“ التسامح موضوع صعب جداً
مثلاً كيف تسامح زول سرق طفولتك؟
كيف تسامح زول عيشك احساس الفقد؟
كيف تسامح إنسان خلاك تتمنى تموت؟
صعب .. ما مستحيل
بس صعب ..
فالإنسان ال قوي ممكن يسامح ..
الإنسان ال ضعيف حا ينتقم ..
عشان يحس بالقوه ال فقدها زمان ..
و من مظلوم تتحول لظالم ..
ده السبب الأساسي لكونو الحياه ما بتخلو من الشر .."
#بلسان_ملك :
كُنت متوتره و خايفه .. أتصلت على مهند اكتر من عشره مكالمات
لمن يئست قررت امشي ليهُ
اخذت الفلاشه ال فيها ال فيديوهات معاي و نزلت
أثناء ما انا ماشه في الشارع و قلبي بدق سريع
تلفوني ضرب
ملك:مهند .. انت لي ما بترد؟
مهند:بسم الله .. كنت شغال .. في شنو؟
ملك:انا لقيت التسجيلات حقه حياه .. مهند الموضوع كبير شديد و حياه مصدر خطر حقيقي ..
مهند:ما فاهم!
ملك:وين هيا حسي ؟
مهند:في المستشفي ..
ملك:لي؟
مهند:لسه ما عرفنا بس في زول طعنه بالسكين
ملك:مهند انت متأكد انو زول طعنه؟ما هيا ال عملت كده في نفسها!
مهند سكت مسافه ..
ملك:مهند سامعني .. حياه ما طبيعيه .. بتأذى نفسها عادى .. و بعدها بتأذى زول تاني ..
مهند:انا ما فاهم .. بس هيا في العنايه حسي .. يعني مستحيل تقدر تقوم و تعمل شى حالياً
ملك:مهند ما ينفع حياه تكون براها .. حا تعمل شى
مهند فهم من كلام ملك انو في مصيبه ..
مهند:تمام انا ماشى المستشفى حسي .. ممكن توريني في شنو؟و لي بتقولي كده .. التسجيلات فيها شنو؟
ملك:هيا في ياتو مستشفى؟رسل لي اللوكيشن و ح نتلاقى هناك ..
مهند:تمام ..
مهند اتحرك على المستشفى و عمر كان بتصل عليهُ عشان يشوفو هو وين بس مهند ما كان برد عليهُ ..
مهند وصل المستشفى و طلع للمكان ال فيهُ حياه ..
ممنوع كان يدخل الغرفه جوا بس كان في شباك قزاز كبير بقدر يشوف من خلالو حياه ..
الدكتور جا و لقاهو واقف بعاين من الشباك ..
خالد:مهند .. عاش من شافك ياخ
مهند:يا دكتور .. كيفك انت كويس ؟
خالد:حمد لله .. حاصل شنو جيتنا مخصوص الليله
مهند:وضعها كيف
خالد:صراحه لو كان اتأخرتو شويه كان ممكن تروح فيها .. بس قدرنا نلحقه و الحمد لله ماشه كويس ..
مهند:عارف ممكن تصحى متين؟
خالد:على حسب جسمها و تقبله للعلاج .. بس عادى ممكن بعد كم ساعه تصحى .. ما حا تقدر تقوم طوالي و جسمها حا يكون ضعيف بس خلال يومين حا ترجع زى الفل ..
مهند:حا اجيب اتنين يحرسو الغرفه .. ممنوع زول يدخل او يطلع من عندها .. عايزك تخلى بالك كويس
خالد:حاصل شنو؟خايف زول يجى يعمل ليها شى؟
مهند:ما عارف زول يعمل ليها و لا هيا ح تعمل في زول .. لسه ما قادر افهم الوضع بس احتياطاً عايزك تخلى بالك و تفتح عيونك .. الملف ال انا ماسكو معقد شديد و فيهُ خيوط كتيره .. حياه جزو مهم في الملف
خالد:ما تشيل هم .. انت عارف ما حصل وصيتنى على شى و خذلتك
مهند ابتسم ..
مهند:يديك العافيه ..
خالد مشى و مهند قعد في الكراسي ال قدام غرفه حياه و كان منتظر ملك تجى ..
وصلت المستشفى و دقيت ل مهند و وصف لي محل قاعد ..
مشيت ليهُ و قعدت جمبو في الكرسي
مهند:في شنو يا ملك
طلعت ليهُ الفلاشه ..
ملك:دى كل الفيديوهات ال فيها الجلسات ال كانت بتتعالج فيها حياه .. ما كان بصور كل الجلسات .. اتوقع انو احتفظ بس بالكلام ال مهم ال كانت بتقولو عشان كده ما حا تلقى فيديوهات كتيره ..
مهند:لي خايفه انو حياه تأذى زول؟
ملك:حا تفهم لمن تشوف الفيديوهات بس بالمختصر هيا شافت حاجات ما كان مفروض تشوفها و هيا صغيره و بسبب التروما و الخوف ممكن تعمل حاجات سيئه للناس او حتى لنفسها
مهند:قالو شى في الفيديوهات عن لي سجله بأسم نون؟
ملك:لا .. قال كل شى الا ده .. انا ساعدتك .. عايزاك تساعدني
مهند:اكيد .. بس في شنو؟
ملك:لمن تشوف التسجيلات ح تعرف حقيقه اني ما بت عبد الوهاب الحقيقيه
مهند استغرب من كلام ملك ..
ملك:ابوهم كان عارف و كان بهدد بابا بالحاجه دى .. انا عايزه اعرف منو اهلي ؟ محمد قال ل بابا " بس لمن تعرف أنك رميت أمها الحقيقيه في النار عشان ما تخسره .. تتوقع حا تكون ردة فعلها شنو؟" عايزه اعرف الجمله دى يعني شنو .. مهند انت حا تساعدني عشان افهم كل شى زى ما انا ساعدتك و قدمت ليك اهم شى في القضيه دى .. البنات مفتاحك عشان تقدر تفهم و تحل القضيه و انا مفتاحي ابوهم .. ابوهم مات ..بس حنان عايشه و ممكن تكون عارفه اى شى .. بس ما حا اقدر اعرف منها حاجه لانها ما حا تقول لي
مهند:حنان؟
ملك:ام راجلي .. شريكه بابا قبل يتوفى .. و الشخصيه ال اشتغلت مع محمد قبل يتوفى برضو
مهند صلح قعدتو ..
مهند:هل ال شغل ده نوعاً ما .. شغل منظمه و فيهُ تجاره اعضاء و مخدرات و الخ
ملك هزت راسها بمعني ايوا
مهند:…
كُنت بعاين ل مهند و هو سرحان ..
كأنو بدء يجمع خيوط مهمه
ملك:مالك؟
مهند:تعالي ..
قمت مع مهند و دخلنا مكتب دكتور خالد
قال ليهُ انو محتاج للكمبيوتر شديد و دكتور خالد قالو ليهو اكيد ..
طلع و خلانا في المكتب برانا ..
مهند حضر كل التسجيلات و لمن خلص قفل الكمبيوتر ..
مهند:حا ترجعي البيت و ما حا تعملي اي شى من غير تقولي لي
ملك:عايز تعمل شنو انت؟
مهند:شغلي .. حا امشي اول شى اجيب حنان .. ثاني شى حا اقدر اضغط على البنات و اطلع منهم شى .. ثالث شى حا نخلص من القضيه دى لأنى زهجته
مهند كان مستعجل و عايز يطلع سريع
ملك:طيب عندك خطه؟
مهند:صدقيني أنسب شى الزول يتصرف ساي .. الخطط بتاخذ زمن و انا ما عندى حالياً زمن ..
قبل ارد عليهُ مهند طلع ..
انا طلعت وراهو بس قبل اطلع من المستشفى مشيت وقفت قدام غرفه حياه ..
كانت مغمضه عيونها و راقده ..
ملك:ما عارفه اشوفك ضحيه و لا لا .. بس اتمنى ما تأذى زول .. اتمنى ده كلو يتحل قبل تصحى .. اتمنى انك تتعالجى ..
أبتسمته و مشيت ..
كان الجو مغيم و حسيت انى محتاجه اتمشى ..
جواى كميه من الطاقه السلبيه و كميه من الحُزن ..
و ما قادره افرغ زعلي اصلاً !!
أثناء ما انا ماشه في عربيه سوده وقفت جمبي
استغربته بس قبل استوعب لقيت في اتنين نزلو و ركبونى العربيه بالقوه ..
حاولتا اقاومهم و اصرخ بس من غير فايده ..
ما عارفه كيف بس فجأه حسيت راسى بدء يلف ..
و شويه شويه ما حسيت ب شى تانى …
بعد فتره ما متأكده كانت قدر شنو
صحيت و انا بحاول افهم الحاصل ..
في البدايه كنت شايفه ضباب ضباب ..
بعداك قدرت استوعب ..
كُنت راقده في مكتب كبير ..
الألوان كلها كانت فاتحه .. المكان بارد نوعاً ما بس كان فوقي غطا
قمته و لقيت زول بمسكني من يدي و بقعدني تاني ..
مروان:حا تتعبي لو قمتى سريع ..
عاينت ل مروان و انا بحاول استوعب كيف ده مروان؟و لي مروان يجى المكان ده؟
مروان:عايزه مويه؟
ملك:انت .. انت خليتهم يخطفوني؟
مروان:ايوا
ملك:لي؟لي عملت كده؟
مروان:ملك حاولت اني اعمل اي شى و أبعدك من الموضوع ده بس انتى ما عايزه .. لي مشيتى تقابلي مهند؟
ملك:انت كيف عرفت؟
مروان:ملك .. قلت ليك ابعدى من الموضوع ده .. صعب كان تعملي كده؟
ملك:انت ما عارف شى .. او .. دقيقه ..
حاولت استوعب و فجأه جاتنى لحظه ادراك ..
ملك:انت .. انت عارف .. عشان كده ما عايزني ادخل في الموضوع!!
مروان:كُنت فاكر انك لو كنت بعيده من الحقيقه حا احميك .. ده كان مبدئ ابوك قبل يتوفى .. بس فعلا كلامو صح .. صعب احميك في كل الاحوال
ملك:انت عارف؟عارف اى شى؟انت شغال مع امك؟
مروان:اي ..
قمت من مكاني و دموعي بتنزل ..
ملك:ما اتوقعته .. انت يا مروان!!!
مروان:و لا انا .. ما اتوقعت صراحه انى في يوم حا اكون هنا .. بس الحياه
ملك:الحياه؟ماف مبرر واحد لل انت بتعمل فيهُ حالياً غير انك انسان سئ .. في اطفال بتموت .. في ناس بتضيع بسبب ال حاجات ال انتو شغالين فيها .. و ابوي !! انت كنت عارف انى ما بتو !!
مروان:ملك لو عايزه تعرفي تفاصيل اكتر .. اتمنى انك تهدى .. ف حاجات كتيره صعب انى اشرحه ليك بس حا احاول ..
ملك:انت عارف اهلي منو؟
مروان:اي
ملك:اي؟دقيقه .. اهلي الحقيقين .. انت عارف اهلي الحقيقين منو؟
مروان:اي ..
ملك:…
#فلاش_باك :
قبل سنين طويله :
عرس كبير في وحده من ضواحى السودان ..
بلده صغيره و واضح شعبها ناس على قدر حالهم ..
اغاني بصوت عالي و اصوات ضحك ..
وحده كبيره في العمر قاعده و ماسكه عصايه من خشب ..
عائشه:الولد ده ما لقى عروسه الا دى؟انا اصلا ما مرتاحه و لا مبسوطه
نهى:يا امى عليك الله خلاص .. ولدك عرسو الليله افرحى بيهُ بدل الكلام ال كتير ده .. بعدين مالا يعني العروسه و الله زى القمر انتى عارفاها حلوه من هيا صغيره
عائشه:حلاتها سوت بيهن شنو؟ما طلقوها في النهايه .. ولدى صغير و حليوه معرس لي وحده مطلقه و ب ولدها كمان ..
نهى:يا امى عدى الليله دى ..
عائشه سكتت و طلعت قعدت في الحوش ..
النسوان كان بدلكو بالدلوكه و الاغاني الشعبيه شغاله ..
جوا البيت و في غرفه كبيره اصوات شباب بضحكو ..
شاب طويل و لونو ابيض واقف و بسرح في شعرو ..
بقولو ليهُ الناس حلبي ..
معاذ:يا حلبي احساسك شنو بالله بعد مرقته مننا؟خلاص عريس جد
حلبي:اخذت ال بت ال بحلم بيها .. تاني عايز شنو؟
معاذ:انا عمرى ما اتوقعت انك تقع للدرجه دى
عادل:تتذكرو زمان؟حلبي ما كان بعاين لوحده اصلاً .. يجو عادين بنات المدرسه و هو تلقى بعاين للحمار ال ماشى في حال سبيلو ..
حلبي كان بضحك و مبسوط ..
فعلاً ما كان ليهُ في الحب .. بس جات الخطفت قلبو ..
خلص لبس و طلع للناس بره ..
الزغاريد و صوت النسوان بباركو ..
حلبي مشى هو و اصحابو و الرجال المسجد ..
عقدو و اخيرا حس انو فاز في معركه حياتو ..
في النهايه اخذك لشريكه حياتك ال كنت بتحلم بيها نوع من انوع الانتصار ..
بعد المباركات حلبي مشى هو و اصحابو بيت العروسه ..
كان بيت متواضع و صغير ..
بس الغريب انو الناس كانت هاديه شديد
ما كان في زغاريد و لا حتى صوت ضحك ..
كان في احساس غريب ..
حلبي دخل البيت و سأل من عروستو
بس ما كان ف زول برد
حلبي:مرتي وين؟
امها كانت بتبكي ..
حلبي:بتبكي ل شنو انتى؟
سوسن:ما عارفين بتي وين .. كانت بتجهز و اختفت هيا و ولده .. ماف ف البيت
فجأه حلبي عصب ..
و الناس كلها كانت مخلوعه و خايفه ..
حلبي طلع و كان بكورك و نبه كل الرجال انو يفتشوها ..
فجأه المكان اتحول لرجال بتجرى ف كل الشوارع ال قريبه عشان يشوفوها ..
كانت فضيحه ..
ابو العروسه من الخلعه و الخجل أغمى عليهُ وقتياً و نقلوه المستشفى..
حلبي بعد كم ساعه رجع بيت العروسه و في يدو سلاح ..
خته السلاح في راس امها ..
حلبي:مشت مع منو؟و الله بقتلك و لا بندم بعدك .. مشت مع منو؟
سوسن:هيا كانت بتحب ناصر ..
حلبي:ناصر النجار؟ناصر صحبي؟
سوسن:اي و كان عايز يصلح وضعو عشان يعرسه .. بس انت لمن جيت ابوها أجبره عليك و هيا ما قدرت تقول شى ..
حلبي طلع من البيت و استوعب انو ناصر فعلاً ماف ..
حلبي كان مجنون .. الغضب عمى على عيونو ..
ما كان قادر يشوف قدامو ..
كانت بالنسبه ليهُ دى قضيه شرف
جاهُ اتصال انو شافو العروسه في السوق الشعبي " محطه سفر بالباص"
مشى على هناك و معاهو كميه من الشباب
اول ما وصل شاف ناصر شايل شنط
ناصر:خليني اشرح ليك
حلبي:انت صحبي؟تعمل فيني كده؟
ناصر:انا بحبها .. و هيا .. هيا حامل ب طفلي ..
ناصر قعد في الارض جمبه رجولو
ناصر:عليك الله خلينا نمشى .. و الله انا بحبها و هيا كمان .. لولا القروش و وضعي الزفت و الله كان اخذتها بالحلال .. بس انت عارف يا حلبي وضعي و وضع اهلي .. انا و الله ما عايز شى غيرها .. خلينا نمشي .. و الله تاني م بتشوف وشنا ..
حلبي كان بسمع في كلامو و كل ما يقول شى كان بحس بنار في قلبو
اثناء ما ناصر في الارض و بتكلم حلبي ضرب نار طوالي
و ما طلقه وحده .. سبعه طلقات ..
سبعه طلقات في ناصر ..
حلبي:شوفو ال بت دى وين .. هيا و ولده حا يموتو الليله
الشباب فتشو بس ما لقوها و واضح انها قدرت تهرب بطريقه كويسه و ما خلت وراها آثر ..
كان ال تفسير المناسب انها هربت بعد سمعت صوت النار و بعد اتأكدت انو ناصر مات ..
حلبي:دى قضيه شرفي .. لو لفت الدنيا كلها .. موتها حا يكون اكيد .. ما حا اخلى شرفي في الارض ..
….
#في_الوقت_الحالي :
ملك:يعني ال هربت امي و كانت حامل فيني من ناصر ؟ و حامل من واحد ما كان راجله اصلاً يعني انا ..
قبل اتم جملتي مروان سكتني ..
مروان:ما تقولي ال حاجه ال انا عارف انك حا تقوليها .. الموضوع مؤذى .. انا اسف ..
بكيت و انا حاسه أنو قلبي حا يطلع من مكانو ..
مروان:ملك .. بعد ما عبد الوهاب شالك في يوم جو و هاجمو البيت رجال حلبي و عشان ما يحصل ليك شى وراهم مكان امك .. و قتلوها .. كانت بالنسبه ل حلبي قضيه شرف و ما حا تنتهى الا بموت امك .. بعد ماتت عفو عنك بس ده بضغطه من .. من زول قوي
ملك:ما فاهمه .. زول قوي منو؟منو كان عايز يحميني؟
مروان:اخو حلبي .. اسمو .. اسمو جعفر
ملك:لي اخوهو ما وقف معاهو؟
مروان:لانو قبل ناصر يهرب مع امك .. ناصر مشى لجعفر و حاول معاهو انو يساعدو انو يلغو العرس .. وراهو انو بحب امك شديد و انو عايزها بالحلال .. بس جعفر رفض و طلب منو يتخلى عن الموضوع ده .. جعفر حاسس بالذنب و انو موت ناصر و كل الحاجات ال حصلت كانت بسببو و كان ممكن يوقف كل الحصل ده ..
ملك:حاسه انو عندى اسأله كتيره بس انا مصدومه لدرجه ما قادره اصدق و ما قادره اتأثر اصلاً .. انا جنيت؟انا مالي ..
قمته من مكاني و كنت برجف و بتكلم كأنى مجنونه
مروان وقف و مسك يدي و بدء يهديني ..
مروان:اخذى نفس .. ملك اخذى نفس
ملك:ما قادره .. ما قادره
مروان جاب لي مويه ..
مروان:اشربي ..
شربته و يدي كانت بترجف ..
ملك:مروان .. انا ما فاهمه شى .. طيب اخوي ؟ انت قلت عندى اخو
مروان:عايزه تقابلي؟
ملك:اقابلو؟
مروان:اي .. عايزه تشوفي اخوك؟
ملك:…
….
#عنده_مهند :
دخل ل نون الغرفه ..
مهند:انتهت اللعبه
نون:ما فهمته؟
مهند:وعد قالت اى شى .. شغل ابوك و ال فوبيا ال عاشت فيها حياه و انها شافت حاجات م مفروض تشوفها .. تجاره الاعضاء .. مخدرات .. صراحه مشاكل كتيره دى
نون:…
مهند:في حكم سنتين عليكم لانو كذبتو في كم حاجه بس اتخففت من وعد .. لانها ساعدتنا .. طيب يا نون سنتين سجن لانك عرقلتي شغل الشرطه و عندك سبعه سنين اعتداء بدافع القتل ل اختك حياه و عندك تاني تهمه تزوير في ملفك و انك كنتِ بتتعالجي و ده كلو كذب يعني تقريبا ممكن ١١ سنه سجن ..
مهند كان طالع بس نون اتكلمت
نون:انا ما لي ذنب .. وعد بتكذب ..
مهند:صراحه ما بقدر اساعدك .. انتى ما عايزه تقولي شى .. ابسط شى ما قلتى لي اصلاً كتبو اسمك بدل اسم حياه لي؟
نون:لاني ما اختهم .. انا م بتو ال حقيقيه ل محمد .. و اكتشفته ال حاجه دى سنه ٢٠٢٠ .. كانت صدمه بالنسبه لي .. بس ابوي اخذه فرصه و عالج حياه ب اسمي .. عشان لو يوم اتكشف انو في زول مريض نفسياً في بيتنا و الناس حبت تعرف السبب يعرفو انو انا و سببي ح يكون واضح .. اكتشفته انى ما بتهم ..
مهند:امممم .. بت منو طيب؟
نون:اخو ماما قبل يتوفى كان عندو علاقه مع وحده .. و انا نتيجه العلاقه دى .. امي الحقيقيه رمتني عندهم لانو قالت ما ح تستحمل مسؤليتي و اختفت .. عشان كده اخذوني .. ابوي الحقيقي متوفى .. امي الحقيقيه ما معروفه وين .. اسمهان ال هيا امي قانونياً لقت انها ملزمه بي عشان ما يرموني في الشارع .. و بس بكل البساطه .. انا بت حرام .. انا نتيجه غلط .. ما شايف ده سبب كافى يخليني اتعب نفسياً ؟؟ فعلا ما حا استغرب لو وعد كذبت و قالت انو كلو بسببي .. في النهايه اختها اهم .. انا وحده غريبه بالنسبه ليهم .. عادى ممكن يغدرو بي ..
مهند كان بعاين ل نون و هيا بتحاول تمسك دموعها ..
مهند:اشربي مويه ..
مهند اداها قاروره مويه ..
و نون اخذته و لمن بدت تشرب مهند انتبه ل حاجه مهمه شديد ..
نون كانت بتستخدم يدها الشمال !!!
مهند:انتى بتستخدمى يدك اليسار؟
نون:اي .. لي؟
مهند:….
….
#عنده_عمر :
جاتو رساله و هو في المكتب انو كل شى جاهز و انو سالم في المكان ال مفروض انو يكون فيهُ ..
عمر طلع و هو مستعجل و مشى مسافه ساعتين تقريباً لمن وصل مستودع قديم و سالم كان هناك بس في كرسي و مربط من كل الجهات ..
سالم:انا عملت شنو؟انا ما عملت شى
عمر:انت كنت جزء من حاجه ما مفروض تكونها ..
سالم:ما لي علاقه ب موت بتك و لا مرتك ..
عمر:كُنت عارف .. كنت عارف يوم الحريق انو حا يحصل حريق بس ما عملت شى
سالم:انت كيف عارف ده كلو ؟
عمر:حاليا مهم عندك انا كيف عرفته؟ما مهم عندك الذنب ال انت ارتكبتو؟
سالم:كنت عارف .. بس ما كان بيدى اعمل شى !! انت ما عارف جعفر و ال معاهو .. انا اصلا لو فكرته اقول شى ممكن يقتلوني .. عارف يعني شنو يقتلوني؟
عمر:انت شايف حياتك قيمه عندى اكتر من حياه بتي و مرتي؟
سالم:بتك عايشه .. ما ماتت في الحريق .. اخذوها قبل يعملو الحريق .. انا عارف بتك وين .. خليني عايش و حا اساعدك ..
عمر أبتسم ..
عمر:انت قايل اني ما عارف؟
سالم:عارف شنو؟
عمر:مكان بتي
سالم:ما فاهم .. بتعمل شنو طيب .. لي ما اخذته؟
عمر:ما حا اخذه قبل اقتلكم كلكم .. كلكم حتى جعفر ال فوقك ..
سالم:انت .. انت مجنون
عمر ابتسم و ما رد عليهُ ..
كب بنزين فوق سالم و في أنحاء المكان ال هو فيهُ
سالم:ما تقتلني .. عليك الله ما تقتلني .. حا اعمل ليك اى شى ..
عمر:عندك رساله من اختك ..
سالم:اختي ؟؟
عمر:بتقول ليك أنها أخذت إنتقامها منك .. و أنها ما نست أنت كنت بتعمل شنو .. بس انتظرت الوقت ال مناسب عشان تاخذ حقها ..
سالم:وعد ..
عمر بعد مسافه و رمى ال ناس
سالم كان بصرخ و عمر كان بتفرج ..
عمر:متعه .. صريخك نوع من انواع المتعه .. خساره ما حا اقدر اسجلو ..
عمر طلع و وقف بره .. جات عربيه لونها اسود و وقفت قدام المستودع ..
نزل من العربيه مروان ..
مشى الباب ال تاني و فتح الباب ل ملك ..
ملك نزلت و كانت بتعاين ل عمر ..
بينهم مسافه ما كبيره بس ما بسيطه ..
عمر كان بعاين ل ملك نظرات كلها حُزن ..
و ملك كانت بتعاين ليهُ بحيره .. حزن .. قلق
مروان:اخوك يا ملك .. عمر اخوك ..
ملك:…
" انك تكون قريب من شخص قرب عادى ..
تتوقع انو عابر .. غريب
بس الحقيقه ..
الحياه غريبه لدرجه انك كنت جمبه اهم انسان في حياتك،
بس انت ما عارف !."
يتبع …