اتكرفست وانا برجف كان اسمع ليك صوت صرخه قويه حرفيآ قلبي طلع ودخل من الخلعه على الخوف الفيني الصرخه كملتو زيادهه
والفي الجبلون كلهم قامو على صوت الصريخ حرامي حرامي وسمعنا حركة الجري برا الجبلون قمنا وطلعنا لقينا الراجال جارين ورا واحد تلب بي الحيطة وماقدرو يمسكو وفي مره تكورك وتنبز ماعافيه ليك تلفوني ماينفعك وتتدعي والنسوان يهدو فيها رجعنا انا شلت تلفوني دسيتو جابت ليه سرقه وحرامية رجعت نمت وكان في صوت النسوان البتكلمو عن الحرامي وما الحرامي وبعد الناس مانامت
المخيم كان جنب البحر ونحنا نايمين جاتنا ريحة البحر وسامعه صوت بعيد صحيت لقيت الناس طالعه لي برا وفي صوت كواريك طلعت لقيت الناس واقفه مع المشرفين وبكوركو البحر قرب من المخيم وامكن يغرقنا ونغرق والمشرفين يهدو فيهم واحد قال ليهم هو انتو هربتو من الداعامة وماجاتكم حاجه اسه خايفين من الغرق وضحك ارجعو نومو ساي مافي عوجة بجيكم
و النسوان والرجال يتونسو
والنسوان يتونسو ويضحكو وحده قالت عاد مامتنا من الجنجويد نموت بي البحر وضحكو انا اتحركت ورجعت نمت
الليله دي ما اظن تعدي على خير صحينا الصباح امي كانت مولعة الكانون طلعت اتسوك شايلة ابريقي ولقيت صف الحمام وسامعه وحده تقول شوفي الريشه دي طويله كيف كانت في الحمام الدخلت فيو امس انا وشفت المره كانت ريشه سودا طويله وكبيره وغريبه انا اتذكرت المره الأمس كان شكلها غريب وانا نهاي ماشفتها في المخيم دا
جات ساره تضحك قلت ليه مالك قالت لي مؤيد اخوي قال لينا امس صحه بليل ماشي الحمام وقال شاف ليو رجلين قاعدات في الحمام رجلين بس ومافي اي جسم وقال شاف الركب وهي تحكي وتضحك جا مؤيد قال ليه اضحكي كويس لما تظهر ليك الركب انا قعدت اضحك وهو يضحك وقال لينا الحمام الفي النص كان فيو ام ركب طلعت وحده شلت ابريقي واتحركت الحمام قفلت الباب كان اسمع ليك طاخ سقف الحمام من الزنك وجيت جاريه لقيت ساره ومؤيد يضحكو ساره شالت ليه حجر ورمتو في الحمام قلت ليه الله يجزاك خوفتني رجعت الحمام طلعت ودخلت الجبلون لقيت في اسره جديد جو من مصر بعد ما اتقبضو سافرو تهريب
كانت وحده وعندها ٥اطفال في واحد عندو ٦سنوات لميض وبتاع مشاكل انا وامي قاعدين في الفرشه كل مره يجي يكب التراب في الفرشه ويجري انا زهجت منو زهج اخر مره مسكتو وضربتو فات يبكي وبعد شوية جا مع امو امو نوبيه طويله وسمينه قالت ليو منو الضربك اشر علي
قالت لي ضاربه لي امي حكت ليه قالت لي امي انا ماسالتك يامره لمي خشمك عليك
وقالت لي كيف تضربي قلت ليه ولدك قليل ادب يقل أدبو ونسكت ليو من قلت ليه كده المره اتحولت وجنت عديل واندفعت علي حاولت تضربني وانا كنت بدفر فيه لقيت سكين جنبي رفعتها ليه
قالت لي ترفعي السكين فيني اصبري لي
الناس ادخلو من كلامه وكوراكها والنبز البتقول فيو وامي تحجز فينا المره جرت برا الجبلون وجات جاريه شايله ليه عكاز في يدها وجاريه زي المجنونه اظن راسها ماتمام
ووقعت فيني ضرب والرجال حاولو يبعدوها ٥رجال مسكوها وهي زي المجنونه وال٥ ديل طيرتهم بعيد واحد ضربها عشان تهدا وقامت في الراجل والقيامه قامت الراجل ضربها ضرب وهي تضرب وتكورك المشرفين اتصلو بي الامن وجا ضابط شايل سلاح في يدو
قال لينا انتي وهو بصرخ انتو جاين من حرب مفترض تكونو سند لي بعض وانا وهي ننبز في بعض جنبو صرخ وقال لينا ارح معاي القسم هي قالت ليو رفعت فيني السكين قال لي صحي وحده همست لي وقالت لي انكري حطب اوع تقولي شلت السكين قلت ليو دي وحده كذابه ماشلت اي سكين قامت تكورك وتنبز وانا اعاين فيه واتبسم
امي كوركت لي وقالت لي عايزه تخشي القسم العمرو ماشفتي وليله اوب علي الليله اوب علي وبكت وقالت لي لو مسكتي خشمك ويدينك ديل عليك ماكان احسن مابتسمعي الكلام وتضرب فيني
الضابط رفعنا انا وهي واولادها وامي وصلنا القسم هي تتبكا ساي وقاعده تقول راجلي قتلو الدعامة وانا اكورك فيها واضحك كان في ضباط كتيرين واحد زهج مننا قال لينا انتي وهي تتطلعو من المخيم وهي قعدت تتبكا امشي واحد ماعندي مكان وانا سكت واعاين
امي حنستو وقالت ليو بتصالحو وبتي بتعتزر منها امي قالت لي الا تعتزري اعتزرت وهي اعتزرت مني طلعنا من القسم وكنت محروقه منها حرقه ضربتني ضرب
وقلت نهاي مابخلي حقي وصلنا المخيم امي قالت لي اوع تكلمي محمد اخوك
ساره جات تضحك قالت لي عاده مابسالك المره طويله وسمينه وانتي تحتها زي النملة عفصتك عفيص قلت ليه ماكان تجي تضربيها معاي قالت لي هوووي جنس دا مابقدر عليو وقعدنا نضحك سامعين صوت عربات طلعنا لقينا ديل ناس الهلال الاحمر جايبين ليهم خيم ومشمعات معهم كم اسره قالو كانو في الشارع
عملو الخيم وقعدو فيها الاسر الجديده
ودخلو الجبلون فصلو لينا بي المشمعات اي اسره فصلو ليها بي المشمع نظام غرفه قالو من البرد لانو حلفا بردها شديد وجابو بطاطين ووزوعها والنسوان ديل يخاطفو بطريقه تخجل لو صبرو اي زول بدو حقو
نحنا نتفرج ونضحك
انا وامي دخلنا الفرشه في الغرفة جا محمد اجر ليو سريرين امي ختت الكانون وتعمل في الفطور ونحنا قاعدين جا صاحب محمد سلم وقعد كان عمرو بكون نهاية العشرينات في عمر محمد اخوي فطر معنا وطلعو هو ومحمد
ساره قالت لي عزماك قهوة ارح طلعت معها وصلت غرفتهم ودخلت لقيت اخواتها واخوانها وامها خاتين بخور وشيشه والقهوة ويتونسو وصينية فيها قهوة وفنكوش وحلاوة ونحنا بنشرب في القهوة وحده من اخوات ساره قامت وطيرت الصينية بعيد عيونها اتقلبو العدسات اختفو لون عيونها ابيض وقعدت ترجف انا من شفت المنظر جريت جري وانا ارجف دخلت الغرفة وانا اقرا في القرآن جات ساره تضحك وقالت لي خوافه اخواتي بحضرو عندهم الظار وقعدت تحكي لينا وهي بتحكي انا بشوفو كلامه كذب وكذب حكت لي حاجات تشيب الراس الدنيا دي فيها حاجات غريبه
ساره قالت لي المره الضربتك تغسل برا في ملابسه وعندي فكره همست لي في اضنين قعدنا هضحك وطلعت معها
كنا نراقب فيه وخلينها بعد ماشرت الملابس اتسحبنا براحة شلنا عبايتها وختينهم في كيس وجدعناهم في الوساخة دخلنا نضحك مشينا على الغرفة الفاصلنها ليه بي المشمع شلنا موس وقطعنا المشمع
ودخلنا لي امي نضحك امي قالت لينا خير قلنا ليها خير وضحكنا بعد شوية سمعنا المره تكورك العمل كده منو وملابسي السرقه منو والله لو عرفت الا يشوف ليو مكان انا عندي الاسياد ومعاي الجن بقولو لي العمل كده منو
انا بجيب الصاقعه الصاقعة دي الليل بتضرب الزول العمل لي كده وهي تكورك ونحنا نضحك
سمعنا صوت عربيه طلعنا برا كانت وحده لابسه ليه عباية ونقاب كانت بيضه شديد وظاهر جميلة شديد معها ولدين شايلين ليهم حله وعيش وقفت والناس جو عليها واحد قعد يوزع كان عدس وعيش وهي تصور طبعآ النسوان يكوركو صحني وصحنك البنت وقفت بعيد تصور فيهم جان المشرفة عليها قالت ليه ماتصوري قالت ليه ماقاعده اصور طبعآ هي كانت بتصور في النسوان البدافرو والشفع البخطفو في الأكل وحده شافته تصور جات عليه قالت ليه كيف تصورينا تصوري عشان تمشي تشحدي بينا في المواقع مش وكورك فيها جو كم مره عليه قامت كوركت فيهم قالت ليهم انتو نسوان ولا شبه النسوان وملصت النقاب وجدعتو فيهم وحده كده طويله خمشته من وشها البنت قعدت تبكي وتكورك جو الولدين وحجزوها من النسوان الاولاد الفي المخيم كلهم وقفو معها والعجب الرجال كانت جميلة شديد الطرحة وقعت منها شعرها طويل شديد مشاء الله مافيه غلط تبارك الخالق طلعوها من المخيم وهي تبكي والرجال شغالين دي مره يدوقها الحسنه الجابت ليكم اكل انا وساره نتفرج ونضحك جا مؤيد قال لينا نسوان فقر طيرتو المزه فعلا لقوله انتو نسوان عاملات زي الرجال وكان زهجان انا وساره عايزين نموت من الضحك
اليوم انتها صليت العشاء ونمت صحينا في نص الليل بصوت كواريك طلعنا لقينا اخو ساره علي العمرو ١٥ سنه مسكو مع بنت عندها ١٥ سنه وأهل البنت يضربو فيو وأهل ساره يحجزو والبنت امها جاراها في الأرض وزي شوال العيش دخلتها الغرفة وسامعين صوت الضرب والصريخي لما جات عربية الشرطه ورفعتهم رجعنا ننوم امي قالت لي الله يطلعنا على خير الناس ديل اخير منهم الجنجويد عشان كده الحرب قامت
صحين الصباح ومحمد اخوي جا قال لي امي صحبي ياسين قال عايز زينب وانا شايفو زول كويس مافيو اي عيب وراجل وزينب احسن توافق بيو مامعروف ظروف الحرب دي امي قالت ليو القرار عندك يامحمد محمد قعد اتكلم معاي وقال لي بعد اسبوع عايز اديو الرد انتي فكري
الاسبوع خلص وانا وافقت جو اهلو كان عندو ٤اخوات وامو وابو بعد اسبوعين عملو العقد وجو ساقوني
عندهم بيت في حلفا ياسين كان طيب شديد بس اهلو صعبين والعجب اخواتو وامو عملو لي عمايل كنت ساكته وصابره لما ظهر لي حمل
وكنت بمشي لي امي في المخيم وظاهر فيني انو مامرتاحه بقيت ضعيفه وسوده الليله جيت لي امي العصر وقاعده اتونس معها وتسأل فيني ليه ضعفت وسوده
اتصل علي ياسين وقال لي محمد اخوك قبضو عليو انا انخلعت قلت ليو كيف قال لي اسمو كان زي اسم دعامي مطلوب الضابط جا في السوق وساقو قلت ليو المره الفاتت كده قال لي المره دي انشاء الله يطلعو تلفونو كان فيو فيدهات عن الدعم
والواتس ونستو كلها عن الدعم والجيش وفي صور الضابط فتش التلفون ورفعو في البوكسي
انتي عارف اي زول بكون بتكلم عن الدعم والجيش بس محمد عشان مشتبه بيو مسكو لي الفيدوهات والكلام والصور قعدت ابكي وامي تسأل فيني اسبوعين ونحنا بنمشي القسم وهم رافضين نشوفو بعدو حولو سجن دنقلا وشهر وشهرين كل مانمشي ليو مابقولو لينا حاجه واحده تنو هو خاين انو هو مع الدعم السريع في يوم جابو لينا عشان نتكلم معاو محمد كان ضعيف واسود جسمو كل جروح من شفنا بكينا معاو بكا وبعدو تاني ماعرفنا عنو اي حاجه الا يوم اتصل ياسين وقال لي محمد اخوك الله يرحمو قال لي كان ميت ليو اسبوع ولما مشينا نسال عنو كل شوية يقولو لينا حاجه في النهاي قالو لينا الزول دا اتوفه ان الله وانا اليه راجعون البركه فيكم
انا صرخت صرخه وااااي يامحمد وااااي ياخوي واااي المت وماشفناك ولا عرفنا عنك حاجه واااي ياسندنا واااي يابونا الليلة اوب وكررر علينا امي من سمعت صرخة صرخه واحد وسكتت وتاني خشمها ما فتحتو دموعها الجاريه امي دخلت في صدمه شهرين وامي على الحال دا ساكته ونهاي مابتتكلم صحته اتهورت شديد النسوان يصبرو فيها ويقولو ليها ابكي طلعي الجواك اتكلمي اصرخي وامي ساكته عيونها بس البدمع انا قعدت معها وفي الشهر التاسع ياسين سافر لي الدهب شهرين ومامنو خبر انا ولدت وجبت ولد سميتو محمد وكل ما اسأل اهلو يقول لي ماعارفين عنو اي حاجة بعد ٦ شهور جابو لي خبر موت قالو انهدم بيو بير في الدهب انا حرفيآ كنت ماعايشه عايشه زي الشبح بي موت محمد موت ياسين مرض امي وفي يدي طفل عمرو ٦ شهور وأهل ياسين قالو لي انتي نحس نحنا ماعايزين منك اي حاجه حتى ولدك ماعايزنو وماعندنا بيك شغله من دخلتي علينا قتلتي ولدنا الله ينتقم منك
قعدت في المخيم تلاته سنوات مافي طريقه ارجع الجزيره الجزيره نظفت وطلعو منها الجنجويد بس ارجع كيف امي صحته ماكويسه كنت بقابل بيها اسبوعين وعايزه قروش مواصلات وقروش اكل وشراب ولو مشيت الجزيره البصرف علينا منو ماعندنا غير محمد ولو رجعت اشتغل شنو مافي شغل هناك وفي مرض حمه الضنك والملاريات
اشتغلت في فندق قريب من المخيم ولدي سميتو محمد واسه عندو ٣سنوات كنت جاري ورا محمد في المخيم وهو جاري ورا ولد شايل ليو كورة عايزه يشل الكورة من الولد
وانا انادي ليو محمد تعالي ارح ياخي اتخرت انا عن الشغل حمودي لو مسكتك بقتلك انا الليله ما امسكك بقتلك عديل
وانا جاريه واكورك فيو جا واحد داخل المخيم ومعاو كم واحد وكم بنت كانو نظيفين شديد محمد جر لي واحد من الدخلو المخيم
الشاب رفع محمد وشالو وقفت جنبهم سلمت عليهم
محمد قال ليو عاين عايزه تضربتي عشان انا عايز الكوره من الولاد داك واشر عليو الشاب سلم عليو وقال ليو انا بجيب ليك كوره وتكون ليك براك وبوسو ونزلو الشاب كان طويل حلبي معضل شعرو طويل مفلفل وسامعه وحده قالت ليو دكتور سمؤال واتكلمت معاو بي الانجليزي وهو اتكلم معها
والبنات الفي المخيم كلهم يعاينو فيو وحده قالت احي عاينو الولد الطويل داك عامل زي فارس الأحلام سبحان الخالق وحده قالت ليه دا مشهور ماشفتي صفحتو في الفيس ولا في الانستا دا موديل ودكتور في بريطانيا
هو اتحرك على الخيم وانا مسكت محمد واتحركت على الشغل وصلت قعدت انظف في الفندق ومحمد واقف جنب باب الفندق يعاين في الماشي والجاي خلصت عايزه ارجع أدوات التنظيف مكانه
سمعت صوت بقول محمد البطل لقيتو الشاب دكتور سمؤال رفع محمد وسلم عليو
رفع عيونو عاين فيني وقال لي امسيتي كيف قلت ليو بتردد لااالحمد لله كنت لافة الطرحه في وشي مسكت محمد قلت ليو يلا نطلع ونحنا طالعين جا واحد شايل ليو كور ولعبات يبيع فيهم محمد جر ورا انا جريت جبتو وهو كان ببكي في الكور بعد تعب حتى قدرت اتحرك بيو وكان ببكي وشايفه دكتور سمؤال جنب باب الفندق كان يعاين فينا خجلت خجل وصلت المخيم لقيت امي قاعده في السرير وشايلة السبحه وساكته من يوم موت محمد اخوي وهي ساكته ٣سنوات مافتحت خشمها بي حرف والاكل دا الا احنسها تحانيس صحته ماشه تتهور ماخليت دكتور ولا مستشفى قعدت اعمل في الأكل ومحمد طلع يلعب مع الشفع
انا يادوب عمري ٢٠ وشلت الهم هم طفل وامي والعيشه
الجزيره نظفت من الجنجويد لو رجعنا البصرف علينا منو وعايزين قروش مواصلات وامي كل اسبوع عندها مقابلة لانو مابتاكل ولا بتشرب وصحته ماكويسه والجزيره لسه مارجعت زي ماكانت فيه حمه الضنك والملاريات ومابقدر اجازف بي امي ومافيه شغل ولو رجعت البصرف علينا منو كان ماعندنا غير محمد الله يرحمو والاهل اي زول في همو وانا سرحانه واعمل في الاكل ودموعي جاريه
ساره جات داخله وقالت لي واااي يازينب ماشفتي بعد مشيتي جا منو مسحت دموعي سريع وابتسمت ليه ساره الوحيده المخففه عني وشديد قالت لي قومي قومي خليني انا بكمل ليك قلت ليه لا اقعدي اتونسي ساي قالت لي انتي عويره قومي خلينا اوريك ابداعي في الطبيخ ضحكت قلت ليه تمام قمت وهي تقطع في البصل ودموعها جاريه وتحكي قالت لي واااي جا واحد من بريطاني وهو موديل ودكتور واااي انا أعلنت انبراشي طبعآ جا يشوف وضع الناس وجايب معاو مساعدات وقروش
عامل زي فارس الأحلام وقامت جات علي وفتحت التلفون وقالت لي اتفرجي كانت صفحتو وهو منزل فيدهات كتيره شديد ليو والبنات ديل منبرشات بي كلو في فيديو راكب فيو حصان وفيديو خاتي راسو على رأس ألحصان وملصق جبهتو فيو
لقول سارة زي فارس الأحلام بي ألحصان الأبيض
وفيديو يلبس ليو في جكت كان لابس ليو قميص بي الأبيض وبنطلون بني فاتح ازار القميص عندو شامه في رقبتو لبس جاكت بي البني وطاقيه ونظارات ومسك عطر ورش منو واتكلم بي الانجليزي يشبه الأجانب وتاني صور لابس عراقي وسروال والعراق بقا ترند في المواقع الناس دي مبهوره بيو شديد اخر فيديو لما كان عندنا في المخيم كان يلعب مع الأطفال تحس بيو حنين شديد قاعد في الأرض معهم وفي طفله تشاغل فيو وهو يضحك سرحت في ضحكتو سبحان الله المبدع عندو هيبه وقبول عجيب وفي الفيديو دخل الخيم وشاف الحالات الصعبه وكان بقعد جنبهم وبتكلم معاهم الرجال والنسوان الكبار بسلم عليهم في رأسهم وبتعامل معهم بكل حنيه
ساره قالت لي واااي يازوبه الحبه دي نادره
فكرك بتعاين فينا ولا بتفكر فينا ووواي اسه دا البتتزوجو دي بكون شعورها شنو ضحكت عليها
قالت لي بكرا جاي قال بكمل الخيم وبجي الجبلون وقعدت تحكي بيو وانا اضحك عليه جا داخل محمد شايل كوره قلت ليو اوع تكون شلتها من ولد ماناقصني مشاكل قال لي لا ياماما جابها لي عمو قلت ليو عمو منو جر وقف بعيد قال لي عشان تشيليها مني جريت وراو طلعت من الجبلون وانا جاريه وراو توبي اتفك من وشي وطقشت لي زول رفعت راسي وانخلعت رجعت لي ورا .....يتبع