رواية ضماد جرح الفصل التاسع 9بقلم نوسه حمد
بعد نهايه اليوم في المدرسه مشيت كالعاده للبشتغل عندها وشكلها هي ماف في راجلها وحسيتو غريب كانو شارب حاجه سالتو من مرتو قال لي قاعده جوه ادخلي ليها دخلت لقيت البيت فاضي هو دخل وقفل الباب وبيتهم جوه يعني لو لمسني وصرختا زول بسمعني ماف قلت ليهو عاوز شنو انت وفهمك شنو قال لي عاوزك انتي وطمعان فيك من يوم شفتك شيلتي قلبي نظافه وسماحه وادب قلت ليهو احترم نفسك شويه انت بدل المره معرس تلاته قال لي بي قروشي اعرس وتعجبني الرابعه واعرسها واعمل علاقه مع الخامسه والسادسه انا زول بحب النسوان حسيتو مريض قلت ليهو تحب النسوان ولا تخليهن انا مالي دخل فيك خليني في حالي قال لي لا انا مستعد اديك قروش كتيره ولا بتحلمي بيها زاتو اخليك تقري القرايه العاوزاها دي من غير م تشتغلي تخدمي في البيوت الشغله دي م شبهك وعلي فكره لو مشيتي اشتغلتي في بيت اي زول رده فعلو بتكون زي رده فعلي دي اها قلتي شنو قلت ليهو فشنو قلت شنو قال لي اعمل معاك علاقه في السر واجيك مكان عاوزه قلت ليهو ليه م تكون في النور وانا موافقه قال لي لا انا ما بقدر اتزوج واحده كانت خدامه اتغظت منو قلت ليهو الخدامه دي بي احتراما وادبها تشتريك وتشتري اهلك كلهم انت مفتكرني ح اوافق لمن تغريني بالقروش قال لي اقنعيني انك م عندك علاقات بعد زوجك اتوفي طوالي عرفت مرتو حكت ليهو اي شي قلت ليهو يلا الما عارفو والما قالتو ليك مرتك الانا اساسا م قلتو ليها انا كنت متزوجه راجل كبير علي الورق بس قال لي كيف معقوله قلت ليهو دي الحقيقه وافتح لي الباب اطلع قال لي طيب عندي ليك حل بدل اديك مليار بديك خمسه مليار عشان انتي بت انا كنت فاكرك متزوجه ولد صغير اكيد دا الفقر الخلاك تقعي الوقعه دي قعدت اضحك قلت ليهو يعني ابيع شرفي ليك بخمسه مليار بتحلم والله احسن تفتح الباب دا عشان م تشوف وشي التاني قال لي وشك التاني شنو م بتقدري م خليتو كمل كلامو ركبت ليهو التربيزه في راسو وخليت دمو يكب وطلعت لاقتني مرتو في الشارع قالت لي هيا نسيت اقول ليك انا مشيت اهلي ومالك طالعه فشنو م رديت عليها قلت ليها انا جيت اقول ليك انا م بقدر اجي اشتغل ليك قالت لي ليه يا نسيبه بعد قلت خلاص لقيت بت تساعدني وتبقا لي اخت وخاله لي اولادي قلت ليها معليش عندي امتحانات وكانت متاثره وما عايزاني امشي بس انا اصريت علي موقفي قالت لي ارح اديك مرتبك وعندي فساتين كده م محتاجاهم طلعتهم ليك قلت ليها لا لا م بتقصري ومرتبي وزعي لي اولادك ومشيت خليتا تكورك لي قلت بعد تدخل البيت بتعرف الحاصل والغلط غلطها خلتو يطمع فيني ومفتكر اني متزوجه وراجلي ميت يعني ممكن ببساطه اغلط مفتكر كل البنات القابلهم واحد مشيت البيت وكنت زهجانه امي قالت لي مالك الليله جيتي بدري قلت ليها خليت الشغل قعدت تكورك وتهرج وتسمع فيني في فارغ قلت ليها انا لو م خليت الشغل الخايفه منو انتي ح يحصل لانو زوجها قليل ادب ولازم كان يتربا ابوي قال لي تاني م تمشي ليهم ولا تشتغلي انا بستغل امي قعدت تضحك بي استهتار قالت ليهو هو انت فيك حيل تقيف عشان تشتغل يا راجل م تسمعا الكلام دا قال ليها م تصغريني قدام بتي انا ح اشتغل قدر البقدر عليهو اتاثرت شديد لي ابوي قلت ليهو ابوي م تتكلم معاها وم تشيل همي انا بشتغل دموعو جرت وطلع قعد في الشارع قلت ليها انا بشتغل م ح اقعد ح اعمل اي شي قالت لي امشي اشتغلي مع مياده عندهم قروش النار م تاكلهن وابوهم وزير طبعا اول مره اعرف ابو فادي وزير قلت ليها ربنا يزيدهم م قصرت معاي بس انا بيت فيهو راجل م بشتغل فيهو بشوف لي شغل في مكتبه ولا اي مكان قعدت تتكلم بي تحت تحت قلت من حقها لانها حاسه اني هم عليها هي م مسؤوله مني بس كنت مجبره اني اقعد معاهم وامتحانتي قربت جيتا راجعه لقيت ابوي قاعد قلت ليها يمه ممكن طلب انا عندي امتحانات اسبوعين اخلصهم بس والله اشتغل اي شي بس استحمليني وم بشيل منك مصروف بجي افطر هنا قالت لي والفطور جايبه ليكم من تكيه ولا بيتي تكيه فاتحاها ليكم كلاما جارح كالعاده اصلها ما بتنطق حرف يفتح النفس دايمه ساده نيتنا قالت لي انا استحملتك عمري دا كلو ماعندي استعداد استحملك انتي وابوك قلت ليها ابوي دا راجلك لو م عاوزه تستحملي كان م تتزوجي م عرستيهو دكتور ولا مهندس ابوي سكت ساي قال ليها يا ريا خليها انا بشتغل قالت ليهو اشتغل كان بتقدر بس الاتنين م تقعدو لي همين م بقدر عليكم كفاي هم واحد اتأثرت شديد قلت ليها قسمتي اعمل شنو وانتو غلطتو شيلتوني من الشارع كان تخلوني وم تعيشوني في وضع اسري والله كريم علي قالت لي غلطنا غلط كبير بس ابوك الاصرا عرفت انو امي من الاول م كانت عاوزاني وابوي المصر علي قامت خلتنا ودخلت جوه ابوي الهم في وشو قلت ليهو اعفي لي انا حرمتك من اهلك بسببي هم مخاصمنك وجايبه ليك المشاكل مع امي قال لي لا لا ي بتي انا زول ربنا حرمني من الجنا وراضي بي قسمتو وكان نفسي في البقول لي ابوي ولقيتك انتي قلت ليهو ابوي انت لقيتني واقعه في الشارع ولا لقيتني وين اتنهد وقال لي دي قصه طويله خليها قلت ليهو نفسي اعرفها يا ابوي عليك الله احكيها لي قال لي نحنا كنا تلاته عبدالله ومعانا واحد اسمو محمد ودا اتوفي يلا محمد دا قال عندو صاحبو مهموم وغلط مع بت ناس وحملت وولدت وما عارفين الطفل يودوهو وين وما عايزين يجدعو يشيلو ذنبين ادوهو لي مره تمسكو مسافه زول يشيلو يربيهو انا يا بتي ربنا خلقني عقيم واتزوجت امك دي ووافقت علي جيت كلمتها اني عايز اتبناك رفضت شديد بعد تحانيس وافقت ومشيت كلمت محمد وعبدالله وجابك لي قلت ليهو عبدالله منو تقصد راجلي قال لي اي وهو الوحيد العارف ابوك الحقيقي وكان بديهو قروش طوالي لي بس تاني انقطع مننا قلت ليهو شنو شنو وليه م قلت لي علي الاقل كان عرفت منو منو ابوي الحقيقي قال لي م كان ح يوريك قلت ليهو ح يوريني كان حنستو لمن عرفت الحقيقه قال لي ي بتي حتي لو عرفتيهو م ح يعترف بيك لانو جايه بطريقه غير شرعيه اكتر جملتين كرهتهم جايه بطريقه غير شرعيه وبت حرام عندي منهم عقده رسمي وشعبي ابوي قال لي م تشيلي هم انا ابوك بس م تزعلي من امك قلت ليهو نفسي اشوفهم م حبا فيهم عاوزه اقول ليهم كلام انا م ح ارتاح الا اقولو قال لي ي بتي م تندميني اني حكيت ليك قلت ليهو ابوي دا الطبيعي يحصل اكيد كان ح اكبر وح افتش واعرف اهلي الحقيقين قال لي م تزعليني منك وتندميني قلت ليهو طيب ي ابوي قال لي هسي ادخلي اقري ولا نومي وبكره ربك بهونا ان شاءالله مشيت رقدتا والنوم غلبني وكلام ابوي بتردد في راسي ولسه مصممه اعرف اهلي الحقيقين نومتا وصحيت الصباح مشيت المدرسه زمن الفطور لمن يجي م بطلع من الفصل عشان م اشوف الناس بفطرو البنات قالن لي ابوك قاعد بره قال انادوك طلعت لقيتو شايل ليهو سندوتش ومويه قال لي هاك قلت ليهو جبت القروش من وين قال لي الله كريم بس م تقعدي جيعانه وفعلا انا من دون الايام جعانه وبطني بتكورك شيلت منو الاكل وقعدت تحت شجره اكلتو وهو قعد معاي قال لي مبسوطه قلت ليهو الحمد لله يابا قال لي انا طالع ادخلي فصلك وفات نهايه اليوم اكتشفت ابوي شغال في البوفي بتاع المدرسه بترسل ليهم وبغسل العده قلبي انقطع ودا كلو بس عشان يجيب لي فطور قلت ليهو ابوي لا لا تاني م تعمل كده انا بجي اكل في البيت قال لي لا لا م بخليك جيعانه طبعا امي عندها القروش بس بتوديهن وين الله اعلم وبتحب حاجه اسمها قروش وكلاما كلو قروش ودايره تغني بي اي طريقه ما عارفه الغني بالقناعه. رغم اني صغيزه بس القروش اخر همي نفسي احس بالامان نفسي اعيش جو اسري مستقر بس الحمد لله جات كده مرت الايام وخلصت الامتحانات بتاعت ثانيه ثانوي وجيت الاولي رغم اني كنت قاعده في الفصل الفيهو ناس عايدين وفاجأتهم بالنتيجه وجات المرحله المفترض اكون فيها م شايله هم ومحتاجه للقروش عشان الدروس وانا بي طبعي عايزه افهم اي حاجه ومرات من اول مره من شرح الاستاذه م بستوعب بقيت افكر اعمل شنو وامي يومي من الصباح تقول لينا جوز اللوز القاعدين لي هم وقالت لي ابوي هي م اشتغلت تمش انت تشتغل وانا بالصدفه عرفت ابوي مريض قلب يعني التعب مشكله وما عندو وظيفه وبقا كبير في العمر والشغل الشاق مشكله قلت ليها يمه انا بفتش اصبري النلقا شغل قالت لي الشغل داير يجيك في سريرك اتلحلحي يختي من الغضب صحيت تاني يوم من الصبح ومشيت افتش لميت لي في واحده بت حلال عندها بوتيك قالت لي انا والله لي روحي بفتش للرزق وزي م شايفه المحل ميتان بس انا عندي رقم الزول زاتو البشتري منو اشتغلي معاهو قلت ليها شغل مع راجل م عايزه لو بديني مال قارون قالت لي كدي افهمي وانا والله بفتش معاك لحل ولو م عايزه حره قلت ليها كدي طيب وريني قالت لي اشتغلي بالتلفون قلت ليها كيف قالت لي بفهمك هو انتي مخك مفتح ولا اميه زيي كده قلت ليها كنت زيك بس الحمد لله هسي بفهم اي شي قالت لي شغل بالنت الزول دا بجيب بضاعه مستورده اشتغلي اون لاين ليهو ومن بيتك بتترزقي كلاما دخل لي في راسي وخصوصا انا عايزه اكون في البيت عشان الامتحانات شيلت. رقمو ومشيت نزلت رصيدد وفتحت التلفون شغلتو واتصلت عليهو اتكلمت معاهو وشكلو زول محترم وانا بتكلم داخله علي مكالمات كتيره من رقم اول مره اشوفو اتفقت معاهو وقال لي افتحي الواتساب ارسل ليك الشغل وان شالله ربنا يوفقك شكرتو وقفلت رديت علي الرقم جاتني صوت بت قالت لي نسيبه قلت ليها اي منو معاي قالت لي انا زوله عايزه مصلحتك ممكن تلاقيني في المكان الفلاني قلت ليها الاقيك كيف فهميني انتي منو قالت لي مستقبلك في يدي وانا عايزه الاقيك وتعبت حتي لقيت رقمك وقالت لي انا عندي ايام محدده في السودان وراجعه ولو عايزه تعرفي انا منو تعالي لي ولمن توافقي ارجعي لي في الرقم دا برساله م تتصلي بحزرك م تتصلي تمام وقفلت الخط كلامها شطب راسي وبقيت اسال نفسي دي منو انا لا عندي صاحبه لا عندي معرفه وامش ولا ما امش وتتوقعو دي تكون منو وعايزه شنو………يتبع