رواية هنا يسكن شيخي الجزء الثاني2الفصل الاول1بقلم هدير اسامة
هو طلع من الرواية اللي كنت بقرأها ازاي !!
بجد ، مافيش كده
يعني ايه الشخص اللي تحبه في رواية يطلع حقيقي !!
كنت ماشيه في يوم من الأيام راحه السوبرماركت أشتري طلبات علشان أنا اللي عليا أجهز الأكل لإن ماما وبابا هيتأخروا في الشغل النهارده
انا بحب الروايات جدا لدرجة بحب البطل قبل ما البطله تشوفه أصلا ، اتقدملي ناس كتير لكن دايما كنت مقتنعه إن كل اللي بيحصل في الروايات دا كلام روايات وخلاص وإني مش هلاقي بطل يليق بروايتي أنا
أنا مش عاوزه أتجوز جواز تقليدي ، وكمان عمري ما دخلت في قصة حب أبدا ، بخاف
بخاف قلبي يتكسر والصراحة مش عارفه أنا مستنية ايه كل دا
لا راضيه احب واتحب ولا راضيه أتجوز صالونات
المهم دخلت السوبر ماركت لقيته قاعد على الكاشير وبيقرأ بسرعة في سره وشويه يبص على المصحف وشويه يرجع تاني .
قولتله بعفوية أسمعلك؟
لقيته بيقولي بحماس : تمام ياريت ، كإنه ماصدق يلاقي حد يسمعله .
الحمد لله كنت متوضية لإن دايما بحاول أحافظ على وضوئي كل شوية علشان لو الصلاة حضرت أصلي متركش مساحه للشيطان إنه يخليني أكسل ..
المهم خدت المصحف وطبعا المصحف لا يمسه إلا المطهرون فالحمد لله على نعمة الحفاظ على الوضوء..
فجأه ما شاء الله لقيته سمع كويس جدا وقالي شكرا من غير ما يبص في وشي وكإن الدنيا كلها مش سيعاه إنه خلص السورة والحمد لله الدنيا تمام .
خدني الفضول اسأله : انت طالب أزهر ؟
رد بهدوء : لأ أنا دكتور بيطري لسه متخرج
استغربت الصراحة وطبيعتي فضولية أكيد خدتوا بالكم
طب وشغال كاشير في سوبر ماركت ليه ؟
دا شيفت محمد صاحبتي وهو تعبان النهارده فأنا نزلت مكانه .
بصيت على المصحف وأنا عاوزه اسأله عليه لقيته بهدوء قالي : براجع علشان الشيخ بدر هيسمعلي النهارده في المسجد بعد العشاء علشان هانت وأختم دعواتك
انبسطت أما عرفت إن الشيخ بدر هو المعلم بتاعه ، بجد اللهم بارك حاجه فوق الوصف
المهم خدت الطلبات وحاسبت ومشيت بس شاغلني أوي الكائن الكاشير الطبيب البيطري دا ،هو مش حب أكيد ولا حتى إعجاب ، هو مجرد انبهار وفضول بردو
ومن كتر التفكير حسيتني غيرانه إني لسه مختمتش ومع العلم دكتوره يقين مرات الشيخ بدر هي اللي بتحفظنا في نفس المسجد وبتدرسلنا عقيدة كمان ، قولت لأ أنا محتاجه أشد حيلي شوية علشان أخلص أنا كمان ..
الشاب دا ما شاء الله عليه في وشه القبول وتحس وشه بشوش من غير ما يضحك
خدت الطلبات وطلعت بيتنا اللي هو بالتحديد قدام السوبر ماركت وطلعت فتحت البلكونه أبص عليه بصه كمان
لقيته بيضحك مع بنت كده وبيهزر معاها وكمان بيسلم عليها بالإيد والمصحف في إيده التانيه ..
جوايا حسيتني مش طيقاه اللي هو أنا افتكرتك كويس يا جدع
دخلت المطبخ وبدأت أعمل الأكل ، لكن لقيتني فجأه دخلت أجيب المصحف وحطيته على رخامة المطبخ وقولت أنا كمان لازم أحفظ وأنا بشتغل ..
انا غيوره جدا في العلم الديني ، نفسي كده أبقى زي دكتورة يقين ، ما شاء الله عليها ، قمة في الصلاح والتقوى ، بعافر والله ، الحمد لله لبسي كويس ومحتشم وبصلي الوقت بوقته وبصوم اتنين وخميس وكل اللي في جيبي مش ليا الحمد لله ، ما بصدق ألاقي حد محتاج بس ، لكن لسه ناقصني كتير أوووووي .
المهم الحمد لله ربنا كرمني وخلصت حفظ السورة وخلصت الأكل كمان ..
سمعت صوت الباب بيتفتح ،
بابا جه وجابلي معاه علبة مااااااندووووولين ، يا أسعد يوم في عمري ، دا أنا بحب ماندولين دي كإنها حد من اخواتي
بالمناسبة أنا عندي أخ واحد أكبر مني اسمه فريد ومسافر ألمانيا هو مهندس ميكانيكا بردو
خدت بابا بالحضن علشان هو عارف إني بحبها جدا وفي الغالب مش باكل حلويات غيرها
خمس دقايق وماما كانت جت وجهزت الأكل على السفرة وأكلنا ودخلت أوضتي علشان أراجع ناخد الحلقة أونلاين لإن دكتورة يقين مش هتقدر تيجي المسجد الفتره دي علشان بنتها بتجهز علشان الإجازة عقبااااالي بقا ..
السلام عليكم يا دكتورة يقين
وعليكم السلام يا حفصة ، أخبارك ايه يا حبيبة قلبي
الحمد لله يا دكتورة ، حضرتك وحشتيني جدا ، ربنا ينفع بيكي الأمة يارب.
اللهم آمين ، وأنتي كمان يا حفصة جدا ، دعواتك كده هانت وعائشة تاخد الإجازة .
اللهم بارك يارب ، عقبالي
بإذن الله يا حبيبتي قريب هانت أهو وربنا يكرمك يارب من فضله ..
المهم بدأت أسمع عليها الحفظ ولقيتها مبسوطة مني جدا ، ومكنتش مصدقة نفسي الحمد لله مغلطتش خالص .
بعد ما خلصنا دخلت عملت فنجان قهوة و فتحت الرواية اللي قرأتها ١٦ مرة علشان أقرأها تاني للمرة ال ١٧ 🙈
ياااه مافيش حد كده بجد ، أنا طول ما أنا بقرأ روايات كده عمري ما هتجوز معروفة ، البطل محترم وملتزم وعلى خلق ومش بيكلم بنات وعينه في الأرض ، دا ألاقي زيه فين دا !!!
المهم مقدرتش أكمل وغلبني النوم
صحيت بدري صليت الفجر ولقيت ماما لبست وفطرنا سوا علشان تاخدني الجامعة في طريقها وهي راحه الشغل .
طول الطريق وأنا وماما في صمت تام ، مافيش بينا لغة حوار ، هي متفتحه ودايما معترضة على لبسي وتصرفاتي ، من كتر ما احنا بعاد جدا عن بعض هي متعرفش حاجه عني ولا حتى تعرف انا بحفظ قرآن فين أو اي معلومه غير إني نازله درس القرآن ، عمري كمان ما شوفتها بتضحك مع بابا على الأكل ، بابا بحس إنه لين عنها ، المهم حاولت أفتح معاها حوار وهي سايقه
ماما انتي عارفه إني قربت آخد الإجازة
هي الامتحانات امتى دا لسه بدري على الأجازة
لأ يا ماما إجازة القرآن الكريم
اه يعني ايه بقا ؟
يعني ربنا يكرمني بإذن الله وهبقى معلمة قرآن
معلمة قرآن!! وهتسيبي الهندسه ؟!
لأ دا حاجه ودا حاجه ، هشتغل الاتنين ، واحد لوجه الله والتاني بهدف ربنا يوسع عليا ماديا وكده .
فجأه لقيت ماما بتبصلي بصات غريبه وسكتت وانتهى كده الحوار ، اللي هو مش هعرف أفتح معاها حوار تاني خلاص
وصلت الجامعه وقابلت صحابي وحرفيا بروح الجامعه علشانهم أصلا ، ومن حسن الحظ قابلت عائشة كمان ، بالمناسبة عائشة تبقى بنت دكتورة يقين والبيست فريند بتاعتي وهي اللي عرفتني عليها
حبيبتي يا عائش وحشتيني جداااااا ، ها هاااانت ونحضر حفل الإجازة ولا لسه
واحده واحده عليا يا حفصة أنا أصلا متوترة جدا
ليه بس ؟
أنا كنت فاكره الإجازة على قدي أنا وماما ، دا طلع حوار كبير وهيبقى في حفلة كبيرة وشيوخ من الأزهر وشيخات وبطني وجعتني
عائشة عااادي خليكي واثقة في نفسك ، ما شاء الله انتي شطوره جدااا ومتأكده إنك هتعمليها بإذن الله .
دعواتك انتي بس وربنا ييسر ، المهم هتكوني معايا من أول اليوم صح
اه بإذن الله أكيد
ثواني يا حفصة معلش أرد على بابا
السلام عليكم ، عامل ايه يا حبيبي
وعليكم السلام ورحمة الله وبركاته ، الحمد لله يا قرة العين ،
أخبارك ايه يا عائش
الحمد لله يا بابا بخير ، معلش ملحقتش أستناك علشان أسلم عليك قبل ما أنزل ...
لأ يا قرة عيني ،أنا رنيت أقولك إني هعدي أخدك النهارده وأنا مروح علشان هنتغدى بره احتفالا بالإجازة مقدما
يا بابا أنا خايفة
تخافي ليه ، مش عاوزه تلبسيني تاج الوقار أنا وأمك ولا ايه ؟ أنتِ لها يا عائش
حبيبي يا بابا ربنا ما يحرمني منك يارب ، دايما مشجعني كده بجد ، بحبك
أستودعكِ الله يا قرة عيني
طول ما عائشة بتتكلم في التليفون وأنا باصه على تعبيرات وشها وهي مبسوطه ما شاء الله ، يابختها بوالدها ووالدتها بجد ، عائشة تستاهل كل خير اللهم بارك ..
حفصه جاتلنا توصيله النهارده ببلاش ، بابا هيعدي ياخدني وبالمرة أعرفك عليه
ايه دا بجد ، أنا نفسي أشوفه بجد ، تعرفي أنا ولا مرة شوفته في الحقيقة .
هو جميل جدا ربنا يبارك لنا في عمره يارب
---------------------------
اليوم خلص أخيرا بعد محاضرات كتييير وإرهاق ونسيت حوار التوصيلة اللي عائشة قالتلي عليها
فجأه لقيتها بتقولي يلا يا حفصة بابا بره علشان لسه هيروح يجيب ماما من البيت
ااه انا نسيت خالص حوار التوصيل دا ، أنا طبعا متحمسة أشوف الشيخ بدر لكن مكسوفه جدا
لأ تتكسفي من ايه ، أنا حكيتله عنك كتير جدا ..
طيب يا ستي ربنا يستر
المهم وصلنا عند العربية ولقيت شاب راكب جنبه ، فضلت أحقق كده ، اااااه دا هو البيطري بتاع الكاشير ، ولقيت بنت راكبه كمان معاهم
دي البنت اللي كان بيسلم عليها
عائشة ، ثانيه واحده مين دول؟
دا محمود وخديچة اخواتي ، انتي أول مرة تشوفيهم ؟
اه الصراحه
اتوترت جدا وانبسطت في نفس الوقت
السلام عليكم ازيك يا شيخ بدر
الحمد لله يا حفصة أخبارك ايه يا بنتي ، عائشة كلمتني عنك كتير ، ربنا يجعلكم لبعض يارب صحبة صالحة .
الصراحه الشيخ بدر له طله كده جميلة بس أنا غصب عني كنت مركزة مع محمود وهو مش باصص على حد وباصص في تليفونه ، واتكسفت أسلم عليه
لقيت عائشة بتقوله محمود انت دايما ماسك التليفون كده ؟
انتبه وقالها حقك عليا يا حبيبتي ونزل من العربية وسلم عليها وبصلي كده وقالي أهلا اتفضلوا وفتحلنا الباب
للأسف مفتكرنيش أصلا
سلمت على خديچة ، وعرفت إنها في ثانوية عامة لسه بس عسولة جدا شبه عائشة ..
ركبت جنبهم والتزمت الصمت لحد ما وصلنا ،وطول الطريق وعائشة عماله تتكلم هي والشيخ بدر ومحمود أما خديچة كانت ملتزمة الصمت ومركزة في الطريق .
محمود وهو بيتكلم دمه خفيف جدا وبيعامل اخواته البنات زي ما يكون أبوهم ، ما شاء الله أسرة جميلة ومبهجة ..
فجأه وصلنا البيت وأول مره أحس الطريق خفيف ونزلت قدام بيتي وهما كملوا علشان يجيبوا دكتورة يقين ،طول ما أنا طالعه على السلم وأنا سرحانه
ياريت فريد يرجع ونعمل جو حلو كده أنا وهو ..
طلعت حضرت الأكل و بالليل لقيت عائشة بعتالي رسالة كده غريبة
ممكن أعترفلك في اعتراف
خير يا عائشة اعترفي
انا كنت عاوزاكي تركبي معانا النهارده علشان محمود أخويا يشوفك علشان كنا بندور على عروسة وأنا وماما رشحناكي ليه ، ايه رأيك؟
انا اتخضيت حرفيا ، عروسة ايه بس ، الحوار كبير عليا ، ودي ناس متترفضش ، فجأه لقتني بقولها : بس هو مشافنيش
لأ كلمني النهارده الحمد لله إني أكلمك يعني لو تمام تبلغي أهلك وكده وتحدديلنا ميعاد .
انا استغربت الصراحة وفرحت وخوفت واتوترت ، كل المشاعر مع بعضها ، لأ أنا لازم أنام بجد
دخلت أنام وحاولت أغمض عيني لكن معرفتش ، قومت وقفت على أوضة بابا وخبطت عليه : بابا صاحي؟
اه يا حبيبتي صاحي اتفضلي
قعدت جنبه على السرير ولقيت ماما في سابع نومه ، فضلت ساكته شويه
مالك يا حبيبتي في حاجه شغلاكي؟
مش عارفه أبدأ منين ، بس هو في عريس متقدم لي كويس
طيب طالما كويس ايه المشكلة ، ينور ونتعرف وربنا يكرم
انت مش شايفني لسه صغيرة؟
مهما تكبري هشوفك صغيرة ، لكن لو حد كويس ليه نقول لأ ، احكيلي بس عنه شويه
معرفش تفاصيل يا بابا ،غير أنه ابن معلمة القرآن بتاعتي وأخو صاحبتي وطبيب بيطري لسه متخرج
طيب تمام الصبح هكلم والدتك وأقولك على ميعاد ينورونا فيه ونتعرف .
تمام يا بابا أنا هدخل أنام ، تصبح على خير ..
-------
الصبح ركبت مع ماما كالمعتاد وسألتها بتوتر : بابا كلمك في حاجه ؟
اه الصبح قالي على حوار العريس ، تمام هنشوف وقت فاضي ونبلغك آخر اليوم .
يعني انتي موافقه؟
اه الدكاتره البيطري مستقبلهم هايل بره .
بس أنا مش عاوزه أسافر
ليه ما أخوكي أهه مسافر وعامل تارجت هايل.
ماشي يا ماما تمام ....
انتهى الحوار من قبل ما يبدأ كالعادة
وصلت الجامعة وعائشة خدتني بالحضن بابتسامة لطيفة كده وقالتلي هاااا يا عروسة
ضحكت من الكسوف ، الحوار غريب عليا : بصي يا عائشة أنا مكسوفة لوحدي ومتوترة
ليه مكسوفة، دا محمود أخويا سكر سكر سكر
عائشة احنا لسه صغيرين صح؟
صغيرين ايه بس ، دا احنا هنتخرج السنة الجايه
طب احكيلي عنه شويه
بصي يا ستي ، محمود طبيب بيطري ، وإمام جامع الصادق الامين ، وحافظ المصحف ما شاء الله بخمس قراءات ، وملتزم ومتفاهم ومش قفل خالص ، ومثقف ، وكل حاجه حلوه بجد
طيب عيوبه ايه؟
غيور جداااا ، وبيحب القط بتاعه أكتر من أي حاجه ، كإنه ابنه
بس أنا بخاف من القطط
يا ستي سيبتي كل المميزات ومسكتي في القطه
طيب ربنا يسهل بقا
ـــــــــــــــــــــــــــــــــــــــــ
حفصة
ايوه يا بابا ، ثواني هجبلك القهوة وجايه
عملت القهوة وقعدت مع بابا في البلكونه لقيته بيقولي
احنا اجازة الجمعة بإذن الله قوليلهم يتفضلوا ...
انا اتوترت ، بالسرعة دي ، هو اه شاغلني محمود ، لكن لا حب ولا إعجاب ، هو حاجه مختلفة بس أهي خطوبة ولو مش مرتاحه كل واحد يروح لحاله ، بس لحاله ازاي !! دا ابن الشيخ بدر والدكتوره يقين وأخو عائشة ، ربنا ييسر بقا من عنده
وجه يوم الجمعة بسرعة ولبست وجهزت وأنا مش مستوعبه لسه الأحداث اللي جريت بسرعة
الباب خبط وماما راحت تفتح الباب
لكن المفاجأة
ماما سلمت على دكتورة يقين وقالتلها
أهلا يا بنت خالتي
يقين بصدمة : إسراااااء!!!