكن الحساسة كلها مرات بتكون بسبب السحر والكتابة لانو بترتد على صاحبها ،جسمي دا بقى ما شايلني انا اول مرة اكتب زول بس ما كنت متخيلة انو دة البحصل ،قررت أنو ارجع للدجال واقول ليهو ما عايزة!!! كل شي ولا صحتي!(طيب ودينك).
لمن مشيت اصلي لقييت نسوان برة يرمن في ودع بقييت قاعدة جنبهم جات مرة وباين عليها الوقار وقالت ليهن الحاجة دي حرام وبدخلكن النار وبقت تعظ فيهن بالايات القرآنية وبالاحاديث ،انا ما كنت قايلة انو مممكن ادخل النار بسببو وقايلاهو تسلية بس.
امي زمان انا لمن اسالها انو حرام ولا لا بتقول لي ما حرام!! بقييت اتحسر وخوفت خوف شديد انا متعلمة بس جاهلة باي حاجة في الدين ما خليت مجالس ودع ما خليت قهوات وكلام فارغ ،كنت متبعة امي وشايفه انو البتعمل فيهو صاح وانبهرت بيهن شديد لمن في حاجات بتحصل معانا بتقولها المرة "كذب المنجمون ولو صدقوا".
ما عرفت ابدا من وين ولا اعمل شنو ولا اتوب كيف، خايفة انو تجيني حاجة اكعب من امي!!! مشيت باريت المرة الكانت بتتكلم وكلمتها باي حاجة ،قالت لي لا حول ولا قوة الا بالله يا بتي توبي التوبة النصوحة وإن شاء الله ربنا بغفر لييك،قولت ليها بتصدقي انا بقييت القرآن ما قادرة اقراهو عندي انتكاس في العبادات، قالت ليي دة من مجالسك البتحضرن فيهن ،أكبر عقوبة ما ظاهرية لرب العالمين على العبد البعد عن عبادتو والانتكاسة وعدم استشعار قربو عشان كدة يا بتي لازم ترجعي وتبطلي الأمور دي عشان ربنا يحبك، بقييت ابكي وقولت ليها اوريك حاجة اكعب انا زنييت، هنا المرة نطتتت عيونها فيني وقالت لي ذنب عظيم كبيرة من أكبر الكبائر وفاحشة مبينة لا حول ولا قوة الا بالله العلي العظيم متزوجة ولا لا، قولت ليها متزوجة، قالت لي حسبنا الله ونعم الوكيل حسبنا الله ونعم الوكيل توبي يا بتي توبي توبة نصوحة رحمة الله واسعة تسع كل شي ،توبي وانا بدعي ليك ربنا يخفف عليك ،بكيييت بأعلى صوت قولت ليها كنت منغمسة في بئر من المحرمات!!! وشايفاهن عاديات ولولا مرض امي الأسي دة ما كنت عرفت الحقيقة، قالت لي ربنا مرات بخت الابتلاءات في طريق الزول عشان يصحصح ويعرف البعمل فيهو غلط، بس ما كل الناس بوعو وبتمادو في البعملو فيهو بس انتي غييير وما طغيتي واتنازلتي سريع وربنا ساعدك ونور بصيرتك عشان عالم بييك،للأسف انتي اتربيتي ونشاتي على يد امك والشي دة أثر بييك بس انت بعد كبرتي كان مفروض تعرفي الصاح من الغلط وتهدي امك لكن بقييتي تمشي معاها وتستمتعي في الغلط بس زي ما قولت ليك ربنا نور بصيرتك لحكمة لا يعلم بيها الا هو فانتي حاولي توبي وارجعي ليهو ،قولت ليها شكرا يا خالتو ما عارفة كلامك دة ريحني كيف.
_______________________
بلسان احمد
صاح مرتي رجعت لي بس رجعت عشان الاولاد وكلمة ما قاعدة تقولها لي ولا قاعدة تعاملني زي زمان انا بسبب حقدي خسرت أغلى ما عندي بقت باردة معاي برود شديد وقال لي بالواضح انو هي ما ممكن تقدم لي حاجة ولو عايز اتزوج اتزوج بس انا بحبها وما شايف اي مرة غيرها وبصبر عليها وحا اقدم ليها اي حاجة بس عشان ترضى.
قرررت اني امشي افك عمل مظفر عشان يادوب وعييت على نفسي بعد خسرت مرتي وقررت اتوب.
فكيتو الشيخ قال انو في 3اعمال تانية مكتوبة ليهو قررت احذرو في رسالة في توبة من السحر فكتبت ليهو ورسلتها للمشرف عشان ينشرها.
ممكن دة الحاجة الوحيدة الأسي انا بقدر اعملها، قررت انو ارجع القروش الشيلتها منو ،ما كان في سرقة كان اي حاجة مخططة مني انا والسمسار عشان بس يتسجن.
انا الكراهية عمت قلبي بس كلو منو ما كان يتفوق ولا كان يكون احسن مني ،بقييت قاعد ومحتار شديد وقولت استفدت شنو ؟؟!، ياهو بسس ضيعت حياتي عشان حقدي عليهو.
مرتي الوقفت معاي في الحلوة والمرة خذلتها وكسرتها اكعب كسرة وبقيت ندمان وساف التراب.
_____________________________
بلسان علي
ابوها ما رد نهاي وفي النهاية انا قررت امشي ليهو في البيت لمن مشيييت لقيتو قاعد وظاهر من وشو انو في حاجة كعبة حصلت ليهو ،قولت ليهو خير يا عمي في شنو، حكى لي انو بتو مرقدة وما بقدر يمشي ليها في البلد البعيدة وانو صاحبو قال ليه ما بقدر اجيبها، قولت ليهو انا عندي اخوي هناك هو البجيها ليك ما تخاف، فرح وقال ليي اتكلم معاهو اسي اتكلمت ووافق.
تاني قولت ليهو بعرف انو الوقت ما مناسب اسي بس والله انا بعد كدة ما قادر اصبر وانا بشوف وُد في الحالة دي وعايز ارافقها الهند بس ما بصفتي دكتورها بصفتي راجلها والحاجة دي ما بتحصل الا بالعقد عليها.
قال لي يا ولدي اصبر شوية اسي انا....، قاطعتو وقولت ليهو انا ما داير منك غيير تمشي معاي تعقد والباقي هيين ما مطلوب منك تعمل ليها عرس انا بتكفل باي حاجة ،قال لي وُد بتيي انا ما قدرت اديها اي حاجة وعايزك تعوضها انت ،زواجها من مظفر كان فاشل وما عايز زواجها التاني منك يكون برضو فاشل ويكسر لي قلب بتي ، قولت ليهو اطمن يا عمي بتك إن شاء الله حا تكون في أيدي أمينة، قولت في نفسي ماف داعي اورية الحب الانا بحبو لوُد.
خالتو جاتت وظاهر انها كانت بتبكي بكاء شديد وقالت ليهو ماش وبين مخلينا برانا ،بتك في المستشفى، قال ليها ماش أعقد لوُد وجاي قالت ليهو وُد اهم من بتنا ،انخلعت تاني وبقت قاعدة انا ما عارف ليه حاس انو المرة دي بتكرهها، عاينت فيها وقولت ليها يا خالتو كلها 5دقائق وبجي وبعدين حتى لو قعد ماف حاجة بقدر يعملها صاح، عاينت لي بحقد كبييير وقامت وقالت ليهو ما تتأخر انا هنا حا اقلق وانا براي.
طلعنا ووصلنا لقينا مظفر هناك! جاء بعلي وقال لي علي انا ما واثق منك انك حا تقدر تقدم ليها حاجة ،قولت ليهو انا ما عندي شغلة برايييك، قال لي انت متأكد بتحب وُد ولا بس عايزاها تكون ليك ،ما تعمل غلطتي انا بسبب الحاجة دي فقدتها، قولت ليهو انا زول عارف داير شنو فما تقارني بييك ،انت ما حصل حبييت وُد واتخليت عنها مما جات زولتك راجعة لحياتك بس انا عمري ما حا اتخلى عنها ومهما حصل بينا حا اكون معاها، قال لي لو في يوم واحد زعلتها انا ما بخليك، قولت ليهو الحاجة دي ما حا تحصل اصلا وحتى لو حصلت انا بعرف اراضيها كيف انت بسس امشي شوف شغلة تانية غيرنا وركز مع حياتك، وُد انت براك الخليتها بارداتك وماف زول ضغط عليك وكل الناس ديل كانو ضدك في القرار دة وانت كنت متمادي عشان بس بتحب شهد وومما شهد طلعت ما زي وُد قررت انو ترجع ليها بس وُد ما البت البترجع لزول زيك وقررت انو تكمل حياتها معاي ،قال لي علي انت ضاغط عليها هي ما عايزة عرس اسي ولا عايزة حاجة تانية بسس انت ضاغطها ووُد ما بتحب الاسلوب وصدقني انو هي في يوم حا تندم على الزواج منك، لمن قال لي كدة حسييييت بالضيق ، انا ضاغط عليها عشان خايف انو ترجع لمظفر وعايزها لي براي والحقيقة دي كنت طول الوقت بحاول ما اظهرها بس الحاجة دي ما بتخليني أتراجع نهاي عن قراري ووُد حا تكون لي ،قولت ليهو انا ما زيك عشان اخليها تندم وانت حا تشوف بعينك الحاجة دي، دخلت جوة وحضرت العقد وفرحت لمن العقد اكتمل وأخيرا وُد بقت مرتي................
_________________________
ليتني استطيع أن أُبقيك بجآنبي ،
كمآ أنت بقلبي ..💔