رواية ضماد جرح الفصل الثالث عشر 13 بقلم نوسه حمد
بقيت مراقبه امي عشان اعرف ابوي منو من ناحيه حسيت كلام حنين وحقيقتي لي كويس ومن ناحيه تانيه ح ادخل نفسي في متاهات بالاخص ابوي حزرني منو قال لي ممكن لو عرف يقتلك عشان سمعتو وهو زول كبير في البلد بس كان عندي رغبه اعرف واصر اني اعرف بقيت مراغباها وعرفت امي شغاله شغل كعب للاسف مكان مشبوهه لاني لمن جيت ادخل في ولد من بره قال لي وين ماشه قلت ليهو جوه مكان الناس بتدخل قال لي هو اي زول بدخل لكن انتي تبع منو قلت ليهو كيف تبع منو قال لي معناتا انتي م ح تدخلي قلت ليهو كيف م ح ادخل قلت ليهو طيب انا تبع ريا عاين لي كده وبقا مركز في عيوني وانا حاولت اتهرب منو قال لي اسمعيني انا بس عايز اقول ليك كلام شكلك انتي بت ناس والمكان دا م بشبهك واعتبريني اخوك وارجعي مكان جيتي ونصيحتي ليك اياك تجي هنا لو محتاجه قروش هاك دا رقمي اتصلي علي وانا جاهز والله اخدمك علي الاقل اخفف عن ذنوبي شويه قلت ليهو طيب مدام انت ضميرك صاحي كده وقف اي شي بدخلك في ذنوب قال لي انك لا تهدي من احببت لكن الله يهدي من يشاء واداني رقمو وقال لي امشي ممكن مشيت وبقيت اتلفت كل دقيقه اعاين للولد وكلامو للان بتردد في اضاني المكان دا م كويس فيهو شنو جوه وبقيت متوتره معقوله امي تكون كعبه بس كعبه كيف وخلاص راسي شاطب معقوله ابوي الزمن دا كلو عايش معاها وهي م كويسه وياريتني م مشيت افتش لي ابوي بقيت افكر الطريق كلو وسرحانه وخليت ابوي بقيت في امي رغم انها عمرها م قالت لي كلمه سمحه بس حسيت نفسي اضايقت م نفسي اشوفها في مواقف كعبه العشره م بتهون الا علي ود الحرام ورغم اني بت حرام بس عشرتها م بتهون لكن انا م عندي فيها دخل عشان اتكلم معاها ولو اتكلمت هل ح تسمعني ولا ح تشاكلني وابوي زاتو طلقا م عندها فيها شغله بقيت في صراع بين اقيف معاها ولا اخليها وهي حره واتوترت زياده رجعت البيت ابوي قال لي مشيتي وين قلت ليهو عندي مشروع عايزه اعملو قبل المدرسه قال لي شنو قلت ليهو ح تعرف ان شاءالله لقيت مكالمات من الزول الاشتغلت معاهو رجعت ليهو قال لي مالك وقفتي نشر وطلبيات اعتزرت ليهو وقلت ليهو طيب ح ابدا من اليوم قال لي تمام ولو م عايزه عشان اشيل منك الصفحات واشوف غيرك لانو انا شغلي اكتر اونلاين قلت ليهو تمام قفلت منو وبديت ارفع ليهو في الطلبيات وكانت كتيره لمن صدعت وجاتني دوخه عديل شغلو حلو شديد وفيهو قروش تراب بس متعب قلت م اعتمد علي قروش حنين لازم انا اموري تظبط بي كل شي وبالاخص نحنا قاعدين في بيت ايجار دخل علي نزار قال لي انا نازل جامعه لو محتاجه اني اقيف معاك قلت ليهو اكيد عايزاك نمش مكان الجمله نجيب باقي حاجات والدكان الفي البيت فيهو رفوف يعني م محتاجين قال لي ميه ميه بس محتاج لون قلت ليهو نشوف زول ونمشي نشتري قال لي تمام الصباح بجيك اليوم داك م نومتا من الصداع وامي. صحيت استحميت وجهزت وفطرت ابوي وطلعت لقيت نزار في الشارع مشينا مكان الجمله اشترينا اي شي وجبنا البوهيه نزار قال لي انا بعملا ما بتاخد زمن قلت ليهو طيب جبنا الحاجات البيت وكلمنا ابوي فرح شديد قال لي من زمان نفسي يكون عندي دكان اقعد فيهو اشتغل ويونسني عشان قعاد البيت كعب قلت ليهو الحمد لله البتتمناهو جاك حدي عندك يا ابوي قال لي ربنا اخليك لي وبقا يشكر في نزار ونزار قال ليهو انت ابوي وعشرتكم م سأهله ومحتاجين للسند م ح اقصر منكم بالذات نسيبه م بتعرف حاجه عاينت ليهو وحسيت انو نزار لسه بحبني زي م قال بس انا لازم اقول ليهو انت اخوي م تفكر في حاجه تانيه وفعلا لمن طلع طلعت وراهو قلت ليهو نزار انت زي اخوي عاين لي وقال لي لي الشرف وفات حسيت قلبو انقطع وتاني م اظن يجي بس الصباح فاجأني لقيت بتصل علي قال لي افتحي الدكان وجيبي الحاجات انا جيت معاي اصحابي عاوزين نعمل اللون طلعت سلمت عليهم وفتحت ليهم الدكان وجهزت ليهم الاكل والشاي والقهوه وما اخدو زمن انتهو سريع حاولت اديهم قروش نزار زعل وفات اتصلت اعتزرت ليهو قال لي خلي اللون ينشف عايز اجي ارتب الدكان واسعر لي ابوك الحاجات وكان بتكلم بي جديه قال لي نوسه موش قلتي انا اخوك انا اخوك وخلاص قلت ليهو م عارفه اشكرك كيف قال لي م عايز شكر ي نوسه
نزار تاني جا ومعاهو نفس الاولاد وظبطو الدكان وابوي كان مبسوط وطاير من الفرح والدكان جنبو شجرتين كبار وظلهن سمح شديد طلعت لي ابوي كرسيين بلاستيك وطربيزه فيها حفاظه مويه وبدا شغل من تاني يوم والرجال بقو اجو يقعدو مع ابوي عندهم قوه الصباح ثابته بعملا ليهم والمره اللاقيتا اول مره اسمها ساره اتعرفت عليها وطلعت عندها بت ممتحنه ثالث ثانوي اتعرفت عليها وقلت ليها ح اسجل معاها في نفس المدرسه وفعلا مشيت سجلت وبدينا دراسه وكنت مبسوطه من ناحيه اموري ظبطت وامور ابوي ظبطت وبقا مبسوط وعمل اصحاب ودكانو ماشي انا الصباح بمش المدرسه المساء بجي اعمل الطلبيات وكان الشغل كتير علي شديد والطلبيات كتيره قلت خلاص ح ادي صفحه لي بت جيرانا اسمها ميار اتكلمت معاها قالت لي جدا ماعندك مشكله وكلمت بتاع الشغل قال لي تمام يلا ميار م بترفع طلبيات كتيره بس انا طلبياتي كتيره بقيت اديها طلبيات عشان تترزق وامورنا ماشه ظابطه وبقيت متعلقه بيهم يومي م بكمل الا امش ليهم ولا هم يجوني ومرات ميار بتجي تنوم معاي حكيت ليها بي نزار قالت لي نفسي اشوفو وهي كانت بتحب واحد اسمو عباده اليوم كلو تتكلم معاهو ومرات لمن تكون عايزه تساهر بالتلفون بتجي تنوم معاي عشان امها م تشاكلا كنت بقول ليها عباده دا م بعرسك م تكلفي نفسك وتتعبيها كانت بتزعل مني قالت لي انتي عشان م بتحسي بتقولي لي كده قلت ليها هو في زول م بحس بس دا ملحوق انا عندي قرايه هي م كانت شاطره نهاي بس بتمر مرور وبقيت احبها حب شديد وعندهم اخوان بس في السعوديه وعندها اخت متزوجه فئ الجزيره بتجيهم في الاجازات بس وعايشين في البيت هي وامها وابوها واخوانا صغار
مرت الايام وتاني جاني الفضول اعرف ابوي منو بقيت احنس في ابوي واترجا فيهو عشان يوريني قال لي بوريك بس علي شرط لا تمشي ليهو لا عندك فيهو شغله قلت ليهو اكيد قال لي ابوك اسمو ياسر عبدالسلام محمد قلت ليهو يعني انا كده عرفتو قال لي وانتي عايزه تعرفي ليه طيب النوريك ابوك دا رجل اعمال كبير شديد م بطلع الا بي حرس عندو شركات كتيره وعندو فندق سياحي اسمو شنو م بعرفو لكن دا كل البعرفو عنو واوعك ي بتي تمشي تسالي منو لو عندي معزه عندك اوعك ي بتي قلت ليهو معزتك فوق راسي بس لازم ي ابوي اعرفو قال لي لا ي بتي عليك الله وبقا يترجا فيني وانا من جواي مصره اعرفو بس م استفدت حاجه ابوي قال لي اسمو بس لا عارف ساكن وين لا شركاتو وين وبقيت افكر في طريقه اعرف بيها مكاناتو دي قلت اسال ميار احتمال تعرف قلت ليها ميار بتعرفي واحد اسمو كده كده قالت لي لا ليه قلت ليها دا رجل اعمال كبير ممكن اساعدنا نفتح مشروع توهتها من الموضوع قالت لي طيب انتي م عارفه شركاتو ولا الفندق البتتكلمي عنو دا قلت ليها لو عارفه كان مشيت قالت لي دقيقه في البحث في قوقل نكتب قلت ليها تكتبي اسمو يعني انتي غبيه قالت لي كدي اصبري وكتبت في البحث فندق رجل الاعمال ياسر عبدالسلام طوالي جاها فندق السلام اداره ياسر عبدالسلام وجاها اللوكيشن انا بقيت مخلوعه قالت لي شفتي كيف انا شيطانه وهدا لقيناهو انتي اتكلمي معاهو في المشروع وانا بعرسو عديل قلت ليها بتهظري صاح دا قدر جدك قالت لي بس وريني نمشي متين اتندمت اني كلمتها بس لو م كلمتها م كان عرفت مكانو قلت ليها كدي بعد اشوف مرت الايام وميار جابت صفحتو عديل لمن شافتو لمن انخلعت قالت لي نوسه واي الراجل بشبهك قلت ليها راجل منو ي بت قالت لي ياسر رجل الاعمال قلت ليها عرفتي كيف قالت لي هدي صورتو ولمن ورتني ليهو لمن بقيت ارجف انا عندي شامه في وشي هو عندو قلت ليها سبحان الله وقت القا شبهي القاهو راجل وقلت ليها انتي جبتي صورتو كيف البت لقيتا ضايفاهو في كل مكان ومرسله ليهو بس شكلو م برد وعرفت مكان شركتو وقالت لي لو م ماشه انا بمش براي قلت ليها لا م تمشي ياخ انا خليت الموضوع دا قالت لي خلي بس انا م خليتو وبكره ماشه ماشه معاي ارح م ماشه حره البت شيطان وقويه وعندها شخصيه قويه وم بتخاف قلت طيب النمش معاها الصباح جاتنا قاشره وانا اتفقت معاها من بليل انها تجي قدام ابوي تقول لي في زول بدعم المشاريع الصغيره نمشّي ليهو عشان نعمل مشروع وجات قالت القلتو ليها ولبست وطلعت معاها قلت ليها اسمي الحقيقي ساجده تمام عشان م تتلخبطي قالت لي وليه بقولو ليك نسيبه قلت ليها علي امي االله يرحمها ماتت وهي بتولدني كذبت عليها ومشت فيها الكذبه ومشينا الشركه قالو لينا ستين يمين م بتدخلو ليهو بس البت شيطانه شافتو طالع وجرت ليهو وانا مشيت معاها لمن شافني لمن بقا مركز معاي شديد ………يتبع