رواية بينهما الفصل الرابع عشر 14 بقلم ال زهراء
قولت الليله شهد دي معاها منو أتقدمت ناحية غرفتنا وفتحت الباب لقييت معاها راجل وكمان الراجل دة ما زول غريب علي الراجل دة احمد يلي هو شريكي!!، لمن شافنو انخلعو الاتنين!!!، عروقي برزن من الغضب ونفسي دا بقى قايم!!، جيييتو زي التور الهائج وجدعتو في الأرض وشهد اديتها كف واحد لمن فقدت بيهو توازنها وتاني رجعت ليهو وضربتو لمن فقد وعييو جبت المسدس وقررت انو اقتلو شهد وقفت قدامي وقالت لي لاااا، قولت ليها ما تخافي الدور جايييك بعدي ،قالت لي عليك الله ما تعمل لي حاجة ، ضحكت وقولت ليها خايفة اسي ما قبل شوية ضحكاتك عالية... قسما بالله اربييك واخليك عظة وعبرة للبعتبرو ،قالت لي اهدى!!! اديتها كف تاني لمن نزفت من انفها وقولت ليها افتحي خشمي دا بكلمة تانية عشان اوريك!!!، قالت لي مظظ مسكت خشمها بيدي وقولت ليها اسمي دا لو اتذكر تاني بلسانك بقطعو ليك! ،خافت وسكتتت!!!، عبييت المسدس وكنت عايز اقتلو وانتهي منو واقتلها هي وراهو!!!، وقفت قدامي وقالت لي فكر بالبحصل لأهلك!!! طيب وُد حا يكون شعورها شنو لمن تعرف انك قتلت زول!!!، حا تفتكر انها حا ترضى!!!، أتراجعت شوية ومسكتها من يدها ووقعتها في السرير وجبت القاش وضربتو بيها ضرب شديد!!، لمن بقت ما بتنشاف ليها ملامح من كترة الدم والتاني داك ربطتو!!!!، واتصلت بأهلها وداك اتصلت بمرتو!!! عشان يجو يشوفو بنفسهم!!!.
لمن جو انصدمو كلهم مرتو كانت حامل أغمى عليها لمن شافتو بالمنظر دة!! انا ما كنت عارفها كدة بس لازم تعرف الحقيقة وما تعيش في وهم!، اخو شهد كان ماش عليها يقتلها بالسكين بس ابوهو منعو وقال ليهو خليها انا براي البيت بنادبها والله تاني يسمها في عرس ولا طلوع تقعد تحبس البييت والتقدر امها تقول عايزة تعرس ليها عشان اوريها. ما كفايه الفضائح العملتهن زمان!!!، ما عارف الفضائح الزمان شنو بس ارتحت بعد ابوها عرف، طلقت بتهم قدامهم وقولت ليهم دي بتكم بعد كدة حرييين فيها
طلعت برة وبقييت خات راسي على يدي! صحي الحب ما بعمل حاجة براهو اهم شي اخلاق المرة المتزوجها.
كل الناس قالو بتندم وندمت! ،وُد البت المحترمة الرزينة العاقلة البتعرف تخفف علي الحافظة نفسها وما البتعاين لي زول غيري اديتها! استاهل الحصل لي،لو بسسس قتلتهم كنت ارتحت بس اسي ما مرتاح ولا حاجة ولا عمري حا ارتاح.
_____________________
بلسان نرجس
الامتحانات خلصت وانا بقييت متفرغة للبيت! بس كان في محاضرات وكمان مع همام! واسي لازم اتحرك عشان اصل، مشيت لمن عاينت للساعة لقيتها 11ودقيقين ،وهو بقفل الباب 11معروفة، دقييت الباب بكل ثقة نظام انا مرتو وحا يخليني وطمنت الجبني انو حا يخلينا ندخل ،قالت لي ما ظنيت ما حصل خلانا ندخل ،الباب فتح قال لي الساعة كم يا نرجس؟ ؟!، قولت ليهو 11 ودقيقين بس المواصلات هي السبب وانت عارف مستحيل اتأخر، قال لي معليش بس مستحيل اخليك تتدخلي!!، حمرت ليهو ومديت بوزي!!!، هو طوالي قفل الباب في وشي، قولت في نفسي الاصبر بس والله ما اخليهو!، قعدت في بنات تاني دقو الباب وما دخلهم، البنات جني وهن بضحكن ،قولت ليها في شنو، قالت واحدة الدكتور قال انو انا مرتي ما دخلتها ادخلكن انتن ،يا ربي مرتو منو ؟؟!، خجلت شديد من انو اقول دي انا مرتو شخصياً الطردني.
لمن انتهينا محاضرة رسل لي رسالة وقال لي فيها انتي وين؟؟!، قولت ليهو ما عارفة وما تسالني!، قال لي نرجس عارفاني ما بقدر استثناء زول ،قولت ليهو طيب بقت كدة تمام، قال لي انسي عليك الله وتعالي اصالحك حا اجيب ليك اسكريم، قولت ليهو ما عايزة!؟، قومتا حسيت بطمام بطن!!! وراسي لفا، قعدت مسافة وقررت امشي افحص ،مشيت وطلعت برة لقيتو واقف اتجاهلتو ،قال لي يا شافعة وقفي! ،قولت ليهو يا دكتور عندك حاجة عندي، حك راسو وقال لي انا اسي ما دكتورك انا راجلك ،قولت ليهو ايييوا بمزاجك تبقى راجلي لو كنت راجلي صحي صحي كنت دخلتني يلا مع السلامه، قال لي اسف والله بس القانون قوانين بقيت ماشة ،قال لي نرجس لو جيتي اي حاجة في بالك بجيبها ليك، عاينت ليهو وقولت ليهو اي حاجة اي حاجة؟؟!، قال لي اي اي حاجة قولت ليهو طيب تمام اتذكر كلامك دة كويس، ركبت العربية قال لي نمشي البيت ولا ناكل برة قولت ليهو المستشفى اول شي، قال لي مالك؟؟!، قولت ليهو ما حاسة اني كويسة ،قال لي بقلق الحاصل ليك شنو؟؟!، قولت ليهو ما عارفة احتمال ملاريا، مسك يدي وقال لي ما قاعدة تسمعي الكلام كلمتك مية مرة ما تقعدي في الحوش باليل!، قولت ليهو انا بحس بالخنقة جوة البيوت انا اتعودت على الحوش الواسع واسي بعد حوشكم الضيق دة بحس برضو بالراحة المهم الملاريا دي اصلا في دم كل سوداني وما بتروح نهاي، العلاج بس أداء واجب،ضحك وقال لي والله كلامك صاح يعني انا جربت كل أنواع العلاجات ولسه حاس بيها!، ضحكت وقولت ليهو يبقى لو عندي جبتها منك انت، قال لي ممكن.
لمن وصلنا دخلت الدكتورة قالت لي اعملي دم وبول، قعدنا وانتظرنا النتيجة بتاع المعمل لمن طلعها قال لي همام مبروك حا يجيك ولد، انا عاينت لهمام وهمام عاين لي وبقى يتبسم براهو قال لي كدي يا زول اتأكد لي كويس!!، قال ليهو اقراهو براك بتعرفو!!، قراهو قال لي شوفيييي يا نرجس الكلام دة صاح، انا عاينت وبقييت اضحك واقول ليهو اي يا همام صاح، عاين لي وكان عايز يضمني بس خجل!!، قال لي تعالي للدكتورة تكتب ليك علاجات. قولت ليهو ضروري هييي، قال لي بحزم اي ضروري ،قولت ليهو بكرة الحبوب انا ،قال لي والله ياخ فترة وبتمر لازم تستحملي ورح قعدنا والدكتورة وصف لي فيتامينات قال ليها مرتي دي مناعتها ضعيفة أوصفي ليها فيتامينات كتيرة ،قالت ليهو بتجيها أمراض كتيرة ولا شنو؟؟!، رديت ليها انا قولت ليها بحب يكبر المواضيع، شكلو متذكر الالتهاب الجاني قبل مية سنة داك، ضحكت، طلعنا قولت ليهو همو حبيبي عليك الله ما تقلق من أسي انا كدة بتوتر، قال لي انا بس عايز الجنين دة ينمو بشكل سليم، قولت ليهو ما تخاف عليهو انا بهتم بصحتي!!، ركبنا العربية ومسك يدي باسها قال لي ما قادر أصدق انو ربنا حا يكرمني بولد بعد كل السنين دي وكمان منك!! خجلت وقولت ليهو تسلم ،قال لي انا نذرت لو رزقت بولد بمشي عمرة ولازم امشي ،قولت ليهو سوقني معاك ،قال لي في الوضع دة، قولت ليهو لسه علي بدري، قال لي لا خطر ،قولت ليهو خطر في شنو لا خطر ولا حاجة موش قولت لي اي حاجة بجيبها ليك عايزة تذكرة وجواز عايزة ازور بيت رب العالمين والمدينة المنورة معاك، عايزة اشوف قبر الرسول صلى الله عليه وسلم وعايز اتامل وأشعر بالسكينة هناك ،قال لي طيب يا نرجس بس في حاجة اول مفروض نعملها، قولت ليهو شنو ،قال لي انا فتحت قضية هنا في السودان، قولت ليهو قضية شنو ،قال لي قضية ود خالك؟؟!، قالت موش هو في السعودية، قال لي يعني شنو ،القانون بجيبو لو في اي مكان ،قولت ليهو انا خايفة من الناس وامك لو عرفت!! وسمعتك وسمعة أولادنا بعدين لا خلية، قال لي لي يلا كل الجرائم زادت بالسبب دة الواحدة تخاف على نفسها وعلى كلام المجتمع وتسكت والمغتضب يكون حر لمن يمشي يعتدي على بنات اكتر! والفساد ينتشر.
خليك قوية وحاسمة عشان يبقى مثال للمغتصبين وعشان انتي تبقى مثال لكل المعتدين عليهن ويكون عندهن الشجاعة عشان يمشن يشتكن ،قولت ليهو بحس مبحوح ماف دليل، قال لي انا بلقى الادلة انتي بسس عليك تقيفي معاي وما تضعفي، قولت ليهو بس خايفة!!!، مسك يدي وقال لي ماف حاجة بتخوفك انا جنبك كلهم حا يتعاقبو وانا بوعدك، مش قولت ليك بحميك حتى من نفسي وانا عند وعدي، عاينت ليهو ودمعت!!!، قولت في نفسي عوض ربنا عظيم الحمد لله على نعمة السند،لمن وصلنا قولت ليهو ممكن تدس الحمل دي فترة عليك الله ،قال لي لشنو، قولت ليهو انا بحلفك وما تسالني لشنو ،قال لي بسسس ،ضميتو وقولت ليهو لو سمحت يا همو، قال لي شوفتي ما تعملي لي حركات الدلع ديل ،ضحكت و قولت ليهو وافق طيب ،قال لي تمام بس امي لو عرفت حا تزعل، قولت ليهو ما حا تزعل حا ابرر ليها ،قال لي طيب ادخلي انا راجع الشغل، قولت ليهو سوق براحة ولو اتاخرت كلمني عارفاني بقلق ،قال لي تمام بس اهتمي بنفسك وما تشتغلي اي حاجة تانية، قولت ليهو عمرو الشغل ما كتل ليهو زول ،قال لي وضعك حساس ،قولت ليهو ما عندي حاجة ما تخاف علي.
دخلت جوة لقييت وفاق قاعدة وتضحك مع تلفونها قامت علي وقالت اووو السيدة نرجس! جوك ضيوف جوة، قولت ليها منو؟؟!، قالت لي ما بعرف تقريبا زول اسمو حسام!!، لمن سمعت الاسم جاتني قشعريرة في كل انحاء جسمي وراسي تقل، قربت وضحكت وقال لي لون وشك اتخطف همست في اضاني وقالت لي دة هو حسام الاغتصبك صاح هههه ،بقيت متصمغة في حتتي وحسيت بلفة راس شديد لمن ثبتا فيها هي بقت تضحك وزحت يدي بقوة وقالت لي اوعى تلمسيني!! ؟انتي منو عشان تثبتي يدك فيني، وتاني قالت لي انا كنت بس بهظر في موضوع حسام كنت عايزة أحول ابتسامتك القبل شوية دي لخوف وقدرت احولها.
اتذكري انك مجرد نزوة لهمام والرجال كلهم عندهم الطبع دة بس انا الأصل الما بقدر يتخلى عنو بكرة يزهج منك ويجدعك ،ميسم في اللحظة دي جات وقالت ليها مالها قاعدة معاهو بالحرام عشان تبقى نزوة دي مرتو زي ما انتي مرتو وتاني مرة يا وفاق اعرفي اتكلمي صاح ،عارفة همام جاد شديد مع نرجس وعمرو اخوي ما اتخذ قرار أتراجع عنو الا بعد ما انتي كتبتيهو، دخلتني جوة وانا برجف جابت لي موية شربتها قالت لي حا أكلم همام عليها ،قولت ليها ما تكلمية عليك الله اسي بقلق انا حا ابقى كويسة.
بالمساء كنت راقدة ومغطية همام جاء جنب راسي وبقى يقول لي نرجس انتي صاحية ولا نايمة، ما اديتو اي ردة فعل، قام وجاني بعد مسافة وقال بصوت عالي نرجس اصحى اشربي حليب ما رديت، لكزني براحة قومتا قولت ليهو ما بشربو الا اكل اول، قال لي للان ما اكلتي، قولت ليهو اي، قال لي طيب مشتهية حاجة معينة، قولت ليهو شية ،قال لي شية اسي ؟؟!، قولت ليهو فيها شنو؟؟! جيب لي معاها حاجة تهضمها لي بس، قال لي طيب بس ليه عيونك مورمة، قولت ليهو من النوم الكتير، ضحك وقال لي ما كان تعرفي انك حامل نهاي زمان ما بتنومي ديل اسي نفسيات، قولت ليهو الله يسامحك يعني كان ما عرفت ما كان حصل كل الأمور دي لا بحصلن، المهم عايزة انوم تاني ،قولت في نفسي انا اسفة يا همام اني دسيت عليك الحاجة المضايقني بس ما معقول تكون كويس معاي للدرجة دي واشغلك كمان بعقدي.
اليوم التاني مشيت لخالتو ولقيتها قاعدة ومتحسرة قولت ليها في شنو، قالت لي مظفر جاني هنا وودعني قال مسافر، قولت ليها مسافر ويين ؟؟!، قالت لي قال ماش عمرة ، قولت ليها هي العمرة دي ما عايزة تجهيز، قالت لي والله ما بعرفو شكلو من زمان مجهز ليها بس كلمني بحاجة كعبة وبقت تبكي ،قولت ليها في شنو، قالت لي مرتو طلعت بت كلب وزنت مع صاحبو ، قولت ليها بصوت عالي شنووووووو؟؟؟،وبالجد كنت حاسة بالشماتة تحت تحت لكن تاني استغفرت، وقولت دي ياها الخلا ليها وُد ،الرجال ديل كلهم عينهم طايرة الحب يطير
وُد كانت سانداهو ومحترماهو زولة جميلة ودكتورة كمان وما ناقصها حاجة وعلى خلق ودين، اتنهدت وقولت البتعملو بيدك يغلب اجاوديك ،قالت لي الخلا على مظفر الطلق مرتو الاولى ومشى للمطلوقة دي ،الخلا عليهو سحروهم ساي الناس بعينهم واكلوهم !!، بقت تبكي، قولت ليها خالتو اهدي إن شاء الله امور مظفر كلها بتتحل ما تخافي عليهو.
____________________
بلسان مظفر
كان لازم العمرة دي امشيها مع شهد وكنت عاملها ليها مفاجأة بسسس الفا*جرة ورتني حقيقتها قبل ما تحصل.
بعد مرور 3 شهور
جيت من السعودية وقررت انو بعد توبت من ذنوبي هناك واستغفرت ربي امشي لوُد وارجعها وإن شاء الله ترجع لي،اخبارها كانت بتجيني من فترة للتانية بس حاجات سطحية.
الطريق كان طويييل شديد ولا انا حسيتو كدة ما بعرف!! لمن وصلت ما كنت عارف اواجهها كيف مع اني قبل شوية كان عندي الشجاعة بس بعد حصلت كل الشجاعة طارت، انا مظفر الإنسان الما حصل اعتذر نهاي ولا أتراجع حا أتراجع الليله وحا اعتذر ولو ما وافقت حا افضل اعتذر لمن هي توافق .
سالت منها الناس وصفوها انها في غرف مرضى الكوليرا دخلت ليها لمن شافتني انصدمت!!، وتاني طلعتني وقالت لي بتتعادى دا مرض وبائي، قولت ليها سلمني علي اول، قالت لي اهلا استاذ مظفر ؟؟! جيت لشنو؟!، قولت ليها جبت لي دواء وجيت عشانك، قالت لي السبب البجيبك عشاني شنو ؟؟! ، قولت ليها الندم، انا عرفت غلطي، ضحكت وقالت لي بعد شنو؟؟!، انت طلعت من نفسي، واوريك شي تاني انا اتخطبت لدكتور علي وعرسي قريب عشان كدة ما تعمل لي مشاكل لو سمحت ................
________________________
حتي لو كنت الفرصه موجودة