رواية حظي الفصل الاول 1 بقلم سلوى اسماعيل
من قمت في الدنيا دي وانا وحييبده عشت وسط اهلي وحيده وياهو شقيت طريقي برااي بس ربنا عوضني وزي مابقولو طعم العوض نساي ..
من وانا طفله انا البنت التالته قدامي أختين ووراي اخواني الاولاد الاتنين اخواتي اتولدو بره السودان وامورم طيبه الحمدلله ولما اهلي جو السودان ابوي وامي اختلفوا وباقي لامي بس القسيمه أمي حللت وطلعت حامل بي 💔
ومن هنا بدت معاناتي حتى وانا في بطن امي
أمي حاولت تنزلني بي كل الطرق ولكن ماقدرت
وبقيت عقبه في طريق أنها تتفك من ابوي ولانو نقطة اختلافا مع ابوي القرايه واخدت من عمرا 3 سنه ولما اتولدت رفضت ترضعني وبتعنفني وتكورك فيني وكم مره مرضت رفضت تعالجني وسافرت ساقت اخواتي بحكم انهم كبار ومابتقدر تتحمل مسؤولية طفل صغير بعدها امي اطلقت ورجعت تدرس واخواتي دخلتم احسن المدارس في السعوديه وبتصرف عليهم بي بزخ شديييد ورفعت على ابوي قضية نفقه لبنين ..
وكسبت القضيه وبقت كل سنه اخواتي تجيهم كفالتم من ابوهم وامي مامقصره منهم ..
وانا خاتي النقه ياقول حبوبه زول جايب خبري ماف كتر خير عماتي الاثنين بيدخلو صناديق مخصوص عشاني وكل صرفه بجيبو لي مرات ملابس ومرات يلموها لمصاريفي بتاعت الدراسه واخوالي وخالاتي كارهني شديد وضرب وزلة وشغل مابنتهي واصلا زوله اهلا رافضنها ح انتظر منهم هم شنو ؟!
ولما كنت ممتحنه شهادة الأساس امي واخواتي جو اجازه السودان ..
وم احكي ليكم طبعا بنتين حلوين ولونم رهيبيييب وبرستيج والشعر واللبس مابتقارنو بي انا لاقيتم عادي مديت ليهم يدي من غير ولا كلمه وامي اليوم الاول زاتو مالاقيتا م الدكتوره العظيمه المافاضيه تسأل من بتها زاتو وضيوفا كتاااااار ..
صبحت تاني يوم شايفاها في الممر البطلع على الشارع جيت ماره فيها وكانت بتتسوك انتظرتها خلصت وزحت لي من الطريق كانت بتعاين لي عادي وانا كذلك م عندي مشاعر تجاها لا كره ولا حب ولا شوق !!
بعد مشيت نادتني يابت اقيفي وقفت ومااتلفت عليها .. انتي بنت منو ؟!
قلت ليها بنت عبدالله السيد وواصلت وانا ببكي ببكي وماعارفه ليه م كان في سبب للبكاء غير سؤالا ده .. لقيت اخواتي في الباب الاثنين سمعوني وعاينو لي ولدموعي خجلت شديد لانهم شافوني وانا ببكي ..
طلعت من البيت ومشيت المدرسه لقيت حنان صحبتي كانت اسم على مسمى م فشلت يوم انها تحتويني .. استلمتني من وصلتها ..
اموووونه واااي امك جات من السعوديه اها جابت ليك شنو واخواتك كيف سامعه الحله كلها بتقول اخواتك عسسسل ماتجيبيهم لينا المدرسه وكان متي بي حاجات السعوديه براك ماعافيه ليك ..
قلت ليها ابررررردي انتي مالك ماك عارفه البير وغطاها سعودية شنو وقرف شنو ياخي لي هسي ماكلفت نفسها تسلم علي سلام الله ولا تسال مني ..
حنان سكتت وبقت تعاين لي .. قالت لي ياخ خلاص زاتو مادايرين شي ارح ارح ناكل طعميه الليله خالتو اامنه جات وانتي عارفه انو مسمنك عليها بتزيدك ..
ضحكت ومشيت معاها اكلنا طعميتنا وخلصنا اليوم الدراسي ورجعنا البيت وانا شايله هم ارجع كيف والح يحصل شنو ؟!
ماشه على البيت ورجليني تقيلات وقلبي بضرب م عرفتو خوف وله زعل وصلت والحمدلله م كان في زول في الحوش ..
وانا ماشه على البرنده الخاتين لي حاجاتي فيها اسمع خالاتي بقولو لامي هسي نحن قلنا تكوني خميتي ليها خم تقيل ..
امي ماردت وانا واقفه منتظره ردها ..
جاني صوت وحده في اخواتي : تستاهل والله بس انا قلت لامي الدهب احسن ..
اختي التانيه قالت : ااي صاح لانو الدهب لي قدام بنفعا ولو احتاجت عندها حاجه في يدها ..
خالتي قالت ليهم كده كده م بتعرف حتى وين تلمو ..
حبوبه قالت ليهم الشوم مابتستاهل اي شي
وده كلو وانا واقفه ..
مابكيت الغريبه في وقفتي باب الشارع فتح اشوف .......