رواية هنا يسكن شيخي الجزء الثاني2الفصل الثاني2بقلم هدير اسامة
نظرات ماما مكنتش مريحه ، ولأول مرة أشوف دكتورة يقين متوترة كده حتى الشيخ بدر ، وايه حوار بنت خالتي دي اللي ماما قالتهالها ...
نورتينا يا هدير اتفضلي ولا اقولك يقين صحيح، أهلا يا شيخ بدر ، اتفضلوا
دكتورة يقين دخلت وقعدت في هدوء وهي بتبص للشيخ بدر نظرات كده أنا مش فهماها ، حتى بابا كان مستغرب ، والصمت حل في المكان
فجأة دكتورة يقين خرجت عن صمتها وقالت لماما : شكلك متغيرش خالص ما شاء الله ، بقالي سنين كتير مشوفتكيش..
الدنيا تلاهي بقا انتي عارفه ، وبعدين الشيخ بدر خدك مننا خالص .
الحمد لله والله على كل حال ، تسمحيلي بس أشم هوا في البلكونه ٥ دقائق
اه طبعا اتفضلي
أول ما دكتورة يقين دخلت البلكونه دخل وراها الشيخ بدر
مالك يا يقين؟
دي إسراء يا بدر ..
بدر بهدوء: ايوه عارف إنها إسراء ، فين المشكلة ؟
انا ما صدقت عايشه في هدوء أنا وأولادي يا بدر
يا يقين لو اجتمعت الأمة على أن يضروك بشئ لن يضروك إلا بشيء قد كتبه الله عليك ، دا مش كلامي ومش أنا اللي هقولك كده ، المهم اثبتي كده وقوليلي ايه رأيك في حفصة ؟
البنت طيبة وكويسة وشبه بناتنا أوي ما شاء الله عليها وبدرسلها بقالي سنين
طيب على بركة الله ، سيبك انتي مين أهلها ، وربنا هييسرلنا ويبعد عننا كل سوء زي كل مره ، ثقي في الله يا يقين ويلا نتعرف على الناس ...
ونعم بالله
ـــــــــــــــــــــ
طول القاعده وأنا قلبي عمال يدق خصوصا إنه قاعد قصادي، مكنتش متخيلة إن ثباتي اللي طول عمري محافظه عليه يروح في ثانية كده ، كنا قاعدين أنا وهو وعائشة في الريسيبشن قدامهم ، وبعد صمت طويل لقيته بيقولي
في الجزء الكام يا حفصة ؟
في ال ٢٥
طب انتي عارفه ايه المتشابه في سور الجزء ال ٢٥ ؟
اه طبعا إن كلهم بيبدأوا ب "حم"
طيب تعرفي ليه سورة الجاثية اتسمت بالاسم دا ؟
احترت شوية وبعدين قولتله لأ مش عارفه
بصي يا ستي سورة الجاثية فكرتها إنها عالجت إعراض وتكبّر المشركين عن النبي وعن القرآن وعن التصديق بالوحي ... بعرض دلائل قدرة الله في الخلق ... وده ظهر في أول صفحة من السورة
يعني السورة حاربت ( صفة الكبر ) اللي ماينفعش تكون موجودة عند حد غير ربنا وبس .. وده اللي ربنا قاله في آخر آية في السورة ( وله الكبرياء في السموات والأرض )
أما بقا اتسمت بالجاثية ليه ؟ دا لإننا هنعيش هول من أهوال يوم القيامة ... ( هنبقى قاعدين في وضع الجثي على الركب ...وضع ذليل مهين منتظرين الحساب )
ياااه حلو أوي أنا مكنتش أعرف إننا هنكون قاعدين على الركب في وضع الجثي ،كنت فاكره إننا واقفين مستنين ، طب وسورة الزخرف؟
أولا خلينا متفقين إن الزخرف جايه من الزخارف والمقصود بيها هنا إنك متنخدعش بزخارف الحياة
سورة الزخرف ركزت على هدم الخرافات والخزعبلات اللي المشركين في مكة كانوا بيعتقدوها
طب الخرافات دي مثلا زي ايه، يعني على سبيل المثال
لما كان حد منهم يجيله بنت كان وشه يسود ويجيله اكتئاب ويوأدها لإنها عندهم كانت بترمز للعار....
وزي مثلاً إنهم قالوا على الملائكة إنهم بنات الله ....
وزي مثلاً إنهم قالوا الرسالة اللي نزلت على سيدنا محمد كانت المفروض تنزل على راجل مننا رجل عظيم له منصب وسلطان مش راجل فقير راعي غنم زي محمد ، فهتلاقي طول السورة رد من ربنا سبحانه وتعالى على خرافاتهم دي وتهديد ووعيد لهم بسبب اللي قالوه و كمان السورة ذكرت قصة سيدنا موسى مع فرعون كتأكيد لمصير قريش السئ اللي مستنيهم على خرافاتهم وأباطيلهم ...
طول ما هو كان بيشرحلي حسيتني مرتاحه أوي والحوار شيق جدا ، أنا استحاله أفرط فيه بجد ، بيتكلم بهدوء وراسي وبيشرح براحه وطريقه سهلة كده تدخل القلب زي ما هو دخل قلبي ، كل دا وعائشة قاعده مركزه في تليفونها علشان تسيبنا نتكلم براحتنا ، خدني الفضول اسأله عن نفسه
انت ليه دخلت كلية طب بيطري ؟
ضحك وقالي بهدوء : علشان بحب الحيوانات ، في مره كنت صغير جدا وشديت قطه من ديلها فصرخت جامد ، والدي شافني وقالي ليه عملت كده؟ قولتله علشان يلعب معاها ، قام شاددني من شعري جامد وقولت ااااه ، بصلي بتحدي وقالي بلعب معاك، فهمت ساعتها إن الحيوانات بتحس زيها زينا بس ممكن انت تقدر تتكلم وتقول فيك ايه ، هما لأ ، ووالدتي كانت حكتلي قصة سيدنا سليمان وفهمه للغة الطير وكده يعني ، قررت إني أحس بالحيوانات وأفهم هما جاسين بإيه من غير ما يتكلموا ، والحمد لله ربنا وفقني ..
طول ما هو بيتكلم وأنا مش مستوعبه بجد ،هو في كده ، دا انا كنت مهووسه بمراد بطل الرواية اللي قرأتها ١٧ مرة ، مراااد يجي جنبه ايه بس ، فجأه لقيتني بسأله سؤال واحد عاوزه أعرف إجابته
انت وافقت عليا ليه؟
ضحك كده ضحكه مريحه وقالي :علشان بتعرفي تسمعيلي كويس
اتصدمت من الرد وتلقائي قولتله : انت خدت بالك مني ؟
ضحك وقالي : اه اومال جيت ليه
بس انت مبصتليش خالص
وأبصلك ليه ، مش حلالي لسه
اتكسفت أوي وكنت مبسوطة جدا ، حسيته خطفني كده وحسيت لأول مرة بشعور غريب مسيطر عليا..
خلصوا قعدتهم ومشيوا ، ودخلت أوضتي وأنا في قمة السعادة ، ازاي في حد كده ، الغرفة لا تسع أجنحتي بجد ، بس جه في بالي جملة ماما وهي بتقول لدكتورة يقين يا بنت خالتي!! اللي هو يعني ايه ؟ وازاي يعرفوا بعض وكمان ماما متفاجئتش بيها وهي على الباب كإنها عارفه إنها هي
فجأة سمعت صوت بابا وماما بيتخانقوا في الأوضه ولأول مرة أسمع صوتهم عالي كده ، وغصب عني سمعت كلام مكنتش فهماه في الأول ، لكن للأسف فهمت ..
انتي اتجننتي يا إسراء ، دي بنتك
وفيها ايه يعني بنتي ، هي هتتجوز أي جوازة ، دي هتتجوز ابن الشيخ بدر
يا ستي سيبي الناس في حالهم ، أنا رضيت أكمل حياتي معاكي بس علشان العيال ، لكن أنا للأسف تعبت ، رسمتيلي دور البريئة واجبرتينا نسكن هنا من زمان وعرفت بالصدفة إنهم ساكنين بعيد عننا بشوية ، كل شوية تلفي وراهم حتى دخلتي حفصة نفس جامعة عائشة علشان تقرب منها ، انتي شيطاااااانه وانت تعبت منك
خلصت كلام ؟
انتي الكلام معاكي منتهي من زمان .
انت تعرف إن هدير دي أو يقين زي ما بيقولوا سرقت مني طفولتي كلها ، حتى أمي ماتت وهي بتدعيلها هي ، أنا أحلى منها وأشطر منها ، لكن دايما كانت سهتانه كده وتخدع أي حد ، عمري ما نسيت طفولتي اللي راحت بسببها ..
يا ستي وهي ذنبها اييييه !! دا قبول من عند ربنا ، وأهو ربنا كرمها وبقت دكتورة في الدين وست الناس كلها بتقتدي بيها ..
متنرفزنيش ، كلامك دا في حد ذاته بيضايقني ، حتى أخويا سابني وطفش وعاش بره بسببها ، مبقاش ليا حد ، لحد ما جاتلي حاله نفسية وروحت اتعالج عندك ، وانت قبلت بيا بكل عيوبي ..
جواكي كويس يا إسراء ، شيلي هدير بس من دماغك ، بقيتي عندك كام سنة وكل دا وهي لسه في دماغك ، الشيخ بدر ربنا يبارك له عرف يغير هدير ويخليها دكتوره يقين
لكن أنا للأسف معرفتش أعالجك من اللي انتي فيه ، أنا دكتور فاشل
مش وقته كلامك دا انا لازم انتقم منها حتى لو هخسر كل حاجه
حتى لو هتخسري بنتك
حتى لو هخسر بنتي
----------
انا سمعت الكلام دا ودموعي مقدرتش أتمالكها ، يعني ايه!!
في أم تكره بنتها كده !!! يعني ايه أم تبقى بالشر دا كله ، في أم تعامل بنتها كده!!! دا أنا حتى كنت فكراها متعرفش حاجه عني ، أتاريها هي اللي بتزقني في طريقهم !! طب أنا !! طب الناس اللي أنا فعلا حبيتهم وقربت منهم بقلبي
يعني أمي وخداني طعم علشان تدمر الناس دي ، طب ومحمود !! دا أنا كنت بدور عليه من زمان ، دا أنا قلبي كان لسه حااالا فرحان بيه ..
لأ أنا لا يمكن أوافق على الجوازة دي