رواية حظي الفصل الخامس 5 بقلم سلوى إسماعيل
اول ماوصلت الغرفه اشوفا فاااتحه ؟!
بسم الله انا خليتا مقفوله متأكده .. بعد دخلت لقيت السرير العلى يميني مفرش بي لحاف وملايه جداد عرفت انه في وحده ح تسكن معاي جات داخله سلمت عليها واتعرفت عليها عرفت انه اسمها مياده زوله جمييييله حد الجمال وهاديه شديد وم بتحب الونسه والكلام الكتير ودي معاي انا فله اصلا ماعايزه ونسه ..
وخالي م خلى جامعه م فتشا ولا داخليه وداخليتنا دي زااااتاااا فتشا ومالقى امنه عبدالله السيد ..
وبي كده انا افضل حاجه عملتها اني غيرت اسمي ..
بدا السمستر وانا بس قرايتي وانتقبت ومتواصله مع اخواتي
وبسلم على امي مره مره يوم اتصلت لحنان يحليلا تبكي وقالت لي اهلك ماخلو مكان مافتشو عليك وجوني م خلو لي ضرب وتهديد وامك م عارفاك ؟!
قلت ليها ليه بتسألي !!
قالت لي كل م تتصل تقول ليهم طفشتو بنتي ماعافيه ليكم ..
ضحكت وقلت ليها خليهم يتأدبو المهم انا مبسوطه الحمدلله
اتونست معاها وكلمتها تمسح الرقم ..
بديت امشي الجامعه وم عملت شلليات ولا اتعرفت على اي فرد من الجامعه لا زميله ولا صديقه هو انا هاربه الصحبه لي شنو !!
اكتفيت بمياده ..
لقيتا زولة حاره شجعتني اشتغل قالت لي نمي هواياتك لانو مرات الشهادات مابتفيدك وابعدي من الصحبات نهائي مهما كانت درجة صحبتكم ح يجي موقف وتحسدك عليه ..
فعلا بقيت بقرا وبشتغل شيل وش وحواجب لبنات الداخليه شويه شويه اتطورت وبقيت برسم الحواجب بالبيقن وبديت اتعلم الرسم وبنهاية السمستر بمساعدة مياده انا اتقنت الرسم تماما وبقيت رسامه بمعنى الكلمه وبشتغل في العمارات والمقرن وبري وبدخل دخل كويس شديد الحمدلله وبستلم العروس شيل وجه وحواجب وحنه ..
انتهى السمستر الاول وانا الحمدلله طلعت منه بحاجتين اولا معدلي 3,13 وشغل فل لما مالاقيه زمن زاتو ..
في السمستر التاني انا قدرت انظم وقتي مع القرايه والتعب والشغل وجدولي ملتزمه بيه تماما قدرت اجمع قروش كويسه شديد بس الكان محيرني الاجازه 4 شهور انا اقعد وين ؟!
مياده اقترحت علي أاجر شقه وفعلا فتشت مع نهاية اخر امتحان انتقلت وكانت مختصره غرفه وصاله ومطبخ وحمام ولاول مره احب القعده براااي ياخ انا مرتاحه عدييييل ..
اخدت 4 شهور عباره عن شغل شغل شغل وكنت بعمل دهب بس فكرت اطلع جواز في الاجازه دي اسبوعين واستلمتوو
نزلت السنه الجديده وانا غير طبعا اخر لون نضيف وروقه
وملابس جديده واسبورتات حسيت اني زول زول
برضو نفس الشي م عندي اختلاطات ..
كانت عندنا حفلة استقبال الطلاب الجدد لقيت الطلاب الجداد ظريفين اكتر من الدفعه .. اتعرفت على بنوته ظريييفه اسمها مهاد ومعاها توأما ولد مُهيد هم في العمر اكبر مني بي سنتين ولظروف أجلو امتحاناتم ..
اتبادلنا الارقام انا ومهاد وقالت انها هي زاتا ساكنه الداخليه ..
عرضت علي انها تسكن معاي قلت ليها معاي زميله في السكن اشاورا وح اكلمك ..
هي رجعت مكان اهلا الحاليا معاهم وانا مشيت الداخليه لقيت مياده سالتها قالت لي حره انتي افتكرتها اضايقت
قلت خلاص ارفض بطريقه ظريفه ..
فهمتها قالت لي خلاص بسكن في الغرفه الجمبك وفعلا سكنت مع السناير بي نقتا الكتيره وافقو تسكن معاهم ..
بقت علاقتي مع مياده ومهاد ومره مره بلاقي مُهيد
بدت الدراسه عندنا كورس المهارات المهنيه ..
الدكتور اتأخر اسبوعين واخر شي قالو ح يجينا دكتور من السعوديه مخصوص يدرسنا السمستر واحتمال يستمر واحتمال لا ...
يوم كانت اول محاضره وانا من يومي بقعد في اول بنش وبجي بدري كنت قاعده بعد شويه كل الطلاب دخلو وانا بقرا في قصه في الفيس ومندمجه شديد القصه بتاعت رعب وعشت الجو لما بقيت م سامعه ولا صوت رفعت راسي اتلفت يمين وشمال لقيت القاعه ملاااااانه والناس دي مركزه قدام رفعت راسي اشوف الدكتور واتخيلو طلع منو ؟!
عاااااامر بقيت ماقادره انزل عيوني عنه منتقبه ولابسه نضاره وهو نفسسسه م اتغير بل زاد وسامه واللحيه بقت اكثف ونبرة صوتو زادت خشونه ااخر زول اتوقعت اشوفو ..
بس اتزكرت كلام اخواتي وقلت م هسي يمكن يكون حبيب وحده فيهم ؟!
نزلت عيوني والمحاضره كانت بتحكي عن اخلاقيات العمل الطبي وانو الطب مهنه انسانيه قبل تكون عمليه والمحاضره سلسه بصوره رهيييبه ونص البنات حبو الدكتور والنص التاني حب طريقة شرحو للماده ..
لاني عارفاهم م كانو مركزين كتير مع الماده ..
المهم خلصنا وطلعنا رجعت الداخليه معاي مهاد بنرجع سوا وفي الطريق قالت لي يابت انتي بخيله وله مالك ؟!
قلت ليها بسم الله مالك ؟!
قالت لي من جيت مافكرتي تعزميني ساي تعزميني غرفتك م بتملي من القعده براك ؟!
قلت ليها امل شنو يابت اولا انا مابراي معاي مياده وتاني شي لا انا ولا هي م بنحب الازعاج لكن ماعليك بكره المساء معزوومه عندي احلى شاي بلبن لعيونك ..
قالت لي : بكره وشاي بلبن ؟!
قلت ليها : ايووون اول حاجه عندنا محاضره طويييله تقريبا ح يعوضو لينا فيها 3 محاضرات وتاني شي عندي حجزين حنه بخلصم واجيب معاي كم حاجه كده وتجيني ..
قالت لي : ظااابط يازوله اتفقنا ..
وصلتها غرفتا ولاقيت مياده في الشارع سلمت عليها ماردت لي اظن ماسمعتني مهاد نادتني جوووووود مالك جنيتي بتتكلمي براكي ؟!
قلت ليها مالك عميتي .. ودخلت الغرفه الزمن كان الساعه 5 وانا كل م انوم زمن زي ده كنت بصحى مضااايقه شديد وكتير بجيني جاثوم ( دي حاله بتحس نفسك زي المشلول وفي زول ضاغط على صدرك وم بتقدر تصحى الا يصحيك زول ) اها انا حسيت بي نفس الشي بس ماطول جات صحتني مياده ولاول مره اصحى مرتاحه ..
شكرتها وكنت ح اتبطح راجعه قمت على حيلي بخلعه
مياده ؟!
انتي جيتي كيف ومتين انا كنت قافله الباب
قالت لي : الباب فاتح وقومي صلي الزمن مشى
مشيت الحمامات وانا بطنطن لاقيت مهاد في وشي ..
خلعتني ؛ قلت ليها يابت مالك انتي كل م امشي القاك في وشي ؟!
قالت لي : هووي انا عايزه اسالك انتي بتتكلمي براك مالك ؟!
قلت ليها : يابت قبيل كنت بتكلم مع مياده
لمست راسي وقالت لي جود انتي جنيتي ؟!
ميادة شمو وانا شايفاك بي عيني بتتكلمي براك !!
قلت ليها مهاد ماتخوفيني انا هسي جايه منها ومشاكلاها كيف دخلت والباب مقفول متأكده ..
قالت لي سجمك 😳😳😳😳😳