عاين لي وقال لي زحي من هنا والا والله اندمك، قولت ليهو لا ما بزح ما بخليك تعمل الغلطة دي افهم اول الحاصل!، ما اشتغل بي وحاول يتجاوزي وانا كنت بعترض فيهو لمن هو بكل قوتو دفرني!! بقيت واقعة وما قادرة اتحرك ورجلي كانت بتوجع فيني لدرجة انو صرخت !، قرب علي وحاول يقومني قولت ليهو ما تلمسني بحذرك ،وُد جات برضو وقالت ليهو بعد منها وبعدهاحاولت تقومني بس ما قدرت!، الألم في رجلي كان مبالغ فيهو وما كنت قادرة ارفعها، همام انحنا لي وانا بقيت بقول ليهو بعد وبدفر فيهو بيدي بس هو ما كان شغال بي وشالني بالرغم عني ،قال لي وفاق تعالي افتحي باب العربيه بس كانت تعاين وما اشتغلت بيه!، وُد لحقتنا وفتحتو ختاني في المقعد الوراء وفاق قعدت في القدام ووُد بوراى ،قالت لي وين الألم!، وصفت ليها قالت لي إن شاء الله ما يكون كسر بس ،قال ليها انتي بتالفي من راسك!؟؟، كسر كيف، قالت ليهو لو جسمها من حديد بدفرتك دي كان اتكسر يا ابو راس ناشف!، عاين ليها وحمر!، هي حدرت ليهو وقالت لي نرجس مجرد ما ننتهي من الأمر دة حا تجي تقعدي معانا!، زول ما عارف انو الحقوق مشتركة وزي ما مفروض يستمع لمرتو الأولى لازم يستمع لمرتو التانية دة ما زول!، واوريك شي كمان زول مخو مقفل واخلاقو في طرف نخرتو ما بستاهلك!، ياخ حتى انا كان عايز يعتدي علي !، وقف العربية فجاءة وقال لي وُد انزلي هنا مشوارك انتهى معانا وما المحك لا من قريب ولا من بعيد تجاة بيتي!، قولت ليهو لو نزلت وُد انا زاتي بنزل والله لو انجر حا انزل! وفاق قالت لي انزلي لو عايزة تنزلي معاها ماف زول حا يسالك ، المشاكل دي كلها منها زولة بتاعت فتن، حاسدة ؟؟!، ياخي عمري ما اتقال لي كلمة زي تجيني واحدة زيها تقول عني كدة تنزل بس. وُد طوالي نزلت قولت ليها نزليني معاك! ،همام عاين لي وقال خلاص يا وُد اركبي وخلينا نتوكل! باين انو نرجس تعبانة!، وُد قالت ليهو الا تعتذر لي انت والاسمها وفاق وبعدها حا اطلع العربية ،عاين لي واتنهد وقال ليها اسف طيب عاين لوفاق تاني وقال ليها اعتذري، قالت ليهو عشانك بس بعتذر وعشان حالة نرجس صعبة عاينت بنظرة تكبر ليها وقالت بعتذر وُد ادتها نظرة باردة وطلعت جنبي!، لمن وصلنا قالو كسر!، ومحتاج عمليه كمان!، همام دة بقى يقول ليهم اكيد في غلط راجعو صور الأشعة تاني، وُد قالت ليهو هم دكاترة وعارفين شغلهم اكتر منك!، معالم وشو بقت ما بتتفسر ووشو اتخطف! ما قدر يعاين لي من الخجل وطوالي طلع! ولحقتو وفاق وانا بالجد خوفت على حالتو .
_________________________
بلسان همام
كنت مستاء شديد صدري كان بطلع وبهبط من الغضب ما كنت قادر اسامح نفسي، بعد ما اذيت مرة كمان يتيمة!، وفاق جات ومسكت كتفي وقالت لي همام مالك! ؟عارفو حادث وما قاصد ،قولت ليهو ما كان احاول اتجاوزتها لو سمعت ليها ما كان حصل الحصل!، قالت لي انت كنت معصب وانت لمن تع...، قطعتها وقولت ليها ما تبرري لي انا غلطان! اسي ما قادر اعاين ليها، وقفت قدامي ومسكت يدي وقالت لي اوعى لنفسك! ما تضعف انت ما غلطان ولا حاجة!، هي اصلا معترضة طريقك لشنو ؟؟! وبعدين انت ما تخاف عليها خاف منها احتمال تشتكيك انت قايله هينة عاينت ليها اتذكرت كلام انو بحميها من نفسي واسلم عقاب لي هو السجن!مشيت ليها وبقيت مدنقر لانو ما قادر اعاين في عيونها!،قالت لي همام! قرب علي، خطواتي بقت مثقلة وانا ماش بعلها قعدت قالت لي انت ندمان وساف التراب صاح ! ،قولت ليها اي!، قالت لي يبقى انك عندك إنسانة بس انت زول متسرع! وما بتفكر في موضوع بخص وفاق ،اسي تفتكر لو اديت الكف لوُد شعور مظفر حا يكون كيف بعد الإهانة دي ،وهل انت بترضى لو عمل كدة بوفاق، ما تزعل بس لو بقيت كدة حا تفقد كل الحوليك، اي بتحب مرتك بس ما تخلي الحب يتحكم فيك ويخليك تفقد الناس! ،افهم الطرفين اول وما تتسرع وأهم شي ما تلجى للضرب لاي سبب من الأسباب، همام الضرب ما بفقدك الا هيبتك وبقيك حثاله والله والاحترام البحترموهو ليك الناس حا يروح! انت قولت حا تحميني حتى من نفسك وعاملتني كويس للان! بس شوف اسي جاء موقف واحد خلاني انسى اي حاجة عملتها لي وبقيت والله خاتك معاهم، صاح زواجنا كان بالغضب بس ما بعني انو نحن ما زوج وزوجة وعندي حقوق عندك وزي ما بسمع لوفاق مفروض تسمع مني، الزواج مسؤوليه يا همام بغض النظر عن ظروفو، اسي انا حا احكي ليك الحاصل وانت بس احكم ما بعين الحب لمرتك بعين المنطق والعقل!، حكيت ليهو اي شي!، عاين لشعري ولقاها كلو مقصوص، قال لي اكيد في غلط!، قولت ليهو لو في غلط ولا لا ودُ شافت شعري في الارض انصدمت وحست انو الحاجة دي مقصودة! فقامت ادتها كف! ،بس والله لو اي زول كان فكر كدة ما وُد بس اوريك لشنو لانو القصة زاتها محيرة ولو شوفت شعري معمول كدة بسبب زول تاني كنت ما خليتو وانا متأكدة،وفاق في اللحظة دي جات داخلة ووقعد بدون ما تقول كلمة، همام بقى ماسك راسو وشكلو كلامي دخل ليهو، قولت ليهو مصدع امشي البيت انا حا تقعد معاي وُد، قال لي خطوة ما بمشيها من هنا حا اطلع اجيب ليكم حاجات تاكلنها.
___________________
بلسان وفاق
جات هي وقالت لي مفكرة انو بكلامك دة حا يتغير علي في أحلامك، واعرفي انو انا اسي سترتك بزواجك دة بيهو! فلو عايزة قرايتك تتم ما تخليني افضحك مع خالتو لأنها اسي حا ترجعك بدربك! انتي قايلاني اخترتك لشنو عشان انا بحبك يعني! ما هو عشان بقدر اتحكم فيك بمزاجي همست لي متذكرة المخزن القديم الفي بيت خالك حصل ليك فيهو شنو؟؟!، جسمي كشا كلو والصوت بقى متردد العرق بقى غزيز شديد بنزل مني!،جاء داخل همام شافني في الحالة دي قرب علي مسكتو وانا برجف زيادة وحضنتو! وغمضت عيوني! وتاني فتحتهن بعد اتذكرت الحصل لي!!!، بقيت خاتة راسي في صدرو ودافناه فيهو وهو يربت عليهو وقال لي اجيب ليك الممرض، قولت ليهو وانا باخر انفاسي للااا وفاق قالت ليهو خليها تشرب موية شكلو جفاف جات وبعدتو مني وضمتني هي وقالت لي اهدي تمام اسي حا تبقي كويسة انا ماشة البيت وجاية عشان احضر عمليتك!!!، ما قدرت ابعدها! وُد جات وشافتني وانا برجف كتبت لهمام دربات، وفاق زحت وتاني طلعت ،وُد قربت مني وانا رقدت وما قدرت اغمض عيوني تاني قالت لي مالك قولت ليها بحس واطي ما قادرة اتكلم، بقت تعاين لي وتاني اتصلت بمظفر قالت ليهو نحن في الطابق التاني، تاني قالت لي عارفة وضعك ما تمام اسي بس برضو لازم اقول ليك الكلام دة مظفر ما يعرف الحصل الليله ،هو حا يعمل مشاكل! ظاهر من طبعو الحدة! هزيت راسي!، جاء وكفر لي وتاني قعد جابو الدربات هي حاله نفسية اكتر من انها جسدية!، بس بعملهم.
بالمساء كدة وُد قالت لي بجيك بكرة إن شاء الله ،مظفر عندو شغل مهم بكرة الصباح في مدينة تانية ولازم امشي معاه عشان اساعدو في ترتيب حاجتو!، قولت ليها تمام!.
حاولت انوم ما قدرت من الخوف جاء همام قولت ليهو نوم جنبي!! ممكن، زمان بواجه الحاجة دي بنفسي بس اسي عايزة الاحتواء ولو للحظة لاني من زمان طمعانة بالشعور دة مع اني عارفة شفقة بس اي كان سبب مُعاملتو لي انا رضيانة لانوما حصل زول عاملني كدة حتى لو شفقة ماف زول شفق علي ،عاين لي وقال لي ما بقدر رجلك! قعد جنب راسي وبقى يربت عليهو وقال لي انا جنبك وما بزح منك، تاني بقى يعتذر لي وقال لي اسوء راجل في العالم انا لانو اذيتك قولت ليهو ما تخت الموضوع دة في بالك يا همام، قال لي تمام.
__________________________
بلسان وُد
في الطريق
=السفرة دي جاتك كيف فجاءة
_ماف اي سفر بس ما حا تقتنعي لو ما قولت كدة
=رجعني ! ما رضيانة
_انا زاتي ما رضيان لي انا لي كم ساعة منك؟؟!
=نظام بقيت تشتاق لي ولا شنو؟؟!،
_اي مشتاق فيها حاجة كمان؟؟!.
=كذب كذب سمح وانا بصدق!
ضحك وقال
_خليني اسي يومك كيف؟!، عاينت ليهو وقولت ليهو مرهق شديد!
قال لي في حاجة حاصلة، قولت ليهو لا ماف مجرد إرهاق!، قال لي متأكدة!، قولت ليهو ايوا متأكدة!، مممكن انوم شوية وتصحيني لمن نصل، قال لي تمام!.
حسيت بزول شالني وكنت بين النايمة ووالصاحية!،ختاني في السرير! وبقى يربت على شعري وتاني باسني في خدي ومشى.
في الصباح صحيت على الاذان التاني بالضبط! لقيتو هو صاحي وبصلي مشيت واتوضيت وتاني صليت قال لي نومتي كويس ،قولت ليهو الحمد لله ،قال لي صوتك ليه متغير، قولت ليهو تغير جو بس جواي من الصريخ حق أمس!، لمس جبهتي وقال لي معاه حمى، قولت ليهو لا!!!، ما عندي حاجة!، قال لي تمام ارتاحي اسي!، قولت ليهو وين ارتاح لازم امشي اجهز حاجات اوديهم المستشفى قال لي انا بعفيك من الحاجة دي!، قولت ليهو شوربة بس طيب ،قال لي لاا لاا لسه ما مؤهلة! كشرت ليهو وشي! بس هو ما اشتغل بي، اتصلو بي ناس المستشفى وقالو لي تعالي عياني حالتو مكدسة! ،طوالي لبست!، وبقيت اتمكيج،قال لي المكياج لزومو شنو في المستشفى، قولت ليهو انا اروسة، قال لي اروسة جابت ليها كلام تاني بعد الصوت المبحوح !، قولت ليهو نعم نعم بس جيل التسعينات دا ما بعرف لحاجة، قال لي أمسحي زفت الطين دة!، قولت ليهو ابجيقة السوداني يتحدث! ،قال لي انا ما بعيد كلامي!، قولت ليهو لالا اهم شي الميكب التقيل الفترة دي والحنة!، قرب علي وقال لي والله اخليك من غير يدين تلبسي جونتيات دي زينة للراجلك بس ما قالو ليك تستعرضيها في زفت الطين المستشفى دي ،قولت ليهو لينا 3اسابيع مع بعض عايز تتحكم فيني من أسي، يلا شوفت ما برضى اانا....، قاطعني وقال لي ابقي مرة واطلعي بيهو الجعجعة دي كلها ماف فيها فايدة لي عاملة صوتك الرايح دة ،قولت ليهو متنمر ثقيل! ،لبست جونتايتي وخليت فكرت الميكب التقيل وعملت صن بلوك ومرطب شفاف ،قولت ليهو ها كدة كيف؟؟! ، قال لي كدة ما فيك كلمة يا ست البنات! قرب وباسني من جبيني وقال لي ما بنعرف بعض كتير بس المواقف الزي دي بتكبرك في عيني وبتخلني أعجب بيك وخاصة انك سمعتي كلامي!، قلبي دق سريع! ماف احلى من زواج الترشيح في النهاية المودة والرحمة هي البتحل محل الحب وبتخلي الزواج ينجح! ،هو كويس شديد معاي! وإن شاء الله يستمر كدة!، وصلني شغلي وقال لي لو ما راح حسك اتصلي بي نشوف الحاصل شنو؟!، قولت ليهو ما تخاف حا يروح مع السلامة!، نزلت وهو اتحرك بقيت اعاين للطريق وادعيت ليهو ،جات مرة من بعيد وقفت جنبي وقالت لي معليش بس هل انتي مرت مظفر!؟، قولت ليها ايوا، قالت لي ما شاء الله تبارك الله، قولت ليها بتعرفي من وين، عيونها اتربكت وقالت لي زملاء شغل كنا ،قولت ليها ايوا قالت لي طيب بستاذن انا ،قولت ليها اذنك معاك بس ممكن اعرف اسمك ،قالت لي شهد، قولت ليها تشرفنا انا وُد ،قالت لي لي عظيم الشرف اني اعرف عروس الزول الصعب دة ،ضحكت وقولت ليها اي نعم بس والله ماف أطيب منو، قالت لي اتزوجتو قريب بس عرفتي هو كويس، قولت ليهو ما عرفتو كويس لسه بس بحاول ،عاينت لي وقالت لي ربنا يحفظكم ومشت.
دخلت جوة وبقييت قاعدة مع عياني المكدس! ،جاء دكتور علي وبقى يعاين ليهو ويشوف في مؤاشراتو الحيوية، قولت ليهو رأيك شنو ؟؟!، قال لي حالتو بالانجليزي وفهمت انو صعبة حالتو!! والغيبوبة الدخل فيها دي صعب يطلع منها.
بعد انتهيت مشيت لنرجس ولقيت مجهزنها للعمليه وكان معاها الاسمو همام لمن دخلت بقينا منتظرين قولت ارسل لي ريكورد لمظفر بقيت مثبتة الريكورد همام جاء وقال لي بعتذر ليك انا ما كان استعجل واحاول امد يدي عليك بس موضوع بخص وفاق خط احمر عندي عشان كدة ما تحاولي تاني تتعرضي ليها عشان ما يحصل بينا موقف ما يرضينا الاتنين ،قولت ليهو انت والله طرطورة مرتك ياخ اخجل! ،هي يعني وفاق دلوعة ولا مسكينة وما بتاخد حقها عشان انت تحاول تمد يدك على مرة! صحي القلم ما بزيل بلم وتاني مرة لمن تشوفي اعمل نفسك ما بتعرفني، بعذ انتيهت نسيت انو التسجيل شغال كنت عايزة اعمل الغى من استعجالي عملت ارسال قررت امسحو بس اتذكرت انو ما شغال بالواتس العادي قولت في نفسي خلاص حا تحصل مشاكل بقيت مراقبة الواتس وتاني رسلت ليهو اهدى وخليني افهمك بعد مسافة قرأ الرسائل وما رد رسلت مظفر عليك الله ما تستعجل ما رد قولت ليهو مظفر بزعل ما رد ،بقيت منتظرة في باب المسشفى عشان أهدية لو جاء شايفاه عربيتو من بعيد وقف، قولت ليهو مظفر اهدى مسك يدي وقال لي انا هادي انتي بس ما تتدخلي تمام ،قولت ليهو مظفر ما تلعب باعصابي عليك الله ،قال لي شنو مظفر مظفر قولت ليك هادي انا بس عايز اقول كلمتين لهمام وانتي زي الشاطرة تقعدي هنا........