دخلت البيت لقيت بنت المره في الشارع جنب الباب تعاين في الأطفال البلعبو وهي واقفه تعاين فيهم قلت ليه العبي معهم قالت لي مابخلوني العب معهم مسكتها من يدها ومشيت على الأطفال وخليتهم يلعبو معها اتحركت على البيت لقيت امي والمره في المطبخ يتونسو امي تعمل في الملاح والمره تعوس امي سألتني من محمد قلت ليه كويس الحمد لله كانت في عده وسخانه في المغسلة وقفت غسلتها ختو الفطور المره شالت لي راجلها الراجل من شاف الاكل سأله من وين جبتي القروشش
انا كنت ماشه على الحمام وسمعتهم قالت ليو والله المره وبنتها ادوني قروش وحلفو علي قال ليه ماكنتي تشيل منهم هم ضيوف عندنا ولو بي البسيط بنكرمهم
صح كلامتو كانت بسيطه والله من سمعتها دمعت الحمد لله لسه في ناس عندهم رحمة في قلوبها
طلعت من الحمام ومشيت المطبخ قعدت مع امي المره جات قمت ختيت الفطور وافطرنا رفعت الصينية وغسلتها امي عملت القهوة
قعدنا مع المره شهر كامل وكانت نعم الأخت والأم طيبه وحنينه شديد كنا بندخل ونطلع مع بعض شاركتنا حتى ملابسه
كنا بنمشي الشبكة طوالي انا وامي محمد اخوي كان بقول لينا لسه العربات قالو عايزين يعرفو ناس القرية الموجوده في الحصاحيصا ويحصرهم ويشوفو المسافر منو عشان يرسلو العربات على حسب الناس وكانو محتاجين زول يسجل الناس المسافره قلت لي محمد انا ممكن اسجل ليكم الناس الفي الحي الهنا وقال لي تمام وفعلا طلعت ولفيت الحي مشيت لي الناس الكانو من قريتنا كان اغلبهم فقدو ليهم ناس البقول ليك قتلو والبقول ليك مالقينا والبقول ليك خلينهم ورانا في القرية
رجعت البيت ومشيت الشبكة لما دخلت لقيت الولد العمرو ١٦ سنه ومن شافني ابتسم كان لابس طاقية من سعف ولابس لبس الدعامة وشايل سلاحو
انا قلت لي وحده ممكن تمدي ليو التلفون مدتو ليو وقفت بعيد فتح لي الشبكة ومديت ليو القروش اتصلت بي محمد وقلت ليو الناس المسافره وسالتو من الناس المفقوده قال لي عملنا قروب ونزلنا فيو الناس المفقوده
وانا بتكلم الشبكة فصلت
اتوكلت ومشيت لي الولد لقيت قاعدات معاو بنات وبتونسو وبضحكو قلت ليو الشبكة فصلت قال لي قررت اعمل الدقيقة بي الف جنيه قلت في سري حسبي الله عليكم انا متاكدة انو الشبكة دي سرقنها
مديت ليو القروش البنات المعاو قعدو يضحكو شال مني القروش وفتح لي الشبكه كان مسجلة بي ام عيون شلت تلفوني واتحركت رجعت لي محمد قال لي عايز ارسل ليكم قروش قلت ليو الا اشوف اذا عندهم كاش ولا لا قال لي اساليهم اتحركت سألت الولد قال لي لو عندنا مابنديك ومسك سلاحو انا قلبي عايز يقيف من الخوف طوالي رجعت قعدت مع النسوان في الحوش ورجعت لي محمد كلمتو قال لي لما تلاقي ليك بنكك وكاش ارجعي لي قبل ما ارد ليو الشبكة فصلت قعدت اتحسبن عليو ولد تافه وحقير وحيوان قمت طلعت وانا طالعة سمعتو بضحك بصوت اتحركت البيت وادعي فيو
وصلت البيت امي سألتني من محمد كلمتها ونحنا بنتونس جات اخت الراجل المره القاعده في البيت التانيه وقالت لي اخوها اسمع هنا عندنا أهلنا جاين وعندهم ولد مضروب وانا عايزه اقعدهم في الصالة عندك وعاينت فينا وقالت لي امي شوفو ليكم مكان تاتي معلش واتحركت فاتت
امي قالت لي ارح نطلع الراجل قال لي امي معلش اعفي لي زي ماشايفه انا وضعي كيف امي قالت ليو ماقصرتو والله في ميزان حسناتكم
مرتو زعلت زعل وقدر ما حنست امي عشان تقعد امي رفضت
امي نفسها عزيزه شديد
المره طلعت لينا عبايات وتياب وشنطة
امي قبل ما تطلع عصرت ليه قروش وطلعنا ماعارفين نمشي على وين وخصوصا المغرب دخل
قلت لي امي مافي حل الا نفتش لينا بيت فاضي مابنقدر على الزلة ووجع القلب و لما ربنا يسهل ونقدر نسافر
قالت لي كانو في ناس طلعو الليلة سافرو شندي قلت ليه ماكلمتيني كنا بنسافر معهم قالت لي كانو عايشين في البيت مع اخت الراجل المعاق واناعرفتهم مسافرين من الراجل المعاق
قمت مشيت عليهم قلت ليهم مسافرين بي شنو قالت لي قالو لي عربية اجروها قلت ليهم ممكن ندفع معاكم قالو ليه مافي مكان قلت ليهم ربنا يسهل طريقكم وقالت لي لما طلعو يسافرو العربيه كانت فاضيه وزعلت زعل وقالت لي الحرب دي ماقامت ساي الناس نفوسها كعبه شديد قلت ليه فعلا وقفت جنب بيت ضربت الباب فتحو وسألت ناس البيت اذا في بيت فاضي ولا لا وقالو مافي لفينا لف وفي النهاية قعدنا في الشارع وفي الأرض جنب سيد بقالة
عايزين نموت من التعب وامي تبكي ساي
سيد البقالة جا علينا وبعد ما سلم سالنا قلنا ليو عايزين بيت فاضي قال لينا في بيت اخوي والله قعدتكم ماعجبتني يلا قومو معاي وقمنا قال لي ولدو وصلهم لي ناس البيت وقول ليهم اكرموهم وقول لي امك افتحي ليهم بيت عمك الولد كان عمرو ١٣ قال لينا ارح امي شكرتو قال ليه انتي في مقام اختي الكبيره وبتك بتي مامعقول تقعدو في الشارع واتحركنا مع ولدو وصلنا دخلنا سلمنا على المره اكرمتنا وقالت لينا ارح اوريكم البيت وطلعنا كان قريب من بيته وسبحان الله في نفس الحي وقريب من الشبكة اتحركنا على البيت وقالت لينا لو ناقصكم اي حاجه بيني مفتوح ليكم وقالت لي ولدها امشي جيب سيرمس موية وملايات نظيفه نظفت معنا البيت وفاتت نحنا من التعب نمنا وماحسينا بي نفسنا صحيت الصباح امي قالت لي امشي لي سيد البقالة لو عندو بنكك وكاش لبست توبي وطلعت وانا طالعة جا بعندي موتر وراكب فيو الولد الدعامي الفي الشبكة من شفتو غطيت وشي واتحركت سامعه يضحك رفع السلاح وضربو في الهوا وقال المره الجايه بتكون فيك اعملي حسابك انا جريت وصلت البقالة سالتو قال لي الكاش دا مابتلاقي الا تمشو السوق وصف لي السوق وين
كان بعيد من هنا والا نركب كارو لانو مافي اي عربات سرقهوها الدعامة وركبنها
رجعت كلمت امي قالت لي خلاص نمشي نتصل بي محمد ونكلمو ونتحرك السوق
لبست عباية وطرحة لفيت وشي بي الطرحة وامي لبست ليه توب وطلعنا الشبكة وصلنا شايفه الدعامي قاعد من شافني ضحك قلت لي امي امشي انتي مدي ليو التلفون امي مشت شالت التلفون وجات قعدنا في كراسي بلاستيك في الحوش كان فيو شجر
امي اتصلت بي محمد سلمت عليو وسالتو من العربات قال ليه لسه ماحصرو الناس و انا قلت ليك اشوف طريقة واجي ليكم
قالت ليو يمن الله ماترجع تاني الجزيره نحنا كويسين وماعندنا اي عوجة قال ليه لقيت ليك حساب قالت ليو اي كنت عايزه اكلمك لكن بعيد شوية بنمشي انا وزينب قال ليه المكان امان قالت ليو اي مافي شي الناس قاعدين قال ليه والجنجويد كنت فاتحة الاسبيكر على كلمة الجنجويد جا الولد ماري وانا عايزه اموت من الخوف قلعت من امي التلفون قلت لي محمد اخوي محمد نحنا كويس وانت كيف كنت برجف وبتكلم شايفه الولد ضحك وفات على الصالة وقبل ما اكمل كلامي الشبكة فصلت عرفت دا هو واحد تافه حسبي الله
قلت لي امي ارح نطلع نشوف الكاش قالت لي مالك قفلتي من اخوك قلت ليه الشبكة فصلت قالت لي عايزه اتكلم معاو قلت ليه كويس شلت التلفون وانا متردده امشي ولا والصراحه كده خايفه ومافي شبكة قريبه من هنا الا الشبكة دي ونحنا لازم نتكلم مع محمد اخوي عشان نطلع من هنا اتوكلت ومشيت لقيتو مافي طلعت من الديوان شايفه في الشارع قاعد ليو مع جنجويد اتحركت عليو وقفت عاين فيني وهمس لي الجنبو وقعدو يضحكو جو بنتين لابسات تياب وممكيجات وقعدو يتونسو معهم
واحد فيهم قال لي جاي التلفون نفتح ليك الشبكة مديت التلفون الدعامي التافه قال لي غيرنا اسم الشبكة وعايزين نزيد القروش الدقيقه بي ٥ الف وضحك المعاو ضحكو انا نهاي مافتحت خشمي قام كورك ورفع سلاح وقال لي لما اتكلم ردي قلت ليو ت ت ت تمام و كويس
وقعد يضحك رفع السلاح وضرب في الهوا وطلع طلقه وقال لي افتحي يدك فتحتها ختها في يدي قال لي المره الجايه بتجي في نص راسك والمعاو ضحكو شلت تلفوني وجريت لقيت مغير اسم الشبكة لي الجاسوسة الموت قرب منك
قلت لي امي اتكلمي سريع خلينا نطلع وانا ارجف امي شالت التلفون واتكلمت مع محمد وبعدو قالت لي اتصلي على خالتك شوفي الرقمو داخل منو قعدت اتصل ليه على الاهل
كان في الديوان ياهو حوش وفي غرفة وانا وامي قاعدين في ضل شجره وكنا متجهين على الغرفة جات وحده من البنات الكانو قاعدين مع الجنجويد ودخلت الغرفه شايفها تعمل ليه في شاي جا الدعامي التافه وقف جنبها ويتونس معها وكانو وقفين بطريقة ما محترمة انا اعاين واستغفر جات البنت المعاها وقفت معهم وانا اراقب في الوضع اسه ديل ماعندهم اهل معقول يقيفو مع أشكال زي دي جا طالع ومعاو البنات وانا مديت راسي اشوف فيهم الكرسي ميل بي وهب وقعت الدعامي التافه عاين فيني وضحك والبنات المعاو ضحكو جات طيارة في الجو وفجأة سمعنا صوت ضربه قريبه من الشبكة اظن برميل وقع قريب من مكان الشبكة انا وامي والناس جرين جري لما طلعنا لقينا وقع ليو في بيت فيو دعم سريع وشايف الدعم جرو على البيت قلت الله ينتقم منكم انشاء الله مافي فيكم زول يعيش
اتحركنا على السوق ونحنا متحركين
في البيوت ابوابه فاتحه وفي الباب معلقين خرفان مطبوحه و في جنجويد قاعدين وجنبهم شبكة لاسلكية زي النمل كتيرين شديد قلت في سري يارب بجي يوم نتحرر منهم
شكلهم ولابسهم حرفيآ مرعب السلاح الفي يدهم والعربات الفيه سلاح والزخيرة الفي نصهم والحجاب الفي جسمهم والشعر الطويل الوسخان عاملين زي الوحوش
وقفنا في نهايه الحي كان ظلط كان في كم ست شاي لابسات ضيق وممكيجات والجنجويد قاعدين معهم عربات الجنجويد الكانت بتجري في الظلط وفي عربات محروقة جنب الظلط
جات كارو ركبنا معاو كان ولد صغير امي سلمت عليو وسلم على امي
امي سالتو من اهلو طلع الولد من قريتنا قال ليه قاعدين هنا في الحصاحيصا وانو كانو قاعدين في القرية بعد دخلو الجنجويد ماطلعو قعدو فيه كم يوم وطلعو امي سالتو من القرية وحكى ليه قال ليه فكو فيها مدافع وفي ناس كتيره ماتت الجثث في الشوارع والبيوت والمساجد والكلاب تاكل في الجثث قال ليه مافي زول قدر يدفن ليو زول الجنجويد منتشرين في القرية
وقال ليه انو دخلو علينا جنجويد بعد ما شالو العندنا قالو لي امي اعملي لينا اكل امي عملت ليهم وانا شلتو ليهم وعملت ليهم الشاي بعد ما اكلو وشربو لمو فيني ضربوني ضرب وقالو لي ماعايزين لينا مخلوق هنا بكرا بنجي لو لقيناكم لسه قاعدين بنفضي فيكم السلاح وقال لي امي طلعنا طوالي
وقال لي امي بتعرفي العريس يوسف امي قالت ليو بتقصد ود احمد قال ليه اي قال ليه اتزوج ليو شهر وكان مع زوجتو في البيت ودخلو عليو ٥من الدعامة وضربو ولما دخلو الغرفة شافو زوجتو الخمسة دخلو عليها في الغرفة وقفلو باب الغرفة وهي تصرخ ومافي زول قدر ينقذها هو دخل عليهم وحاول بس قتلو وهي ماتت امي قالت ليو لا حول ولاقوة الابالله ديل مابشر شواطين كانت بتتكلم معاو وبتبكي والشارع كلو عربات جنجويد والظلط كلو عربات دعم متحركة سريع الناس راكبه الحناطير لي المواصلات والجنجويد راكب العربات والظلط دا مافي حنطور بقدر يمشي فيو لانو عادي ممكن يخشو في الحنطور ونحنا ماشين جا دعامي وقف الحنطور وركب جنبي وانا زحيت جنب امي قال لي مال عندي مرض امي قالت ليو لا العفو مابتقصد وقعد يتكلم مع امي امي ترد ليو على حسب كلامو ركبو معنا كم مره
وهو حراكتو زي الزفت قلت لي امي زحي شويه امي زحت لي وزحت عليه طلع ليو سجايرة وقعد يشرب بعد مسافه نزل ولا دفع لي بتاع الحنطور بعد نزل امي نبزتو نبز وفي كم مره اتكلمو بي البحصل والحصل
في مره كبيره حلبيه ساكت تعاين فينا وصلنا السوق وكان كلو جنجويد يبيعو في عفش الناس والملابس الكريمات والملابس والعده والنسوان تشتري
كانت كل الحاجات مسروقة المره الحلبية من وصلنا السوق كل شوية ترفع يدها لي دعامي وهو يسلم عليه ويضحك وقف واحد جنب الحنطور وقال ليه اها جهزتي لينا الشغل ضحكت وقالت ليو جاهز ونزلت فتحت ليه مطبقة مليان قروش ومدت لي سيد الحنطور والتفت علينا وقال لينا تاني ماتتكلمو ساي عشان لسانكم دا مايتقطع واتحركت فاتت انا وامي عايزين نموت من الخوف اظن المره شغاله مع الدعامة امي قالت لي سيد الحنطور عايزين مكان فيو شبكة نزلنا في الموقف حق الحناطير سبحان الله بعد ما كنا نركب العربات اسه نركب في الحناطير دفعنا ليو ووصف لينا محل الشبكة كانت بعيد شوية واتحركنا الناس دي تشتري من الجنجويد واي حاجه رخيصه
كيلو اللحم يبيعو فيو بي الف جنيه والخضار دا ٣الف يقعد معاك اسبوع وفي جنجويد خاتين زخيره يبعو فيها وكل انوع السجاير وبدر مربوطه في اكيس اظن مخدرات
الحاجات دي كانت عاديه وفي العلن و البنات الواقفات مع الجنجويد البس كيف والمكياج كيف حسبي الله ونعم الوكيل في انتشار الفساد معقول ديل بحكمو البلد ؟
طلعنا من السوق ودخلنا في شارع كلو ستات شاي وجنجويد
والشوارع مجدوع فيه زخيره فاضية وباقي سجاير
جينا بي ست شاي ومعها جنجويد قالت لي الشربات لزومه شنو ومغطيه وشك ليه والجنجويد المعاها يضحكو قالت لي الجماعة ديل ما رضيانين وضحكت وهم ضحكو معها اتحركنا سريع
شايفين لينا مظلة نظام صالة فاتحة وفيها مكتب وفيو كم دعامي وفي صالة تانيه وفيها بنتين قاعدات وفي الاسلكي حق الشبكة ونحنا ماشين عليه جينا مارين بي جنجويد قاعدين ليهم تحت شجره في كراسي سمعت واحد قال اقيفو من قال كده انا قلبي عايز يطلع من مكانو مسكت امي من يدها والتفتنا عليهم قال لي مغطيه وشك ليه أمي قالت ليو عندها ازمه والغبار مابنفع معها قال لي امي بلا غبار بلا زفت وانتظرو هنا ودخل ليو بيت والقاعدين قالو لينا تعالو اقعدو امي قالت ليو مستعجلين وسالونا من وين امي كانت بترد عليهم
جا الدخل البيت شايل ليو صندوق فيو كمامات جدعو لي وقال لي فكي الطرحة دي وتاني لو لمحتك ملفلفه وشك دا بفجر ليك شلت الصندوق عايزه اتحرك قال لي فكي الطرحة والبسي كمامة فكيت الطرحة وانا برجف لبست الكمامة عايزه اتحرك قال لي امي خليها هنا وامشي من قال كده انا قعدت ارجف وقلبي حسيت بيو وقع في رجولي امي قالت ليو اخليها كيف قال ليها خليها عديل كده امي قعدت ابكي وتحنس فيو بعد تعب حتى قدرنا نتحرك منهم لما جا واحد وقال ليو خليهم يمشو واتحركنا انا ابكي وامي تبكي وصلنا الشبكة ودخلنا مديت التلفون وفتح لي مديت ليو القروش امي كانت بتتكلم مع محمد مشيت جبت الرقم الحساب من الدعامي وامي قالتو لي محمد
ومحمد قفل منها عشان يحول وانتظرنا شايف في عربية وقفت ونزل منها جنجويد وفي واحد عاين فيني ودخل الشبكة محمد رجع لينا وقال لي امي الشبكة زفت دقيقة بس العاين لي داك جا ومعاو واحد. وقعدو في الصالة القاعدين فيها كانو في بنتين قاعداتت قام قال لي البنتين اتفكفكو من هنا البنتين قامو وهو قعد ورفع عيونو فيني ونزل السلاح وقال لي انتي من وين انا ارجف امي ردت ليو قال ليها يامره انا ماسالتك
مسكت التلفون ودنقرت فيو قال لي بتكلم معاك وقعد يسأل ونهاي ما رديت ليو مسك السلاح وحركو في الأرض السلاح عمل صوت
الجنبو ضحك امي قالت ليو ياولدي نحنا من .. قال ليه قلت ليك ماتفتحي خشمك وقف وجا وقف جنبي وقال لي فكي الزفت الفي وشك دا وانا ماسكة التلفون وارجف رفع السلاح على راسي...يتبع