رواية هنا يسكن شيخي الجزء الثاني2الفصل الثالث3بقلم هدير اسامة
هو مين دا اللي تقوليله لأ ، انتي مش عارفه دول مين؟
بصيت لها بكل حزن وسألتها : أنا عاوزه أعرف منك دول مين؟
دا الشيخ بدر الدين عبدالوهاب الداعية اللي بيطلع في التليفزيون والراديو ومحدش زيه تقولي لابنه لأ
ودكتوره يقين يا ماما؟
مالها ،مراته عادي وأكيد هتبقى كويسه علشان مراته
حسيت بطاقة سلبية وأنا بتكلم معاها ، حسيت إني خلاص مش قادره أستوعب وحسيت إن الكلام معاها منهي زي كل مرة لكن للأسف أمي ...
بس أنا مش موافقه ومش هتجوزه ..
هتتجوزيه غصب عنك ،،،
قالت الكلمتين دول وسابتني ومشيت ودموعي مبقتش عارفه أتمالكها ، أنا مش هينفع اظلم محمود معايا ومش هينفع أكون سبب في تدمير العيلة دي ...
بعد شوية لقيت عائشة بعتالي رسالة على التليفون بتقولي بكره الحفلة بتاعتي أنا ومحمود ومجموعة من الحفّاظ هستناكي يا حفصة والعقبى لكِ ..
رسالة جميلة مبهجة ، لكن مش قادره أرفع عيني فيهم ولا حتى قادره أحضر الدرس مع دكتورة يقين ...
دخلت أوضتي وفرشت مصليتي وقعدت أصلي وأدعي ربنا بحق قلبي وحسن نيتي ، دعيت ربنا ينجيهم ويحفظهم ويهدي أمي لإني مينفعش أعقها ..
نمت على مصليتي وأنا بصلي والدموع ماليه عيني لقيت محمود بيصحيني يلا يا حفصة يلا قومي يلا علشان نصلي الفجر أنا اتوضيت ومستنيكي ، قومت مفزوعه أدور على محمود ..
لقيت الفجر بيأذن ولقيتني نايمه على المصلية ، قومت صليت ونمت على سريري وأنا سرحانه في محمود وكلامه وأول ما جيت ابتسم افتكرت كلام أمي وأبويا وفضلت أعيط تاني ...
نمت علشان مش عاوزه أفكر تاني خالص وصحيت على صوت تليفوني وهو بيرن ..
ألو السلام عليكم ،صباح الخير يا عائشة
وعليكم السلام ورحمة الله وبركاته ، صباح الخير ايه بس احنا بقينا العصر ، يلا قومي بسرعة أنا مش هلبس إلا أما تيجي ..
بس يا عائشة ، أصل ..
لا أصل ولا غيره أنا مش هلبس إلا أما تيجي ،سلام
قومت اتوضيت وصليت ولبست ، وكالعادة ملقتش حد في البيت ، بابا وماما في الشغل ، رنيت على بابا استأذنه ونزلت ..
وأنا نازلة لقيت محمود خارج من السوبر ماركت قدامي وبيقول لمحمد صاحبه : أنا هروح أنا علشان اتأخرت أوي يدوب أخلص وأجيلك على طول ، بإذن الله مش هتأخر عليك يا غالي ..
متقلقش يا محمود أنا بقيت أحسن الحمد لله ، خلص حفلتك وروح بيتك ارتاح يا حبيبي..
يا سيدي حد يلاقي دلع وميتدلعش ، أنا ماشي بقا سلام.
ومحمود بيلف لقاني واقفه وراه وعيني مليانه دموع ، فضل باصصلي بقلق كده وبعدين وطى عينه في الأرض بسرعة ومشي وفي ثواني لقيت عائشة بترن عليا
مالك يا حفصة في حاجه؟
لأ مافيش أنا جيالك في الطريق اهه
لأ متضحكيش عليا فيكي ايه بس ، انتي حد زعلك ؟
لأ أما أجيلك بس ..
وصلت البيت عندهم تحت ما شاء الله بيت كبير جدا من دورين ، الدور اللي تحت استراحة وأوضة محمود والدور اللي فوق للبنات
عائشة فتحتلي وخدتني بالحضن وكإني كنت عاوزاها تخصني حبه كمان
مالك يا حفصة عيونك مدمعة ليه ؟
فرحانه بيكي أوي يا عائشة بإذن الله ربنا يجمعني بيكم في الجنة مع رسول الله
يااارب يا حفصة اللهم آمين ، المهم فرحانه بيا لوحدي ولا بحد تاني كمان ..
فرحانه بيكم كلكم ، يلا بس علشان تجهزي علشان منتأخرش .
طلعت الأوضة معاها لقيت دكتورة يقين وأول ما شافتني قامت بسرعة وخدتني بالحضن ورحبت بيا بوشها البشوش
أول ما شوفتها جوايا فضل يقول : دي حد يكرهها ، دي حد يشوفها وحشه ويحب يفسد عليها حياتها ، الله يسامحك يا أمي .
عائشة طلعت من الدولاب فستان أبيض وخمار أبيض ولبست في أوضة خديچة ، وأول ما دخلت الأوضة ما شاء الله وشها زي البدر ، دكتوره يقين قامت بسرعة خدتها بالحضن وفضلت تعيط وتقول اللهم بارك يارب اللهم بارك
فجأه الباب خبط ودخل الشيخ بدر ومحمود وراه ، محمود كان لابس عباية وعمة وحاجات تانيه معرفش اسمها زي اللي بيطلعوا في التليفزيون ، كان جميل اوي ، دخل الأوضة بعد والده وباس ايد دكتورة يقين وقالها هااا ايه رأيك ، عقبال ما تشوفيني عريس بقا .
الشيخ بدر خد عائشة بالحضن وفضل يقولها اللهم بارك يا قرة العين وشاور لمحمود يجيب العلبة اللي على التسريحه وطلع منها تاج جميل ولبسهولها وقالها عقبال ما تلبسينا تاج الوقار يا قرة العين ..
وهو بيلف علشان يخرج لقاني قاعده ، قالي أزيك يا حفصة يا بنتي ، العقبى لكِ بإذن الله عن قريب .
يقين : هااااانت جدا يا بدر ، ما شاء الله حفصة في تقدم جميل.
ما شاء الله يا بنتي ربنا يحفظك بحفظه يارب .
انا الكلام محبوس جوايا ، بصيت في الأرض وقولتله : بإذن الله ، كله بفضل ربنا ثم دكتورة يقين الله يبارك لها يارب .
المهم نزلنا وركبت معاهم العربية
الشيخ بدر ومحمود قدام وأنا ودكتور يقين وعائشة ورا ، أنا خديچة كان ليها نصيب تقعد على رجلي بقا واكتشفت إن دمها خفيف ، كانت في الأول ساكته علشان متعرفنيش .
طول الطريق واحنا بنضحك ونسيت أهلي ونسيت اللي حصل ولقيتني مبسوطة جدا
ـــــــــــــــ
ألو ازيك يا فريد أخبارك ايه ؟
عامله ايه يا ماما وحشتيني أوي .
وانت كمان يا حبيبي جدا ، ايه هتيجي امتى ؟ عندي ليك عروسة زي القمر .
عروسة ايه يا ماما ، أنا مش بفكر في الجواز خالص .
لااا دي عروسة ميتقالهاش لأ يا حبيبي ، المهم حفصة اختك اتخطبت ولازم تبقى موجود
ايه دا بجد ، لسه مكلمها امبارح مقالتليش ، عموما أنا هرتب أموري وأجي في أقرب وقت المهم مافيش خطوبة غير أما أجي .
قفلت إسراء التليفون وبتبص لقت جوزها وراها
عروسة مين يا إسراء؟
عائشة ، بنت جميله وزي القمر
يا شيخه اتقي الله ، انتي دماغك ايه شيطان ، ارحمي نفسك شوية .
وانت ايه دخلك ، أنا بفكر في مصلحة عيالي
عيالك !! انتي مبتفكريش غير في نفسك الله يهديكي.
ــــــــــــــــــــــــ
ما شاء الله الحفلة مبهجة أوي كنت قاعدة جنب دكتورة يقين وطول القاعده وهي ماسكه ايدي وتقولي شوفي يا حفصة اللهم بارك زي القمر ازاي.
الحفّاظ كلهم كانوا على المسرح قاعدين على كراسي شكلهم حلو أوي
١٠ أولاد و١٠ بنات
والمفاجأة افتتحوا الحفل بصوت الشيخ محمود بدر الدين عبدالوهاب .
شكله مبهج وهو قاعد على الكرسي وبدأ يقرأ بهدوء
صوته جميل ، جميل أوي ، مش شبه اللي كان بيسمع بيه خالص ، صوته يخلي الإنسان يراجع نفسه ألف مره من الخشوع اللي بيقرأ بيه ..
بعد كده جه دور باقي الحفاظ في التسميع
بدأ الشيخ ينادي على اسم اسم ويسألهم من آيات متفرقة ، وما شاء الله كلهم قمة في الهدوء والثبات ، حتى عائشة كانت ثابته رغم إني عارفه إن قلبها بيدق بسرعه دلوقتي.
بعد ساعات بسيطة كانوا ما شاء الله خلصوا لكل الحفاظ واللهم بارك الجو كان مبهج وجه وقت التكريم ،
أول ما ندهوا على اسم عائشة محمود قام من الكرسي بتاعه وراح خدها من إيدها وباس راسها .
ودكتوره يقين بقلبها الطيب عماله تحمد الله طول ما هي قاعده ودموعها مش قادره تتكمالكها .
فجأه أول ما كله جه يقوم لقيتني بحضن دكتوره يقين جامد وأقولها مبااارك مبااارك يا أمي مبااااارك .
معرفش طلعت مني كلمت أمي ازاي ، غصب عني ، أنا حسيت فعلا ناحيتها كده .
عائشة ومحمود جريوا عليها هي والشيخ بدر وباسوا ايدهم ولقيت محمود بيقولي شكرا إنك سمعتيلي مرة عقبال ما تسمعيلي المصحف كله .
قلبي فضل يدق بسرعة ، وحسيتني مبسوطة جدا والدنيا مش سيعاني ، لكن كان جوايا شحنة كلام محتاجه أفرغها واحكي كل اللي جوايا لحد .
فجأه بدون مقدمات لقيتني قبل ما أنزل بقول لدكتورة يقين : محتاجه أقعد معاكي لوحدي بكره شويه .
اه طبعا يا حبيبتي ، مستنياكي بكره في البيت الوقت اللي تحدديه .
ينفع في المسجد؟
اه طبعا ينفع طبعا...