رواية بينهما الفصل الثاني عشر 12 بقلم ال زهراء

رواية بينهما الفصل الثاني عشر 12 بقلم ال زهراء

كنت زهجان شديد وما لاقي اي زول اشكي ليهو الا هي فقمت اتصلت بيها ما ردت!!!، رسلت ليها محتاج ليك!!!!، ردت لي بنقطة النقطة دي انا عارف انو قصدها بيها مالي ،رسلت الراجل سرق القروش كلها! واحمد قال الا ارجع القروش!، اتصلت بي رديت طوالي قالت لي  بحس قلق يا مظفر انت كويس؟؟! طمني عليك!!، ما قدرت ارد عليها، قالت لي ما تعمل لي الحركات دي انا الوحيدة العارفة المشروع  دة بعني ليك قدر شنو!، وعارفة اجتهدت وثابرت بس عشان تصل للعايزو عشان كدة بحس بوجعك اتكلم معاي ولو كلمة وطمني عليك!، عايز احس انك بخير عليك الله يا مظفر!!!!، قولت ليها ما كويسس، قالت لي لا حا تكون كويس  في ابتلاءات بتحصل للانسان لكن عوض ربنا عظيم وحتى الزول الشالهن دا لو ربنا أراد حا يتلقي والقروش برجعن إن شاء الله لانو مال حلال وبعرق جبينك وبالنسبة للدين حق احمد انا بدهبي ببيعو بس انت ما تقلق!، قولت ليها ما بخليييك تبيعي حاجة لي!! انا طلقتك ما معقول اشيل منك!!!، قالت لي مظفر انا المشروع دا كنت معاك فيهو وما حا اخليك تتخطا الحاجة دي براك بغض النظر عن الحصل بينا بس مستحيل ما اقيف معاك ،قولت ليها انا حا القى حل ما تخلي موضوعي دة يقلق بيك ، قالت لي واثقة منك حا تلقى حل انت ما منك مخافة بس برضو لازم اقيف معاك فيهو ممكن نخلي خلافاتنا على جنب حاليا، قولت ليها طيب، قالت لي قدم بلاغ في الزول واكيد حا يقبضو عليهو وانا حا انشر اسمو في الفيس وكل مواقع التواصل ويا حبذا لو لقينا ليهو صورة، قولت ليها مرة كدة اتصورت معاهو ،قالت لي طيب رسل وإن شاء الله بنلقى زول صادفو في حتة قولت ليها تمام شكراً يا وُد على وقفتك معاي يادوب  رجعت لنفسي وعرفت الحا اعملو شنو قبل شوية كنت حاس الدنيا دي قفلت في وشي بس بعد اتكلمت معاك ارتحت، قالت لي الحمد لله وقفلت.

ما عارف ليه هي تعاملني كدة بعد العملتو فيها! بس كلو البعرفو انو هي السند المهما لفيت ما حا القى زيها في حياتي. صدق همام لمن قال انو المرة الليها أثر في حياة الراجل هي المهمة. 

____________________

بلسان وُد

بالرغم العملو لي مظفر بس ما بقدر ما اقيف معاهو!!، نشرت اول حاجة صورة الراجل في كل القروبات وسالت من أسعار الجرام!!، قولت في نفسي انا مستعدة ابيع الدهب عشان ما يتسجن!! بس ما لازم امي تعرف نهاي.

اتصل بي رقم غريب رديت طلعت شهد قالت لي مظفر معاك! قولت ليها لا! بس هو مضايق ممكن تقيفي معاها ،قالت لي انتي منو عشان تديني الأوامر وريني ؟؟!، قولت ليها اسمعيني هنا يا شهد انا الكنت مرتو الأولى ويلي اسي لو عايزة ممكن ارجع ليهو واخليك تضوفي الحمضل عشان كدة اتادبي، مظفر ما اتخلى عني اعرفي انا الاتخليت عنو فيبقى ما تخليني اجيك وامرر عليك الدنيا انا اسي مخلياك عايشة معاة مرتاحة بس وقسما بالله لو قليتي أدبك معاي تاني الا ارجع ليهو عشان اوريك، قفلت الخط في وشي قولت بس دة هو الناقص مرة فارغة انا بنبه فيها انو تهتم براجلها تقول لي ما تديني أوامر.

اتصلت بنرجس وكلمتها بالقصة!!، قالت لي نحن حا نساعدو حا أكلم همام ما تخافي!، قولت ليها همام موش اشتري قبل فترة أرض وعايز يبني ،قالت لي لو اضطر يبيعيها اخوهو ولا الأرض الشغلة مليادرات عديييل ،قولت ليها الشيطانة ديك بتخليهو ،قالت لي الشيطانة ديك ما بتقدر تحرشو! انتي قايلاهو ما عندو شخصية ولا شنو!!، قولت ليها اسفة على الكلام الحا اقولو ليك دي بس اي، قالت لي ده ما منو يا وُد دة حاجة ما في ارادو الخضوع ليها وحتى محاربة اخواتو وامو كلو ما كان عندو يد فيهو، قولت ليها كيف كيف بس لكن فهميني مالو مكتوب يعني ،قالت لي ما تكلمي بس انا شاكة ماف راجل للدرجة دي بطيع كلام زوجتو، قولت ليها عرق محبة ولا شنو ،قالت لي بسسس عرق محبة ،ضحكت وقولت ليها يا بت انا بهظر في حاجات زي دي، قالت لي اي في أعوذ الله السحر أشكال وأنواع، قولت ليها نرجس هااا ما تخوفيني جادة انتي ،قالت لي اي وحتى انا شاكة انو دة السبب المنعها الولادة ما تفكري انو الزول البعمل السحر بعيش حياتو مبسوط في النهاية في عداله الهية وزي ما بقولو ينقلب السحر على الساحر، قالت لي لا حول ولا قوة الا بالله لي بس لكن ليه تتحرم من الولادة وتخسر دينها عشان تسيطر على راجلها !!، قولت ليها وفاق شخصيتها كدة عايزة تكون الكل في الكل  وهي عايزة ينضرب بيها المثل في اي حاجة!، قولت ليها واااي لكن ما تكون كاتباني وانا ما عارفة!!، قولت ليها ما ظنيت موش انتي بتتحصني، قولت ليها مرات مرات بنسى المهم تفتكري انها كاتباني ،قالت لي لااا هي ما اظنها كاتبه غير همام  بس لو زهجت حا تكتبني لكن انا ما خايفة منها ومحصنة تحصين ومومنة ايمان تام إنو عوجة ما بتجيني ،قولت ليها انا زاتي من اليوم حا اتحصن الظروف ما معروفة خوفتيني بكلامك دة يا نرجس!!، قالت لي ما تخافي رب العالمين حا يقيف معانا وإن شاء الله ماف حاجة بتجينا، قولت ليها إن شاء الله.

رقدت وقولت ارسل ليهو ولا ما ارسل ليهو جاني اتصال من مرة ابوي قولت اللهم اجعلة خيراً رديت قالت لي سلامتك سمعت انك اجهضتي، قولت ليها الله يسلمك الله يديك العافية!!، هي علاقتها معاي ما كعبة شديد ،قالت لي رسلت لي شوربة مع ابوك  تقوي بيها نفسك قولت ليها ما قصرتي يا خالتو.

لمن وصل ابوي ختاها في الطربيزة جات رماز ما منبه وكلها اتكشحت!!! زعلت شديد لأنو ما قدرت اضوق منها!!!، ووقولت مافي قسمتي!!.

بالمساء كدة اتصلت بي تاني كنت فاتحة الاسبكير رماز كانت جنبي ، قالت لي اها كيف طعم الشوربة ،رماز عملت كتم!!!، وقالت لي ما تكلميها انو اتكشحت مني تقول قاصدات مشي الموضوع، قولت ليها تمام!!، قولت ليها والله  ولا كلمة  تسلم يديك يا رب، قالت لي بالهنا، قفلت وبقييت قاعدة جات امي وقالت لي اها بقيتي كيف قولت ليها بخير والله ما عندي حاجة.

______________________

بلسان وفاق

جاء مظفر لعندي وقال لي أوراق الملكية حق الأرض وين؟؟!، قولت ليه عايز بيهن شنو ؟؟!، حكى لي عن أزمة اخوهو قولت ليهو اسي تبيع أرض كاملة!! عشان اخوك والله بكرة لو قعدت بدون بيت هو ما يديك شبر!! انت ما جادي ولا شنو، فكر في مستقبلنا!! وبعديين اصلا القطعة باسمي وما بديك ليها لو شنو داك، قال لي وفاق لا اله الا الله، قولت ليهو محمد رسول الله، قال لي الارض دي حا تتباع وانتي حا توقعي، قولت ليهو لاا ما بوقع!!!، قال لي وفاااااق قولت ليك الأرض دي بتتباع ،قولت ليهو لاااا ما ببعيها!!، قال لي بغضب يا توقعي يا اطلقك!!وخلي قطعة الأرض دي تنفعك وبديك ليوم بكرة دة يا وفاق طلع وهو معصب، قولت دي شخصية همام الحقيقة الزول الحازم البعرف حق اخوانو عليهو. 

مما كنا مخطوبييين عرفت انو اهلو هم الأساس  وقرررت بعد نتزوج لو بس اختار في يوم امي علي بوريهو وفي يوم جاب لامو توب!! وانا ما جاب لي والحجة شنو انو جاب لي قريب!!، في النهاية حقوقنا متساوية صاح وما كان بسمع كلامي في اي حاجة صرف بصرف على البيت حتى بدي مظفر مصاريف فالحاجة دي حرقتني لانو هم في نفس العمر ليه يصرف عليهو موش مفروض بعد العرس كل الصرف يصرفو علي بسس. اي هو من حقي انا وبس حتى القعاد مفروض يقعد معاي. امو شنو واخوات شنو واخو شنو.

في يوم اشتكيت لأمي قالت لي بعرف لي شيخ شاطر بخليهو لعبة في يدك!! وبالفعل العمل مشى فيهو عشان انا عملتو بسحر نجاسة!!.بس اسي قال لي الشيخ انو في زول قاعد يحصن فيهو، فالا ننجس الزول دة ولا نوقفو عن التحصين  وانا متأكدة انو دي نرجس وانا بعرف بعمل ليها شنو. هي عايزة ترجعو لاهلو بس والله ما اخيلهو ليهم!!!، اهلو متحكمين امو عايزاهو يكون جبنها بسس، انا مرتو وعندو حق عندي!!،اسي كمان عايز يدي قطعتي لي اخوهو وكمان بقى يهدد.

_______________________

بلسان نرجس

همام جاء غضبان وقعد قولت ليهو مالك الورق ما لقيتو؟؟!، قال لي ماف حاجة مذاكرة كويس ليوم بكرة، قولت ليهو اي بس انت مالك اتكلم، قال لي ماف حاجة  تعالي جنبي جيتو، قال لي مصدع قولت ليهو صداعك دة كتير خلاص!!، قال لي دة ضغط الشغل بس يا نرجس، قولت ليهو اجز ولو شايف الشغل متعبك خليهو ،ضحك وقال لي ااكلك من وين ؟؟!، قولت ليهو الله كريم ،قال لي الله جعل السبب ؛+ الاباء مفروض يشتغلو عشان يربو أولادهم ولا شنو يا طفلتي!!، خجلت خجل شديد!!، ضحك وخت راسو في كتفي وقال لي انتي المسكن حقي اسي صداعي بروح!!، بعد مسافة  قولت ليهو همو وسكتا ، قال لي الزول حرد اسمو بعد همو دي عيون همو عايزة شنو ؟؟!، قلبي دق بسرعة من الكلام الحلو دة خيتيت ليهو الدبلة والمحبس وقولت ليهو بيعيهن، قال لي لشنو؟؟!، قولت ليهو انت قولت حا تبيع قطعة الأرض بس احتمال ما تكون كفايه ، لبسني ليهن وقال لي ديل للطواري خليهن! ،قولت ليهو بسس انت عارف مظفر دة..،قاطعني وقال لي نرجس انا لو احتجهن بشيلهن ،قولت ليهو طيب!!، قال لي اقري حا اخليك براك، قولت ليهو ليه ماش وين، قال لي اشوف مظفر!!، قولت ليهو تمام.

بعد مسافة وفاق جات وشايله العقد وقالت لي وينو مظفر!!، قولت ليها ما عارفاهو مشى وين ؟!، قالت لي دة العقد قولي ليهو بمشي أوقع ليك في النهاية هو ود عمي!!، قولت ليها علاقتك شنو ؟!، قالت لي باسمي العقد علاقتي شنو كيف، قولت ليها ليه سجلتي قطعة أرض باسمك، قالت لي بحبني فسجلها باسمي ،قولت ليها صاح بحبك بسسس همام ما من النوع البسجل قطعة الأرض لزول لانو  شخصيتو ما بتحوي بكدة ،ما تكوني بسس كاتباهو عشان يعمل الحاجة البتعجبك، جات علي  وقالت لي اي كاتباهو بس اعرفي قبل الكتابه كان بحبني حب شديد ،قولت ليها طيب ليه كفيتي نعمتك بيدك ؟؟!، اسي كان عندكم اولاد وما كنت انا دخلت حياتكم ليه بس وعشان شنو خسرتي دينك ودينتك ،قالت لي اهلو!!!، هو شغال باهلو اكتر مني انا البحبها والاتزوجها عن حب، قولت ليها في زول ببقى من غيرهم وبعدين انتي لو اخوك جاب مرة وبقى ما شغال  بأمك وابوك بترضي ،انتي عايزة تتملكي همام ليك بسس همام ما حيوان عشان تبقيهو كدة!!!، هو حباك يا وفاق ووثق فيك ليه تمشي تكتبيهوعشان يكره اهلو ؟؟!، ضحكت ضحكة شديد وقالت لي بكره اهلو بسس دة انا عملت ليهو اخضاع كمان!!!، وانتي امشي افتحي خشمك بحرف والنشوف لو يصدفك صاح السحر ما ماش فيهو بسببك اسي بس هو بحبني!!!واكيد ما حا بتهمني اتهام زي دة ،مسكتها من شعرها وقولت ليها انتيييي واحدة سيئة ياخ اسي استفدتي شنو غير بقية عديم شخصية وخليتي كل الحولينو ينبذو فيهو ومسمنو الطرطورة ويا حليليو هو مكتوب ،لو بس انتي احترمتيه واحترمتي امة واخواتو والله من غير سحر كان جاب ليك نجوم السماء لانو همام بحبك!!، بسس اسي خسرتي اي حاجة وفي يوم حا اخلية يكتشفك!!، ،هي في اللحظة دي خربشتني بضوفرها!!! وتاني بقينا نتشاكل جات امو واخواتو باصواتنا وفكني منها قالت لي والله ما اخليك الله،امو جات وضربتها كف وقالت ليها لحدي هنا وكفاية!!! اطلعي من بيتي انا سمعت اي حاجة ،انا كنت خايفة منك على بناتي  ما اكذب بس ما كنت متوقعة انك كتبتي همام وبعد كلمتني نرجس بالحاسة بيهو يادوب جمعتا ولدي ما ربيتو كدة صاح كان هو الدايرك بس متأكدة ما بعامل اخواتو البحبهن كدة!!!، انا والله ما اخليك في البيت دة ولا دقيقة ما اخليك ليها!!!، قالت لينا ما بمشي ما لم همام يطلقني وما تفكرو انو هو بطل يحبني هو بس بقى يعرف الصاح من الغلط بس حبو لي ما اتغير نهاي ومستحيل يصدق الحاجة دي ،امو تاني ادتها كف هنا همام جاء داخل وقرب مننا وقال لينا بصوت عالي وحازم مالكم أصواتكم عاليه وامي السبب شنو الخلاك تضربي وفاق قدامهن؟؟؟،انا جيت عليهو كنت دايرة اتكلم قال لي بغضب حتى انتي داخلة في المشكله يا نرجس، وتاني عاين لوفاق وقال لي بغضب امشي بهناك انا بجيك بعد اسمع الموضوع منهن ، قربت عليهو وقالت لي لاا اسمعو مني اتخيل نرجس مفكرة اني كاتباك وامك صدقتها همام عاين لي باستغراب وقال لي نرجس الكلام دة صاح، جيت وقولت ليهو اي صاح انت بتحبها بس مستحيل تسمع كلامها في الغلط انت ما ملاحظ انو شخصيتك اتغيرت وبقيت بس معاها حنى امك واخواتك ما بتسمع ليهن في سحر اسمو الاخضاع وفي سحر لكره الاهل وكلهن عملتهن ليك ، ضحك وقال لي نرجس انا فاهم جاية من قرية بسس ما تبقييي متخلفة وتامني بالخرفات............

اللهم صلي وسلم على نبينا محمد وعلى آله وصحبه أجمعين 🩷 

____________________

*‏الكلام الجارح ينتهي ‏ويبقى القلب يتألم طويلاً...