فجاءة اتصلت بي وفاق وقالت لي وين انت؟!، قولت ليها في الجامعة ما كنت عايز اوريها اني معاها قالت لي بقيت تكذب التفت وراك التفت لقيتها هي واختها كمان وهي طوالي قفلت الخط وعاينت لي واتحركت بسرعة!، انا نسيت في اللحظة دي اي حاجة وجريت عشان الحقها!.
_____________________
بلسان نرجس
الشي الشوفتو بثبت انو مرتو ما مقتنعة بالعرس دة زي ما قال خالي! اتنهدت وقولت انا ما حا اقدر على المشاكل معاها اعترف انو ماف حاجة بينا ولا حا يكون واريح نفسي، تاني قولت هو قال ما تكلمي زول! جات البت الكانت معاها ومسكتني من يدي بقوة وقالت لي همام أتزوجك عشان بس يسكت امو بس ما شايف غير وفاق ولو ختتيتي عينيك عليه ولا فكرتي تقربي ليه نحن بنرجعك للحتة الجيتي منها! وما تقولي نحن ما سالنا عنك قبل ما نختارك نحن سالنا وعارفين اي حاجة عنك فاتادبي واعرفي حدودك!! همام ما حا يكون ليك نهاي، سمعت صوت زول بقول وئام فكي يد البت، عاينت ليهو وفكتها سريع جاء وقال ليها ما اسمع تاني الكلام دة صدر منك زي ما اختك عندها حقوق نرجس عنها،ولو انتي ولا اختك قليتن ادبكن انا بعرف اربيكن كيف ؟! وما تقولي اخوي الغبي دة معاكن والله انتي واخوي واختك ما شغال بيكم والبعملو فيكم ما حا يعجبكم اختو البت دي بحذركم وانتي عارفة انو تحذري دة مرة واحدة والمره التانيه بنفذ! فهمتي؟؟! البت وشها قلب اصفر من الخوف ،قال ليها لسانك اتبلع!!!؟، قالت ليهو فهمت اي ما بكررها البت دي دمعت عديل، قال ليها لو فهمتي منتظر اعتذار انا ،قالت ليهو اعتذر ليها عديل بقى يمسح في وشو وقال ليها وئام!!!، اعتذرت بحس برجف ومشت وهي غضبانة جاء وقف جنبي وقال لي ما بتكوني بتعرفيني انا مظفر اخو همام! ،قولت ليهو وانا نرجس تشرفنا، ما رد وقال لي جيتي براك!، قولت ليهو كان معاي همام بس شكلو وفاق زعلت لمن شافتنا مع بعض ،قال لي امر النسوان غريب!، المهم تمشي معاي البيت منها تتعرفي على وُد مرتي، قولت ليهو تمام بس اكلم همام، قال لي ما حا يرد انا برسل ليهو رساله، قولت ليهو طيب.
في الطريق جاتو مكالمة! قال فيه متصلة بي ليه ،الاسبيكر كان فاتح قالت ليهو غضبان مني للان ؟؟!، قال انا ما غضبان منك ما قولتي الا الحقيقة والله انا غلطت، ما كان أضعف انتي بقيتي مرة متزوجة وانا ما عملت ليك الا المشاكل باتصالي بلحظة ضعف، بس خلاص بعد اتزوجت اكيد ما حا تتعاد القصة دي تاني ، الاسبيكر كان فاتح فسمعت بتقول زواجك بسببي يعني ،قال ليها اي عشان احاول اضبط نفسي وانشغل منك ، قالت ليهو بعد لحظات صمت طويله بينهم وقالت ليهو انبسط يا مظفر تمام وعاملها كويس غتاتك وعصبيتك خليها على جنبة، قال ليها شهد كفاية حا اقفل ،قالت ليهو لا دقيقة ما تقفل عايزة اقول اخر حاجة انا جيت عرسك بس ما اتصلت عشان ما جاتني ال جراءة اسالك ليه ما جيت، قال ليها عشان انتي كنتي هناك، ضحكت ضحكة اساء وقالت انت ما حضرت عرسي فقولت اردها ليك ،ضحك نفس الضحكة وقال ليها عشان اصدق انك بقيتي لغيري كان لازم احضر!، قالت ليهو عارف شعوري كيف وقتها؟؟!، قال ليها عارف لانو انا زاتي انصدمت بيك لمن كلموني انك هناك، المهم ما تتصلي بي تاني ،قالت ليهو دة الحا يحصل يا مظفر إن شاء الله ربنا يسعدك دي اخر لي مكالمة معاك حا تكون !، قال ليها تمام. قفلت!، بقيت اعاين فيهو قال لي المكالمة دي امسحيها من ذاكرتك ماضي وانتهى!، قولت ليهو طيب!، تسالات كتيرة كانت بدور في بالي ليه سمعني الكلام دة وما خاف مني!!؟، عاين لي وقال لي لسه الحيرة في وشك ؟!، قولت ليهو ليه انت خليتني اسمع كلامك!، قال لي لانو واثق يا مرت اخوي انك زولة في حالك! واكيد ما حا تخربي بيتي!! كان لازم ارد على المكالمة دي!، قولت ليهو قصتكم شنو ليه ما اتزوجت منها ؟؟!، عاين لي وقال لي بسبب أهلها!، قولت ليهو ليه رفضوك ؟؟! ، قال لي اي قالو لي انت غريب! وما بنرضى، قولت ليهو ليه اتنازلت عنها كان تحاول، قال لي ما كنت عايز اخليها تختار بيني وبينهم فاخترت اني ابعد! فاتنازلت، قولت ليهو كانت مستعدة تحارب معاك، قال لي اي بس ما بقدر اشوفها بين خيارين فقررت انفصل منها!، قولت ليهو هي رضت، قال لي اي ما هي عارفة اني بحبها ومستحيل اخليها تحارب أهلها عشاني ،سكتا ساي!، قال لي ماف زول عارف الحاجة دي بس بعد قولتها لزول كانو جبل وانزاح مني! شكراً، قولت ليهو العفو لمن وصلنا ونزلنا فتحت الباب بت جميلة! عاملة شعرها ضنب حصان! ،ولمن شافتني بأن الاستغراب على وشها ،قال ليها دي نرجس بتكون مرت همام، سلمت علي ودخلنا!، قعدت ضيفتني وبقت قاعدة معاي! عرفتني بنفسها!! وبقت ترقي وترقي! مظفر قال ليها بعدها ممكن دقيقة على انفراد ساقها ومشى.
______________________
بلسان وُد
مشيت معاه قولت ليهو في شنو؟؟!، قرب لي وشعرت بالخجل! تاني همس لي في اضاني وقال لي عدة الشاي دي ليه ما اتغسلت + اكيد ما حا تكوني فطرتي وقاعدة بدون شغلة ولا مشغلة، قولت ليهو دة وقتو يا مظفر ياخ انا بونس في البت !، قال لي بتونسي فيها وكل بيتك جايط!، قولت ليهو اصبر بس دقائق بس وانضف اي حاجة قال لي خلييهو اصلا كدة كدة شافتهن!،قولت ليهو ليه جايبني طيب ثقيل!!، لويت ليه خشمي ومشيت كم خطوة مشى وراي ومسك يدي و جراني عليهو وقال لي شنو التسريحة الحلوة دي!، قولت ليهو شوفتها اسي!! بعد مني قال لي ولو ما بعدت، قولت ليهو ما عايزين فضائح معانا ضيوف!، بعد وضحك!، طلعت بره وبقيت اتكلم معاها بت عسولة وبرئية شديد وطيبة!!، قولت ليها باسف على جوطة البيت! ،عاينت وضحكت وقالت ماف مشكلة!، بقت تاخد وتدي معاي في الكلام وورتني حاجاتها بتاعات الجامعة وكانت مبسوطة وهي بتحكي عن حلمها وانا لاني ما كنت عايزة انزع بفرحها ما سالتها ليه ما قرت جامعة من بدري!، بعد مسافة قالت بستاذن انا ،قولت ليها لا ما بتمشي! انا لسه ما اتونست زي الناس معاك ما تمشي، قالت لي مرة تانية بجيكم، بقيت انادي لمظفر عشان يوصلها جاء وقال لي همام قال تقعدي هنا لمن يجيك!، قالت ليهو قال كدة تمام، قعدت بالمساء كدة جاء وكان زهجان وقال ليها باخر أنفاسو نمشي ،مظفر قال ليهو اقعدوا العشاء عاين ليهو وقال ليهو لا مستعجلين ورح يا نرجس ،طلعو قعد في الكنبة و اتنهد وقال الله يعينها عليهو!، قعدت جنبو وقولت ليهو ليه اخوك مالو ؟؟!، قال لي جاري وراء مرة وومشياهو على كفيها ،قالت لي نرجس ممشية اخوك لالا مستحيل هي اتزوجتو متين، قولت ليها لا ما عارفة انتي انو هو عندو مرة أولى ودي مرتو التانية، قالت لي ابدا ليه اتزوج، قولت ليها بسبب امي، قالت لي شعور مرتو الأولى حا يكون كيف!؟، ما رد وقال لي حا اخد دوش واجيك وانتي المدة دي لملي سجم الرماد الخاتاهن ديل ،مشى وانا بقيت المم في العدة غسلتها وبقيت قاعدة ،جاء وقرب وحاوطني بيدو وقال لي يومك كيف، قولت ليهو يومي عادي انت كيف؟؟!، قال لي والله ياخ الاختبار نجح!، قولت ليهو الحمدلله!، قال لي وشك دة وش سعد علي!، خجلت ليك خجل وما عرفت ارد بشنو ما هو انا لسه جديدة بس هو شكلو من زمان محنك! وبعرف للبنات يفصلهن كيف!، قال لي قومي واعملي لينا قهوة ظريفة كدة من تحت يدك يا جميل!، اتوترت وقمت سريع سريع!.
لمن جيت اتونست معاه ونسة كتيرة وعلقت ليهو انو اليوم دة كان حلو بوجود نرجس، قال لي صاحبيها! ممكن!، هي غريبة وكدة ما بتحس بالغربةومسكينه، قولت ليهو ظاهر، حكى لي موقف عنها وهو انو اخت وفاق وقفتها وشاكلتها وهي ما فتحت خشمها بحرف!، قولت ليهو عويرة بس والله لو كنت مكانها كنت عملت ليها فصائح، قال لي عشان كدة انا مستحيل اخاف عليك حقك دة بتاخدة بيدك ظاهر عليك، ضحكت!، اتصل بي ابوي جسمي كلو كشا بخاف منو عديل ما حصل حسسني انو هو سندي كان مختفي في كل لحظاتي السعيدة انا واختي وحتى لو جاء ما حصل سألنا من حاجة بتخصنا، ومع بتو التانية ديك احلى صور واحلى لبس واحلى بوستات ،رديت ومشيت بعيد سلمت عليهو قال لي عرس اختك بعد اسبوعين، قولت ليهو من منو؟؟، وليه فجاءة قال لي المهم العرس بعد اسبوعين العريس غريب في المانيا من زمان خطبها مني ،قولت ليهو كان نعمل عرسنا سوا طيب ،ما رد وقفل طوالي، يادوب استوعبت انو ليه لفا العريس لي شكلو عشان بس هي مخطوبة وعشان ما يقول مخطوبة لانو اكيد مرتو الأولى حذرتو عشان بتخاف من امي وقايلاها بتاعت شيوخ. قولت احتمال بقى يحبني بعد خلا العريس لي ما لي سارة وفصلني في حاجة بس يبدو انو كل تفكيري كان غلط اكتئبت شديد وجيت قولت لمظفر عايزة انوم حاسة اني مرهقة!، هز راسو وما سألني واكتفى بأنو قال لي انا زاتي نعست مشيت ورقدت رقد جننبي قال لي مالك حاصلة حاجة!؟ المكالمة دي قالو فيها حاجة، قولت ليهو ابدا قرب وقال لي ما عايزة تشاركيني حياتك عشان نقدر نعرف بعض اكتر ،قولت ليهو في الوقت المناسب بكلمك افهمني!، قال لي ممكن اضمك طيب!،عاينت ليهو شديد هو عايز يخفف علي كان صادق في انو عايز ينجح الزواج دة! انا ما غلطت لمن قولت موافقة.
________________
بلسان نرجس
في الطريق سالتو وقولت ليهو الحصل شنو بينك وبين وفاق حمر لي وقال لي الأفضل ما تتكلمي معاي !، قولت ليهو انا بس عايزة ..، قال لي نرجس ما بتفهمي انتي ،قولت ليهو اس...، ما خلاني اتم كلمتي المرة دي ووقف العربية وقال لي وهو بصريخ نفس ما عايزك تتنفسي! خليك في حالك!! ما عايز اسمع حسك!، بعد قال لي كدة العبرة خنقتني شديد! التفت منو وما سالتو تاني.
وصلني البيت ودخلت جوة هو دخل وبقى يمشي ويجي!، وانا قررت اعمل قهوة ليهو عشان يهدي اعصابو مشيت وعملتها ومديت ليهو الكوباية شال الكوباية وضرب بيها الأرض وقال لي ادخلي غرفتك وما المحك هنا ،نزلت في الأرض وبقيت الملم في القزاز والدموع خلاص خذلني! دي ما معاملة يعاملني بيها قومني وقال لي امشي من هنا بس وخلي اي حاجة في مكانها وما اشوف وشك ، دخلت طوالي وكنت مضايقة من نفسي إني بديت اثق في زول في النهاية ما قال بقريني الا عشان يسكتني! ،اتكومت في نفسي وقولت ما عايزة تكون تاني في بينا معاملة نهاي، بعد شوية حسيت بزول فتح الباب وجاء قعد فوق راسي وقال لي اسف! ما رديت بقى يربت في شعري ويعتذر! ما حصل زول اعتذر لي بعد اذاني البيت داك كان كلو كان بشاكلوني من غير سبب وكنت بلملم شتات نفسي بنفسي، قومت وقولت ليهو بحس مرهق انا متعودة على الصراخ بس ما متعودة زول يعتذر لي عليهو شكراً لمن قولت ليهو كدة عاين لي مسافة وخت يدو في كتفو وقال لي ما تتعذري لي وعليك الله لمن تشوفيني معصب ما تسأليني تمام دة الأفضل، قولت ليهو انا عايزة اخفف عليك! انت ساعدتني في موضوع قرايتي فلازم اساعدك! ، قال لي طيب حصل خيير، قام وقال لي اتعلمي تدافعي عن نفسك وما تخلي حقك َ،قولت لي لوه فتحت خشمي وشاكلتك على تصرفك وقومت ضربتي اعمل شنو.. واصلا انا سديت الباب دة من زمن خالي ومرتو وبقيت لو صرخو فيني ما .....،قاطعني ولمس خدي بيدو وقال لي بوعدك اني احميك حتى من نفسي ما تخافي يا نرجس واتعلمي ما تسكتي! على الاقل تبرري وجهة نظرك!، لمن قال لي كدة حسيت انو قلبي انشرح وبكيت لمن بليت ليهو قميصو هو طيب ليه معاي! ما حصل زول عاملني كدة.
في اليوم التاني من الصبح مشى سجل لي ولحظي السمح البرالمة يادوب بدو كورس واحد وهو قال حا يلحقني بيهم بعد طلعنا قال لي الجامعة من البيت بعيدة ليك حا اشوف بيت في حي ناس مظفر وكدة حا تكوني ضربتي عصفورين بحجر واحد ،قولت ليهو تمام.
بعد انتهيت أولى محاضراتي في الكورس التاني كان منتظرني ووصلني وقال لي ادخلي البيت وما تفتحي لزول الا تتاكدي هو منو!!.
مرت اسبوعين وانا من محاضرة للتانية وهو كان مبسوط شكلو صالحتو وبقى يجييني ثابت كل يوم ويشوفني ماشة كيف في القراية ويمشي كل دة بفكر فيهو وانا راجعة البيت يلي اجرو لي قريب من ناس وُد وصلت.
الباب دق بعد مسافة ما عرفت اتصرف كيف!، قولت احتمال زول بعرفو النفتح فتحت لقيتها وفاق ضمتني وقالت لي كيكفك تمام، قولت ليها كويسة الحمد لله دخلت وبقت تكشف للبيت ضيفتها قالت لي جيت احل سوء التفاهم! قولت ليها اي سوء تفاهم، قالت لي اختي والكلام القالتو ليك ،انا ما اخترتك الا عشان عرفت انك طيبة وحا تكوني نعمة الزوجة ليهو وبالنسبة لموقفي داك ما زعلت الا لانو كذب علي، قولت ليها ماف اي مشكلة!، قالت لي طيب تمام اديني رقمك وخلينا على تواصل، اديتها الرقم، قولت ليها تاني مبسوطة انك صالحتي همام ما شوفتية طول الفترة الفاتت كان عامل كيف ؟؟!، قالت لي عرفتي كيف اني صالحتو، قولت ليها كان مقلق بس اليومين ديل قلقو راح، قالت لي بقيتي تعرفية كويس! وتعرفي قلقو كمان ، قولت ليها هو شفاف عشان كدة وبعدين باين انو بحبك شديد لدرجة انو كان طول الوقت مكتئب عشان زعلك ،عاينت لي وقالت لي وحا يفضل يحبني! الحمد لله انك إكتشفتي الشي دة، الأفضل انك ما تتعلقي بحاجة ما حا تكون ليك لأنك حا تندمي همام ما حا يكون ليك ابداً!!، قولت ليها وانا بتمتم انا ما....،قاطعتني بضحكة وقالت لي بهظر ياخ ما بتعرفي الهظار،دققت فيني شديد وعاينت لشعري وقالت لي شعرك حلو شديد!، بقت تلمس فيهو قالت لي متقصف الأطراف تحبي اقصو ليك قص علاجي!، قولت ليها ما اظن يحتاج قالت لي لا بحتاج ما عندكم مقص في البيت ،قولت ليها يا وفاق والله ما بحتاج قالت لي ما عايزة تبقيني صاحبتك فيها شنو لو ساعدتك انا خبيرة تجميل وبعرف!،قولت ليها طيب تمام بقيت افتش في مقص لقيتو قالت لي بلي شعرك بليتو وصل قريب نص الضهر قالت لي دقائق حا أحاول اوازي الأطراف بقت تقص فوق وتحت ولمن سالتها قالت لي خليني اشوف شغلي ما واثقة فيني، شوية شوية شعري بقى كتير في الأرض !، الباب دق قولت ليها دقيقة بس طيب قالت لي تمام فتحتو بدون ما اخاف عشان وفاق قاعدة كانت وُد سلمت علي ودخلت !، سلمت على وفاق ببرود وعاينت للشعر وقالت لي سجمي يا وُد دة شنو العملتية في شعرك عاينت فيهو ، قالت ليها دة ما بنفع الا توازيهو زي الناس ولو وازيتة الا تقصي لحدي رقبتك! ،لانو بقت جهة قصيرة وجهة طويله والجهة القصيرة اكتر! وفاق دة شنو العملتيه ليها دة، قالت لينا كنت عايزة اصلح الحصل المقص دة ما كويس كنت عايزة بس اوازيهَو ليها بس زي ما قولتي ما حا يتصلح الا يتقص!!، وُد ادتها كف طوالي وقالت ليها دي حسادة منك يعني عشان مسكينة!، الباب فتح فجاءة وطلع المرة دي همام! هي بقت تبكي بأعلى صوتها! وتقول لي وُد والله انا ما قصدي حاجة سيئة ليه تعتدي علي همام تعال شوف حتى مرت اخوك ما محترماني زيو!!، همام جاء وقال في شنو الجوطة دي لشنو!، قالت ليهو ادتني كف وبكت زيادة!!؟، ما قال ليها السبب شنو الادتك بيهو الكف وطوالي التفت لوُد وهو غضبان ورفع يدو انا جيت طوالي ووقفت في نصهم قال لي زحي قولت ليهو اسمع اول قال لي بقول ليك زحي قولت ليهو خليني أفهمك، عاين لي وقال لي زحي من هنا والا والله اندمك، قولت ليهو لا ما بزح ما بخليك تعمل الغلطة دي افهم اول الحاصل!، ما اشتغل بي وحاول يتجاوزي وانا كنت بعترض فيهو لمن هو بكل قوتو دفرني.............