رواية الوجه الاخر للرحمة الفصل الثاني عشر12 بقلم عبير ادريس
(بسم الله أعوذ بعزة الله ، وقدرته من شر ما أجد وأحاذر ) (اعوذ بكلمات الله التامات التى لا يجاوزهن بر ولا فاجر ، من شر ما خلق وذرأ وبرأ ، ومن شر ما ينزل من السماء ، ومن شر ما يعرج فيها ، ومن شر ما ذرأ في الأرض ، ومن شر ما يخرج منها ، ومن شر فتن الليل والنهار ، ومن شر كل طارق إلا طارقاً يطرق بخير يا رحمن)
بسم الله ارقيج ، هسه صرتي زينة ؟
فتحت عيونها باوعتله همست تريد مي
فارس : هسه منين اجيبلج مي ؟ تانيني شوية واجيج لا تشردين ترى البستان جبيرة وارجع ألكفج مرة ثانية ..
رجع للبيت جابلها مي ورجعلها لكاها مسنودة على شجرة ، فتح گربة الماي وشربها منها ، وكع على ملابسها باوعتله وصاحت
_ ادري شبيك ؟ ما تشوف ؟ نكعتني
فارس : اوي عيني هسه شوكعت عليج هو مي بالعافية
_الله يعافيك
شربت الماي وعاينتله مبتسمة
_ انت منو منهم المدرس ؟
فارس : شاطرة ما تنسين الدرس
ضحكت
_ شلون انساه وانتم خبلتوني
فارس : هو منو تحرش بمنو ؟ شجابج علينا ودستي بساطنا ؟ ما سامعة لاتدوس الجني وتصيح بسم الله
_الوكت الأغبر جابني عليكم قابل بيدي ؟
فارس : وعليش تكولين اغبر ، يمكن من محاسن الصدف رجلج جابتج علينا
_اي حتى تحبسوني هنا ليل نهار
_ استرلج يالعرمة ، اقلها هنا مستورة احسن من الخوارة بالشوارع رايحة رادة تصيدين بهالشباب
_ اي وشلون شباب عاد
حك شعره وعاينلها بنص عين
فارس : عجبوج مو ؟
_ ولا واحد عاجبني
فارس : اي غير انتِ اجيتي على كميل لو دازيج علية جان الشغل صار لوز
_ شنو قصدك ؟
فارس : يعني جان عقدت عليج وسترتج
_ تموت على الستر
فارس : اتخبل عليه ، اصلاً متفصل علية تفصل ، شوفي هذا ثوبي مو دشداشة لا
_ لعد شنو
فارس : فدوة لدينها للعد شلون تحجيها
_ شنو ثوبك لا تغير الموضوع
فارس : ثوبي ؟
_ اي
فارس : ستر مفصل علية تفصال
_ها ياعيني ، اكولك انت صدك شيخ ؟
فارس : اي توني راجع من الجامع أذنت الظهر
_ شو ما مبين عليك
فارس : چا مو رقيتج توني
_ شكلك مو يم المشيخة ابد
فارس : المهم سولفي وين جنتي رايحة ؟ وراكضة هالكد ؟
_ اريد اطلع منا اختنكت لا ليلي ليل ولا نهاري نهار ، اكل وشرب ونوم
فارس : اكو احلى من هيج ؟
_طبعاً اكو ليش هي هاي هم حياة ؟
فارس : وحياتج الجنتي عايشتها بالنصب والأحتيال هم تعتبرينها حياة ؟
_ الله عليك ساعدني اطلع منا
فارس : وين تروحين ؟ لنفرض ساعدتج ، عندج مكان تروحيله ؟
_ارض الله وسيعة
فارس : محد يخليج بحالج ينهشوج نهش
_ وشمدريني انتم شنو غايتكم مني ؟ معقولة تعوفوني بحالي ؟
فارس : لو عندنا نية نسويلج شي جان سوينا ما ننتظر كل هذا الوقت
_ادري وبعدين ابقى هنا شنو اسوي ؟
فارس : نشوف شيخ عشيرتنا على شنو ناوي وابلغج
_ اي بس استعجل ترى مليت
فارس : شنو اسمج ؟
_ كلتلكم اسمي سهر
فارس : سهر اسم الشهرة ؟ انه اريد اسمج الحقيقي
_ سهير ، بس محد يصيحني بهذا الأسم كلها تصيحني سهر
فارس : سهر ، حلو خوش اسم ، بنت عمي اسمها سمر نفس الوزن
سهر : اي وشعلية بيها
فارس : اي صدك شعليج
سهر : خليني احاجي ابوك بلكت يحجي وية شيخكم واطلع منا بأسرع وقت
فارس : وابوي شعلية؟
سهر : شلون شعليه ؟ غير هو جبيركم والمفروض كلمته مسموعه ؟
فارس : ابوي مو بحالج باله يم الزرع الحركتوه
سهر : ولازم انتظر يطلع زرعكم يلا تشوفولي حل ؟
فارس : شبيدي عليج ياعيني
سهر : فارس
فارس : عيناي وميها وضواها احجي اسمعج
سهر : خلصني حباب
فارس : شلون اخلصج ما اكدر
سهر : محد سائل عني وكوللهم هي انهزمت
فارس : عبالج يصدكون اذا حجيتلهم هيج ؟
سهر : اكيد
فارس : اللي يطب هنا مو بسهولة يطلع ألف عين مفتوحة عليه ، ما تكدرين تخطين خطوة اذا ما عثرتيلج بواحد منا
سهر : وصلت للباب انت منين طلعتلي ما ادري جان هسه واصلة الشارع وماخذتلي سيارة
ضحك وطلع باكيت الجكاير ، ورث وحدة ومدها الها
فارس : تدخنين ؟
سهر : لا
فارس : حلو حبيتج
سهر : جاوبني على سؤالي
فارس : اللي هو ؟
سهر : ليش ما خليتني اطلع من الباب ؟
فارس : هذا الباب ياخذج لغير بستان او بالأصح بستان بيت عمي قادر ، يعني تطلعين من مكان تفوتين لمكان ثاني
سهر : شنو متاهة ؟
فارس : بالضبط متاهة
سهر : وين الباب الرئيسي ؟ الله عليك دليني عليها
فارس : عوفج من الباب والشردة انتِ شنو سالفتج ؟ احجيلي يمكن اساعدج
سهر : ماعندي سالفة ، كل اللي ردتوا تعرفوه حجيته
فارس : بيا دار جنتي ؟
سهر : دار ال _______
فارس : ومن شوكت انتِ بية ؟
سهر : من اول ما انولدت
فارس : يعني مجهولة النسب ؟
سهر : تكدر تكول هيج
فارس : بعمر 18 طلعتي وكبل اشتغلتي وية هذولة الناس ؟
سهر : اي
فارس : كم سنة بقيتي عندهم ؟
سهر : سنتين
فارس : يعني هسه عمرج عشرين سنة
سهر : اي
فارس : بعدج جاهلة
سهر : جاهلة شنو ؟ افهم منك ومن غيرك
فارس : يعني طفلة بعدج مو قصدي شي
سهر : هسه شتريد ؟
فارس : احد اعتدى عليج ؟
سهر : ما يخصك وانت شكو وتسأل ؟
فارس : اي صح ما يخصني
سهر : عندك شي بعد ؟
فارس : لا
سهر : يلة توكل
نفخ الدخان وضحك ، باوعلها وكال
فارس : اموت بأسلوب الشوارع
سهر : امشي رجعني للكبر الجنت بيه ما اندله
فارس : يلة امشي
كامت وياه نفضت ملابسها ومشوا لحد باب المشتمل بنهاية المزرعة ، فتحلها الباب ، وكف على صفحة فاتت ، أخذ المفتاح قفله عليها ورجع للبيت ..
ما يخلونا نوصللها ولا نهتم بيها وبأكلها ، كلشي تحتاجة امي توصله ألها ، فات فارس وصاح
فارس : يمة يوم ماما ، زهرة
زهرة : وعمة شكو شبيك تصيح ؟
فارس : شوكت رحتي لسهر آخر مرة ؟
زهرة : يا سهر هاي ؟
فارس : البنية الدخيلة
زهرة : هاي الأجت عگب سالفة كميل ؟
فارس : اي هي
زهرة : اليوم الصبح وديتلها اكلها ليش تسأل عنها لا يكون رحتلها ؟
فارس : لا ما رحت تصادفت وياها من جنت راجع من الزرع
زهرة : وشطلعها هاي العرمة مناك ؟
فارس : جانت تريد تنهزم
زهرة : يا وشلون طلعت ؟
فارس : من زرف الباب غير انتِ عايفة المفاتيح بالباب
ضربت جبهتها وكالت
زهرة : أعوذ بالله من نسوة ، ما ادري حطيتلها الأكل وهي لهلوبة دوختني بالحجي ويمكن نسيته
فارس : واحنا دازيج تضربين فج وياها لو تنطيها اكل وتطلعين
زهرة : وانت شيخصك مني ها ؟
فارس : لازم حبيتيها يمكموعة ؟ الصراحة هي تنحب
زهرة : انجب انجب ولي من وجهي وجيب المفتاح وحسك عينك تحجي ﻷبوك لو اخوانك افتهمت
حجتها وجرت المفتاح منه
فارس : هاي عليها سواية باچة يلا اسكتلج عنها
زهرة : اسويلك سم تريده ؟
فارس : هيج صارت مو ؟
زهرة : اي والله هيج
فارس : سهلة زهرة سهلة ، اليوم على الغدا احجيلهم سالفتج
زهرة : احجي خايفة منك ؟
فارس : نشوف
عافها وصعد فوك ، اجت تبارك وبتول من الحوش وكفن كبالي وكالن
_ طيبة الله عليج تعالي لعبي ويانا
طيبة : شنو ألعب ؟
بتول : تعالي ومعليج
طيبة : وخروا عني عندي شغل كومة شوكت اخلصه
تبارك : نساعدج بيه فد امشي شوية حبابة
طيبة : ولكم كبرت على اللعب امشوا انتم لعبوا
بتول : والله تجين يعني تجين ما نتحرك اذا ماجيتي ويانا
زهرة : كومي وياهن الشغل ما يخلص هسه انه وسمر نفضه
طلعت وياهن للحوش جايبات حبل عاينتلهم اضحك
طيبة : وتريدن اكمز وياجن ؟
بتول : والله تتونسين لعبة تخبل
طيبة : ويني وين الحبل هسه مفاصلي تصيح علية
تبارك : نلعب غميضة شتكولين ؟
طيبة : لا ما ألعبها مالي خلك
اجى شهم يمشي من بعيد سمعنا وابتسم
شهم : لمة خير ان شاءالله
طيبة : ما تحاجي خواتك يبطلن مني
شهم : شبيهن وياج ؟
طيبة : يريدن نلعب نط وانه مابية حيل كاعدة من الصباحيات وهنه نايمات للظهر بيهن كل الحيل
تبارك : نلعب غير لعبة
طيبة : شنو نلعب ؟
تبارك : توكي
طيبة : وتوسخين الحوش ؟ الصبح غاسلته
بتول: طيبة هاي شبيج عود انه اغسله من نخلص لعب
طيبة : ولج والله عيب اتكمزن منو بيجن صغيرة ؟
تبارك : كلنا صغار يلة يلة اجيب طباشير واجي
راحت تركض للبيت جابته واجتي ، شهم واكف متكتف ويباوع ، دنكت تبارك حتى ترسم ، صاح عليها
شهم : تبارك ، جيبي انه ارسم
تبارك : ليش ؟
شهم : الأميرات ما تندك
حضنته دنك باسها ونزل للكاع يخططها على شكل مربعات بخط مائل ، وحدة ورا الثانية صف طويل ، وبالنهاية نصف دائرة نسميها البيت ، نوكف بوسطها ونبدي اللعب ..
شهم : يلة لعبوا ، اروح اجيب فطوم تلعب وياكم
بتول : ابقى بمكانك انه اصيحها
راحت صاحتها واجوي وبلشنا نلعب وشهم كعد على جذع نخلة يابس يعاين علينا ..
شمرت النعال بالمربع الأول وكمزت على تك رجل مغمضمة عيوني ولازم ما ادوس على الخط
طيبة : كبي ؟
بتول : نو
طيبة : كبي
تبارك : يس
اختل توازني ودست على الخط ، صاحت بتول
بتول : خسرتي
فتحت عيوني عاينتلها
طيبة : لا
بتول : والله خسرتي دستي على الخط ، وخري اجه دوري ..
وفطومة تحاول تقلدهم ، وتضحك على ضحكهم ، شوية يتعاركون وبعدها يتصافون ، والجو انترس بالحظات حلوة ..
الهوا حرك الشجر وكعت رمانة صغيرة تعاركنا عليها ، شكد يجيبولنا فاكهة من الحصاد ، فد اللي توكع لو احنا نقطفها طعمها نحسه غير
تبارك : انه فزت
بتول : دروحي
تبارك : والله انه فزت اصلاً انه بطلة التوكي
كمت من الكاع نفضت التراب عن هدومي ورجعت للبيت والبسمة مرسومة على وجهي ، غيرت جو وياهم ويمكن جنت محتاجة نفسي القديمة وعشتها حتى لو لحظات بسيطة ...
خلص اليوم بخير وحمدنا ربنا على الهدوء العايشيه ....
يوسف
طلع من المستشفى ، اتصل على فرح ماردت بعدها زعلانة عليه ، تركها ورجع للبيت ، قبل لا ينام دزلها رسالة موضحلها بيها كلشي هي تريد تفهمه منه وهم ما ردت ، ثاني يوم ماجان عنده دوام بالمستشفى فقط بالعيادة ومراجع واحد حاجز يمه ، رجع كتب لفرح مسج يعزمها على مطعم يتغدون وبعدها يرجع للعيادة يكمل شغله ..
استلمت المسج وجاوبته بكلمة تمام ، رجع بلغها بالوقت ، جهز نفسه ومر عليها وكف قريب البيت اتصل جاوبته
فرح : وين انت ؟
يوسف : وعليكم السلام كل الهلة
فرح : بدينا نثكل دم
يوسف : اكو وحدة يتصل عليها حبيبها بعد غياب اسبوع وتكوله وين انت ؟ بدون حتى ما تسلم عليه ؟
فرح : هلو شلونك
يوسف : هلو بعينج ، يلة انزلي انه جوا
فرح : اصبر بس تجي الكهرباء حتى انزل بالمصعد
يوسف : على راحتج
فرح : ما تجي ؟
يوسف : وين ؟
فرح : فوك
يوسف : والشيطان ثالثنا ؟
ضحكت
فرح : اكيد لا
يوسف : شعندي صاعد انتِ تعاي
فرح : غير تسلم على ماما ، قابل هيج تاخذني بدون سلام
يوسف : اشوفها زحمة اصعد انطيني احاجيها بالتليفون
فرح : ماكو داعي
يوسف : هسه عليش كل شوية وزعلتي ؟
فرح : اجتي الكهرباء ، خليني انزل جاو
يوسف : هله
نزلت من العمارة وطلعت صعدت للسيارة بعدها ما كعدت ضربته بالجنطة ، سحبها من ايدها بقوة وشمرها على الكشن الورا ، وتغيرت ملامحه ، ساق السيارة بدون ما يلتفت ألها ..
فرح : زعلت ؟
ما رد
فرح : بيبي زعلت ؟ هاي شبيك ؟ هسه هي جنطة قابل بلوكة ضربتك بيها ؟
وكف السيارة فجأة وألتفت عليها عاكد حاجبه
يوسف : ماحبيت تصرفج واصلاً عيب
فرح : على شنو دخلتها بالعيب ترة واضح اتشاقى
يوسف : وما احب هيج نوع من الشقى ، المرة التمد ايديها علية اكسرها خليها ابالج
سكتت ودارت وجهها على الجامة وكمل سياقة للمطعم ، وصلوا صف سيارته ونزلوا ، مشت كدامه جانت عصبية ، وكل شوية تسوي حركة بشعرها تدل على عصبيتها ، وصل للطاولة سحب الكرسي حتى تكعد وهو اندار كعد على الكرسي المقابيلها ...
ساكتين كلمن لاهي بتليفونه ، بعد دقائق اجى النادل وسألهم شنو تحبون تاكلون ؟
يوسف : شنو عاجبج تتغدين ؟
فرح : ما اريد انسدت نفسي
يوسف سحب نفس وألتفت على النادل طلب ألها وإله ، من راح ، تركت موبايلها على الطاولة وكالت
فرح : على شنو طلبتلي ؟ كلتلك ما اريد
يوسف : على شنو جايين غير نتغدا ؟
فرح : كلت ما اريد أكل انت
يوسف : من شنو ضجتي بالضبط ممكن افهم ؟
فرح : تعرف كلش زين ماكو داعي احجي
يوسف : لا ما اعرف
فرح : مو كلت اكسر ايدج ؟
يوسف : ما شخصت ، عممت
فرح : شلون بلة ما شخصت وانت وجهتلي الكلام ؟
يوسف : كلت المرة التمد ايدها علية اكسرها
فرح : الله عليك ، صدك تحجي ؟
يوسف : ليش شوكت شفتي وحدة ضربتني وسكتت ألها حتى تقلديها
مدت ايدها لامست خده ومررتها عليه وهمست
فرح : وهذا الأثر الراح يعيش بينا ؟ شو ماكسرت ايد صاحبته ؟
سحب ايدها من وجهه ونزلها على الطاولة تقرب منها وهمس
يوسف : قصدج ريحانة ؟
فرح : منو غيرها تتجرأ عليك ؟
يوسف : وانت تريدين تقلدين تصرفاتها يا دكتورة يا محترمة ؟
فرح : ما قلدت ، قابل شگيت وجهك ؟
يوسف : ريحانة مريضة وما تتحاسب
فرح : بس فرح تتحاسب
يوسف : اي طبعاً
فرح : ليش بلة ؟
يوسف : لأن هي مريضة وانتِ مابيج شي ، دكتورة والج اسمج والمفروض تعالجيهم بدل ما تقلدين تصرفاتهم
فرح : حلو حبيت دفاعك عنها
يوسف : فرح طالعين نغير جو لو نتنكد شبيج انتِ ؟
فرح : شبية يعني ؟
يوسف : افصلي الواقع عن العمل ياحبيبتي
فرح : تصرفاتك وياها راح تجلطني
يوسف : زاعجج هذا الشي ؟
فرح : جداً
يوسف : بس هاي تصرفاتي وية كل المرضى ليش ركزتي وية ريحانة بالذات ؟
فرح : لأن تحبك
يوسف : استغفر الله ربي واتوب اليك ، رجعنا لنفس الموضوع ، لج بابا شتحب مني ؟ ليش هي بحال تحب ؟ ما تشوفيها شلون ضايعة ؟
فرح : اذا تريد تستمر علاقتنا تشيل ايدك عنها
يوسف : شلون يعني ؟ استثنيها من بين المرضى واعزلها لو شلون ؟
فرح : لا ما كالت هيج
يوسف : شلون ؟ انطيني طريقة اعاملها بيها وترضيج
فرح : تنطيها وصفة علاج وتكتب تقرير وتطلع ، لا تهتم ولا تشتري ولا توكلها بيدك
يوسف : قبلها المريضة شيماء تتذكريها ؟
فرح : اي اتذكرها شبيها ؟
يوسف : مو عالجناها بنفس الطريقة ، بالأسلوب الحلو والمعاملة اللينة ، فرح ترى اغلب المرضى ما يحتاجون علاج ومهدئات بكد ما يحتاجون اهتمام وكلمة طيبة وبال طويل ، مو هذا اللي درسناه لو نسيتي ؟
فرح : اي بس شيماء مو مثل هاي جانت محترمة نفسها
يوسف : وليش ريحانة شنو مسوية ؟
فرح : لا ابد ما مسوية غير تتلزك بيك عبالك طفلة ..
اجى الغدا وسكتوا ، اكلوا بهدوء وبعد ما سمحلها تفتح موضوع يخص الشغل ، كملوا ورجعها للشقة بدون اي كلام ، بقت زعلانة عليه ، وبلغته بدوامها ثاني يوم ...
اجازتها ما خلصت بس راح تقطعها حتى تصير قريبة منهم ..
يوسف راح للعيادة خلص شغله و رجع للبيت بالليل اتصل على طيبة وطلب منها تعلمه يطبخ فاصوليا يابسة ..
طيبة : تريدها لباجر ؟
يوسف : اي
طيبة : منكعها كبل وقت؟
يوسف : لا
طيبة : شلون تستوي تطول هواي
يوسف : يعني تاخذ نصف ساعة ؟
طيبة : لا أكثر
يوسف : اريد انام ميت نعس
طيبة : سوي شي ثاني والفاصوليا نكعها وباجر اطبخها
يوسف : لالا مو مال اسوي شي ثاني لازم فاصوليا
طيبة : عندك جدر ضغط ؟
يوسف : هم لا
طيبة : يوسف سوي غير شي وفضها
يوسف : مثل شنو ؟
طيبة : شنو عندك ؟
عدللها آخر شي علمته يسوي مركة بتيتة سهلة وسريعة وما تاخذ وقت ..
ثاني يوم أخذ الأكل وراح للمستشفى ، وكالعادة افتر على المرضى وراح لغرفة ريحانة ، قبل لا يدخل وصلت فرح وكفت متكتفه كبال الباب
فرح : افوت وياك
يوسف : شنو ما رايدة روحج ؟
فرح : انت وياي ما راح تسويلي شي
يوسف : وعليمن نجازف بنفسنا وندخل بتحدي؟
فرح : افوت يعني افوت
يوسف : لازم عاجبج وجهج يتخطط
فرح : حبيبي يحميني
يوسف : جان حمى نفسه ، وخري من طريقي
فتح الباب ودخل ، ترك مسافة بينه وبينها ، عيونه على الملف ويحجي وياها بصوت هادئ رسمي خالي من اي تعبير سوا ابتسامة بسيطة
يوسف : صباح الخير ريحانة
رفعت عيونها بأستغراب
ريحانة : صباح النور
ردها قصير و بارد
حط الجنطة على الميز بصف الكرسي وكعد ، فتح الملف وبلش يكتب ، بالمقابل ريحانة تباوعله بغرابة وتسأل نفسها هذا شبيه ؟ ليش هيج بارد ؟ شنو صاير وياه ؟ تسأل اسئلة ما تعرف اجابتها ..
يوسف : اليوم لازم نراجع كل الملاحظات القديمة ونقارنها بالجديدة ونشوف نظام نومج ، ضغطج ، والأكل ..
تابع كلامه بصوت ثابت ، بمهنية بحته ، وكأنه يحجي وية اي مريض عادي بدون اهتمام زايد
قاطعته بنبرة تعالي وكالت
ريحانة : روح اكعد يم الباب بعد
رفع عيونه باوعلها ورجع دنك على الدفتر وهمس
يوسف : مرتاح بمكاني
ريحانة : وليش بعيد خايف ؟
يوسف: لا ليش هيج فسرتيها
ريحانة : ما اعرف احس بيك شي مختلف اليوم ، صاير وياك شي ؟
يوسف : لا ابداً بس شوية ضغط عمل لا اكثر
ريحانة : متأكد ؟
رفع عيونه ، صادفت عيونها البدأت تغرك بالدموع
يوسف : بيج شي ؟
ريحانة : بلغوك تحافظ على الحدود بين الدكتور ومريضته ؟
يوسف : عفواً ما فهمت ؟
ريحانة : يعني رسمولك حدود ؟ يمكن تكون جزء من العلاج النفسي ؟
يوسف : ومنو يتجرأ يرسملي حدود او يفرض علية الاسويه ؟
ريحانة : ما اعرف هيج حسيت
يوسف : احساسج مو بمحله
ريحانة : اسلوبك متغير
يوسف : شوية تعبان ، لا تخلين ابالج
ريحانة : اتمنى يكون هيج
يوسف : اليوم كلشي طبيعي وممتاز ، الأكل ، المتابعة جيدة ، الضغط زين ، وضعنا تمام ريحانة
هزت راسها ساكته
يوسف : شوية ويوصلج الأكل تاكلين وتاخذين علاجج وتنامين حتى باجر الوضع يكون احسن وشوية شوية نتخلص من المهدئات بشكل نهائي
بعدها غلق الملف باوعلها مبتسم
يوسف : اذا ما محتاجتني تسمحيلي اطلع
هزت راسها بأي بدون ما تجاوبه ، أخذ جنطته وطلع راح لغرفته ، نزع اللابكوت وكعد خلف الميز ، دخلت فرح وسدت الباب
يوسف : اتركيه مفتوح
فرح : بس اريد احجي وياك
يوسف : احجي وحافظي على المسافة
فرح : لا تخاف ما اتقرب
يوسف : افتحي الباب كلت
ألتفتت فتحتها ورجعت كعدت
يوسف : كولي ؟
فرح : زين اليوم ما طولت وياها ، الحجي جاب نتيجة وياك
يوسف : هذا الأسلوب ما احبه حاولي تغيريه ، واذا على تعاملي وية ريحانة ، جربت اغير وياها لمصلحتها ما اريدها تتعلق بوهم وتنصدم بالواقع وتتأزم نفسيتها
لاحت شفايفها ابتسامة نصر ، لفت رجل على رجل وكالت
فرح : اي صح صعبة عليها تسمع بخبر زواجنا اكيد نفسيتها تتأزم
يوسف : لازم ناوية تعزميها ؟
فرح : اكيد لا شنو هالاشكال هاي واعزمها بعرسي
يوسف : شلون تعرف بزواجنا ؟ نكتب على كصتنا ؟ لو تفوتيلها بفستان العرس ؟
فرح : ماكو شي ينضم
يوسف : اذا ماحجيتي كدامها ماراح تعرف
فرح : مو شرط مني احتمال من الكادر
يوسف : لوقتها تكون تشافت وطلعت منا
فرح : شنووو ؟ ليش ناوي تطول لحدما تتعالج ؟
يوسف : متحسنة حالتها هواي واتوقع خروجها قريب
فرح : ها اذا هيج تمام
طلعت منه ، ورا دقائق دز عليه دكتور عدنان ، راحله دخل غرفته سلم وكعد
عدنان : شلون شفت وضع المرضى اليوم ؟
يوسف : اكو بيهم عندهم تحسن ملحوظ واكو لا بعد يحتاجلهم وقت وعناية أكثر
عدنان : وريحانة ؟
يوسف : شبيها ؟
عدنان : وضعها شلونه ؟
يوسف : تقارير الطبيب المقيم كلها جيدة الحمدلله
عدنان : يعني وضعها في تحسن ؟
يوسف : ان شاءالله بس ليش هيج متلهف على حالتها ؟
عدنان : ما متلهف بس يعني خطية بلكت تطلع هي هواي ضايجة هنا
يوسف : نتمنى كل المرضى يتعالجون ويطلعون بأسرع وقت ليش لا
قدمله ورقة وفتح قبغ القلم وحطه عليها ، يوسف عيونه نزلت على الورقة ورجع باوعله وكال
يوسف : شنو هاي ؟
عدنان : محتاجين توقيعك
يوسف : على ؟
عدنان : شفائها
يوسف : وبعدين ؟
عدنان : اوقع اني على خروجها
يوسف : ريحانة تقصد ؟
عدنان : اي
يوسف : طيب وين تروح ما فكرت بيها ؟
عدنان : ماعلينا بيها وين ما تروح تروح ، شنو هنا فندق خمس نجوم ؟
يوسف : دكتور راح تخليني اشك بتقارير اليوم المكتوبة عن حالتها شو صدك كلها جيدة ، الضاهر يادكتور بدينا نلعب
عدنان : عيب عليك هاي مو مهنية
يوسف : والكذب على الأستشاري بحالة المريض ؟ برأيك هاي مهنية ؟
عدنان : دكتور لا تطولها محتاجين توقيع وختم حضرتك
يوسف : البنية بعدها ما متشافية تماماً شلون اوقع شلون ؟
عدنان : يعني اني والكادر كلنا ما تاخذ بحجايتنا ؟
يوسف : دكتور يا حجاية الآخذها هي غير قبل كم يوم خنكت دكتورة فرح ، شنو هاي السرعة اللي تشافت بيها لو مارد هم ما يشافيها بيوم وليلة ..
عدنان : وقع على مسؤوليتي
دفع الورقة بأتجاهه وكال بحزم
يوسف : تريد انت وقع ، انه ما وقع ﻷن بعدها مريضة
تركه ورجع لغرفته ، باوع للميز ما لكى اكل ريحانة ، طلع بسرعة لغرفتها فتح الباب وانصدم بالفوضى ، الأكل متطشر وريحانة واكعة على الأرض ، ألتفت على الممرضة وصاح
يوسف : شنو صاير ؟
حجاها و دنك رفعها من على الأرض توسدت اذرعه ونزلها بحنية على السرير ، فعل اللازم وهدأها غسل وجهها بمي بارد ، تنفست سريع بعدها طلبت تشرب مي ، رفع راسها بيده شربها ورجعها تنام ، باوعلها وهمس
يوسف : ليش هيج سويتي شنو اللي صار ؟
دارت وجهها عنه وعيونها مليانة دموع
أخذ نفس عميق وهمس قريب أذنها
يوسف : فدوة الج ، هسة الغرفة تتنظف وتترتب ، المهم صحتج
جسمها رجف دموعها نزلت ، طلع وهي ألتفتت تدور على دليل لقربه ، مالكت غير الحدود الجديدة اللي رسمها بعلاقتهم ...
طلع وطلب تتنظف الغرفة واخذ الممرضة وياه لغرفته حتى يفتهم اللي صار ..
_بأثناء دخولك على دكتور عدنان ، اجتي دكتورة فرح وطلبت مني آخذ الصينية واوديها للمريضة ريحانة حتى تاكل ، اخذتها ورحت.
دخلت بالصينية ، تركتها على الميز الجانبي ، الصحون مرتبة وكلشي تمام مثل ما سلمتني الأكل الدكتورة يعني مشيت بتعليماتها اني مال دخل باللي صار ..
يوسف : كملي ؟
المريضة رفعت حاجبها علية مستغربة وهمست
ريحانة : شنو هذا ؟
_أكل من دكتور يوسف
كلتلها هيج مثل ما طلبت مني دكتورة فرح
ريحانة : وليش مو هو جابة ؟
_عنده شغل وطلب مني اوصله لغرفتج
ريحانة : همممم طلعيه
_شنو ؟
ريحانة : الأكل طلعيه
_ وين اوديه هو جايبه مخصوص الج
ريحانة : رجعيه وخليه هو ياكله
_ بس
ريحانة : كلتلج ماريده
حجتها وضغطت بيدها على اللحاف بقوة
_ بس ما يصير لازم تاكلين ، جسمج محتاج اكل
ريحانة : رجعيه كلت ، او انطوه ﻷي مريض جوعان
الجو صار مشحون والصراحة خفت احجي وردت اطلع بس تذكرت كلام الدكتورة فرح من كالت لازم اجبرها تاكل بأمر منك
_هاي المرة انتِ اكلي وبعدين نودي للمرضى
كامت من مكانها وانفاسها لاهثة عصبية ، دفعت الصينية بقوة من على الطاولة ، وكعت على الأرض وتطشر الأكل ، وصارت تصرخ
ريحانة : هذا مو عدل ابداً مو عدل تعاملكم وياية غلط ، كل يوم تعاملوني شكل مليت تعبت منكم تعبت اريد اطلع طلعوني
حاولت ألزمها اهديها ، دفعتني ، دنكت اخذت الصحون وشمرتهم على الحايط والباب وتصرخ
ريحانة : ماريده ماريده ماريد كلشي منه ماريد حتى هو ماريد اشوفه احقر انسان عرفته بحياتي
بعدها انهارت على الأرض تتنفس بصعوبة وعيونها انگلب ليفوك ، طلعت حتى اصيح الطبيب المقيم حضرتك صرت بوجهي وسويت اللازم ..
يوسف : تمام تكدرين تروحين وصيحي دكتورة فرح
راحت رجعتله دكت الباب وكالت
_دكتور تكول عندي شغل اخلصه واجي
يوسف : هي وين ؟
_بغرفة الأطباء
يوسف : تمام تكدرين تاخذين راحتج
كام طلع من الغرفة توجه لغرفة الأطباء فتح الباب ودخل لكاها كاعدة تصبغ اظافرها وتدندن ، تقرب منها ، حط ايده على الميز وحجى بنبرة غضب
يوسف : شنو الشي المهم اللي خلاج ما تجيني لغرفتي؟
رفعت ايدها بطريقة مستفزة وعرضت اظافرها كدامه مبتسمة
فرح : هاي مثل مدتشوف
يوسف : وشغلج ليش تاركته ؟
فرح : وقت استراحتي
يوسف : تدرين اكدر اكتب بيج تقرير تنفصلين من وراه
فرح : سويها ولا تقصر
يوسف : غرفتي مرة ثانية ممنوع تعتبيها وحركتج مال اليوم اذا انعادت تشوفين مني شي تنصدمين منه
فرح : مثل شنو ؟
يوسف : فرح نصيحة لله لا تختبرين صبري
فرح : شنو تسوي ؟ حابة اعرف
يوسف : بوقتها راح تعرفين
فرح : شلون انصدم بيك ؟ ليش عندك وجه ثاني ما شايفته ؟
يوسف : بالضبط ، اشوفج الوجه العربي شلونه
فرح : اموت على التحدي
يوسف : مو بكدي
فرح : هاي كله لأن استعجلتلها بالأكل ؟ صدك لو كال ابو المثل ، زين لا تسوي لاش ما تتلكى
يوسف : وزينج هذا لاتسويه وية ريحانة ، وطلعيها من راسج
نفخت على اصابعها ، وهمست
فرح : صار عندك أمر ثاني ؟
تركها وطلع راجع لغرفته ...
ثاني يوم عنده عطلة ماداوم وراها بيوم داوم وعلاقته بريحانة استمرت بشكل رسمي حتى تتعود ويمكن بدأت تتعود لأن بطلت تعاتبه ..
بنهاية الأسبوع جان كلش تعبان ومحتاج راحة قرر يقضيه بالبيت ويبتعد شوية عن ضغط العمل والمشاكل ، بالليل اتصلت عليه طيبة
طيبة : الو شلونه حبيبي اليوم ؟
يوسف : تعبان كلش
طيبة : ليش يابعد عمرها لأختك
يوسف : هيج مشاغل ، انتم شلونكم ؟
طيبة : الحمدلله بخير
يوسف : عساكم دوم
طيبة : شوكت تجينا ؟
يوسف : اسبوع الجاي
طيبة : حيل هواي
يوسف : مابية حيل الطريق واريد اكون قريب من المستشفى في حال صار طارئ اروح بسرعة
طيبة : عبالي تجي حتى نجي انه وسمر وياك
يوسف : سمر تريد تجي ؟
طيبة : اي هي طلبت مني اتصل عليك وهذا فارس بالكوة قبل اخابر من نقاله
يوسف : اجيبلج واحد جديد ؟
طيبة : شسوي بية ما اعرفله
يوسف : تخابريني منه انه اخابرج وهيج يعني
طيبة : خافن ابوي يزعل ما يرضى
يوسف : ما عليج انه احاجيه اذا تريدين اشتريلج واحد قبل لا اجي
طيبة : يعني راح تجي بنهاية الأسبوع ؟
يوسف : هو احنا بنهايته مضيعة طيوب
طيبة : اي والله ايامي تتشابه ما احس بيها
يوسف : اي والله صحيح ، محتاجة شي لو اروح انام ؟
طيبة : لا نام ، ماعندي شي حبيت اسلم تصبح على خير
يوسف : وانتِ من اهله
سديته منه ورجعت النقال لفارس ، اخذه مني حطه جوا مخدته ونام ، وانه رحت نمت ، ثاني يوم وكت الفجر فزيت چن واحد فوك راسي ، ما ادري حلم لو صدك ، فتحت عيني ، هذا يوسف يعاينلي مبتسم ، كمت على حيلي حضنته
طيبة : هاي اجيت ؟
يوسف : وانه اكدر ما اجيج
طيبة : مو تعبان يابعد حيلي شلون اجيت ليش ما ارتاحيت ؟
يوسف : نمت ساعتين وكعدت شبعان نوم كلت اجيكم
طيبة : زين ما سويت ، جوعان ؟ اسويلك ريوك ؟
يوسف : اي ياريت
طيبة : انتظرني فد اصلي فرض الفجر واسويلك
يوسف : انه هم كايم اصلي ، شهم نايم هنا ؟ شعجب ؟
عاينت على فراشه وهمست بأي
يوسف : عليش مو بغرفته ؟
طيبة : صارت سالفة بعدين احجيلك عنها
يوسف : خير ان شاء الله
كمت للحمام جددت وضوئي وفرشت سجادتي اصلي ، خلصت ونزلت للمطبخ اسوي ريوك ، كعدوا ابوي وامي وبيبي وجدة وصار صوت بالبيت ، زيدت الكمية ، نزل يوسف ، امي شافته طارت بجيته
زهرة : يا يوسف هنا ؟
يوسف : اي
حجاها وحضنها باسها براسها وراها سلم على ابوي وجدة وبعدها دنك لجدي على مصلايته جان كاعد ، باسه براسه وكال
يوسف : تقبل الله جدي
يعقوب : منا ومنك حمدلله على سلامتك
يوسف : الله يسلمك
حطيت الريوك ألتمينا جانت الساعة ستة الصبح ، امي صاحت على شهم وفارس ، فد شهم نزل فارس ما رضى
زهرة : كلها تكعد إلا هذا شالع گلبي
طيبة : عوفيه يمه سهران
زهرة : اي على هالنقال اذا ما عمت عيونه ويكوم يلمض بيها ما اتسمى زهرة
اجه صوته من فوك
فارس : كاعد كاعد لا تاخذين بغيبتي توج صليتي الفرض
صدمة : جنه ملچ ما ادري منين يمد راسه
زهرة : مو اذانات عنده راديرارات مادري شني ...
ضحكنا على سوالفهم صبيت الجاي وبلشنا بسم الله ناكل بهدوء
كفيت الريوك وراها وكفت اغسل مواعين وامي شنكت العجين حتى نخبز ..
انفتح الباب ودخلوا بيت عمي راضي وحنة زوجته ورفل وريمة ، استغربنا جيتهم ، من يوم ما صارت سالفة رفل لا هم اجوي ولا احنا رحنالهم حتى بعرس نوح ما اجو رغم عزمناهم ..
سلمنا عليهم وامي صاحت علية ...
زهرة : طيبة يمة جهزي الريوك لبيت عمج
حنة : لا والله ماكلين وجايين
صدمة : ما يصير اكلوا هنا مرة ثانية
راضي : لا يمة ما نريد اذا اكو جاي زين
صدمة : جدة خدري جاي جديد
طيبة : صار جدة
رحت للمطبخ اخدر الجاي اجت رفل وراية وكفت تسألني عن يوسف ..
رفل : طيبة شلونج ؟
طيبة : الحمد لله وانتِ
رفل : زينة ، اكلج يوسف هنا ؟
طيبة : شرايدة منه رفل ما تبتي ؟
رفل : لا هيج مو مارضيت اجي خفت يكون هنا
طيبة : حتى لو هنا بعد شوية يطلعون للبستان وماراح تشوفينه ..
رفل : يابستان ؟
طيبة : مالنه
رفل : ها زين
ضلت تسولف شيش بيش وانه اسايرها الى ان خدر الجاي صبيته ورحت وزعته الهم
فات يوسف سلم ردوله بوجوه ثكيلة ، استأذن وطلع ، وراها شهم فات سلم وطلع ، انه والبنات دخلنا لغرفة بيبي ، رفل وريمة نزعوا حجاباتهم وكعدوا...
رفل : شوفي شعري ولا طول بعد
طيبة : يطول فد يحتاجله مدة
رفل : مايرجع مثل اول لازم اتانيه سنين يلة
طيبة : حطيله زيوت من بيبي هسه يفور
رفل : عندها زيت جدة ؟
طيبة : اي هسه تخلص چايها واصيحها تحطلج
سولفنا شوية ، وراها كالت
رفل : روحي صيحي جدة
طيبة : اي كايمة
طلعت صحتها واجت تمشي وتتوجى علية فاتت للغرفة عاينت لراس رفل وكالت
صدمة : زيت الخروع زين لراسج
رفل : جدة حطيلي منه
صدمة : طيبة جيبي الزيت من البوفية ، وانتِ تعاي نامي بحضني
كيفت واجت مددت بحضنها ، طلعت الزيت فتحت القبغ وحطيتلها بيدها فركته بجفها وحطته براس رفل وصارت تدلك بيه بقوة
رفل : جدة دتوجعيني
صدمة : هو هيج حتى ينبت الشعر
كملتلها وكالت
صدمة : يلة كومي خلصت ، وانتِ ناوشيني سطلة المي اغسل ايدي بيها
طلعت اجيبلها سطل مي وصابون تغسل ايدها ، رجعت لكيت فارس واكفلهن بالباب يحك بشعره ..
صدمة : شعندك واكف هنا تحك بشعرك خافن بيك كمل ؟
فارس : يمكن والله ، جدة تفليني ؟
صدمة : اسبح ويوكع منك
فارس : البارحة سبحت ما وكعن لازكات
صدمة : يعيشن على الوسخ ماتزين كفشتك جنها ليفة
فارس : جدة ما اسمحلج
رفل ضحكت على حجي جدة ، ألتفت عليها جانت لابسه حجابها عاينلها وكال
فارس : تضحك عود
رفل : وليش ما اضحك حرام ؟
فارس : ماعاجبج شعري ؟
رفل : يخرع
فارس : مو احسن من راسج جنه طوبة گريگر
رفل : انجب وين شفته ؟
فارس : كالوا مزينينج صفر عقوبة
رفل : جدة صيحي بيه
جدة تغسل بيدها وتحاجيه يعوفها
فارس : النوب صار يلمع تكول صلعة يعقوب من يوكف بالشمس
رفل : انجب يلة ولي منا بلا لواكة
فارس : هذا شبيه وجهج ؟
رفل : شبيه ؟
فارس : جنة معلاك بايت
رفل : مو احسن من وجهك صارله سنة ما لايحة صابون
فارس : خاف جايتج العادة يولي
جدة شمرت الخاولي عليه وصاحت بيه يطلع ، انسحب دار ظهره وطلع يضحك ..
رفل : شفتي اخوج شلون يحجي ؟
طيبة : لا تحارشيه وهو ما يتقربلج
رفل : حقير يقلد علية عبالك هو حلو ، مدري شنو شايف نفسه
طيبة : فارس معروف بالمداهر ما يقصد يضوجج
رفل : لا يقصد واصلاً صوجي اجيت ابوي جبرني اجي وياهم
صدمة : وعليش ما تجين ، هذا حوش جدج ما جاية لحوشة
دنكت تبجي ، رحت حضنتها ما تقبل تسكت ، بعدين فاتت سمر سلمت وكعدت ، عاد ألتهت وياها بالسوالف ...
طلعت رحت لأمي اعاونها بالخبز ، اجوي اخواني على الريحة وكفوا تلاثتهم يساعدونا ..
كسرت خبزة ليوسف وحطيتها بيده حارة ..
طيبة : خبيزة حارة وتفوح طيب مثل وجه البنية بيوم عرسها ، شوفها ...
اخذها مني اكلها بلكمتين وراها اخذ الشلاعة مال الخبز من ايدي عاينلي وكال
يوسف : يانادرة وخبزج عَ الرد ومن ريحة التنور ورد
طيبة : بعد عمري عمرك
معنى المثل (النادرة ، شي نادر ، وخبزج على الرد ، يعني الجمر الحار ، خبز اصيل بيه تعب واصالة ، ومن ريحة التنور ورد ، ريحة الخبز فايحة مثل الورد ..
عاينلي شهم وجاوبه ليوسف يقصدني بهذا المثل الريفي الجنوبي...
شهم : طيوبتنا من ذيلها كصوا براكع ومن جارها ما يشرب الماي
طيبة : حبيبي والله
رحت حضنته بقوة ، دلال اخواني ألنا ماكو بعده دلال ، معنى المثل (من ذيلها كصوا براكع ، من قوة هيبتها ومكانتها عند اهلها حتى الرجال ينحنون الها ، هيبتها تخلي الناس تخضع ،، ومن جارها ما يشرب الماي ، الجار ما يكدر يتجاوز حدوده وياها او يقلل من قدرها ، لأن هيبة اهلها تمنع هذا الشي )
اجى فارس دخل على الخط ولازم يشارك
فارس : من كاعكم تنبت الهيبة
ومن اسمكم تسكت المصبية
هاي لطيبة ولزهرتي
زهرة : غير تسكت المصيبة وتجفينا شرها
فارس : لا يكون قاصدتني زهرة ؟
اجت بيبي كعدت على المفرش تلم الخبز البارد وتسفطه ...
صدمة : انت مصايب مو مصيبة وحدة
شهم يلزك الكرصة بالتنور ويوسف يطلع المستوي وفارس واكف يداهر امي وجدة ، اخذ خبزة وجدة حادته ماتريده ياخذ
صدمة : ولي هسه تطير البركة
فارس : هاي بس انه من أمد ايدي تطير البركة
صدمة : محد ياچل وي ابليس
ألتفت لشهم يسأله
فارس : جدتك يامواليد ؟
شهم : ثلاثينات
فارس : حيل مطولة
صدمة : وشرايد من عمري ؟
فارس : جدة عمرج من ذاك الوكت
صدمة : شقصدك ؟
فارس : يعني قديمة من جان البعير اسعاف
صدمة : كون اللحد ياخذك
فارس : تدعين علية جدة ؟
صدمة : اي
فارس : من گلبج ؟
صدمة : اي من گلبي
لزم گلبه وكال
فارس : اخ يابة قلبي في ذمة الله
ضحكنا ، وخلصنا خبز على السوالف واللمة ، وراها اجى ابوي أخذ شهم وفارس وياه للبستان
يوسف ماراح يريد يحاجي سمر اجى صاحني..
يوسف : طيوب
طيبة : عيوني
يوسف : سمر وينها ؟
طيبة : جوا اصيحها ؟
يوسف : اي وتعالوا بنهاية الحوش انتظركم
طيبة : صار
فتت صحتها وطلعنا رحنا ليوسف جان كاعد منتظرنا ، كعدنا يمه على الكرويتات الخوص
طيبة : اذا موضوع خاص اروح
لزمتني سمر من ثوبي وكالت
سمر : ضلي ماكو شي مضموم
اشرلي يوسف اكعد ، كعدت ، سألها عن احوالها ووضعها وية شهم بعدها كال
يوسف : عليش عازلة فراشج عن زلمتج ؟
سمر : هو حاجاك ؟
يوسف : لا بس انه شفته نايم بغير غرفة
سمر : سأله هو يحجيلك
يوسف : اسمع منج بالأول وبعدين اسمع منه
سمر : اسألك كبل لا احجي
يوسف : اسمعج
سمر : هو عليش عقد علية اذا ماجان رايدني ، ورجع يعاملني بنفور وحقد اكثر من قبل
يوسف : لو ادري اجيج واسأل ؟
سمر : الجواب تلكاه عنده ، اسأله عليش عاشرني اذا رايد يبتعد ؟ جان عافني على كد العقد جدام الناس وينهيها بهذا الشكل ، فد انه اكولك هو عاجبه يكسرني ويهيني ويذلني ، شحجيلك عنه وشنو اسولف ، ماعندي غير وصف واحد ، شهم بيومها صعدني للسما ورجع شمرني للكاع ..
وحجتله تفاصيل من غير ما تتعمق ..
يوسف : انتِ شنو حابة ؟
سمر : ما اعرف
يوسف : تريدين تبعدين شوية وتفكرين وبعدها تاخذين قرار
سمر : لنفرض فكرت واخذت قرار تتوقع اخلص من سجن اخوك ؟
ابتسم يوسف
يوسف : آسف بس يعني هسه شهم صار سجان ؟
سمر : اي تدري ليش ؟ لأن انهنت هواي وتأذيت ، وماحصدت من محبته غير الأذية
يوسف : مو حجينا وشرحنا وكعدت وياج ساعات كلتلج يابنت عمي شهم گلبه مو الج روحه مو وياج لا تكسرين بختج وبخت البنية ماسمعتيني وهاي النتيجة..
سمر : حبه جان عاميني لو تجي لكبل من جنت ذيج السمر وتسألني اكولك اريده حتى لو ماخذ عشرة
يوسف : وهسه ؟
سمر : لو بوحده عايش ماريده
يوسف : سهلة ، شوكت حابين تجون وياي ؟
سمر : من تروح نجي وياك
يوسف : رتبوا اموركم بس قبلها بلغي زوجج
سمر : ما راح يخليني انت حاجيه..
يوسف : انه احجي وياه قبلها وانتِ انطيه علم احسن
سمر : ماشي
رجعت للبيت وانه وياه رحنا للبستان نعاونهم ، يوسف شاف شهم صاح عليه
يوسف : ابو الأشهام رايدك بشغلة
اندارله وكال
شهم : حبيبي ابو يعكوب كول اسمعك
يوسف : تعال هنا
شمر المسحاة من ايده وراحله ..
شهم : خير ؟ كول محتاج شي ؟
يوسف : رايد اخذ البنات وياي
شهم : يابنات ؟
يوسف : طيبة وسمر
شهم : وين ؟
يوسف : لبغداد
شهم : شنو المناسبة ؟
يوسف : ماكو هيج اريد اغيرلهم جو
شهم : بالنسبة لطيبة اختك وانت حر بيها بس سمر تعذرني ما اكدر ادزها
يوسف : بس انت راجع لبغداد خلصت اجازتك يعني لو جنت موجود ما ارضى اخذها منك وانت تبقى هنا
شهم : لا تفتحلي فتوك يرحم اهلك خليها هنا كاعدة وساكتة
يوسف : قابل اذا اخذتها اطلع عينها لو شنو ؟
شهم : طبعاً راح تاكل راسي يا رايدة تروح لبغداد يا رايدة ترجع
يوسف : لخاطري
شهم : لا تحرجني الله يخليك
قاطعهم صياح عمي ابراهيم وهو يكول
ابراهيم : وينهم الجلاب وينهم الأدبسزية ؟ لو بيكم زلمة يطلعلي
طلعله يوسف واجاه فارس شايل الفاسة ويتمشى من بعيد ، وعلى صوته طلعوا كميل ونوح وابوي وجدي كلهم التموا داير ما يدوره...
يوسف : خيرك عمي مگبل بالخير علينا ؟
ابراهيم : منين ييجي الخير وانتم موجودين؟
اجى شهم من بعيد صاح
يوسف : عمي صوتك بعيد ، جيت لو بعدك داير برا ؟
ابراهيم : اجيت يا ابن اخوي اجيت
تقرب شهم وكف كباله وكال..
شهم :عرفتك من دكة رجلك بالكاع من غير ما ألتفت ، كول شرايد ؟
ابراهيم : ولكم انتم ما تستحون هيج زايعيها ؟
عبد الملك : وعليكم السلام والرحمة
عاينله وكال
ابراهيم : السلام اللي ييجي بعد السالفة ما تخلص ما يسوى فلس
فارس : عمي لا تكبرها ، الموضوع قسمة ونصيب هاي اذا جيتك جانت على سالفة زواج سمر
ابراهيم : ليش هاي عندكم قليلة ؟ تجون و تاخذونها بدون علمي ؟ هي هاي الأصول بنتي تتزوج وانه بالعمرة ما ادري ؟ ولا كلفتوا نفسكم تبلغون اهلها على الأقل
شهم : من شوكت تدري بسمر حتى هسه جاي تسأل عنها ؟
ابراهيم : انت تسكت سوايتك ما يسويها الوسخ
شهم : ما زوجتها ونطيتها بدون علمي
ابراهيم: وانت منو واحطك بالصورة ؟ ها ؟ انت منو ؟
شهم : ابن عمها وابو بنتها وزوجتي
ابراهيم : ما جانت زوجتك لا تكثر بالحجي ، حجايتي وي ابوك
صارت هوسة وما نشوف غير ليث چاي ويسحل سمر من راسها ، شمرها كدامهم وتفل عليها
ليث : يابة لا تعاتب متبرين منها هالجلبة خل تولي..
شهم عاينله ودنك لسمر كومها ، جانت تبجي رجع ليث هد عليها راد يضربها ختلها وراه وصاح بيه
شهم : ولك مو بعينك زلمتها وتناوش تضربها
حجاها و ألتفت عليها محس وجهها من التراب ودنك حيله ينفض ملابسها ، دخلها جوا جناحه وكال
شهم : لايكون ضربج ؟
هزت راسها بلا وتبجي
شهم : طيبة اخذي سمر للبيت
ابراهيم : ما تتحرك منا لو ترجع ويانا للبيت وتطكلها وتطلبها من اهلها من جديد
شهم : لو ؟ الثانية انطيني اسهل
ابراهيم : ادفنها بكاعها
شهم : عمي كصر الشر واخذ جلابك وروح منا مادام النفس عليكم طيبة
ليث : واذا ما رحنا ؟
شهم : تعتذر من اختك وتدنك تبوسها ايدها وراسها وراها يلا افكر اعفو عنك ويمكن اعديلك اهانة مرتي بهيج طريقة
ابرهيم : محد يعتذر انتم لازم تعتذرون منا وترجعون البنية لأهلها وتطلبوها من بيت ابوها على الأقل حفظوا مي وجهنا جدام الناس
شهم : والله بالله اذا ما اعتذر ابنك منها ما تقوملكم قايمة
ليث : على اي اساس اعتذر منها اختي وبراحتي شنو اسوي بيها اسوي..
ابراهيم : اي و ما يعتذر
شهم : بالقرآن اذا ما اعتذر هسه راح اكبرها واذله ذلة ما يكدر بعدها يرفع راسه بين الزلم
ليث : واذا كلت لا وما نفذت شنو تسوي ؟
شهم : راح تشوف رد ما يعجبك
ليث : يهدد هاي جدام الكل اذا صار علية شي ؟
قاطعه شهم وكال
شهم : انه السبب
ابراهيم : شنو من صلافة تهددنا واحنا بوسط بيتكم ؟
شهم : التهديد شغلة واسولفلك الراح يصير شغلة ثانية ...
ابراهيم : شلون بلة ما تفهمني ؟
شهم : تريد تنهيها هنا ، تعتذرون من مرتي وتروحون كان بها ، ما رايدين الأعتذار تلكوا الراح يصير ...
ابراهيم : شنو يصير يعني ؟
شهم : سمر من فاتت لهذا البيت صارت من بنات عبد الملك ، وبناته ممنوع ينداسلهم على طرف واذا انداس تنداس روسكم بدل ذيالهم ..