رواية بينهما الفصل الواحد والعشرون 21 بقلم ال زهراء
مشيت المستشفى وعملنا فحوصات طلع عندها ثقب في القلب وقالو العمليه صعب تتعمل هنا الا في الهند واحتمال نجاحها بسيط نرجس اغمى عليها طوالي وانا بقييت بعاين لبتي الما قادر اخفف عنها،ميسم جات وضربتني في كتفي وقالت لي بغضل همام لو انت ضعفت منو البقوينا شوف مرتك واقعة قدامك تعال ارفعها!! ،يادوب استوعبت ومشيت لنرجس ورفعتها! ،بقيت قاعد جبنها لمن جات الممرضة، بعدها وُد جات وقعدت قولت ليها وُد نعمل شنو ؟؟!، قالت لي هي لسه صغيرة على العمليه حا تتنظر تكبر شوية وبعدها لازم تعملوها ليها ،قولت ليها لكن قالو في خطر على حياتها ، قالت لي همام نحن ما بنعلم بالغيب نحن بس بنقول الكلام الدرسونا ليهو وفي النهاية اي حاجة بيد ربنا، انت اتوكل على رب العالمين وإن شاء الله وُد حا تبقى كويسة، قولت ليها تمام، شلتها وقولت لوُد انا انشغلت عندهم الفترة الفاتت ما قدرت احضر لبتي اي حاجة ،قالت لي اسي ما فات حاجة العمر بمر سريع ولازم تكون مع أسرتك في كل لحظة ولا شنو!، قولت ليها اي انا كان بامكاني انو اخفف ساعات شغلي بس انا كنت ما بثق بزول غيري ،قالت ما بستغرب منك ما هو انت زيو، ضحكت وقولت ليها انتي بس كل ما اقول ليك حاجة تذكري مظفر ،ضحكت وقالت لي اعمل شنو لو انتو تؤام المهم أسي لمن تصحى نرجس خلي وشك دة وحاول تطمنها عارفها خوافة وانت بس البتقدر تزيل الخوف دة منها لانك اكتر واحد بثق بيهو ،قولت ليها والله يا وُد انا ما قايل انك عاقلة كدة ،قالت لي همام انا انصدمت والله فييك وزعلت كيف تقول لي كدة، معقول ما كنت مظهرة الجانب دة طول الوقت، قولت ليها والله لا كنت قايلك واحدة بس مجنونة!!!،ضحكت وقعدت جنب نرجس وانا بقييت شايل وُد.
لمن صحت قامت مخلوعة وخطفت مني وُد وقالت لي همام نعيد الفحوصات في حتة تانية ديل بكذبوا، قولت ليها طيب اي مستشفى دايراها حا نعيد فيها الفحوصات بس حتى لو طلع نفس الكلام انتي ما تقلقي وما تخافي ،قالت لي كيف لكن ما اقلق بتي صغيرة على كل دة، قولت ليها نرجس انتي بفعلتك دي كانك بتتسخطي دي إرادة ربنا وإن شاء الله الابتلاء دة حا نتجاوزو بس لازم نتوكل عليهو ونؤمن ايمان تام انو الازمة دي حا تمر ،قالت لي ما قادرة اصبر انا ام يا همام، ما قادرة والله بقت تبكي وقولت ليها انا معاك يا نرجس وحا ننجاوز سوا ووُد حا تكون كويسة ،قالت لي انت متأكد، قولت ليها إن شاء الله بس علينا بالدعاء.
وُد جات لعندنا وقالت ليها كفاية نواح يا نرجس انتي زولة مؤمنة فوكلي امرك ربنا وقومي اتنفضي.
بعد أيام مظفر جاء عشان يشوف وضع وُد لقاها بتلعب قال لي يا همام انت جبتي على الفاضي الحمد لله انها بخير ،قولت ليهو لو ما قولت ليك وضعها كعب انت اكيد ما حا تجي ليك كم من البلد، قال لي ياخ لو لي مية سنة انت مالك ومالي، قولت ليهو انت يا زول ما بتغيير نهاي، كل ما تكبر تبقى صعب، قال لي همام ما تكتر كلامك انا ماش، قولت ليهو ماش وين بقول ليك بتي عيانة!!!، قال لي حا تبقى كويسة انا حا امشي لناس امي والاسبوع الجاي مفروض اسافر ولمن تكونوا ماشين الهند قول لي عشان اجهز نفسي، قولت ليهو انت اخر واحد حا اسوقو معاي، ضحك ،في اللحظة دي نرجس جات وقالت ليهو ما حا تمشي لاي مكان ما لم تتغدا معانا شالت وُد وادتها ليهو ،قال ليها اسي بتبكي ،قالت ليهو سكتها عشان بعدين تعرف تتعامل مع اولاد، قعد وقال ليها القال ليك منو انا عايز اتزوج!!!، قالت ليهو ما احتمال تلقى ليك واحدة كدة تعجبك! ،قال ليها الا صاحبتك العاجباني، قالت ليهو كانك بقيت صريح زي عن اللزوم، قال ليها تقولي شنو!، المهم وينها؟؟! ما جاية تشوف السموها عليها ،قالت لي حا اعمل ليك خدمة مجانية بس اتذكر معروفي دة كويس ،قال ليها الدايراهو بعملو ليك يا نرجس، قولت ليهم انتو الاتنين ديل لو بس افهم بتقولو في شنو، نرجس جاتني وقالت لي تعال معاي ساعدني وخلي شماراتك دي ،بأن على وشي الاستغراب بس قولت ما حا اقدر اجاريهم ديل.
__________________________
بلسان وُد
اتصلت بي نرجس وقالت لي تعالي لينا، قولت ليها مشغولة، قالت لي عليك الله ولو ساعة، قولت ليها في حاجة حصلت لوُد، قالت لي لا بس انا لي كم يوم منك تعالي اتغدي معانا، قولت ليها طيب بس ساعة لاني مشغولة ما تقعدي تغشيني وتودينا في آخر الليل، ضحكت وقالت لي والله ما بعملها تعالي.
مشيت ودقييت الباب الباب فتح عاينت لقيتو مظفر وشايل وُد قلبي عمل شح وبقيت مصمغة في حتتي!!، سلم وانا رديت السلام وتاني عملت نفسي باردة وكنت دايرة ادخل، قال لي كبرتي ولا انا حاس كدة ما تكون دي القراية الكتيرة، حدرت ليهو وتاني قولت اتعاملي معاه ببرود شديد ما تخليه يستفزك ويطلع اسوء ما عندك ، بس بعد شوية ما قدرت اتمالك نفسي وضاعت هيبتي فقولت ليهو اي وانت زاتك كبرت لمن جلحت بس انا عذري القراية انت مالك؟!!، بقى يهبش في شعرو زي الاهبل هو عارف انو ما عندو وانا بغيظ فيهو بس شكلو صدق، دخلت جوة وبقييت قاعدة وهو قاعد جنبي، قولت ليهو وين نرجس قال لي في المطبخ معاها همام يساعد فيها ،قولت ليهو كويس! بقييت شغالة بتلفوني وهو كان ساكت، تاني رد على اتصال قال ليهو اتصرف اجييك انا اتصرف ليك ولا شنو؟؟!، تاني قال ليهو والله دي مشكلتك يا الطيب حليتها حليتها ما حليتها اعتبر نفسك مطرود، قفل التلفون وقال بزهج الزول الا يحل اي حاجة براهو وُد بقت تبكي من نبرتو !، قام وكان معصب وخت وُد في حضني وهي لسه بتبكي ، وقال لي لو سألت مني نرجس قولي ليها في حمار خرب الشغل وماش يصلح الوضع ،قولت ليهو اهدى اول! ما شايف نفسك لمن خوفت البت وانت بتتكلم، قال لي انا هادي قومت وقولت ليهو لا ما هادي + سكت البكيتها دي اول واتحمل مسؤوليتك شنو جاري ،قال لي انا ما ختيتها عشان تسكتيها ،غزيت يدي في نصي وقولت ليهو اها ختيتها لشنو ؟؟!، اتنهد وبقى يسكت فيها لمن هدت!، قربت وقولت ليهو تاني مرة لمن تتكلم وانت معاك طفل اتعلم تتكلم بصوت واطي لانو بخاف من صوتك!،بقى يعاين لي وكان عايز يتكلم بس سكت واداني وُد.
طلع وانا بقيت قاعدة نرجس جات وقالت لي مشى وين؟ ؟!، عاينت ليها وقولت ليها ما تفكري انو ما كشفت الاعيبك، ضحكت وقالت لي كنت بس عايزاكم تتكلمو مع بعض ،قولت ليها انا ما عندي ليهو اي حاجة عشان اتكلم معاة قربت وقالت لي لشنو ما شوفتيهو بقى وجية كيف ؟؟!، قولت ليها ما شوفت اي حاجة ياها خلقتو الزمان، قالت لي لا والله السعودية دي بقتو سمح زيادة،همام قال ليها انا ما شايف اي تغيير قولت ليها الحمد لله اللقيت زول في صفي، قالت لينا ما هو زي الاضداد عشان كدة بقيف ضدو ،التقول ما تؤم ،قولت ليها اي والله المهم تاني مرة ما تنادني لحاجة سخيفة زي دي ،قربت وهمست لي وقالت لي ياخ ما تكذبي اكيد مبسوطة بشوفتو ،قولت ليها وانا بتمتم ليه اتبسط هو بقت اخلاقو اسوء من زمان، قالت لي والله انا عازاراهو ما هو ناقص من غيرك عشان كدة زهجان على طول، قولت ليها من زمان كدة واخوهو شاهد! ،همام ضحك وقعد تاني انا مشيت ،نرجس قالت لي اقعدي اتغدي قولت ليها ما عايزة عشان حركاتك دي، قالت لي انا عايزة بس ترجعوا لبعض، قولت ليها ماف اي رجوع، قالت لي معقول قلبك دة ما صفا ناحيتو ،قولت ليها ولا حا يصفا مع السلامة.
طلعت برة ومشيت المسشفى وبقيت شغالة في الطواريء نادوني وقالو لي جاء واحد مضروب مشيت اشوف الحاصل لقيتو مظفر بشحمو ولحموا ،عاينت ليهو وعاين لي وخجل ،قولت ليهو اتشاكلت مع منو ؟؟!، قال لي وهو بحك راسو ما بتعرفيهو!، قولت ليهو ايوااا تمام صرخت بأعلى صوت وقولت ماف زول يلمس المريض دة الا يجيب اورنيك ولو ما جاب اورنيك اي زول يلمسوا يتحمل المسؤولية وانا بذات نفسي حا أكلم المدير عليهو. قام والدم نازل منو وقال اصلا انا ما كنت جاي المستشفى دا الطيب الجابني!، بقى متحرك وانا قويت قلبي وبقيت ماشة الاتجاة المعاكس ،بعد شوية جاتني الممرضة وقالت لي في واحدة اسمها مودة استلمت الحالة وقالت ما عندها شغلة بالاورنيك، مشيت ليها لقيتها واحدة منقبة قولت ليها تعالي هنا انا موش قولت ماف زول....، قاطعتني وقالت لي دة ود عمي الدم سايل دة اخليهو يموت ،قولت ليها انتي بت عم دة، قالت لي اي وما بخلية يفقد دم اكترمن الفقدتو وحا اتحمل المسوولية ،قال ليها مودة انا بتصرف حا اجيب شاش ولا اي حاجة...، قاطعتو وقالت ليهو هس ولا كلمة منك ما عايزة اسمعها الجرح دة محتاج خياطة ،انت بس ما تتحرك وخليني انا اشتغل، قولت ليها مودة ولا اي كان اسمك انتي حا تتعرضي لمعاملة قاسية من المدير!، قالت لي كلمية بقول ليك ،جاء علي في اللحظة دي وقال لي في شنو يا وُد، قولت ليهو المريض ما عندو اورنيك وهو مضروب وعايزة تعالجو ،عاين وقال لي طيب يا وُد ممكن نستثنى الحالة دي لانو دة...، قولت ليهو دة منو؟؟!، انا ما بعرفو، مظفر بقى يعاين لي وقال لمودة اسرعي عليك الله ،قالت ليهو لسه ما جابو البنج، قال ليها بغضب اعمليها من غير بنج، قالت لي بس، قام وقال ليها انا ما فاضي ،قالت ليه طيب حا اعملها من غير بنج!!، علي جاء وقال ليهو من غير بنج حا تكون ليك حارة ،قال ليهو ماف زول اخد راييك ،انا جيت في اللحظة دي وقولت ليهو علي امشي شوف شغلك انت مدير وما فاضي للامور دي ،قال لي تمام، جيت وقولت لمودة ما تشتغلي بيهو الا لمن يجي البنج اعمليها ليهو ،قالت لي انتي موش رفضتي تعالجية ما تتدخلي في شغلي ،مظفر كان قاعد وساكت وانا طوالي سكتا، نضفتها ليهو من غير بنج وهو كان ساكت وما عارفة ليه ما ادى اي ردة فعل مرات بحس بيهو بقى اكتر قساوة من زمان ،قالت ليهو انا اتالمت ليك يا مظفر، ضحك وقال ليها دة مجال الشغل بتطلب كدة!،ما فهمت علاقة الشغل بالموضوع دة شنو ؟؟!، انا عارفة انو الصيدلية ما مجال مرغوب هناك طيب مشى اشتغل شنو ؟؟!، بقيت محتارة وما كنت عايزة اسال عشان ابين اني مهتمة، مودة قالت لي وُد في داعي امشي تاني للمدير ولا خلاص، قولت ليها ماف داعي هو وافق تعالجيهو بس تاني ما تكرريها، قالت لي تمام بس يا وُد ما تستغلي معرفتك بالمدير عشان تتحكمي فينا ،عارفاه ممكن يعمل ليك اي حا....، قاطعها وقال ليها مودة انتي يا بت اتبدلتي ولا شنو ،ضحكت وقالت ليهو يمكن بقيت اصلب بعد وفاة اختي وتاني امي، قال ليها ربنا يرحمهن بس انا متعود عليك وانتي البرئية ديك ما تطولي لسانك وتقولي حاجات غلط عن الناس ،قالت ليهو انا اسي ما غلطت في حاجة انا بس قولت الشايفاهو والكل الناس شايفنو، ضرب الطربيزة وقام وقال ليها مودة وراي شكلك لازم تتعلمي الاحترام وانا بعلمك ليهو، انا طبعاً لو ما هو عيان كنت والله ادبتها بس هو ما كويس علشان يقعد يحجز فينا ،عاين لي وانا طبعاً بحمر لمودة ،وماسكة يدي بالقوة من انو تقرب ليها ،عاين وضحك وقال ليها ورح ما عارف وُد حا تتحملك اكتر ولا لا، وتاني قال لي بقيتي تتحكمي باعصابك كويس ،قولت ليهو وانا بضغط باسناني دي مستشفى ما عايزة المرضى يفكرو فيني تفكير كعب ،قال لي ما تخافي ما اظن في زول ما عارف انك لسانك طويل وحقك بتاخديهو بيك!!!، هنا انا غصبت شديد بس قولت اهدي الزول دة عامل اسي عمليه صغيرة اهدي اهدي ،قربت وقولت ليها تاني بس لو قولتي كلامك دة والله اقطع ليك لسانك دة واسلمو ليك في يدك ولا عذر لمن أنذر ،وأنت التاني لو انضربت شوف ليك مستشفى تاني لانك مافي عمر شكل انت القدرتك مفروض يكونوا باحفادهم ،قرب وقال لي الماخرني من الحاجة دي منوو؟؟!، اتوترت وقولت ليهو ما هو انت براك السببت بدة كلو وبراك مشيت لغيري فاتحمل نتائج أفعالك ،قال لي وهو بصرخ لمتيييين ؟؟؟!، قربت وقولت ليهو للأبد، قال لي حاولي بس شوفي الموضوع من وجهة تانية انا اتادبت واتعاقبت مية عقاب زواجي ما كان نافع مرتي خانتني انتي بعدتي عني تاني عايزة شنو؟؟!، ما خلاص كفاية !، قولت ليهو لا ما كفاية!!، قال لي ما حا احنسك تاني ،قولت ليهو ما حصل حنستني كل مرة جايني بمبدأ ارجع ليك بالقوة عشان كدة في عمرك ما تفكر انو ممكن ارجع ليك، قال لي انتي بس عايزة تشوفي الموضوع من الناحية دي، بس ما شايفة محاولتي اليائسة عشان بس ترجعي لي، قربت وقولت ليهو وانا غضبانة لو حاولت مية محاولة ما راجعة ليك فشنو شوف ليك زولة تتحملك وشوف ليك زولة تتقبل كلامك الجارح ،هنا مودة ادتني كف وقالت لي كفاية يا وُد ياخ انتي ما شايفة انك زولة توكسك وموذية!! وما عارفة ليه مظفر معجب بيك للان، ياخ انا ما حصل شوفت مظفر بتكسر لزول كدة دي لو كانت واحدة تانية غيرك صدقيني كان حا يكون عندو تصرف تاني معاها بس انتي بعد كل الكلام القولتو لسه صابر عليك،مظفر هنا قال ليها خليها ورريني ابوك مرقد وين ،طبعا ابوها ليهو شهر مرقد في المستشفى عندو تليف في الكبد في مرحلة متقدمة واحتمال يتوفى، مشو سوا وانا بقيت بعاين بس وهم ببعدو بعد شوية نادوني لابوها زاتو!! لقيت اعمامها طلعتهم من الغرفة وخليت مودة بس لانها دكتورة بعد شوية بعد عرفت انو خلاص انو عايز يموت ناديت اهلو يشهديهو وهو بقى يعاين لمظفر وقال ليهو مظفر مودة أمانة في رقبتك وتاني شهدوهو ومات.....................