رواية لم يكن سندا لي الفصل الخامس5بقلم الهام عبد الرحمن
في صباح اليوم التالي في منزل حنان تقف في المطبخ تعد طعام الافطار لزوجها ولاولادها حينما رن هاتف المنزل ذهبت حنان لتجيب على الهاتف.
حنان:« الو السلام عليكم»
المتصل:« عليكم السلام ازيك يا حنان»
حنان وقد علمت هويه المتصل حيث انها صديقتها بالعمل ووالده العريس سعاد حنان: «اهلا بيكي يا حبيبتي عامله ايه؟»
سعاد: «الحمد لله بخير انت فاضيه دلوقتي كنت عايزه اتكلم معاكي»
حنان:« ولو مش فاضيه يا حبيبتي افضالك ايه يا حبيبتي هو محمود مستعجل يعرف رد قمر ولا ايه ههههههههههه»
ظلت سعاد صامته قليلا مما زرع القلق في قلب حنان لتحدثها بتردد.
حنان:« خير يا سعاد مالك يا حبيبتي في ايه؟»
سعاد:« بصراحه انا مش عارفه اقول لك ايه يا حنان يا اختي بس اللي محمود ابني حكاهولي يخليني اقولك ان قمر مش هي الزوجه اللي اتمناها لابني انا اسفه يا حنان ما تزعليش مني.»
حنان بدهشه:« وهو ايه اللي حصل من قمر يخليها ما تلقش بالمحروس ابنك يا ست سعاد؟»
سعاد:« يعني يرضيكي يا حنان ان بنت اخوك تهين ابني وتغلط فيه عشان بيقولها تبصله وهي بتتكلم وكمان تعلي صوتها عليه ده يرضيكي هي دي اللي متربيه على الاصول والاخلاق انتى كنت بتغشيني يا حنان عشان تجيبي عريس لبنت اخوكى.»
حنان بغضب:«لا عندك يا حبيبتي انا بنت اخويا متربيه احسن تربيه ده الكل بيحلف بادبها واخلاقها وشطارتها سواء في دراستها ولا في البيت كفايه انها تربيه صالح وسميه اما لو هي عملت مع ابنك كده زي ما انت بتقولي يبقى استحاله يكون من فراغ اكيد ابنك ضايقها لان استحاله قمر ترد على حد او تغلط في حد دي نسمه رقيقه عمرها ما تعرف تكسر بخاطر حد ابدا.»
سعاد بضيق:« اهو ده اللي حصل وان ما كنتيش مصدقاني اسالي المحروسه بنت اخوكى وتاكدي منها وبرغم كده ابنى لسه شاريها وعايزها رغم اني زعلانه منها قوي لكن لو هي هتكون سبب فرحه ابني انا ما عنديش مانع اتنازل واقبل بيها عشان خاطر عيون ابني حبيبي بس لازم لازم تتصل وتتاسف ليا الاول انا هستنى ردك عليا يا حنان ثم انهت الاتصال معها.»
ظلت حنان جالسه في مكانها مكفهره الوجه تشعر وكان احدا سكب فوقها دلو ماء مثلج وظلت تحادث نفسها:« ايعقل ان تكون قد فعلت قمر ما حكته لها سعاد؟ أيعقل ان تقلل قمر من احترام نفسها وعائلتها وتهين شخصا بمنزلها؟»
ثم هبت واقفه ممن مكانها وقالت حنان لنفسها:« انا لازم اروح عند اخويا دلوقتي واعرف ايه اللي حصل بالظبط؟»
استأذنت حنان من زوجها للذهاب الى منزل اخيها على وعد بعد بالتاخير حيث انه يوم الاجازه الذي يقضونه مع اولادهم سويا بعد قليل كانت تقف حنان امام منزل اخيها تدق بابه ففتح لها يوسف الاخ الاصغر لقمر.
يوسف:« ازيك يا عمتو اتفضلي ادخلي.»
حنان:« ازيك يا حبيبي بابا وماما فين؟»
يوسف:« كلهم جوه بيفطروا لسه تعالي يا عمتو افطري معانا.»
حنان:«تسلم يا حبيبي انا سبقتكم عرف بابا بس يا حبيبي اني مستنياه هنا عايزه اتكلم معاه هو وماما وقمر في موضوع مهم.»
يوسف:« حاضر يا عمتو.»
بعد لحظات خرج صالح وسميه وقمر ومصطفى الى صاله المنزل حيث تجلس حنان.
مصطفى:« صباح الخير يا عمتو ايه النور ده يا حبيبتي.»
حنان:« دا نورك يا قلب عمتك.»
صالح وهو يجلس الى جوارها:«خير يا حنان ايه اللي جايبك الصبح بدري كده يا حبيبتي؟»
حنان:« ام محمود كلمتني النهارده الصبح واشتكيتلي من قمر واللي عملته في ابنها ثم توجهت بالحديث الى قمر وقالت: بقى كده يا قمر تصغريني قدام الناس وتهيني محمود ينفع كده يا بنتي هي دي التربيه اللي اتربتيها؟»
مصطفى بحدة قليلا:«عمتو لو سمحتي انا ما اسمحش لاي حد يتكلم على تربيه اختي بالشكل المهين ده انا اختي متربيه احسن تربيه والمفروض ان حضرتك اكتر واحده عارفه قمر دا انتى بالنسبه لها امها مش عمتها ازاي تصدقي كلام زي ده على قمر.»
حنان بتلعثم:« انا..... انا.... ما صدقتش انا واثقه في تربيه قمر بس استغربت من الكلام اللي قالتهولي سعاد ويعلم ربنا اني دافعت عن قمر لكن انا برده عايزه افهم ايه اللي حصل؟»
سميه:« اقعدي واستهدي بالله يا حنان وقمر هتحكيلك كل حاجه دلوقتي.»
جلست قمر بجوار عمتها وبدات تقص عليها كل ما حدث من محمود.
قمر:« بس يا عمتو هو ده كل اللي حصل وانا اسفه اني اقولك اني مش موافقه عليه انا ما اقدرش اعيش مع واحد مغرور زي ده.»
حنان:«طيب اقعدي كده واهدي يا قمر ده شيطان يا حبيبتي ودخل بينكم وبعدين انتم كمان ما لحقتوش تقعدوا مع بعض وهو والله يا قلبي لسه شاريكي وعاوزك اديله فرصه تانيه واقعدي معاه مره كمان ولو لسه مش مرتاحه يبقى خلاص.»
هب مصطفى من مكانه واقفا وتحدث بحده.
مصطفى بحده:« ايه الكلام اللي انتى بتقوليه ده يا عمتو على فكره الجواب بيبان من عنوانه والبيه اللي انت بتقنعي اختي انها توافق وتقابله مره ثانيه ده ما يستاهلهاش وبعدين احنا لسه على البر وبيعمل كده اومال لما يتجوزها ويبقى في بينهم عيال هيعمل ايه؟ ومع احترامي ليكى وانا اسف يا بابا بس احنا ما عندناش بنات للجواز احنا بنتنا ملكه متوجه واللي ما يقدرهاش يبقى قلته احسن.»
حنان:« ايه رايك يا صالح في كلام ابنك ده؟»
صالح:«انا ابني راجل يا حنان وهو سند اخته من بعدي واللي قاله هو الصح الشاب ما احترمش بنتي ولا قدرها يبقى ازاي هآمن عليها معاه وزي ما قال مصطفى احنا ما عندناش بنات للجواز.»
حنان:« بس انا كده سعاد هتقاطعني وتزعل مني يرضيك كده يا اخوياأخسر صاحبه عمري؟»
سميه باستنكار:« يعني انتى خايفه انك تخسري صاحبتك يا حنان لكن مش خايفه على بنتي اللي هي بنتك وتربيه ايدك انك ترميها الرميه دي؟»
حنان بلهفه لا والله يا سميه يعلم ربنا ان قمر عندي اغلى من ولادي نفسهم دي اول ما شافت عيني دي هي اللي ساكنه قلبي وكان نفسي حد من ولادي يبقى اكبر منها والله ما كنت خليتها تخرج من تحت ايدي متزعليش مني يا سميه انا بس كنت خايفه اني اخسر صاحبتي بس عمرها ما هتبقى اغلى عندي من قمر سامحيني يا حبيبتي انا كان نفسي بس انها تديله وتدي نفسها فرصه يحلوا سوء التفاهم اللي حصل بينهم.»
صالح:«خلاص يا حنان احنا بنتنا مش متجوزاه عشان هتديله فرصه ده لسه على البر والحمد لله انه بان على حقيقته من بدري ويا ريت تقفلي على الموضوع ده انا بنتي لسه صغيره يا حنان دا يا دوبك لسه في سنه ثالثه انا كنت موافق بس عشان انت شكرتيلي في الناس دول عشان صاحبتك وعشره عمرك زي ما بتقولي لكن دلوقتي وبعد اللي حصل انا خلاص غيرت رايي ومش موافق عليه حتى لو اعتذر ليها انا عايز اسيب بنتي لراجل يحميها ويحافظ عليها مش يهينها وهي في وسط اهلها.»
سميه:«اهدى يا صالح خلاص الموضوع انتهى وانا عارفه ومتاكده ان قمر ومصلحتها اهم من اي حاجه في الدنيا عند حنان.»
حنان:« خلاص يا صالح ما تزعلش يا اخويا المهم صحتك يا حبيبي وان كان على قمر بكره يجيلها سيد سيده اما انا بقى هعرف اتصرف مع سعاد واللي ابنها عمله كويس يلا انا هقوم امشي بقى عشان الحق اجهز الغداء لجوزي والولاد ثم التفتت لمصطفى وسالته:« اومال الواد شريف فين مش باين من امبارح ده حتى محضرش القعده معانا؟»
مصطفى:« شريف في رحله ميدانيه تبع الكليه هيجي منها بكره يا عمتو حنان يجي بالسلامه يا حبيبي ربنا يحميك ويبارك فيكم ويخليكم دايما سند لبعض يا حبايبي.»
مصطفى:« تسلمي يا عمتو ابقي سلمي على عمي واولاد عمتي.»
حنان:«تسلم من كل شر يا حبيبي»
ذهبت حنان الى منزلها ودخلت قمر لتجلس في حجرتها بعد قليل اتت بسمه صديقتها ادخلتها والده قمر لتجلس مع قمر في الحجره.
بسمه:« اه الهانم قاعده هنا وسايباني محتاسه لوحدي في تجهيز حاجه الفرح هو حضرتك معندكيش علم ان الفرح بعد اسبوع؟»
قمر:« في ايه يا بنتي ما تهدي على نفسك كده ايه عامله زي القطر كده ليه يا ستي اقعدي بس الاول.»
بسمه:« قوليلي صحيح عملتى ايه في عريس الهنا اللي جالك امبارح؟»
قمر:« ما خلاص يا اختي خده الغراب وطار يا حبيبتي.»
بسمه:« ليه يا موكوسه ايه اللي حصل؟»
قصت قمر كل ما حدث منذ قدوم العريس واهله وحتى ما حدث مع عمتها اليوم.
بسمه:« ايه ده هو في كده يعني ما حلتوش حاجه وبدل ما يحمد ربنا انه لقى حد يرضى بيه وبظروفه دي يقوم يعمل كده اقولك احسن ان ربنا كشفهو لك على حقيقته من الاول قبل ما يحصل حاجه وتقرفينا معاكي بقى خناقات ومشاكل وطلاق وتجرجرينا بقى في محكمه الاسره والعيال تتبهدل يا عيني ويتعبوا متحيرين بينك وبين ابوهم.»
قمر:« بس... بس... اسكتي ايه يا بنتي ماسوره كلام واتفتحت وبعدين ايه كم الكآبه اللي انتى عيشتهولي ده. جوزتيني، وطلقتيني وشردتى العيال كمان ارحمني يا رب.»
بسمه:«ههههههههههه خلاص خلاص يا اختي اهو خد الشر وراح سيبك منه بقى وخليكى فيا انا فرحي خلاص يا بنتى الاسبوع الجاي وعايزاكي معايا في مليون حاجه لسه مجبتهاش وعايزه اودي هدومي وحاجاتي الشقه وارتبها طبعا مش هعمل كل ده لوحدي ولا ايه يا اختي؟»
قمر:«اه ده استغلال بقى هو انا يعني عشان ما ليش صاحبه غيرك فتقومي تستغليني كده؟»
بسمه:« اه عندك مانع ولا حاجه يعني.»
قمر:« لا يا باشا انا اسفه انا تحت امرك ولو عايزاني اقوم معاكي دلوقتي انا مستعده.»
بسمه:« ههه ايوه كده ناس ما تجيش غير بالعين الحمراء اعملي حسابك بقى يا قلبي بكره تفضي نفسك خالص وتيجي معايا مش هقبل منك اي اعذار.»
قمر:« عيوني ليكي يا حبيبتي انتى تؤمري ربنا يتمملك على خير يا قلبي.»
بسمه:« تسلميلي يا قلبي وعقبال ما افرح بيكي انتى كمان ابقي تعالي اقرصيني في ركبتي عشان تحصليني في جمعتي ههههههههههه.»
قمر:« قوليلي بقى اخترتى الاغنيه اللي هترقصي عليها سلو فى فرحك ولا لسه؟»
بسمه:«اه اخترت اغنيه وماله بتاعت عمرو دياب.»
قمر:« الله انا بحب الاغنيه دي قوي بصراحه عمرو دياب ده بيعمل شويه اغاني بس ايه توديكي في عالم تاني انا بحب اغنيه خليك فاكرني الاغنيه دي اكتر من رائعه.»
ثم سرحا سويا وظلوا يدندنون كلمات الاغنيه معا وقد استطاعت قمر اخيرا بوجود صديقتها الغاليه بسمه ان تتخطى ما حدث من هذا الشاب المتعجرف والمغرور.