رواية ضماد جرح الفصل الخامس عشر 15 بقلم نوسه حمد
عباده جا وطلب يد ميار علي حسب اتفاقي معاهو وانا مشيت ساعدت امها وانتظر كتير م جات وطبعا امها كذبت عليهم قالت ليهم ميار مع خالتها انا الوحيده العارفه ميار وين وامها كمان بس م اتكلمنا ودعونا وفاتو وامها بقت مرعوبه قالت لي دي فكرتك انتي قلت ليها خالتي والله انا من قبل نمشي شيلت الفكره من راسي لانو الامتحانات قربت والقرايه كتيره قالت لي ابوها لو عرف بقتلنا ارح نمشي نفتشها قلت ليها م عندي مشكله انتي قولي لي راجلك اي شي وارح نفتشها قالت لي طيب انتي اسبقيني علي بيتكم انا تاني بتفاهم معاهو قلت ليها زاتي بمش اطمن ابوي بقول ليهو شغلتكم كتيره وعايزه أساعدكم عشان م يخاف قالت لي تمام مشيت كلمت ابوي وقلت ليهو نوم يابا عشان انت عندك شغل الصباح قال لي م تتاخري قلت ليهو حاضر يابا طلعت لقيت خالتو منتظراني في الشارع وقفنا تكسي ومشينا مقر الشركه لقيناها مقفله وخالتي بقت تقول لي كل منك بتي م بتعرف لي الكلام دا انتي وديتي بتي وين قلت ليها والله ياخالتي انا قلت ليها بخشمي بس وحكيت ليها حكا بتك مشت تبحت في اسم صاحب الشركه وهي الجابتني وانا من اول م لقيت معاهو حرس وامور المسلسلات دي طوالي شيلت فكرتو من راسي وبتك هي الصممت وعشان تكوني عارفه بتك ختت صاحب الشركه في راسها وقالت الاتعرسو عشان عندو القروش وانا حاولت اقنعها بس رفضت وقالت لي انتي حاسده وحاقده عشان كده بقيت اعاين بعيوني قالت لي سجمي سجمي عرس شنو وكلام فاضي شنو وبقت تكورك الشارع كلو بتاع التكسي قال لينا فشنو يا ناس وترتوني معاكم بقت تقول ليهو بتي رايحه وبقينا نفتش للساعه اربعه وبتاع التكسي قال لينا م عايز منكم قروش بس انا عندي شغل الصباح شغال ترحال ولازم امش البيت شكرناهو ونزلنا منو قبل م نصل البيت لاقتنا ميار شايله شبطها في يدها وظاهر عليها تعبانه امها دايره تصدم عايزه تكورك قفلت ليها خشمها وقلت ليها كده ح تفضحي بتك وما معروف الناس اقولو شنو دخلتهم بيتنا ابوي صحا مخلوع قلت ليهو ابوي خليك في مكانك م تتحرك قال لي فشنو وصوت الضرب دا شنو غلبني اتكلم وطبعا ام ميار وقعت في ميار ضرب وتكورك لغايه م قفلت عليهم الباب حسيت بالذنب قلت لو البت دي حصلت ليها حاجه بموت بس انا م قلت ليها امشي انا كنت عايزه اعرف مقر ابوي وين وهي م صدقت عرفت انو عندو قروش وحدي الان انا م فاهمه الحصل شنو ابوي بقا مقلق قال لي فشنو فهميني قلت ليهو دي ميار رفضت العريس وامها بتشاكل فيها قدرت اكذب عليهو عشان م يشيل فكره غلط عنها ابوي طوالي بقا يقول لي امها خليها البت الزواج قسمه ونصيب م تغصبي البت احتمال الولد م عاجبا طوالي وقفت منها ضرب سوقت ابوي قلت ليهو ابوي خليها ودخلت عليهن قلت ليها ميار كنتي وين حلفت ابت تتكلم وامها خلاص الهم عايز اقتلها قلت ليها خلاص ي خالتي امشي البيت زوجك بكون قلق وقولي ليهو ميار راقده مع نسيبه والونسه شالتنا عشان كده جيت متاخره حنستها تحانيس حتي فاتت طلعت وراها قفلت الباب وجيت لقيت ميار تبكي قلت ليها ميار انتي عملتي شنو ومشيتي وين فهميني قالت لي نوسه اسكتي مني قلت ليها بسكت ي ميار لو سكاتي بريحك قومت اتوضيت وصليت وبقيت ادعي ليها ربنا يخفف عليها الهي فيهو الانا م عارفاهو شنو اصلا وميار نهاي م وقفت بكا حسيت انها في ورطه بس م عايزه تتكلم معاي قلت ليها ميار قومي صلي احتمال ترتاحي واخدي نومه ابوي ح يطلع الدكان م ح يجي تاني وانا عايزه البس ماشه المدرسه قالت لي نوسه م تمشي قلت ليها بسم الله فشنو قولي م تخافي ي ميار انتي احكي لي والله م اكلم زول انتي فعلا مشيتي الشركه ولا مشيتي مكان تاني قعدت تبكي وماسكه لي في غشاني ي نوسه غشاني انا اعصابي باظت قلت ليها منو الغشاك ميار فهميني قالت لي انا انتهيت الطمع دمرني قلت ليها انتي مشيتي لي ابوي قالت لي ابوك شنو ي نوسه انا انخلعت كلمه ابوي طلعت مني من غير م احسب ليها حساب قلت ليها مشيتي وين وريني انا خلاص اعصابي باظت يا ميار وندمتيني ياريتني م فتحت خشمي ياريتني م حكيت بس انتي م بتسمعي الكلام ي ميار مشيتي ليهو بنفسك قالت لي نوسه خلاص الحصل حصل قلت ليها الحصل شنو فهميني يا ميار تعبتيني معاك قالت لي انا الغلطانه وابت تكلمني بي اي شي قلت ليها طيب قومي استحمي وهدي نفسك ولو عاوزه تحكي لي انا م عندي مشكله بس انا م بقدر اغيب من المدرسه وربنا يخفف عليك م تابعت كلامي امها جات وقالت ليها يلا قومي حاولت افهما انو ميار تعبانه محتاجه راحه قالت لي شكرا ي بتي وساقتا وفاتت وانا جهزت مشيت المدرسه وقلبي مقطوع عليها حسيت انها في مصيبه بس هي شنو الله اعلم وفي الشارع لاقاني عباده قال لي نوسه ممكن اسالك قلت ليهو اتفضل قال لي ميار مالا وامس كانت وين للساعه واحده صباحا قلت ليهو كانت مع ناس خالتا قال لي نوسه انا م اوصف ليك انا بحترمك قدر شنو وختيت ليك مكانه عمري م فكرت اخت فيها زول مافي بت الزمن دا بتحب الخير لي صاحبتها وانتي وقفتي معاي وقفه اخوي م اظنو يقيفا معاي ولا ح يفكر مجرد تفكير انو يقيفا معاي او يقول لي عرس وانا بتكفل بي قروش عرسك لغايه م تشتغل فعشان كده م تخسري ثقتي دي وتكذبي علي نوسه ميار كانت وين قلت ليهو عباده انا والله العظيم ثلاث مرات م عارفه ميار كانت وين بس امها قالت لي عند ناس خالتها ودا الكلام القالو لي قال لي نوسه امها هي م عارفاني اني بعرف ميار وعندي معاها علاقه عشان كده قالت عند ناس خالتها والشي الما عارفه انتي خالتهم دي مقاطعنها بالسنين في الشارع لو لاقتهم م بتسلم عليهم غلبني اقول ليهو شنو قال لي نوسه ع العموم انا بشكرك وانتي مكانتك عندي غاليه جدا وانا اخوك لو احتجتي لي وانا عاوزه اتصل لي ابو ميار واقول ليهو ماف نصيب ويا نوسه ميار شكلها حبت غيري والحبتو دا م ح يحافظ عليها صدقيني ميار متهوره وبتتصرف ساي والله يحفظها وانا مسافر كمان يومين تعبت من الوضع ماشي بورسودان اجهز اوراقي واسافر السعوديه وخلي بالك من ميار ووعيها وقولي ليها اني حبيتا وصدقت معاها بس للاسف هي خسرتني عشان لقت غيري وان شاءالله اللقتو دا يحافظ عليها ويصونها لغايه م يتلمو في بيت واحد قلت ليهو ان شاء الله ي عباده وربنا يوفقك انت ويسعدك قال لي اميييين ي نوسه ودعتك الله خلي بالك من نفسك ونصيحتي ليك م تطلعي خليك محافظه زي م انتي قلت ليهو حاضر ان شاء الله قال لي رقمي معاك ح اراسلك مره في الشهر اعرف اخباركم لو م فيها ازعاج قلت ليهو حبابك ومشيت
مرت الايام وميار بقت م بشوفها الا في المدرسه وبسلم عليها من بعيد لبعيد لانها مباريه ليها بنات م حبيتهم نهاي وخصوصا كانت عندنا امتحانات وكنت مجتهده شديد في القرايه وقفت شغل اونلاين الزول الشغاله معاهو قال لي بعد تخلصي كلميني واداني حسابي وقروش ميار حولهم لي بنكك مشيت استلمتهم ومشيت لميار في البيت اديتا القروش لقيتا عيانه كفرت ليها واديتا القروش وطلعت مشيت البيت اديت ابوي القروش قلت ليهو نزل بضاعه في الدكان وما شاء الله الدكان ماشي مع ابوي شديد وربنا فتحها عليهو وجاب ولد اخوهو من البلد اصغر مني بس م قاري مدرسه بساعدو وببيت في الدكان والولد م شاء الله امين وصادق ابوي بتكيف ليهو كيف ريح ابوي شديد كنت مبسوطه وانا شايفه ابوي مرتاح والراحه ظهرت في وشو قال لي خلصي الامتحانات وعايزك في مشوار قلت ليهو طيب وبقيت مجتهده وبمش الحصص العصر ونزلت الامتحانات الشهريه وحسيت نفسي اشتغلت شديد وميار م نزلت المدرسه مشيت افقدها لقيتا عيانه لونها لمن بقا اسود امها قالت لي عندها ملاريا وجرثومه في المعده وكان حيل م فيها كفرت ليها وطلعت مشيت لي ابوي لقيتو البس واتريح قلت ليهو المشوار وين يا ابوي ماشي تخطب ولا شنو قعد اضحك قال لي انا لو باقي لي عمر عايز اعيشو عشان اشوفك في بيت الحلال واشوف اولادك سبحان الله ابوي اتغير تغيير شديد قله الحيله كانت متوهاهو وانا كان م بي يدي شي وما عارفه الحقيقه وم عارفه البيهو والعليهو وطرده ريا لينا لخير قال لي ماشين نسلم علي ريا قلت ليهو ابوي ريا طردتنا انا م ماشه امش براك قال لي يابتي كان هي كعبه انتي زيها قلت ليهو ابوي عاوز ترجع ليها ابوي انا م نفسي تنزلا ليها اكتر ممكن تفهمني قال لي ي بتي انا والله م داير ارجعها انا م صدقت طلقتها قلت ليهو طيب ي ابوي ماشي ليها ليه قال لي نسلم عليها ساي وقال لي بس ارح معاي قلت ليهو طيب لبست ومشينا ليها لقينا البيت فاتح ابوي بقا من باب الشارع يصفق وسامعين صوتا بعيد بتقول لينا منو البره تعالو دخلنا من الباب البيت مكركب ومبهدل وهي راقده قالت لينا منو م عرفتنا وما قامت علي حيلها والريحه فظيعه ابوي قال ليها خالد قالت لينا اتفضلو قلنا ليها الحاصل شنو قالت انو جاتا جلطه ليها اكتر من شهرين وكانت حالتها تحنننن وروحها طالعا ابوي اتاثر ليها شديد كفرنا ليها وسالنها القاعد معاها منو قالت الجيران بجو يساعدوها وكانت بتعاين لي بي استغراب وقالت لي اعفي لي ي بتي انا ظلمتك شديد وربنا خلص ليك حقك اعفي لي في اي كلمه طلعت مني قلت ليها عافيه ليك يمه وبقيت ابكي وهي تبكي م قايله بجي يوم وامي تنكسر بس فعلا كل اول ليهو اخر ودعناها ومشينا ابوي اتاثر ليها قال لي بشوف بت تخدمها قلت ليهو طوالي ونحنا كل مره نفقدها لانها رفضت تمشي معانا رجعنا البيت متاخرين لقيت ميار في البيت منتظراني وكانت متوتره قالت لي نوسه عايزاك دخلنا جوه الغرفه قلت ليها مالك بسم الله وبقيتي كيف قالت لي م كويسه ي نوسه قلت ليها مالك ي ميار فيك شنو قالت لي نوسه انا حامل ……..يتبع