خت السلاح في راسي وقال لي انا بتكلم معاك ردي يابنت ..... امي دي قعدت تبكي وتكورك قام رفع يدو وضربة كف الناس الفي الشبكة زول فتح خشمو مافي كان جنب الجنجويد البفتح الشبكة كم راجل وكم مره يعاينو سايي
رفعت راسي وانا دموعي جارية جر الكمامة وجدعة وقال لي قومي اتحركي معاي قلت ليو وانا بتمتم ممم معلش م كنت بقصد خليني عليك الله خليني عليك مابقصد والله العظيم مابقصد النبي فيك خلينا انا ببكي وبرجف
المعاو ضحك امي قالت ليو عليك الله خليها وامسحها في وشي ياولدي رفع السلاح على امي وضربه بي طرف السلاح في وشها لما وشها جاب دم انا قعدت اكورك خليها عليك الله خليها في مقام امك حرام عليك خلاص خلاص بجي معاك بس خلي امي آآآآآآسفه معليش وانا ابكي واكورك مافي زول فتح خشمو جر الطرحة جدعه في الأرض وعفصه بي رجلو وجراني من شعري وامي ماسكني من يدي وتسحب فيني منو وتكورك الله يخليك ويرض عليك خليها ياولدي خليها وين سايقها وهو يضرب في امي بطرف البندقية
الزول الماسك الشبكة جا وقف جنبو وقال ليو خليهم داك ولا اشتغل بيو وقال ليو ماتتدخل
الماسك الشبكة رفع السلاح عليو وقال ليو قلت ليك خليهم جو كم دعامي كانو معاو في الشبكة ورفعو السلاح واحد ضرب طلقة في الهوا وقال ليو نزل سلاحك
دا لما حسه انو هو مابقدر عليهم فكاني والمعاو جا رفع سلاحو في سيد الشبكة سيد الشبكة ضرب نار انا اضاني لما صنت وختيت يدي في اضنين وقعت في الارض اكورك امي حضنتي وقعدت تبكي ونحنا نعاين
الاتنين اتحركو وفاتو الماسك الشبكة قال لينا قومو
قمت وقومت امي مشيت على الطرحة وانا برجف عايزه ارفعه رفعة لي الماسك االشبكة ومدها لي شكلو ماداعامي لانو واضح من شعرو اظن مواطن وشغال في الشبكة والمعاو ديل دعامة اظن شغال معهم لانو شكلو مابشبه الدعامة لابس كاكي وتيشيرت اسود وشعرو عادي وحتى شكلو عادي تحس بيو شكري ولا جعلي ماعارفه
رفعت تلفوني على اتصال من محمد رديت وانا برجف حاولت اخلي صوتي طبيعي قال لي حولت ليكم القروش والأشعار قلت ليو تمام وقفلت منو التلفون ولقيت الأشعار امي كانت تمسح في الدم بطرف توبة زعلت زعل ودموعي دي عشره عشره كان نفسي اقتلو معقول ديل يقدرو يحكمو ويمسكو بلد لاعندهم احترام لا كبير ولا صغير حسبي الله ونعم الوكيل فيهم مسكت امي من يدها وقعدتها في مقعد من المقاعد واتحركت على سيد الشبكة بعد مالفيت الطرحة في وشي شاف الأشعار وهمس لي قروشك دي كتير وانا مابقدر اديك ليها هنا زي ماشايفه وعاين في القاعدين كانو في كم دعامي وهس لي ديل أمكن يلحقوكم وبشلو منكم القروش قال لي شايفه البقالة ديك قلت ليو اي كانت في بقالة كبير جنب الشبكة
قام قال لي امشي وخليهم يشوفو الأشعار وقالي لي يختو ليك القروش في كيس قديم ولا شوال
اتحركت على امي
ومشينا على البقالة البقالة كان فيه ولد عمرو بكون ١٥ سنه وفي باب جوه البقالة فاتح في بيت شاف الأشعار وشال التلفون ومشى لي سيد الشبكة اتكلم. معاو وجا راجع مد لي التلفون وقال لي تعالي جوة قلت ليو مستعجيلن جيبهم هنا قال لي مابقدر اديك ليهم هنا زي ماشايفه الوضع قلت ليو تمام واتحركنا انا وامي ودخلنا لقينا راجل نايم ليو تحت شجره ومعاو وحده سلمنا عليهم الولد مد التلفون لي الراجل الراجال قام ودخل جوه غرفة وجا طالع شايل القروش وقال لي ولدو جيب شوال قديم الولد جابو قال لي هاك احسبي المبلغ امي قالت ليو مابحتاج قال لي امي معلش احسبوها الحق حق حسبتهم وبعدين شالهم مني وختهم في الشوال وجاب أكياس قديمه ختاهم من فوق مد لي الكيس شلت القروش واتحركنا امي قالت لي فكي الطرحة من وشك الناس دي مابتفهم فكيتها وشلت لي كمامة لبستها واتحركنا وصلنا السوق ونحنا داخلين في دعامي واقف جنب عربية شحن كبيره مليانه بضايع مسروقة شافني قال لي لابسه كمامة ليه وكان شكلو يخوف رابط زخيره في نصو وشعرو الطويل هدوم الجنجويد الوسخانه البوت الطويل البيجي والحجاب الفي اليد والرقبة قلت ليو من الغبار عندي حساسيه قال لي بلا غبار يابنت ..... انت وحده بنت ...... فكي الزفت وجا علي رافع السلاح ويكورك تحس بيهم عندهم عقده ولا نقص ماعارفه وانا ارجف العجب امي رفعت يدي على الكمامة عايزه افكها جا وقف جنبو واحد خليتو يتكلم معاو واتحركنا كويس كان في زحمة
امي اشترت ليه خضار ولحمة واتحركنا على موقف الحناطير وركبنا حرفيآ انا وامي مصدومين من البحصل معقول ديل بشر حسبي الله ونعم الوكيل كنا ساكتينا لما وصلنا دخلنا البيت امي قالت لي الا نشوف طريقة نطلع بيها نشوف لينا عربية ونشوف كم اسره ونسافر معهم الناس ديل مابشر ومستحيل الزول يعيش معهم انجدعت في السرير كنت تعبانه على خايفه
قعدت افكر اسه لو ساقني نمت وانا افكر في الوضع صحتني امي لي العشاء قمت قعدنا ناكل ونحنا سامعين صوت الحفلة الشغاله وصوت السلاح امي قالت لي حسبي الله ونعم الوكيل فيهم قلت ليه اسه لو دخل الجيش البتزوجهم ديل بعملو شنو قالت لي بخليهم وبهروبو حسبي الله في الاهل البيبيعو بناتهم عشان القروش
خلصنا صليت ورجعت نمت في السرير لقيت في رسالة في الواتس من محمد لما كنا في الشبكة اظن رسله
شفتها كان كاتب لي القروش دي خلوها معاكم عشان أمكن تشوفو ليكم عربية وتشوفو ليكم كم اسره وتتشاركو وتدفعو قروش العربية
قفلت التلفون ورجعت نمت صحيت الصباح قلت لي امي نشوف عربية من وين اسه امي قالت لي والله ماعارفه الا كان نسأل محمد اخوك قلت ليه خلاص نفطر ونمشي الشبكة قالت لي تمام
قالت لي امشي البقالة جيب بن وسكر لبست لي توب غطيت وشي وطلعت وانا طالعة لقيت الولد الفي الشبكة رجعت خطوات لي ورا وجريت دخلت البيت وقفلت الباب وقف جنب الباب وقلبي بضرب شديد امي على صوت الباب جات قالت لي بسم الله مالك قلت ليه ولا حاجه شفت لي كلب وعلى صوت كلب الباب ضرب نطيت لي فوق من الخلعة وختيت يدي في قلبي امي قالت لي افتحي الباب قلت ليه لا ماتفتحي قالت لي قولي بسم الله وقالت لي كدي زحي لي من الباب زحيت من الباب امي فتحتو كانت مره سيد البقالة انا لما جريت نفس سلمت ودخلت وانا ختيت يدي في قلبي ودخلت معهم امي قالت لي وينو البن والسكر قلت ليه بجيبهم بعد شوية المره لما طلعت طلعت معها وصلت البقالة وجبت الحاجات واتحركت على البيت جا موتر ماشي سريع قرب يضربني زحيت سريع لما السكر وقع مني في الأرض وطرف توبي مسكو الزول السايق الموتور خنقني بيو التفت لقيت الدعامي الفي الشبكة قال لي جريت مني وهو يضحك الليلة الموت جاك وانا احاول اتفكه منو نزل من الموتر وهو ماسك طرف التوب كل خطوة علي بلف التوب في يدو وانا ارجف قلت ليو وانا بتمتم انا انا عملت شنو ضحك قال لي جاسوسة قلت ليو لا لا والله ماجاسوسة رفع يدو وخنقني حاسه روحي طلعت في يدو سحب التوب من وشي عاين فيني مسافة رفع يدو من رقبتي واضحك قال لي عرسنا قريب رفع السلاح وضربو في النار وركب الموتر واتحرك انا دموعي جارية عاينت لي السكر رفعتو وصلحت توبي وجريت البيت ارجف
وصلت البيت ودخلت حاولت اكون طبيعة واتحركت ختيت الفطور فطرنا امي قالت لي ارح الشبكة قلت ليه نشوف شبكة غير دي قالت لي ليه قلت ليه ساي قالت لي ساي كيف يعني في شنو قلت ليه مافي حاجه شايفها خافت قلت ليه خلاص تمام مابقدر اخليها تمشي براها ارح
وطلعنا وانا خايفه خوف وارجف من الخوف وادعي انو الله يحمينا منهم
وصلنا كان في بيت فاتح على الديوان الفيو الشبكة وشايفه الولد الدعامي معاو وحده دخلو على البيت حمد الله ودخلت وانا مطمنه وقلت انشاء الله مايجي الا نحنا نطلع مديت التلفون لي وحده قاعده ولابسه ضيق شديد مديت ليه التلفون فتحت لي الشبكة اتكلمنا مع محمد قال لينا في عربية طالعة فيه كم اسره انا اتفقت معهم في الأيام الجايه بتطلع تعالو الشبكة يومي عشان اقول ليكم بتحركو بتين ونحنا بنتكلم جا الولد كنت قاعده وشي على باب الديوان سريع التفت عشان مايشوفني
قلت لي امي ارح نطلع قالت لي اتصلي لي على خالاتك قلت ليه أمي ياخي ارح قالت لي مالك انتي من الصباح وحالك ماعجبني قلت ليه تمااام جاي وشلت التلفون اتصل رفعت التلفون لقيتو واقف جنب الشجره شايل ليو سجايره ويعاين غمضت عيوني سامعه يضحك الخط فتح من الخوف قلت امشي امشي امي قالت لي شنو هو البمشي سامع صوت ضحكو حرفيآ كده عمل لي رعب مع انو عندو اظن ١٦ سمعتو يغني فتحت عيوني سريع لقيتو يغني و رافع تلفونو اظن يصور في فيديو مديت التلفون لي امي وشلت الكرسي وحركتو واديتو ضهري وانا ارجف سامعة صوت حاجة تتجرا في الأرض وتضرب كل شوية التفت لقيتو جاري السلاح وكل شوية يضرب فيو في الأرض وجاي علي ويبتسم زحيت الكرسي على امي ومسكت طرف توبة جا ماري بي جنبي وقال لي اسه بتجي لي و دخل الدوان
امي نزلت التلفون وقالت لي اظن فصلت امشي ليهم قلت ليه ارح لي بكرا تمي كلامك وقمت
قالت لي يابتي خالتك قالت لي فلانه ولدها قتلو الدعامة الله يرحمو وحسبي الله ونعم الوكيل فيهم وعايزه تمليني رقم ليها عشان اعزيه قلت ليه لي بكرا شالت التلفون واتحركت على الديوان وانا منتظرها اتاخرت
مع انو الشبكة فيها نسوان ورجال لما شفتها اتاخرت خفت عليها قلت خلاص الا كان عمل فيها حاجه جريت جري الديوان لقيتها واقفه كان في الولد ومعاو تاني واحد والبنت وفي كم راجل قاعدين في سراير وهو ماسك التلفون ويفتش فيو وامي واقفة جيت عليهم من شافني همس لي الجنبو وضحكو وقفت جنب امي قلت ليه خلي لي بكرا قلت لي الولد جاي التلفون عاين فيني وقال لي المره دي قالت افتح ليه الشبكة
قال لي امي انا غيرت اسم الشبكة ودقيقه بس امشي اقعدي برا وخلي البنت دي بتجيبو ليك
همست لي امي شيلي التلفون وارح امي قالت ليو جاي التلفون عاين فيني كنت برجف مد لي امي التلفون واتحركنا لقيتو فتح ليها الشبكة امي رجعت اتكلمت
قفلت التلفون ومدتو لي وقالت لي ارح رفعت التلفون على صوت رسالة في الواتس لقيت من رقم مسجل بي محمد عاينت في الصوره كانت صورة الولد الدعامي ولا شفت الرسالة فيها شنو مسحتها وحظرت الرقم واتحركت طلعنا ونحنا طالعين من الديون الولد المعاو قال لي امي دقيقة تعالي معاي وقف معاها وانا أعين فيهم امي مدياني ضهرها احس بي يد سحبتني لي برا الشارع التفت سريع لقيتو الولد قال لي يعني عاملة راسك قوي انا بعرف كيف اجيبك ورفع يدو وطاخ كفتني قال لي يابنت ..... أنا بقتلك بي يدي دي فاهمة ولا لا واسه لو عايز بقتلك بقتلك بس حاب اتموضع بيك شوية رفع سلاحو وخته لي في راسي وقال لي فكي التوب دا من وشك وكورك سريع يلا زحيت التوب من وشي وانا برجف نزل سلاحو وضحك واتحرك
امي جات وانا مسحت دموعي سريع واتحركت وادعي الله يمرقنا من هنا وصلنا البيت اليوم انتها بعد المغرب سمعنا الباب يضرب امي فاتت فتحتو لما عاينت لقيتو الولد الدعامي ومعاو واحد وشايلين اسلحة في يدينهم....يتبع