رواية عشق الثأر الفصل الخامس والعشرون25بقلم مينة طلال
يا غشيم
العالم مدورتني بالظلمة ولگتني
وانة حارگ روحي الك بس ماشفتني
_____________________
اسحاق : لاتلوميني منا وجاي .. ومن تجي علاقتنا ابالج خليها بالج انتي الي نهيتي كلشي.. بيدج
حاولت هواي وعلمودج عفت شغلي واعلي وبلدي
بس لهنا وكافي ..
اني راجع للعراق واوعدج اخر مرة تشوفيني بيها
اني كلشي جنت اكدر اسوي واقدمة سويتة الج ، بس انتي بايعتني
تحبين عملج وشغلج ، كلنا تمام وانتي ڪُلـش زين تعرفين بالعراق ادعمج واخليج توصلين وين ماتتمنين ، بس انتي طلعتيني من حياتج
انتي الظاهر حلتلج كعدت الغرب ..
سويت العلية كدامج وكدام نفسي مع السلامة
اتمنالج كل الخير .. والتوفيق بحياتج
عفتها وكمت بدون مااسمع جواب منها
لان اصلان شنو معنا جوابها وتبريراتها وتصرفاتها حجن كلشي
اذا هيه من الاساس بايعة ومخلصة!.. ليش اجبرها تشتريني؟
حتى سليم مرحتلة طلعت من المكان اخذت تكسي للبيت..
مقرر اليوم ارجع..
_____
دموع..
من راح اسحاق لليوم حسيت الدنيا فرغت علية
عبالك محد موجود بدنيا غيرة ، حياتي تحولت لهدوء قاتل
رغم يس وعمة وعمو وصباح وزيد
كلهم حواليه بس مكانة فاررررغ حيل عاف اسحاق غيابة فجوة جبيرة
اشتاقيت اطفرر لبيتة ويطب عليه واسمع صوته..
ونحجي ويجيني العصر ونكعد نسولف ونشاقة
صح هوه مكاطع بية ويخابرني بشكل يومي
بس اني وعيت علية حياتي وموتي ويا مافاركتة كل هل سنين
جنت يومية ادعي يرجع خاصتاً من دكتورتي حددت عمليتي
جنت حيل خايفة وكلها اطمني بس اني ممرتاحة
كل احلامي غريبة واحس صدري ينقبض هواي ، شي خانكني
واحس كلشي اسوي هاي اخر مرة اسوي
التجأت بهل الايام للصلاة هواي اصلي بدون فروض انوي لوجه الله واضل اصلي احد مارجلي تكوم ماتعيني اصلي
اقرة قران يس يزورني دائما بس احلامي خانكتني
دائما احلم اني بغرفة بيضة ويمي ثنين اطفال يدخل بابا
يشيل بنتي ويمد ايدة يريد ياخذني ويا..
وافز مرعوبة مراتب ابجي واختنك
يكعد يس يطمني ويضل وياي لحد ماانام
عمة اجت انتقلت يمنا حتى تساعدنا بالولادة والاطفال
جنت كاعدة العصر بالحديقة ويا عمة وصباح
دك مبايلي اسحاق ردت روحي كبل جاوبت
- ها حبيبي شلونك ، شخبارك
اسحاق : اني راجع بعد يوم حبيبتي
- صدك اسحاق
اسحاق: اكيد يروحي يعني كل عقلج ممكن اعرفج وحدج؟بهل ضروف
- هلا بيك ، ولله كل الدنيا طفت بعيني من رحت هسه ردت روحــي من كلت ترجع ، هلا بيك يبعد روحي
- فدوة اروحلج ، ديري بالج على نفسج عيني انتي ، اني راجع ان شاءالله
- ان شالله حبيبي هلا بجيتك
- شلونج زيد امة يس ؟ شخباركم
- كلنا بخير حبيبي لا يضل بالك
- ماشي حبيبتي اخذي راحتج اريد اطلع احجز تذكرة
- بسلامة حبيبي ، درب السلامة ضل طمني عليك
- ان شاءالله حبيبتي سلميلنا..
سديته واني احمد الله انو راجع بس مكدرت اسالة شسوة على مروج لان صباح وعمتي كاعدات وهنا بالمقابل ماحجن بس كتلهن يسلم عليجن ردن السلام
طب يس باس امة وباسني وباس صباح وهوه يلاعب زيد الي تعلم يصيحلة الو الو عود خالو.. كل مايطب من الشغل..
طبينا نصب الغداء لان تعودنا ماناكل الة من يرجع يس
صبيتا والتمينا بسفرة كلت ليس على رجعة اسحاق هز راسه وكال يرجع بسلامة ..
متفهمة برودهم نحو سالفة اسحاق ، ومتقبلة الوضع
ويمكن اني لو بغير ضرف ومن غير عائلة جان منعوني اجيب اسمه
بس موبيدي الموضوع اسحاق مو اخ وبس هوه صديق واب وحبيب
اول انسان اخذني للمدرسه علمني كومني من وكعت
حاماني من احتاجيت ادافع عن نفسي
علمني هواي بدنيا
مااكدر من ورا مشكلة شخصية ادير ظهري عنة..
مشة اليوم ڪُلـش عادي واجة الليل
ويا كرهي لليل رغم حبي الجبير الة من جنت عزباء واحط الراديو وجكايري الي كطعتهن من ورا الحمل ..
طب يس شافني ضايجة كال
يــٰس : شبيج حبيبتي، ليش ضايجة ؟
- شـَڪد جنت احب الليل كرهتة ، عليك الله اذا متت لاتدفني بالليل ، ادفنوني الصبح الظهر بس مو بليل
عوج عيونة وباوعلي صفح : صلي على نبي شهل حجي فكري بولدج بحياتنا راح نصير عائلة جبيرة ، لاتجيبن طاري الموت مااحبة
- ليش محد يحب الموت ؟ رغم هوه راحة ابدية من كل مشاعر الدنيا والتعب وكلشي..وبداية جديدة لعالم افضل من الدنيا
يــٰس : عاذرج ادري فيوزات الحمل طكن عدج وخلنج تحجين بالموت اسم الله عليج تالي اللليل ، بس اني مو مااحب الموت مااحب فكرتة
احسة انسان حقود يفتر على البيوت يبوك شكو انسان عزيز عد اهل البيت .. ويروح
- بس هوه حاله طبيعية مثل الولادة ، محد بينا يكون مختار يجي للدنيا نفس الشي محد بينا يختار يطلع بكيفة منها
يــٰس : الحجي هواي اسم الله عليج من هل سيرة ليش تحبين تفتين كلبي ، تدرين اخاف عليج من روحي.. شهل حجة هذا
- احب حبك الي ، بس حبيت احجي وياك
- واني اسمعج طول عمري..
حاولت انام خاصتا من خلاني بحضنة بس بدون فائدة
مثلت النوم علية لحد مانام وسحبت روحــي على كيف طلعت من الغرفة للحديقة مختنكة مااعرف ليش محد حاجي وياي كلمة ماضايجة من شي
ليش احس الدنيا كلها مطبوكة على صدري
مالكيت حل غير اخابر اسحاق بس رن جاوب
اسحاق : حبيبتي الوقت متاخر يمج شبيج ، خما بيج شي
بس سمعت صوتة بجيت بس بدون سبب مااعرف شبيه بس احس روحــي مامرتاحة مخنوكة هوه تخبل يصيح الو شبيج الو خرب ضل يغلط على روحة لان بعيد وميكدر يجي ويشوف شبية جريت نفس مانعة روحــي ابجي كلتله وصوتي كوة يطلع : مخنوكة حيل اسحاق مخنوكة محد محاجيني ولابية شي ومرتاحة كلهم يمي ويس موفرلي كلشي وماعايفني بس اني مخنوكة مدري شبية
اسحاق : خاف من الحمل والتعب ، كولي يالله جري نفس خرب بالوكت الخلاني بعيد ومااجي امسح دموعج
- متعبانة ولله عمة يمنا اجت هيه وصباح شايلات البيت محد يخليني اسوي شي
-حبيبتي تعوذي من الشيطان صليلج ركعتين حجزت اني باول طيارة صبح بس لازم لتركيا نوب اجي للعراق جايج يروحي جايج
لاتبجين تهدين حيلــي
- تعال لان حيل محتاجتك ولله
ضليت احجي ويا لحد ماحسيت روحــي رتاحيت شويه طبيت توضيت صليت وتعبت من السهر طبيت نمت يس حس علية حضني ونام
كعدت على اتصال اسحاق يكول وصل تركيا ويمكن بليل هوه واصل للعراق ، شـَڪد كارهه ليل بس حبيته لان هوه راح يجي بي
جانت ساعة ب١١ يس بشغل
خابرتة وصيتة يجيب ورد وكوكو وجكليت هوه خطية ماحجة
بس كلي صار
جنت حابة اطلع ابشرهم راح يجي بس ادري غلط
فااكتفيت بمشاركة يس
خابرني عمي وكلتله اعرف بلغني ..واتفق نروح سوة للمطار
طلبيت من يس اروح انظف بيتة مجان عدة مانع
بس جان خايف علية لان ولادتي مابقالها غير يومين
وجسمي بالكوة احركة شلون اكدر اروح انظف بيت وحدي
وهم ميكدر يطلب من صباح تروح وياي زحمة
خابر اخته الثانية ورحنا اني وياها خطية مخلتني اشتغل
هي كلشي سوت ونظفت وفتحت البيت هوته اني طبخت الاكل الي يحبة فاصولية وتمن وخليته على طباخ وحضرت يمة الصحون
والزلاطة والخضرة بقى بس يجي
بخرنا البيت وسدينا وقفلنا كلشي ، رجعنا لبيتنا
واني انتضر الليل على نار
اجة يس تغدينا كوة اكلت احس كلشي مااريد اسوي بس انتضرة
خابرتة كال مابقى شي وتطلع الطيارة مالتي
بدلت اني ويس صباح بدلت لزيد واخذنا ويا الورد والجكليت..
وصلنا للمطار جان مبايلة مغلط ضلينا ننتضر ساعة ونص اجة عمي وكمنا نباوع بين المسافرين لان اجتني رسالة خطة العراقي نفتح
خابرت كال جاي يستلم جنطتة
مشيت بسرعة ويس ينبهني على نفسي
باوعت وشفتة من بعيد جاي يمشي مشيت بتجاهه بسرعة
متمنية اركض باسرع ماعدي
ركض علية وحضني واني ابوس بي وابجي
الي يشوفنا ميكول صار اسبوعين لان طلعن سنين علية
اول مرة هيج نبتعد..
رغم وجود المبايل بس مايشفي الشوك غير الواقع..
سلم علية عمي ويس وشال زيد يبوس بس ويحجيله شجايبلة اللعاب
اخذ يس جنطتة وصعد هوه يم عمي واحنا بسيارتنا لحكناهم
وصلنا لبيتة نزلنا واني اهلهل واطش جكليت الجيران على هلاهلي طلعو النسوان تتحمدلي بسلامته
والزلم يسلمون عليهم لان كلها تعرفنا..
طبينا بيتة وهوه يباوع على كل تفاصيل واني حاضنته عبالك اذ عفتة راح يختفي طلب منه عمي يسبح ويرتاح
اني كعدت احمي لاكل وزيد يفتح الجنطة يريد يشوف اللعابة
اباوع ليس ممرتاح بس مبين باقي لخاطري كساع ابتسملة ويضحك بوجهي طلع اسحاق كلنا نكله نعيما وهوه يجاوبنا
كعدت اصب ويس يساعدني يشيل للسفرة وعمي واسحاق كعدو يسولفون
كعدنا ناكل وشوية يس فك وكعد يحجي ويا اسحاق ويستفسر
اسحاق خلص صحنة وكال : عاشت ايدج حبيبتي، اشتاقيت لطبخج
حجيت بدون تفكير : كل ماتاكل فاصولية اذكرني ، وكول اختيجانت تعرف شحب
كلهم سكتو وضلو يباوعون علية ابتسمت بوجهم اكسر الصمت الصار يس بطل ياكل واسحاق كلي : بيج شي يروحي ليش هيج تحجين؟
- شبية حبيبي ، بس ردتك تذكرني
- ليش يايوم ناسيج حتى اذكرج اني ؟ لاتحجين هيج بعد اضوج
- صار اعتذر
- لاتعتذرين يروحي اضوج لا لاتكولين هيج
بالكوة كملو اكل شلت الصحون وماقبل اغسلهن كعد هوه يغسل ويس يسوي جاي وعمي يستجوبني
هاشم : اكو احد مزعلج ، بيج شي ؟ ليش حجيج غريب؟
- عمي وعيونك مابية شي بس هيج طلعت من حلكي
سكت واني سكتت جابو الجاي شربنا واستأذنا نطلع ونعرف اسحاق ينام لان صارت ب٢ وهوه مسافر دولتين ، بدلت جاي اطلع من بيتة الي هوه بيتنا الي تربينا بي سوة اني ويا حسيت مراح ادخلة بعد ضليت اباوع لكل زاوية بي ، هنا طبخت بعمر ٨ سنوات ، هنا غسلتة وعمري١٠ هنا غسلت الصحون هنا بجيت من اسلوب عمتي ، هنا حجيت ويا يس ، هنا بستة ، منا طلعت عروس
كل شريط حياتي نعاد بهل بيت عبالك فلم نعرض كدامي
يس صاحني بس مانتبهت جان واكف يم اسحاق من صاحوني مرة ثانية مشيت بتجاهم كلت لاسحاق : عشنا ايام بهل بيت مجنت بيوم متوقعة اطلع منة واني فرحانة ، جان عدي صوتين بعقلي صوتي يحب هل بيت لان بي كل ذكرياتنا وصوت يكرها لان عشت ايام حيل صعبة بي ، بس هاي اول مرة احس انو اخر مرة راح اطب اله
كلهم ضاجو وصاحو اهو اسحاق حضني ويمسح بعيونة : كلشي صعب عدينا سوة وراح نعدي الاصعب هم سوة مثل ماتخطينا كلشي راح واني وياج لاخر عمري
- اذا عفتك لاتنساني
يــٰس : دموع رحمي كلبي لاتضلين تجيبين سيرة الوداع والموت ليش تخوفيني تريدين اموت كولي
دموع : اسم الله عليك يعني ماتخلوني احجي
هاشم : عمي يس خاف مضوج بتنا ، ترة دموع عزيزة وغالية وزعلها يكلفك
يس : وشبية مخبل ازعلها ليش شعدي اني غيرها احبل اجيب؟
هاشم : من هسه اكلك حتى يكون بعلمك
دموع: ولله عمي مامسوي شي خطية
ودعنا اسحاق وهوه حاضني باسني براسي ورجعنا للبيت
عمي بقى يمة زيد نام بحضني خلاة يس ورة خاف لايضايقني
وصلنا للبيت شال زيد لغرفة صباح نومة واني نزعت ولبست شلحة خفيفة وحطيت عطر ورتبت نفسي
يس : شنو هل كمر الطالع
- عيونك حبيبي
- لو تعرفين شـَڪد كلبي شايل حب الج
- شـَڪد يعني
- تعالي وشوفي شـَڪد
طفة الضوة واحضني بين احضانة كمنا سبحنا وطلعنا صارت الصلاة صليلنا وفتحلي ايدة ضليت مغمضة لحد محسيتة نام كمت رجعت على المصلاية ابجي من كلبي
احس عبالك نهاية مسلسل جاي اعيش
شعور غريب بداخلي يخليني كلشي اعيشة واحسة
يكلي هاي اخر مرة..
صليت ورتاحيت رجعت نمت ومحد كعدني لحد مكعدت على صوت اسحاق يلاعب زيد
بدلت وطلعت فرحانة لان رجعت اسمع صوتة بيتي..
جانت ب٣ الظهر وريحة الكهوة تارسة البيت باوع صباح جاي تسويها ، رغم كلشي صار مانست هوه شيحب وشنو يريد
صبحت عليها وحسبت حسابي بالكهوة
من اباوع عليها اعرف شنو معنى النهايات اخلاق
لادعت علية لافضحت لاحجت عبالك شي مصار بحياتها
حضنتها واني اكللها احبج
بادلتني الحضن وهي متفاجئة : واني احبج يروحي
- صباح عادي اكلج شي
صباح : اكيد حبيبتي كولي
- ماادري شبيه صار فترة احس روحــي مختنكة
لزمتني العبرة ونزلت دموعي هيه حضنتني من جتفي وكعدتني على الكرسي
صباح : اسم الله الرحمن شجاج حبيبتي ، خاف ثكلج مال حمل هسه بس تجيبين بسلامة ترتاحين ولله
- لا صباح لا اني وين تعبانة شو كلشي جاي تسوين انتي ، بس شعور بداخلي يخليني احس وقتي خلص من كلشي
صباح : تعوذي من شيطان هاي ضربنج عين عبن دور عدج توم هس اخلي امي تقرة عليج
سكتت لان محد جاي يفهمني ، محد جاييحس بالي احسه
اني احس روحــي رايحة ماباقية يمهم بس محد مصدك وكلها جاي تمنعني احجي
طلعت للحديقة ماخذة الكهوة بعد ماغسلت
اطيت لعمتي واسحاق الي من كعدت طلعو مخططين يسون حفلة ورا سلامتي من العملية كعدت استمعلهم وزيد يلعب داير ميدورنا
وعيوني تحفظ هاي اللحظات الحلوة الي مراح اشوفها بعد
طب يس باسة عمة وباسني كعد يمنا صبيتله كهوة وكعدو يسولفون واني ساكته من شفتهم سكتو كتلها : خل نروح ليوم لكربلاء
يس : حبيبتي باجر عمليتج ولازم تصومين بليل وتتعبين ، من تجيبين بسلامة اخذج انتي وجهال
اسحاق : صح دموع تتعبين وراج عملية لازم ترتاحين
- لا فدوة حيل حابة ازور وين التعب نروحً ونجي بسيارتنا ، عمة حاجيهم
اللهام : اذا هيه تريد تروح كومو من هسه طلعو حتى بليل ترجعون وتصوم وتنام والصبح تكعد مرتاحة
- شكرا عمة حبيبتي تجين ويانه؟
اللهام : يمة جان جيت بس خطية صباح تضل وحدها
- ليش تضل تجي ويانة تكفي السيارة الولد ليكدام واحنا ورا
ها يس شتكول
سكتو واني انتضر موافقتهم كال اسحاق : اذا يس موافق نروح ماعدي شي
يس : اني غير علمودها حتى لاتتعب بس شنسوي عمي طبن حضرن روحجن بين مااروح افول بانزين
طلعو يسون السيارة واني طبيت فرحانة كلت لصباح هم كيفت سبحت غسل الزيارة وراية صباح وعمة بالحمام الثاني طلعت لبيت تراك عريض مال حمل حتى لااضايق فوكاه عباية راس
اخذت مسبحتي وفلوس خليت بجنطة وطلعت
صباح هم مكملة هيه وزيد وعمة تصلي طب يس صاح يلا طلعنا
الطريق كلساع اسحاق ويس يسالوني تعبتي
ويوكفولنا بالحمامات لان يدورن حامل
وكساع مشترين شي خلصو الطريق يوكلوني واني حيل جنت مرتاحة وفرحانة بهل اهتمام
وبعد ساعتين طبينا كربلاء وحسيت صدري نشرح
طبكو بالكراج وكملنا للامام مشي ..
توضينا بالحمامات ووصلنا لباب الامام العباس عليه السلام
من قري اسمة دمعت واني استشعر عظمة هل انسان
طبينا زرنا وصلينا والولد كالو نخلص ونلتقي
اتجهنا للامام الحسين واني اردد قصيدة
صار الدمع سلوتي خايف يجيني موتي يكضي العمر
وبوحشة انتضاري اظلم علي نهاري وحشة الكبر
اني وضلمتي باجر ماحب حجي المكابر مابي ستر
مابي ستر
يامولاي
ضليت اتمتم بيها واني اباوع للقبة والضريح والجمال النظري
والراحة النفسية..
طبينا زرنا وماكو بحلكي بس كلمة مولاي لاتعوفني..
طلعنا تعشينا واخذنا فرة بسوك ودعنا الامام ورجعنا للسيارة
بس مشو ومرينا على طريق مقبرة قريبة كلتلهم..
- ذمة بركبتكم اذا متت تدفنوني يم ابوعلي..