الموت يأخذهم من أعيننا لكنه لا يمحوهم من قلوبنا أبدًا💔
يبقون في تفاصيلنا في الأماكن التي مروا بها في الروائح التي تشبههم وفي الذكريات التي لا تموت
💔
يخبرونك أن الأيام تخفف الألم
لكن الأيام تعيدك إليهم بكل موقف يشبههم
بكل ذكرى تعيدهم، بكل كلمةٍ كنت تسمعها منهم
الأيام لا تنسينا لكنها تمنحنا قدرة على التحمل
💔
لا يزالون هنا
في دعائنا لهم في أحاديثنا عنهم
في الصور في الأصوات وفي كل جميل جمعنا يوما
💔
لولا رحمة الله التي وسعتهم ووعده باللقاء
لما استطاعت هذه القلوب أن تحتمل
💔
إن شاء الله سنلتقي هناك، حيث لا وداع، ولا وجع ولا غياب
اللهم صبرا لا ينفد ورحمة لا تنقطع💔
مسكت راسي بعد ماطقشت في الزول توبي نزل من وشي رفعت عيوني انخلعت لما لقيتو دكتور سمؤال رجعت لي ورا هو ابتسم قال لي يسعد مساك لفيت توب في وشي قلت ليو ومساك ياربب
محمد واقف وماسك الكوره قال ليو عمو قول ليه ماتشيلي مني الكوره
دكتور سمؤال اتحرك عليو ونزل قعد جنبو في الأرض قال ليو دي هديه من عمو والرسول صلى الله عليه وسلم قبل الهدية محمد كان بعاين فيو وماسك الكوره
قال ليو لما نجيب سيرة الرسول نقول عليه افضل الصلاة والسلام يلا قول يا بطل محمد قال ليو عليه افضل الصلاة والسلام دكتور سمؤال بوسو وقال ليو يلا يابطل نلعب ورفعو في كتفو واتحرك جا عليو واحد وطلعو من الجبلون انا اتحركت دخلت لقيت ساره انتهت من الملاح وماسك التلفون تتصفح بيو وانا ماسكه راسي ساره قالت لي خير مالك قلت ليه خير خير وقعدت معها اتونس
صرخت و قالت لي وااااااي لما خلعتني قلت ليه بسم الله الحاله قامت ولا شنو قالت لي سمؤؤال فارس أحلامي برا قاعد
ضحكت قلت ليه عرفتي كيف مدت لي التلفون لقيتو عامل فيديو وهو يلعب مع محمد وكم طفل في المخيم بي الكوره وساره مسكتني من يدي قالت لي الليله حمودي ولدك ينوم معاي تلاقي ريحتو سمؤال سمؤال ضحكت قلت ليه الجن الله يشفيك قالت لي لو دا الجن انا فعلا مجنونه قالت لي تعالي نشوفو قلت ليه ماقادره تعبانه جرتنتي من توبي طلعت معها وصلت غرفتهم ودخلت قالت لي دقيقه
كان مؤيد قاعد ماسك تلفون مشغل اغاني ويرقص
اتسحبت شالت عطر شافه قال ليه دا عطري مش وقام عليه هي جرت وهو جاري وراها وانا اعاين واضحك قالت ليو دي زوبه عايزه العطر قال ليه يازوله ماتكذبي وانا اقول العطر مالو خلص سريع
قالت ليو بتجيب عطور ظابطه ياخي وانا مازولتك رفع سفتجتو هي جات جاريه وقفت ورا ضهري وفك السفنجة في اللحظه دي جا داخل دكتور سمؤال ومعاو كم واحد والسفنج صج وقعت في نص وشي مؤيد قال اوبا مابقصد يازوبة وساره ضحكت قالت لي اوووف دخيلو البفدا صحبو معلش تعيشي وتاكلي غيرها وضحكت
وانا ماسك وشي دكتور سمؤال والمعاو شغالين معلش معلش ياساتر ياساتر
انا من الإحراج ضحكت وقعدت اضحك بي صوت ومؤيد ضحك وساره رافعه الريحه قمت الإحراج ساره كانت لابسه ليه بجامة وعامله كعكات كانت عايزه تغير التوب وتتريح
شكلها يضحك ادست وراي مؤيد دخل جاب ليه التوب طبعآ الجبلون لما فصلو بقا فية مر طويل على جنب الشمال صف من الغرف وعلي الجنب اليمين صف من الغرف وفي النص ممر وفيو كم لمبه
جو جارين الشفع شايلين ليهم سماعة ومشغلين اغاني بصوت عالي ونحنا واقفين دخلو فينا انا اتحركت سريع وساره جرت دخلت غرفتهم وانا مع لخمت الشفع لقيت نفسي واقفه جنب دكتور سمؤال واحد من الشفع دفرني قربت أقع طبعآ مشمع مابتقدر تمسك فيو دكتور سمؤال مسكني وشغال ياساتر ياساتر زحيت منو سريع واتحركت محمد جاري مع الشفع
اتحركت سريع و دخلت غرفتي وانا حاسه بي احراج
ووشي حمر من ضربت السفنجة سامعه صوت دكتور سمؤال ومعاو الرجال بتكلمو عن الجبلون وعن الحاجات المحتاجة ليه والحاجات المحتاجة ليه الناس ساره جات تتضحك قالت لي واااي حركة رومانسية قربت اموركم تظبط زينب انتي جاده سمؤال مسككك جاي يدك يازول وقعدت تشممش فيه وشغاله عطر بريطاني وااي ريحتو رهيبه
عاينت في وشي وضحكت قالت لي مؤيد انتها منك ضحكت معها عاينت لي امي ابتسامتي اتلاشت امي سرحانه وقاعده شايلة سبحته نزلت راسي وسكت ساره قالت لي انا طالعة اشوف سمؤال وطلعت قعدت اعاين في امي
جا حمودي شايل الكوره قال لي ماما رفعت حاجبي قال لي مش الرسول صلى الله عليه وسلم قبل الهدية كتمت الضحكة قلت ليو اي قال لي لما تجي سيره الرسول نقول عليه افضل الصلاة والسلام ابتسمت قلت ليو عليو الصلاة والسلام قال لي الكوره هديه وانا ماشحتو هو جابه لي هديه
ضحكت قلت ليو تمام بس تاني ماتتشبك في اي حاجه جا وقف جنبي وشايل الكوره وقال لي شفتي عمر جابو ليو عجلة قلت ليو واااااااااهااااا سكت وطلع في السرير وخته الكورة قلت ليو ارح نغسل يدينا عشان نتغدا غسلت ليو يدينو خحتينا الاكل امي رفضت بكيت بكا انا ماقادره وماعارفه اعمل ليه شنو واجعني وجع موت محمد على ياسين على حزن امي شافتني ابكي مدت يدها وقعدت تاكل اكلت بسيط ورفعت يدها جبت ليها نشأ وحنستها شربت شوية وقامت اتوضت وصلت المغرب
صليت وقعدت اغسل في العدة بعد المغرب شغالة في كافي بغسل فيو العده ختيت حمودي
جنبها على الاقل يونسه يخفف عليه شوية لبست عباية وطرحه سلمت عليه في راسه قلت ليه ماتخلي حمودي يطلع ختيت حلة اللبن جنبها قلت ليه اديو اللبن شلت لي بجردل أجيب فيه موية وطلعت لقيت ساره مشغله ليه سماعة في نص الجبلون معها مؤيد وعلي ويرقصو ضحكت عليهم واتحركت طلعت وصلت مكان الموية ختيت الجردل في الكولر جنب الفندق البشتغل فيو وقعدت في المسطبة الفيه الشجره اتفرج في ستات الشاي والعربات والبنات والشباب الداخلين الكافي كل شويه تقيف عربيه احلا من التانيه وينزلو منها شباب وبنات اللبس كيف والحركات كيف سمعت صوت زول بقول لي وين سرحانه التفت لقيت الجردل يدفق اتحركت عليو قبل ما أصلو نزلو الابكم وشغال لي يابت يابت ضحكت قلت ليو خاله خاله ابتسم وغمز لي ابتسمت ليو شلت منو الجردل واتحركت وانا متحركة شايفه دكتور سمؤال معاو كم شاب على كم بنت داخلين الكافي التفت عاين فيني وجا علي انا حاولت اخفف حركتي شويه وقف في وشي ومد يدو شال الجردل قلت خليو بوصلو قال لي كيفك قلت ليو بخير الحمد لله قال لي حمودي كيف قلت ليو تمام الحمد لله قال لي الحمد لله واتحرك وصل المخيم خت لي الجردل جنب الباب قال لي معلش لو مامستعجل كنت دخلت قلت ليو ماقصرت يديك العافية خت يدو في صدرو وقال لي ماعملت حاجه دا الواجب واتحرك فات دخلت الجردل
وطلعت دخلت الكافي صوت الاغاني والشباب والبنات البضحكو وبتونسو ريحة البن والقهوة نسمة الهوا المعاها روايح القاعدين والجلسة السودانيه المتسلق الفي المظله الورد الابيض حرفيآ كده يرد الروح
شايفه دكتور سمؤال يتونس ويضحك دخلت المطبخ وقعدت اغسل في العدة جا واحد قال لي زينب معلش الليله شجن ماجات ممكن تقدمي وانا بزيد ليك القروش جا واحد قال لي امشي انا بمسك العده عايزه اعترض لانو انا مابعرف اقدم ولا بعرف اخلي وشي كاشف بخجل من الناس
الولد قال لي يلا ماتسرحي وضحك اتحركت غيرت ملابسي كان اسكيريد اسود قميص بني وطرحة بنيه في بنات بلبسو من غير طرحة لبستهم انا لوني ابيض وصحتي حلوه اللبسه كانت ضيقه شويه بس مابطاله طلعت قلت ليو عندك كمامة قال لي في طلع لي وحده حقت قماش لونه اسود لبستها وشلت الورقة والقلم واتحركت قال لي الطاولة ديك كانت حقت دكتور سمؤال اتحركت عليهم بعد ماسلمت ورحبت بيهم شلت الطلبات كنت كل ما ارفع راسي بلاقي دكتور سمؤال يعاين في عيوني ومركز شديد اتوترت شديد القلم وقع من يدي قبل ما انزل اشيلو نزل شالو ومد لي قلت ليو شكرآ قال لي العفو اتحركت جبت الطلبات ورجعت كانت في طاولة فيها كم شاب اتحركت عليهم واحد قال جايبن مستورد وضحك التاني قال لي. شغل نضيف زعلت زعل من كلامهم شلت الطلبات واتحركت جبت الطلبات واحد وانا جايه على الطاولة مد رجلو وقبل ما اصل احس بي يد سحبتني التفت لقيتو دكتور سمؤال والطلبات اتكشحت في قميصو كانت في قهوة حاره سحبت منديل سريع من الطاولة ومديتو ليو شالو وقعد ينظف في قميصو كنت متوتر ماقادره اتكلم
دكتور سمؤال اتكلم معاهم وانا اتحركت دخلت المطبخ قلت لي الولد امشي كمل انت انا مابقدر اكمل
ضحك قال لي شغل صعب صح قلت ليو اي همس لي اصلا الشباب العندهم قروش ديل كده وسخانين الا من رحم ربي ماتزعلي
ابتسمت وقعدت اغسل في العدة خلصت غيرت ملابسي وطلعت
وصلت المخيم لقيت ساره ومؤيد واخواتها مشغلين اغاني في المخيم ويرقصو ومعهم امهم وكم مره
اسره حلوه شديد حياتهم كلها ضحك وونسه ماشايلين هم في الدنيا دي امهم زاته تحس بيه صغيره الشعر كيف والتياب كيف واللون كيف متشببه شديد مشاء الله
جات ساره جاريه جرتني من يدي قالت لي الا ترقصي معانا قلت ليه ماشه اشوف امي قالت لي نايمه كنا معها انا وامي وامي جابت ليها عشا واتعشت معها إلا تجي ترقصي مؤيد وعلي يتعلوق عولاق ضحكت عليهم ضحك وقفت اعاين فيهم مؤيد يرقص مع امو ويبشر وامو تزغرد وساره ترقص مع علي واخواتها ديل يقعو ويقومو ضحكت عليهم ضحك
وبعدها اتحركت دخلت الجبلون صليت العشا ونمت صحيت الصباح عملت الشاي امي كانت صاحيه وشايله سبحته قلت ليه ياأمي لبتين بتسكتي كده قولي كلمة ياأمي اشتقت لي صوتك ولي كوراك فيني ولي ونستك
ماردتت لي نهاي مسحت دموعي مديت ليه كباية الشاي ماشلت مني
قلت ليه والله مابتشربي مابشرب شالت مني الكباية شربتو لي حمودي مديت ليه تاني كباية شالت مني وهي بتشرب سرحانه بعيد وانا سرحانه فيه امي من موت محمد اتغيرت شديد كتمت وجعه في قلبها ياريت لو بكت وطلعت الجواها جات ساره جاريه وقالت لي زنوبه الليله سراجي سراجي ركزي في يااء الملكية دي وخطي فيه خط احمرررر
ضحكت قلت ليه اها سراجي مالو صرت قالت لي سراج قولي سراج الياء دي لي انااااا
المهم سراجي الليله جاي الجبلون وعايز يمر غرفة غرقة ضحكت قلت ليه اسه انتي بتجيبي الشمارات دي من وين قالت لي قالو لينا نظفوا الجبلون كلو عشان جاي سراجي وقعد تكتل في عيونها
قلت ليه كويس نظفي عشان جاي فارس احلامك وإنشاء الله يجيك بي حصانو المتصور بيو داك وضحكت
قالت لي جاي توبك الأسود ملصي النغسلو عايزه اقشر بيو قبل ما اقول ليه حاجه شالتو مني وجرت قلت الله يشفيك وضحكت
قعدت اغسل في العده وبعدها لبست عبايه وطرحه قلت لي حمودي ماما اها ماشي معاي ولا قاعد قال لي قاعد قلت ليو اوع تطلع من المخيم العب مع الشفع وماتضرب ليك شافع اوع تشيل لعبه من شافع
قال لي كويس سلمت على امي في راسه وقلت ليه طالعه الفندق عايني لي حمودي وطلعت
وانا طالعه شايفه دكتور سمؤال ومعاو كم واحد داخلين وساره معاها وحده ماسكات التوب ينفضو فيو اتحركت على الفندق خلصت وطلعت وصلت المخيم ساره لابسه التوب الأسود ولابسه ليه خلخال في رجلها وعامله لي زمام والشعر مسرح بوب قلت ليه مابسالك دا كلو لشنو قرصتني قرصه حاره
وقالت لي شن عرفك بي الحب ولوت خشمها قلت ليه والله الليله ما اخليك احي قطعتي لحمي عايزه اقرصه جرت جريت لحقتها ونحنا جارين لقينا دكتور سمؤال ومعاو الشفع يصور في فيديو خجلت خجل جيت امشي حمودي جا جاري لي وقال لي الا تجي تتصوري معنا قلت ليو أتصور انت انا ماعايزه كان يجر فيني
دكتور سمؤال رفع التلفون فينا ساره جات جاريه ومسكتني وقعدت تتكلم انو نحنا في المخيم وهربنا من الجنجويد وانو نحنا كلنا اهل واسره تتكلم وتعمل في حركات بي يدينا انا واقفه اعاين فيه ومستغربه في الفصاحه العندها عاينت لي وغمزت ضحكت عليه
دكتور سمؤال قال ليه برافو عليك اها انشر الفيديو قالت ليو اااااي طوالي وجرت وقفت تشوفو وانا واقفه في مكاني
دكتور سمؤال قال لي ماعايزه تشوفي قلت ليو وانا بتمتم لا لا لا مستعجله واتحركت دخلت الجبلون لقيت امي نايمه في السرير وشايله السبحه لبست لي توب وقعدت جنب رجوله اعصر ليه في رجوله واتكلم واحكي ليه وهي ساكت سامعه صوت السلام عليكم صلحت توبي امي قامت لبست توبه وقعدت قلت وعليكم السلام وطلعت من الغرفه لقيتو دكتور سمؤال ومعاو مشرفه سلم ودخل سلم على امي وقعد في سرير
اتحركت جبت ليو موية المشرفه حكت ليو بي امي وبي محمد اخوي وكيف مات قال لي امي البركة فيكم وربنا يتقبلو يارب امي ماردت ليو قال لي انتي مومنة ومسلمة ولدك شهيد أنشأ الله سوء تفاهم كان وانا واثق انو ماعندو دخل في الجنجويد وانتي بي سكوتك دا بتعزبي فيو هو محتاج لي دعواتك ودا يومو والله كاتب ليو يموت كده امي دموعه نزلو قال لي يامي ماتكتمي وجعك امي التفت عليو سريع وقالت امي ياأمي الكلمة دي انا مشتهياها من محمد من حشاي محمد ولدي ماخاين وقعدت تبكي وتكورك محمد ماخاين مامع الدعامه ماقتل ولا سرق ولا نهب
انا ولدي ربيتو امي فتحت يدينها وقالت ربيتو ربيتو من وهو صغير على طاعة الله على الأخلاق على الأدب محمد ولدي بعرف الله محمد ماخاين ولا سرق ولا قاتل
ولدي مات وهو في السجن ولدي مات وانا ماشوفتو وصرخت
احي يامحمد ااااحي ياحشاي اااااحي موتك قص قلبي وكسر ضهري
ولدي مات في السجن ولدي انضرب ولدي اتجوع ولدي مات مظلوم ياناس محمد مظلوم ياناس
مات مظلوم وااااي يامحمد وااااي يامحمد
محمد مات وماعارفه منو الغسلو منو الكفنو منو الصلاه علي
محمد ولدي لما يموت زول بجري مع الناس البحفرو القبر ولدي بجري بصلي على الناس البتموت وبسساعد في حفر القبور ولدي الحنين ماغلط في زول الصغير والكبير بحب محمد
انا كنت بتمنا اشوفو عريس اشوف الحنه في يدو و اشوف مرت محمد ولدي اشوف اولادو
الليله اوب ياناااااس ولدي مات في السجن ولدي مات ومافي زول صلاه عليه ولدي مات وانا ماشوفتو
ولدي مات وانا ماعارفه جيعان عطشان وكويس عيان واااي ياحشاي
امي تبكي وتوصف وانا حضنتها وحضنتي وقالت لي ووواي يازوبه واااي من محمد واااى من الفات في عز شبابو واااي المات مظلوم واااي المات مسجون انا ولدي ماخان بلدو ولدي ماخاين ياناس ولدي مظلوم قالت لي زوبه اخوك مات مظلوم مات مظلوم يازوبه محمد ماقاتل ولا سارق محمد ولد انا الحنين مات مات وكسر قلبي مسخ لي الدنيا
جو النسوان يهدو فيها وامي دي قعدت في الأرض وتصرخ وتكورك محمد انا عايزه اشوف اضمك اشمك عايزه اسمع كلمت امي عايزه اشوفك داخل علي واااي ياولدي واي ياحشاي انا ولدي ماخاين ماخان بلدو ولدي لما دخلو الدعم شال العكاز ووقف مع شباب القريه وطلع الناس وساعد المضروبين ولدي ياناس ماخاين محمد حشاي ماخاين ولدي ماات ماااات ياناس
النسوان كلهم يبكو معها دكتور سمؤال قال ليه بوعدك انو اعرف وين دفنو وبسوقك من يدك تشوفيو استغفر وادعي ليو ولدك شهيد وانتي ام الشهيد صلي على النبي ياأمي قالت ليو ولدي شهيد اي شهيد ما خاين وفتحت يدين ولدي انا ماشوفتو ماشوفت كيف مات دكتور سمؤال قعد جنبها في الأرض ويصبر فيها قالت ليو عايزه امشي لي محمد محمد فات وخلاني انا عايزه اموت معاو حشاي مات سندي مات
النسوان ديل يصبرو فيها وامي تكورك محمد يامحمدتعال لي امك تعال قول لي يامي اشتقت اسمعه منك يامحمد وين مشيت و خليتني وااااي يامحمد واااي ياحشاي يالله محمد ياناس ولدي ماخاين محمد ماخاين امي كانت بتبكي بطريقه تقطع القلب كلمة امي من دكتور سمؤال خلت امي تطلع الجواها
ايتساقط المطر فوقي ولا يدري إن الحريق بداخلي،💔💔...يتبع