رواية بينهما الفصل العشرون 20 بقلم ال زهراء
وُد موش وفاق مشت لبيت عمتها قبل كم شهر اسي جات وبطنها كبيرة وقالت حامل بسس بطنها دي ما بطن حمل قولت ليها جد مالها؟؟!، قالت لي ما عارفة اوصف ليك كيف !!!، قولت ليها نرجس حا اجي اشوف بنفسي وفاق دي شكلها بتكذب .
وصلت ليهم لقييت همام قاعد ومحتار ونرجس برضها عاينت لوفاق الكانت مبسوطة!!!، جييت بعليها قولت ليها ممكن افحصك، قالت لي لااا، قولت ليها بهمس وفاق انتي عارفة نفسك ما حامل بس شكلك ما قادرة تصدقي انو دة مرض، عاينت لي ودمعت وتاني قالت لي لااا انا حامل انااا....، قاطعتها وقولت ليها وانا بصرخ دة ما حمل ديل سوائل في البطن !!!عارفه السببها ليك شنو ولا للأن ما فحصتي، قامت وبقت تقول انا بقول ليكم حامل وتاني جات لهمام ومسكت يدو وقالت ليهو وعيونها غريبات رجعني يا حبيبي انا طلعت حامل، البت دي جنت رسمي!!!، همام بقى يعاين لنرجس ونرجس لهمام ،انا من بعيد أشرت ليهو انو يمشي القصة عشان ترضى تمشي الدكتور ويعرف السبب شنوو،قال ليها وفاق اسي ارتاحي وانا حا امشي معاك بعدين الدكتور نفحصك،قالت ليهو ما دايرة فحص بقت ما بتجيبني دورة واي علامة في الحمل عندي انا حامل يا همام.
قال ليها طيب لازم نطمن على الولد صاح، قالت ليهو طيب تمام، بعد مشت انا انتهدت تنهيدة طويله وقولت ليهو همام دة استثقاء ومن اعراضو بسبب الاستفراغ والدوخة!! ووفاق دي انا متأكدة انو عارفة نفسها ما حامل بس اوهمت روحها وعاشت في الوهم دة بس عشان يكون عندها امل ترجع ليك ،لازم تتعالج احتمال كبيير سببو يكون سرطان في حتة المبيض ولا يكون مجرد عدوى ولا يكون مشكلة في الكبد ما معروف لسه بس لازم نعرف، في الاثناء دي مظفر جاء وسلم وقال لي وُد ممكن دقيقة من وقتك، عاينت ليهو وقولت ليهو طيب ،مشيت معاه، قال لي أحمد رجع لي كل القروش، قولت ليهو احمد صاحبك ولا واحد تاني غيرو قال لي اي ياهو ،قولت ليهو لشنو رجعهن، قال لي لانو سرقهن، قولت ليهو وانت شلتهن وما سجنتو لو انا كنت سجنتو، قال لي هو عندو شفع، قولت ليهو والله لو عندو مية اسجنو بتهمة الاحتيال وكمان هو ما احتال عليك في القروش هو....، سكتا وما قدرت أتم، قال لي كان تكملي انا ما بزعل بس انا راعيت لمرتو و اولادو ، قولت ليهو طيب مفروض يرجع كل القروش سوا قروش الأرض ولا قروشك، قال لي رجعهن كلهن واديت قروش الأرض لهمام عشان يشتري بيها قطعة جديدة وقروشي انا حا اسافر بيهن، قولت ليهو ما الأفضل تشتري بيهن صيدليه واحدة ،يعني زمان انت كنت داير تبني 3 بس الأفضل انو تبدأ شوية شوية الاستعجال عمرو ما كان كويس، ما تتهور، قال لي لا عايز اسافر، المهم حا انتقل للموضوع العايزك بيهو ،انااا اسف على اي حاجة بتمنى انو تلقي زول يعوضك اي آلم سببتو ليك ،انا ما بستاهلك وعمري ما حا اسامح نفسي اني خسرتك،قولت ليهو ما تتاسف خلاص الماضي بقى ماضي وانا بس عايزة اعاين للمستقبل حا اقرا تاني صيدلية وحا اشتغل في المستشفى في ان واحد، قال لي انتي ما حا تقدري تتحملي!، الصيدلة مع شغلك صعبة ،قولت ليهو بقدر!!!، قال لي لا ما بتقدري وقفي شغلك ،قولت ليهو ابييت اهااا عايز تتدخل في قراراتي، قال لي ماسكة في كلمة وحلفتي ما تفكي منها قراراتك دي حا توديك في داهية ،قولت ليهو مظفر موش انتهيت كلامك مع السلامة ،عاين لي وقال لي وُد ما انا الزول البختصرو كلامو، قولت ليهو بقييت منو عشان ما اختصر كلامك عايز تعمل مشاكل معاي موش انا مستعدة ،قال لي انتي شكلك عندك حاجة جواك وعايزة تفضيها فيني ،قولت ليهو اي عندي عندك اي اعتراض ،ضحك وما رد، نرجس جاتنا وقال لي همام قال ليك ورح معانا، قولت ليها قولي ليهو جاية،مشت عاينت ليهو وقولت ليهو تصل بالسلامة للحتة الماش ليها وتاني مرة ما تجادلني في حاجة بتخصني ولحدي هنا وكفاية.
مشيت وما التفت نهاي وراي لانو عارفة لو التفت حا أضعف!!،في الطريق نرجس قالت لي انتي كويسة ،قولت ليها اي ظاهر علي ما كويسة ولا شنو ،قالت لي ما عارفة بس زي الزعلانة، مظفر قال لي كلام ما عجبك، قولت ليها ما قال اعتذر بس، عاينت لي وقالت لي استسلم يعني ،قولت ليها اي مفروض من زمان يستسلم اصلا ،قالت لي طيب بعد كدة ركزي مع نفسك واعتذري لعلي اعتذار صادق لانو اسي انتي كسرتي علي زي ما مظفر كسرك ،عاينت ليها وقولت ليها انا فهمتو بالهداوة بس ما عايز يفهم اعمل ليهو شنو، قالت لي حاولي اتكلمي معاه مرة تانية وفهميهو شوية شوية.
لمن وصلنا دخلتها دكتور نساء وتوليد وتاني انا بقييت افتش في علي، مما شافني جاء بعلي قولت ليهو لشنو قفلت الخط في وشي، قال لي كنت خايف اغضب واسيء ليك ،عاينت ليهو وقولت ليهو ممكن اتكلم معاك، قال لي طيب بس عندي عيان عايز امر ليهو، قولت ليهو طيب بمشي معاك، في الطريق قال لي المريضة بتاعت زايدة بس زايدتها انفجرت والعمليه كانت صعبة ونجت باعجبوبة وكمان معاها سكري، وحاليا الجرح لسه ما برا عشان نقدر نخرجها، قولت ليهو لو عملتها انت انا واثقة انو حا تبقى كويسة، بقى يسال فيها قولت ليهو ممكن اشوف الجرح شوفتو قولت ليهو زي المتورم شوية ما يكون ملتهب، دقق فيهو شوية وقال لي شكلو كدة!!، كتب ليها علاجات، وقال ليها من اليوم انا الحا انضف ليك الجرح دة.
طلع قولت ليهو علي اها انتهيت ،عاين لي وقال لي اي وريني عايزة تقولي لي شنو؟؟!، قولت ليهو انا انجبرت على عرسي من مظفر وتاني حبيتو ما اكذب عليك بس هو كسرني كسرة شديدة ،ويادوب بحاول استعيد نفسي وما اظن بقدر اقدم ليك حاجة!، انا ما عايزة اكسب غير نفسي الفترة دي ،وأنت ضغطت علي ضغطة شديدة انا مقدرة وقفتك معاي ولمن اموت ما بنساها بس ما بقدر اردها ليك بالزواج منك لانو كدة بظلم نفسي وبظلمك معاي ،قبل ما اتزوج مظفر كان عندي احلام وطموحات عايزة اصل ليها واسي حا ارجع لاحلامي دي ،انت صاح ما عائق ليهن بس ما مستعدة انو اكون أسرة حالياً فاعذرني ،قال لي بنتظرك، قولت ليهو لا ما تنتنظرني ما عارفة بقدر متين اتخطىء، قال ليي وُد العمر ماش يا ترجعي لماضيك ولا تفكري في مستقبلك وليك الخيار، قولت ليهو حا افكر في مستقبلي بس من غير اي راجل في حياتي،اتنهدت وقال لي للدرجة دي بقت ما عندك ثقة، قولت ليهو اي هو زي الكان معشني في حلم وصحاني منو بابشع طريقة!!.، قال لي طيب انا حا احترم قرارك، قولت ليهو ما تحترم قراري بس سامحني كمان ،قال لي انا مسامحك انا ختيتك قدام الأمر الواقع بدون ما اديك مساحة للتفكير ،اتنهدت وقولت ليهو طيب انا حا اجي اعتذر لأهلك كمان ولكل الناس ،قال لي ماف داعي، قولت ليهو لا حا اعتذر.
رجعت لناس نرجس نرجس قالت لي الدكتور قال انو عندها ورم في المبيض انتشر وعمل ليها تراكم في السوائل في البطن ومحتاج شفط ،قولت ليها لا حول ولا قوة الا بالله العلي العظيم دا آخر الزول البياري الدجالين.
بعد مرور سنتين :
للاسف وفاق اتوفت بسبب المرض!! وهمام كان معاها كل الفترة دي ،واتاثر بوفاتها في النهاية هو كان بحبها!!، ونرجس بقت معاه وما خلتو نهاي، لمن قدر يتجاوز ويعيش معاها!!، بالنسبة لي انا قدمت عشان اقرا صيدلية وقبلوني في جامعة خاصة!، المهم بقييت امشي المحاضرات وتاني اجي اشتغل في المستشفى!!.
مظفر سافر ولمن سافر رسل لي انو عايز يودعني بس انا رفضت وما مشيت ليهو واعتبرتو دة عقاب ليهو.
ابوي من بعد السحر اتفكا بقى شغال بينا ورجع عايش معانا في نفس البيت وودى رحمة مستشفى المجانين واخواني بقو عايشين براهم زي العزابة وانا كنت ولا رماز بنمشي ليهم وبنطبخ ليهم وعرفناهم اكتر وبقينا زينا زي اي اخوان وفي النهاية انا قررت ازوجهم عشان يستقرو ورشحت ليهم زميلاتي والاتنين وافقو والعرس حا يكون بعد 6 شهور، كل دة وانا بفكر فيهو وانا ماشة احضر جلسة نرجس الأخيرة!!، لمن وصلت لقيت خالتو برة جات وقالت لي لي كم زمن منك قولي بقيتي ما مرة ولدي بس دة ما بخليك تجافيني كدة ،قولت ليها اعفي لي انا والله مشغولة!!، قالت لي عافية ليك بس زوري امك تاني ،قولت ليها إن شاء الله ،بقت تتونس معاي وتاني قالت لي مظفر فتح ليهو صيدلية هنا، قولت ليها ما شاء الله اتوفق يعني ،قالت لي اي، قولت ليها الحمد لله ،قالت لي اي الحمد لله بس مناي اشوف اولادو ما ترجعو لبعض ،قولت ليها مستحيل شوفي ليهو واحدة تعرسو، مسكت يدي وقالت لي رافض يعرس بس لو رجعتي ليهو ما اظن يرفض، قولت ليها وانا ما برجع ليهو، اتنهدت وقالت لي ما بجبرك بس بدعي النصيب تاني يجمعكم.
دخلنا المحكمة ونرجس شوفتها مقلقة شديد وهمام جنبها!!، وخالها ومرتو قاعدين في جهة براهم وعايزين يموتو من التوتر في النهاية دا ولدهم الوحيد وسط اخواتو.
المحامي قدم دلائل كتيرة وكلها في مصلحة نرجس ولحسن الحظ كان في مقطع صوتي مسجل باعتراف حسام باغتصباها ودة القوى الادلة زيادة ،القاضي قام وقال حكمت المحكمة تحت المادة 149 اغتصاب بالسجن لمدى الحياة وغرامة قدرها.....، نرجس دي بقت تبكي بكاء شديد وهمام كان ماسك يدها القضية دي جرت جر شديد والحمدلله اخيرا العداله انتصرت ،كل الأطراف كانو عايزين يخفو الحقائق بس في النهاية كلهن ظهرو.
طلعت برة وبقييت اسلم على نرجس وتاني شلت منها بتها الحلوة وبقييت اسلم عليها هي طبعاً ولدت بعد تعب بنوتة واكيد سمتها علي ههه.
قالت لي خليها معاك انا ماشة الملم بكرة مسافرين عمرة ،قولت ليها دي شنو المفاجات دي ،قولت ليها دة همام فاجني شكلو عشان المرة الفاتت مشى براهو فحس بالذنب ،قولت ليها حس بالذنب ولا قعدتي تنقي فيهو ضحكت وقالت لي لا والله انا ما كعبة للدرجة دي، ضحكت وقولت ليها بتك صغيرة بتستحمل ،قالت لي اي بتستحمل ما تخافي.
_____________________
بلسان همام
وصلنا هناك ولاقينا مظفر وهو بقى يشيل ويبوس فيها وقال ليها إن شاء الله تكوني شايله الاسم بس ما تبقي عنيدة زيها ،ضحكت ،نرجس جات وقالت الاكل جاهز تعال، قال ليها أكلو انتو انا بس داير العب مع العسل دي، قولت ليهو لا تعال اكل معانا جاء واكل.
بعد كم يوم وانا في الكعبة الشريفة وحاضن وُد علي قولت يا رب العالمين دي الدعوة الدعوتك بيها وانا ببكي المرة الفاتت واسي جبتها لبيتك!! ومعاها امها ،بشكرك يا رب العالمين وبحمدك على نعمك التي لا تعد ولا تحصى وبحمدك انك استجبت لي دعائي وخليت عيني تقر ببتي،نرجس جات وقالت لي انت بتدعي بشنو ؟؟!، قولت ليها سر!!، قالت لي كلمني، قولت ليها بقول ليك سر! سكتت مسكت يدها وقولت ليها ورح عشان الوقت ، بقينا ماشين قالت لي انا طول عمري بحلم بعمرة مع شريك حياتي وحلمي اتحقق إبتسم ليها وقولت ليها وانا مبسوط انو انا هنا مع شافعاتي الاتنين، إبتسمت وانا إبتسمت.
رجعنا لمظفر طوالي استلم وُد قولت ليهو انتي بتحبها عشان هي بتي ولا عشان مسميه على وُد حبيبتك، قال لي الاتنين، نرجس قالت لي ولا بخجل ضحكت وقولت ليها طول عمرو مظفر ياهو مظفر ،قالت لي اي والله نفس الوش المتجهم داك، قولت ليها اي ونفس الطباع ضحكنا الاتنين.
بعد مرور 6شهور :
و انا مجهز نفسي عشان امشي الشغل جييت بعلي وُد ولقيتها تلعب في الأرض من استعجالي ما شاغلتها ولا شلتها وصلت للباب بقت تبكي بكاء شديد عاينت لقيتها حصلت نص المسافة وشكلها لمن شافتني ما التفت زعلت ،جات نرجس وشالتها وقالت دا ابوك الثقيل صاح!! زعلك خلاص ما تبكي!! وتاني عاينت لي وقالت لي ما شوفت حركاتها القبل شوية والفرحة لمن شافتك كان تشيلها ،قولت ليها ما لاحظت، قالت لي تلاحظ هي بتزعل عارفها غشيمة زيك ، قولت ليها والله انا ما كدة نهاي دي انتي، جيت لعندها وشلتها وبقيت ابوس فيها وهي تبكي وانا بقيت شغال ليها معليش يا حبيبة البابا سكتت بعد مسافة وتاني بقت متمسكة بي نرجس قالت لي تاني ما بتفكك هي متعلقة بيك عارفها ،قولت ليها حاولي معاي قعدت وقالت لي تدفع كم؟ ؟!، ضحكت وقولت ليها حركات الشفع ديل خليهن اسي، قالت لي همام!! انا جادة، قولت ليها طيب عايزة شنو، قالت لي وقت لينا بقيت مشغول طوالي وما فاضي، قولت ليها عشان منو ما عشانكن، قالت لي همام ما للدرجة دي لكن، قولت ليها طيب يا نرجس تاني ما بخليكن تشعرن بالشعور دة ،قالت لي خالتو برضو حاسة بنفس الحاسنو 😑 انا حا اقتلك والله لو في يوم بقى شغلك اهم من أسرتك، قولت ليها طيب طيب فهمت قربت ليها وبوست جبهتها وقولت ليها ماف اهم منكن ،عاينت لي وقالت لي يبقى توفي بوعدك وتخصص لينا وقت ،قولت ليها تمام.
شالت مني وُد ووصلتني للباب وحضنتي وقالت لي أخيراً لقيت فرصة أفضي فيك ،ضحكت وقولت ليها والله انا لي اسبوع أقول مالها نرجس دي وكنت داير اسالك بس قولت احتمال هرمونات، قالت لي همام انت شكلك مشتاق لأمك وعايز تبيت معاها ،ضحكت وضميتها وقولت ليها مشتاق اي بس ما عايز انطرد مع السلامة باسنتي في خدي وقالت لي طيب لو ما عايز تنطرد ما تتكلم كلام فارغ، قولت ليها تمام.
بالمساء كدة اتصلت بي نرجس وهي بتبكي وقالت لي الحقنا وُد ما قادرة تتنفس، قولت ليها وديها المستشفى انا جاي ما تنتظريني، قالت لي ما قادرة اتصرف براي ،قولت ليها نادي ميسم ،قالت لي طيب.
مشيت المستشفى وعملنا فحوصات طلع عندها ثقب في القلب وقالو العمليه صعب تتعمل هنا الا في الهند واحتمال نجاحها بسيط نرجس اغمى عليها طوالي وانا بقييت بعاين لبتي الما قادر اخفف عنها...............
_________________________
شُجاع من يرحل،
وهو لديه رغبه شديده بالبقاء.