رواية بينهما الفصل الثالث عشر 13 بقلم ال زهراء
ضحك وقال لي نرجس انا فاهم جاية من قرية بسس ما تبقييي متخلفة وتامني بالخرفات ،زعلت زعل ومسكت دموعي بالقوة!!، هو عاين لي تاني قال ما قصدي اجرحك بكلامي ولا ما اصدقك بس الحاجات دي ما بتخش عقلي!! ولا قادر استوعبها،قولت ليهو طيب اسفة انا شكلي فهمت وفاق غلط ،وفاق بقت تعاين لي!!، وطوالي انا دخلت وقولت في نفسي اكيد ما بصدق دة انا زاتي ما صدقت اول مرة!!.
جاني وقعد وبقى يتحسس في جروحي وقال لي شوفتي عملتي شنو بنفسك؟؟!، ما رديييت!!، مسك يدي وقال لي نرجس اقنعيني بس ما تقولي كلام وتنتنظريني اصدقو!!، انا تعبت من انو اخد جهة واحدة فيكن!، من جهة انتي ووفاق ومن جهة تانية وفاق واهلي،قولت ليهو طيب حا يجي يوم وحا اثبت ليك يا همام بس انا خايفة تندم قبل اليوم دة يجي ،عاين لي وقال لي إن شاء الله ماف ندم، انا بعرف وفاق مما كنا صغار ومستحيل تكتبني ولا تكتب اهلي وعشان شنو بس عشان تبعدهم منو لالا مستحيل، قولت ليهو مظفر دة علاقتو بيهو كانت متحسنة متييين ؟؟!، قال لي طول عمرنا علاقتنا متحسنة بس في فترات هو كان بقيف ضدي، قولت ليهو ليه؟؟!، قال لي والله مشاكل تافهة واغلبها ما متذكرة ،قولت ليهو طيب دة لو انت واعي حا تضرب مظفر ولا تسيء لأمك واخواتك ،ما رد واكتفى بأنو يقول لي ما تفكري بالمواضيع دي حالياً وركزي مع الامتحان.
مشيت لملمت شعري المنكوش وعاينت لوشي بالمرايه!! وقولت في نفسي بشتنة!، الخدوش كانت ظاهرة قولت الا البس نقاب بس تاني اتذكرت انو غلط وما صاح البس حاجة زي النقاب َعشان اخفي جروحي وقرررت البس كمامة، همام جاء وقلع المراية مني وقال لي قومي اقري وما تفكري بخدوشك!، قولت ليهو شوفني بقييت كيف ؟؟!، قال لي زدتي حلااا بس ما كان تعملي ليها نفس العملتو فيك!!، ضحكت لانو اول مرة يقول حاجة ضد وفاق!،قال لي ايوا كدة اضحكي وما تكشري!!، انا حا امشي اشوف وفاق.
________________________
بلسان همام
مشبيت عشان اشوف وفاق لقيتها قاعدة جيت لعندها وشوفت راسها وقولت ليها في حاجة بتألم فيك ،قالت لي قلبي بس يا همام ليه يفكرو فيني كدة!! مستفيدة شنو من كتابتك وانت معاملني زي الملكة، قولت ليها اسمعيني انا ما بصدق خرفات بس برضو لازم أنصف الطرف التاني فانتي لو ما عاملة حاجة لازم تثبتي لي برضو قالت لي طيب، بوستها من شعرها وقولت ليها تمام بس ما عايزك تتشاكلي مع نرجس هي صغيرة لسه َوانتي أكبر منها واوعى، قالت لي بس هي اتهمتني اتهام خطييير كيف اعمل سحر كره لأهلك نحن في اي عصر يا همام!!، قولت ليها خليك اعقل منها تمام يا وفاق قالت لي طيب.
مشيت لمظفر تاني وقعدت وبقييت افكر في الموضوع!، مظفر قال لي مالك مهموم ؟! ،قولت ليهو نرجس جابت ليها كلام جديد قالت لي وفاق كاتباك، ضحك وقال لي احتمال لانك تصرفاتك الفاتت دي كلها تصرف زول مجنون! من متين انت قاعد تسمع كلام مرة للدرجة دي، طول عمرك كنت متمرد وما بتعمل الا في راسك ،قولت ليهو شكلك خالط بيني وبينك، ضحك وقال لي والله انت برضك ما كنت بتتنازل! المهم انت رايك شنو في الموضووع، قولت ليهو انا ما بأمن بالحاجات دي النسوان ديل بحبن يكبرن المواضيع ،قال لي والله اي عندهن تكبير مواضيع مرات وُد موضوع صغير بتقلبو شكلة! ،قولت ليهو اي زولك دي صعبة معروفة! ضحك وقال لي اي بس بكايية!! وملامحها بتغيير مع الزعل شوفت مشكلتك معاها عرفتها بسبب ملامحها! ،قولت ليهو انا مستغرب منك انت كنت مبسوط معاها ليه تتزوج فيها اسي بعد طلقتها لو زول قال عايز يتزوجها حا تعمل شنو؟؟!، قال لي زي ما انا اتزوجت من حقها تتزوج ولا شنو ؟؟!، قولت ليهو ما ندمان، قال لي اندم على شنو؟؟!، حياتي مستقرة مع شهد هدوء تام ماف إزعاج ماف جوطة،قولت ليهو عشان كدة شايفك في الحتة دي من قبيل مش مفروض تمشي بيتك بعد دا لو مستقرة ، ضحك وقال لي حاس بس اني مخنوق، قولت ليهو والله الراجل ما بخلي البيت لو فيه مرة كويسة وخاصة في فترتك دي محتاجة تقيف جنبك،قال لي ما كل النسوان بقيفن مع الراجل في نسوان همهن مصلحتهن ،قولت ليهو انت قاصد شنو؟!، قال لي ولا شي انا راجع البيييت بقى ماش، قولت ليهو مظفر رجع وُد انت ما اظن داير غيرها بس بتحب المكابرة وما بتحب تعترف بغلطتك! بس في اغلاط لو ما اعترفت بيهن حا يبقى ليك نقطة سوداء في حياتك وما بتقدر تعيش مرتاح ،قال لي انا الموضوع دة قفلتو خلاص وما عايز يتذكر تاني لاي سبب من الأسباب.
___________________________
بلسان مظفر
رجعت البيييت ولقيتها نايمة حتى انتظار ما انتظرتني!! بقييت راقد وحاولت اغمض عيوني! بس ما قدرت انوم بسبب كلام همام القالو لي و بقيت هام على زواجها أكبر من مشكلتي الواقع فيها هي اسي ما بتشوفني لو اتزوجت البحصل شنو ؟؟!، اتنهدت!! شهد صحصحت فجاءة وقالت لي جيييت يا مظفر مرحب بيييك اها بقيت كيف؟؟!، قولت ليها احسن، قالت لي لقيت حل؟؟!، قولت ليها اي، قالت لي الحمد لله يا حبيبي بس اسمع تاني ما تدخل في حاجة ما عارف اذا حا تخسر معاك ولا لا، قولت ليها ما هو الحياة تجارب والزول لو ما جرب ما بنجح كل الناس البقو غنيانين زمان فشلو!، قالت لي لا الزول لازم يكون حذر!، بس انا بعلمك قربت مني وكانت عايزة تضمني بعدها وقومتا منها! لحقتني وقالت لي مالك؟؟!، قولت ليها ماف حاجة لازم امشي مكان واجي اقفلي الباب عليك كويس، قالت لي ما تمشي حتة اقعد، قولت ليها لا ضروري امشي ،قالت لي طيب ممكن تجيب لي وانت راجع معاك...، تاني سكتت وقالت لي انسى خلاص ما عايزة اضيق عليك اسي، قولت ليها لا قولي عايزة شنو؟؟، قالت لي عايزة كنافة، قولت ليها طيب، قدمتني للباب وقالت لي مع السلامه ،مستغرب شديد منها الاتزوجتها عن حب ما وقفت معاي والما اتزوجتها عن حب وقفت، زمان وُد لمن اكون مضغوط ولا مضايق بتجي سابقني وحتى لو بكون عندها ديوتي بتخليهو وبعد عدم معرفتها بالطبخ بتحاول تطبخ لي عشان تغير لي جو بس اسي شهد ما سالتني حتى إذا أنا اكلت ولا لا، تاني قولت لازم اديها فرصة في النهاية انا اتزوجتها عن قناعة.
جيت متأخر وختيت ليها الكنافة في التلاجة!، في اليوم التاني الجو كان هادي شديد جات وقالت لي صباح الخيير الشاي جاهز!، قولت ليها طيب بقينا نشرب قالت لي في موضوع مهم عايزة اقولو ليك ،قولت ليها شنو، قالت لي بس ما تزعل وتقول لي ما وقتو، قولت ليها لا ماف مشكلة ،قالت لي انا عايزة احضر برة السودان وخلاص جهزت اي حاجة وحتى قدمت، قولت ليها بغضب اسي جاية تختيني قدام الأمر الواقع ولا شنو؟؟!، قالت لي والله ياخ ما شايفة انو من الضرورة اكلمك في حاجة زي دي في النهاية انت زول متفهم واكيد حا توافق!!!، قولت ليها وانا ضاغط على اسناني انا ما رجل كرسي هنا وما مسموح ليك حاجة زي دي بدون ما تشاوريني، قالت لي يا مظفر بكره الراجل المتحكم اناا...، قاطعتهاوقولت ليها بحذرك تفتحي خشمك بحرف تاني موش التحضير الما كلمتني بيهو دة حا تلغية من راسك ولو ما لغتيهو اعتبري انك طالق والخيار خيارك ،قالت لي مظف.. ،قاطعتها وقولت ليها انا كلامي كان واضح وما بحب اعيدو القصة دي حالياً حا تنسياها لمن تتعلمي انك تكلميني باي حاجة في حياتك!، قالت لي بسسس ،قربت وقولت ليها شهد انا ماسك نفسي بالقوة والله بس لو قومت عليك ما اريحك، احسن ليك تمشي من وشي وتنسي الموضوع دة!، دمعت ودخلت!!، قعدت وقولت كل خطوة لازم اعرفها عن حياتها ما مفروض تدس مني ،والله لو كلمتني كنت دعمتها وحتى حاولت اسافر معاها بس بعد كدة ماف ليها والتقدر تاني تعمل شي بدون ما تشاورني.
بعد كم يوم همام باع قطعة الأرض ومشكلتي اتحلت بس كنت حاسس بالذنب لانو باعها!!! وقررت انو حا اعوضو.
انا متأكد انو لو ما نرجس كانت في حياتو ما كان فكر ساعدني!!، كنت حاس اني فتران ومرهق لي فترة فقررت انو امشي المستشفى عشان افحص وما مشيت الا الشغالة فيها وُد لقيييتها قاعدة واتقصدت امشي ليها عاينت لي نحن من اليوم داك ما اتكلمنا مع بعض ،قالت لي بتشكي من شنو يا مظفر؟؟!، قولت ليها فتران على طول ومصدع، قالت لي معاها اي اعراض تانية، قولت ليها حمى ليليه خفيفة ،قالت لي طيب انا بديك فحوصات اعملها لي وتعال، قولت ليها تمام لمن جيت لقيتها قاعدة عاينت لي وقالت لي دمك ناقص عشان كدة حاس بالفتر والشحوب وتاني حاجة عندك تايفويد! بنصحك بالراحة الفترة دي وتحافظ على نظامك الغدائي وما تهمل نفسك ،كتبت لي علاجات كتيرة وقالت لي لو حسيت تاني باي حاجة تعال راجع!، ما عارف هل ديل توجيهات عادية لكل المرضى ولا عشان خايفة علي بس كنت مبسوط بيهن،قولت ليها وُد ما لازمني اي حاجة تانية ،قالت لي لاا ما لازماك ولا اكتب ليك فيتامينات، قولت ليها اي انا حاس اني ناقصني فيتامين وخاصة فيتامين و، حكت راسها وقالت لي واو مظفر لو ما قاري صيدلة!!!، تاني نطتت فيها عيوني ودنقرت راسها من الخجل وقامت وقالت لي شكلو انو ما في وعيك من المرض لو سمحت اتخارج عندي مرضى غيرك ضحكت وقومت سريييع ،قولت ليها بتمنى تكوني قدرتي تسامحيني على موضوع الطفل قالت لي دة ما وقتو ؟؟! بس كل البقولو ليك انو انت عملت القرار دة عشاني وانا بس كنت عاطفية شوية! واساءت ليك. بالكلام، قولت في نفسي وُد ياها وُد البت البتفكر في الكلام القالتو والبترجع عنو لو كان غلط ،قولت ليها طيب مع السلامة،قالت لي انتبه على صحتك، وانا قايم كدة جاء دكتور علي وقال ليها التحضيرات اكتملت بكرة ممكن نسافر، انا طوالي وقفت وقولت ليها ماشة وين؟؟!، قالت لي مخيم لاجئين جنب الحدود بينا وبين تشاد، قولت ليها بغضب ممكن كلمتين معاك ،قالت لي لا لاني مشغولة ،قولت ليها وُد وقسما بالله طلعتي معاي طلعتي ما طلعتي الا أطلعك بالقوة!، قالت لي انا بقول ليك مشغولة علي كان عايز يدخل قالت ليهو لو سمحت ما تتدخل بيني وبينو!، هي مستحيل تخلي زول يدخل طرف تالت بينا معروفة.
قولت ليها دقيقتين بس ،قالت لي قول العايز تقولو قولو قدام الناس ديل كلهم ما فاضية انا، قولت ليها لو سمحتي!، عاينت لي وقالت لي طيب بس دقيقتين.
مشينا برة قولت ليها راجعي القرار دة يا وُد انا ما حا اخليك تخاطري بحياتك ،قالت لي محتاجين لي يا مظفر الامراض هناك انتشرن كوليرا وحميات ،قولت ليها انتي مناعتك ضعيفة وعارفة اقل مرض بتعبك ،قالت لي عارفة بس من واجب الدكتور ينقذ المرضى ،لازم امشي، قولت ليها ما ليك اي مشي، قالت لي بمش بقول ليك وانت ما عندك بعد كدة حق تقول لي الكلام دة ما بينا اي حاجة ،لمن قالت لي كدة ضربت الحيطة من الغضب لمن هي اتخلعت قربت مني وقالت لي لو ضربت راسك بيها كمان ما بغير رايي !! اسي استفدت شنو يا غبي!! ياهو الدم دة البقى مالي يدك!! امشي خليه ينضفو ليك وشوف شغلة تانية، قولت ليها وُد لو جاتك حاجة ...، قاطعتني وقالت لي مظفر احسن ننتهي كلامنا لحدي هنا، انت بمرتك وانا بقى عندي طريق الخاص العايزة امشي بيهو حتى امي موافقة عشان كدة الأفضل تهتم بس بمرتك.
مشت وانا بقيت محتار مستحيل تتمنع لي البت دي!!، وكمان امها موافقة، وُد ما كانت عنيدة وكانت بتسمع كلامي بسس انا اسي زي ما قالت ما عندي سلطة عليها ،بقييت مقلق وماش وجاي وما عارف اعمل اي شي.
رجعت البيت لقيت شهد ماف اتصلت بيها قولت ليها انتي وين؟!، قالت لي مشيييت لي لمناسبة ،قولت ليها مش مفروض تكلميني؟ ؟!، قالت لي مظفر ما تبقى نكدي! فيها شنو لو مشيت، قولت ليها مافيها حاجة بس انا راجلك ومسؤول منك ،قالت لي انا تعبت من الكلمة دي عمرو المرحوم ما اتحكم فيني، قولت ليها دة ما تحكم بس من حقي اعرف انتي وين انا اسي ما قاعد اكلمك باي حاجة ،قالت لي والله لو ما كلمتني ما فرقت، قولت ليها طيب متزوجين لشنو ما احسن نطلق لو اي زول عايز يعيش باستقلالية، قالت لي اها شوفت انت بس عايز تصل لدة عارفاك بقيت تكرهني ،قولت ليها ما كرهتك بسس انتي تصرفاتك بقت غريبة ولا كأنك المرة الحبيتها، قالت لي انا من زمان انا، قولت ليها لا المهم انتي وين انا حا اجي اسوقك، قالت لي ما ضروري وبعدين تسوقني بشنو ؟؟! بجي براي بالمواصلات ،قفلت في وشي، قولت في نفسي هل المرة الكنت بحبها قبل الزواج ممكن تتغير بعد الزواج ولا ما كانت بس مظهره لي طبعها اتنهدت! شديد وبقييت راقد من التعب والتفكير الزايد.
جات بعد مسافة داخلة قعدت جنبي وقالت لي مالك راقد كدة، قولت ليها طلع عندي تايفويد، قالت لي طيب بديت العلاج قولت ليها لسه، قالت لي ارتاح وانا بمشي اعمل ليك حاجة تأكلها، حسيت انو دي هي يادوب رجعت.
جات وقربت مني وقالت لي اسفة يا مظفر على اي أذى سببتو ليك!!، قولت ليها ماف مشكلة!، رقدت جنبي وبقى تمسح في شعري وقالت لي بحبك والله يا مظفر ما تزعل مني ،قولت ليها وانا بس تاني ما تدسي علي حاجة لانو والله المره الجاية ما بسامحك ، قالت لي طيب، بعد مسافة قامت وانا قومت شنطتها الخاتها جنبي وقعت منها ربطة بتاعت قروش استغربت شديد وقولت جابتهم من وين ؟!، لمن جات سالتها ارتبكت وقالت لي ابوي الاداني ليهن قال لي عشان تقدري توفري مصروفك، قولت ليها كلمتي بوضعي ولا شنو ،قالت لي اي موش وبصراحة انا عايزة حاجات وشينة اطلبهن منك وانت في الظروف دي، قولت ليها شهد مهما كانت ظروفي اساليني اول لو ما قدرت الجي لابوك اسي حا يفكر شنو ،قالت لي ابوي ما تخاف زول متفهم وما فيها حاجة لو شلت منو، قولت ليها تمام بس اخر مرة قالت لي طيب إن شاء الله.
في اليوم التاني قلبي وجعني وقررت امشي امنع وُد لقيت انو اتحركوا وماف اي سبيييل تاني عشان ترجع لي.
بعد اسبوع من الكلام دة ما كان في اي رد منها وقلقت شديد عليها اتصلت بنرجس قالت والله انا زاتي ما بترد لي تكون ما عندهم شبكة، قولت ليها موش في استار لينك كان ،قالت لي احتمال خسر وبعدين اصلا بسببك انت كل القصة دي لو انت...، تاني سكتت وقالت لي اصلا بتكلم معاك لشنو؟؟! انت ما بتفهم ولا عمرك حا تفهم وبكرة تندم والندم ما بنفعك انت مكابر مكابرة شديدة لو بس قولت مهمة مالو ؟؟!، لو بس اعترفت الاعتراف البسيط دة فيها شنو ، قفلت في وشها وبقيت مكتئب.
الليله كلمت شهد انو حا امشي مدينة كسلا وقولت ليها حا اقعد كم يوم عشان اوزع الدواء التجريبي مجاني على الدكاترة، بسس خليتها في آخر لحظة واعتذرت وقررت امشي لوُد بس اول لازماتني حاجات تانية زي إثبات الشخصية مشيت البيت وفتحت الباب بالمفتاح الاحتياطي سامع صوت ضحكات من غرفتي قولت الليله شهد دي معاها منو أتقدمت ناحية غرفتنا وفتحت الباب لقييت معاها راجل................
____________________
ﻧﺤﻦ ﺃﺣﻴﺎﻧﺎً ﻧﺴﺘﺤﻖ ﻛﻞﻣﺎ ﻳﺤﺪﺙ ﻟﻨﺎ ، ﺣﺘّﻰ ﻧﻔﻴﻖ ﻣﻦ ﻏﺒﺎﺋﻨﺎ ﻗﻠﻴﻼً ..