رواية مساء وصباح الفصل الحادي عشر 11 بقلم نرمين طه

" سخرية القدر ..

كانت تماماً سخريه .."

#بلسان_ملك :

كنت سامعه صوت دقات قلبي ..

بصوره حرفيه كنت سامعه كل دقه بتطلع من قلبي .. 

مشينا من المستودع ل بيت قديم ..

اخذنا ليهُ مروان ..

مروان كان قاعد جوا و انا و عمر كنا بره ..

كان في كراسي قديمه ..

الدنيا ليل ..

اصوات ال هواء و شجر بتحرك ..

كُنت شايفه عمر متوتر .. بلعب ب اصابع يدو ..

ملك:ما حا تتكلم؟لينا ربع ساعه قاعدين بس

عمر:الموضوع غريب .. يعني انتى اختي .. و احنا قاعدين مع بعض و احنا حرفيا ما بنعرف شى عن بعض .. ما عارف ابدى من وين .. و ما عارف مفروض اقول شنو .. 

ملك:انت .. متذكر امي ؟ يعني شكلها و ده كلو؟

عمر:اي .. لمن اخذوني ما كنت صغير شديد .. كان عمرى سته سنين .. فمتذكر شكلها بس ضباب ضباب .. عارفه اسمها؟

ملك:لا

عمر:اسمها ملك .. عبد الوهاب سماك على اسم امك

لمن قال انو اسمها ملك دموعي نزلت ..

ملك:اخذوك وين؟

عمر:دار الايتام

ملك:انا كنت وين لمن اخذوك؟

عمر:لمن امي هربت كانت حامل فيك بس كان يادوب اول شهور ليها .. جات هنا الخرطوم و نزلت عنده وحده صحبته .. كانت بتعرفها من البلد .. كبرو و اتربو سوا و صحبته عرست و جات هنا .. صحبته ف البدايه قالت ل راجله انو امنا جات فتره و ماشه و انها حامل من راجله ال هو حلبي .. هو ما سمع شى الا بعد مده .. اول م عرف طردنا من البيت انا و امي .. كنا بننوم في الشارع .. امي اشتغلت في مطعم فتره و كانت بتنوم في المطعم .. تاني اشتغلت خدامه و كنا بنقعد في بيت الناس ال بنخدمهم .. لمن ما حلبي جا هنا و كان بفتش فينا بنفسو .. رجالو .. كل الدنيا كانت مهتمه ب انها تحرق امي

ملك:طيب؟

عمر:في يوم ظهر جعفر ..

ملك:اخو حلبي ؟

عمر:اي .. عرض على امي انو يساعده .. كانت على وشك تولد .. بس قال ليها انو لازم تتخلى عن حاجه

ملك:كيف؟

عمر:صعب يحمينا انا و هيا .. طلب منها تتخلى عني ..

لمن عمر قال الجمله دى بكيت من قلبي ..

زعلت شديد على السوء ال هو شافو في عمر صغير !

عمر:بس وعد امي انو حا يخلي بالو مني .. و فعلاً اخذوني دار الايتام .. ما حا اقول ليك كانت اسوء ايامي .. لانو جعفر نفذ وعدو .. ما كان بحصل لي شى سئ هناك لانو كان مراقب وضعي ..

ملك:اها

عمر:بعد أتولدتي و حسب ما بعرف اخذكم عبد الوهاب .. جعفر ما كان قادر انو يخليكم بعيدين عن الأنظار .. عبد الوهاب كان زول كويس و جعفر بثق فيهُ شديد .. طلب منو يخلى بالو منكم .. بس كمان طلب منو حاجه غريبه

ملك:شنو؟

عمر:لو حصل شى الأولويه ليك أنك تعيشى ..

ملك:لي عمل كده؟

عمر:ما لاقى اجابه للسؤال ده .. بس خلينا نقول الخيار الوحيد ال في

ملك:شنو؟

عمر:هو و ناصر ابوك كانو اصحاب شديد .. يعني ممكن انو متعلق بيك عشان كده ..

سكته و ما رديت على عمر ..

بعد لحظات من الهدوء ..

ملك:انت كيف قدرت تصل لي ؟ و علاقتك شنو ب مروان و لي هو عارف انك اخوي ؟و علاقتك شنو بالمنظمه ؟؟

عمر:بعد كبرتا في الميتم كانت قدامي فرص كثيره .. صراحه ما كنت عارف انو جعفر هو ال كان بسهل لي الفرص دى .. يعني كنت قايل نفسى محظوظ .. دخلت كليه الشرطه و اتعلمته و اتخرجتا و اشتغلتا و عملتا عيله حلوه شديد .. كُنت عايز اعرف امي حصل ليها شنو و اختي وين؟كلها كانت حاجات مبهمه بالنسبه لي .. بس أثناء ما انا بسعى و بعد جعفر عرفني بسعى قرر يساعدني .. رسل لي انو ماف داعي تفتش امك لانها ماتت .. كان مفتكر انو كده انا حا اهدى .. بس انا عرفته انو حلبي هو ال حا يكون عمل كده .. كل طاقتي كانت في اني ألقى حلبي .. عملت كل شى .. و لمن خلاص قربته امسك فيهُ شى .. عمل ال عملو ..

ملك:شنو؟

عمر:قتل مرتي .. و اخذ بتي .. كان عايز يعيشني ف الألم ال انا عشتو من سنين .. كان عايز يخليني اجرب احساس الفقد للمره ال ثانيه .. 

عمر اثناء ما بحكي صوتو اتغير ..

كان في بحه كلها حزن ..

كان في دموع مفروض تنزل ..

بس عمر كان بحاول يعمل فيها قوي ..

عمر:بعد عمل كده حسيت ب احساس انى عايز انتقم بصوره اكبر .. ما بس من حلبي .. من كل زول ساعد حلبي .. عايز اقتلهم كلهم .. و أثناء ما انا ال نار بتاكل قلبي و بفكر كيف حا اعمل ده كلو .. جعفر رسل لي مروان .. قال لي انو بتي عايشه و انو حا يساعدني في أنى انتقم ل كل الحاجات ال حاصله ..

ملك:بس لي ؟ يعني لي جعفر عايز يعمل كده؟

عمر:المنظمه دى عباره عن شبكه كبيره .. اتعملت من سنين .. كل فتره مفروض واحد بقولو عليهُ الزعيم يكون مسؤول عن اى شى .. جعفر و حلبي دخلو الشبكه سوا .. حلبي انسان سئ و بحاول انو ياخد منصب الزعيم .. ال اساساً حالياً من نصيب جعفر ..

ملك:يعني نزاع على السلطه

عمر:بالضبط .. جعفر حاول يوقف حلبي كتير .. بس حلبي كان بتمادى كل مره اكثر من المره ال قبلها ..

ملك:مساعدتك حا تساعد جعفر كيف ؟

عمر:انا عايز انتقم من ناس هما اساساً مع حلبي .. سالم واحد من رجال حلبي و محمود عم البنات .. انا لو بديت ادمر اهم رجال عنده حلبي ده شى من صالح جعفر 

ملك:و كل المعلومات دى بتجيك ..

عمر قاطعني ..

عمر:كل المعلومات ال انا بحتاج ليها بجيبها مروان من جعفر .. تتذكرى لمن مشينا بيتكم؟

ملك:اها ..

#فلاش_باك :

عمر و مهند في العربيه و ملك راكبه وره ..

عمر مسك تلفونو و رسل ل مروان ..

عمر:احنا حسي متحركين على بيت ملك .. اتصرف و امشي قبلنا عشان لو في شى في البيت ..

مروان شاف الرساله و قبل يمشى طلب انو يتم تقديم اجتماع مهم يخص عامر ..

عامر بسبب الاجتماع ال جا فجأه ما كان قادر يمشي ل ملك و طلب من مروان يمشى 

و بكده ما كانت حاجه غريبه لو شافو هناك ..

مروان وصل البيت و شال أى شى من بواقي اكل و من حاجات تدل انو هو و عمر كانو بتلاقو هناك ..

و بسبب ضيق الوقت نسى كيس الزباله ال كان في المطبخ .. و ما انتبه ل سيجارتو ال كانت جمبه الشباك ..

….

#في_الوقت_الحالي :

ملك:يعني انت و مروان كُنت بتتلاقو هناك ؟

عمر:خططنا .. المعلومات المهمه .. كُنا محتاجين ل مكان ما يلفت نظر الناس لينا .. و مروان اقترح بيتكم .. كان عارف وين ممكن يلقا المفتاح و كان حافظو اصلاً .. فكنا بنقعد دايماً في المكتب ..

ملك:انا ما فاهمه .. مروان لي اصلا يشتغل مع جعفر ده؟هو ما انسان سئ

عمر:ام مروان انسانه قاسيه .. اتورطت ب حاجات سيئه شديد .. توزيع الأطفال كان بتم من بيتها اغلب الوقت .. ما عندها رحمه .. بعد حصلت المشكله بين حلبي و جعفر اغلبيه ال ناس ال في الشبكه كان بختارو ال جانب ال عايزنو .. حنان اختارت جانب حلبي بس كانت بتخدم جعفر برضو .. ما كانت عايزه تخسر زول .. طبعا ما كان في واحد فيهم عارف انها بتدعم ال عدو

ملك:يعني خاينه؟

عمر:بالضبط .. حلبي لمن اكتشف كان حا يحرق الدنيا .. بس بدل يحرق الدنيا طلب انها تختار واحد من أولادها انو يدخل الشغل ده

ملك:دى اسمها تضحى ب واحد من اولادها

عمر:و ضحت ب مروان

ملك:بس حسب ما فهمته هو مع جعفر

عمر:مروان بعد فهم الدنيا قرر انو يدعم جعفر 

ملك:بس حلبي ما عارف .. يعني مروان خلى حنان تضحى ب ولدها عشان يدخل جاسوس جديد و يكون قادر يجيب ليهُ معلومات من حلبي !

عمر:يعني مروان كمان خاين .. بس بطريقه كويسه هو يعتبر خاين عشان الحق في النهايه يفوز .. جعفر ما انسان سئ

ملك:ما عارفه .. حاسه المعلومات كتيره علي و انى ما قادره افهم برضو .. 

عمر:بالمختصر .. جعفر عايز يحمينا يا ملك.. و عايز يوقف حلبي اخوهو عنده حدو ..

ملك:هل صدفه طيب؟انك دخلت في القضيه ال انت عارف انها في النهايه حا توديك لكل الناس ال انت اصلا عايز تنتقم منهم؟

عمر:لا .. ما صدفه

ملك:طيب كيف ؟

عمر:وعد .. وعد كانت هيا البدايه ..

ملك:….

#عنده_مهند :

كان قاعد في المكتب و بحاول انو يفكر ..

كل ال كان بجى في بالو اروى و انو لمن حسي م اخذ حق روان منها ..

أثناء ما هو غارق في افكارو اتذكر حاجه مهمه 

الشاحنه البيضه .. 

في التسجيلات ال اخذوها ال كانت قريبه من بيت محمود كان في شاحنه لونها ابيض فيها علامه مرسوم فيها حمام

و في التسجيلات ال اخذوها من ال عماره ال كان فيها سالم نفس الشاحنه دى مرت و مستحيل يكون صدفه ..

مهند فتح التسجيلات و كتب رقم الشاحنه و رسله ل قسم المعلوماتيه عشان يجيبو اسم صاحب الشاحنه و موقعو ..

مهند قرر أنو حا يكمل في لعبه الحظ ال هو بدء فيها مع وعد و نون ..

دخل غرفه التحقيق ال فيها وعد ..

كانت بتعاين للسقف و بتفكر

مهند:حا اقاطع تفكيرك ..

وعد:اممم

مهند:نون اعترفت .. اللعبه خلصت

وعد:ههه .. انت كل مره حا تجي تقول نفس الكلام؟

مهند:قالت انها ما اختكم .. بت خالكم .. و انها اكتشفت ال حاجه دى قريب .. بس الصدمه ال حقيقيه لمن قالت انكم قتلتو اهلكم .. كلكم ..

وعد عاينت ل مهند بنظره استغراب و خلعه ..

وعد:كذاب انت .. 

مهند:غريبه .. عارفه في علم النفس بقولو شنو .. لمن تقول شى و الشخص يقول انو انت كذاب معناتا مصدوم من الجهه ال جبته منها المعلومه .. لمن م يقول الكلام كذب معناتا صح هو بس اتصدم انك اكتشفته

وعد:شوف العابك النفسيه دى العبها بعيد مني .. انت انسان مريض نفسي .. كيف يعني حا نقتل اهلنا ؟

مهند:حياه اصلا مريضه .. نون اصلا ما اختكم و الله و اعلم اسبابها ال شخصيه الثانيه ال واضح انها عاشته بسبب طفوله قاسيه من اهل اصلا ما اهلها ..بس انتى .. صراحه استغربتا .. شنو سببك عشان تعملي كده ؟؟

اثناء ما مهند بتكلم جا داخل واحد

_حا ننقل نون غرفه النائب عشان توقع على افادته و بعدها السجن المركزى

وعد:ده شنو؟لي ؟

مهند:تمام اخذها و جيب واحد تاني ياخد وعد ..

وعد قامت من مكانها و بدت تصرخ 

وعد:لي عايزين تعملو كده؟وين ح تاخذو نون

مهند:انا ما فاهم انتى لي ما مصدقه انو نون اعترفت؟يعني اكيد ما حا اجي اخرف ليك قصه و احكيها في الوقت ده .. خلاص انتو انتهيتو .. كلكم السجن طوالي .. ماف محامي ممكن ينقذكم

وعد:انا ما قتلتهم .. انا ما قتلته زول هيا بتكذب

مهند:وعد اختك شرحت الجريمه حصلت كيف .. هيا ال قتلت امكم .. ماف داعي تكذبي خلاص .. القصه كامله اتكشفت

وعد كانت مصدومه .. 

التفاصيل ال قالها مهند خلته تخاف ..

و عارفين الانسان اضعف ما يكون و هو خايف ..

وعد:عايزه عمر ..

مهند:…

مهند لعب لعبه نفسيه قاسيه شديد على وعد ..

لمن ربط الأحداث فهم انو في جزئيه مهمه ما فكر فيها

و هيا لي ما يكونو الاخوات ال ثلاثه مشتركيه في الجريمه؟

في النهايه كل وحده عندها اسبابها النفسيه ال بتخليها تمشى في طريق زى ده ..

الراجل ال دخل و الكلام ال قالو كلو كان اتفاق بينو و بين مهند عشان وعد تخاف ..

و فعلاً خوفها خلاها تقول اكتر شى ما كان مفروض تقولو ..

"عمر .."

….

عنده_عمر :

ملك:ما فهمته

عمر:بأختصار كان لازم نبدى من مكان .. وعد كانت بتتعالج عن دكتور عبد الوهاب برضو .. بس ما كان في زول عارف .. و لا حتى ابوها

#فلاش_باك :

قبل سنين :

وعد:ساعدني

عبد الوهاب:لي ما تكلمي ابوك ؟متأكد ما حا يرفض فكره انك تتعالجي .. طالما انتى حاسه انو عندك مشكله نفسيه ..

وعد:ما عايزه .. انا بفكر اموت .. انا بكرهم .. ساعدني و خلصني من الالم ال انا فيهُ .. ابوي اصلا لو عرف ممكن يقتلني .. انا ما زى حياه عشان يفكرو يعالجوني .. مستحيل يرضى انو سمعه ولدو تتضرر بسببي

عبد الوهاب:انا ما بقدر اديك مسكنات او الحبوب ال انتى عايزاها .. بس بقدر اساعدك .. احكي لي مشكلتك شنو .. و لو انتى ما عايزه انى اقول ل ابوك فأنا ما عندى مشكله .. ما حا اسجل اسمك في الزيارات اصلاً 

عبد الوهاب كان بحاول مع وعد لمن في النهايه رضت انها تحكي ..

وعد:انا .. لمن كنت صغيره بابا كان بحبسني في القبو .. في يوم جا سالم و اتوقعتا انو جا عشان يطلعني .. انبسطه شديد .. كانت اعمارنا تقريبا بين 13 ل 14 سنه

عبد الوهاب:طيب؟

وعد:سالم كان بعمل حاجات غريبه .. كنت خايفه و مصدومه .. ده اخوي !!

عبد الوهاب:حاجات غريبه زى شنو؟

وعد:سالم اتحرش بي ..

عبد الوهاب اتأثر شديد بكلامها ..

عبد الوهاب:انتى عملتي شنو؟

وعد:انا كأى وحده طبيعيه صرخته و قاومتو و طلعته ال بيت ببكي .. عارف حصل شنو؟حكيت ليهم .. حكيت ل امي و ابوي .. و عارف حصل شنو؟ابوي ضربني .. ضربني و انا ال مُعتدى عليه ما المُعتدى !!!

عبد الوهاب:ما صدقوك؟

وعد:صدقوني .. للأسف صدقوني .. بس قالو لي انو صغير و انو اكيد انا ال عملت حاجه غلط عشان كده هو اتأثر .. انا يا دكتور ؟؟ انا ذنبي شنو؟

عبد الوهاب:حصل شنو تاني؟

وعد:لمن شاف انهم عاقبوني و ما سألو استمر يعمل كده .. طول السنين ال فاتت و انا بتعرض ل اذى من اخوي !! و الغريبه انو بس انا .. عارف لي؟لانو عارف انو حياه ممكن تقتلو .. لانو عارف انو نون برضو م ح تسكت .. بس انا .. انا حتى لمن اتكلم ماف زول ح يدافع عني .. انا و لا شى .. انا الغلط بس .. لي ؟؟ لي ؟؟؟ انا ذنبي شنو؟هل انا ضعيفه؟هل انا حيوانه عندهم؟مرات بحس اني ما بنتهم .. في زول برضى حاجه زى دى ل بتو ؟؟ 

عبد الوهاب:انتى حاسه شنو ال ممكن يفرغ ليك غضبك منهم؟

وعد:اقتلهم ..

عبد الوهاب:…

….

#في_الوقت_الحالي :

ملك:ما فاهمه .. انتو كيف عرفتو ال تفاصيل دى ؟

عمر:جعفر كان عارف انو وعد كانت بتمشي ل دكتور عبد الوهاب .. ضغط عليهُ عشان يعرف السبب و عبد الوهاب اداهو التسجيل ال كانت وعد بتحكي فيهُ

ملك:طيب انتو عملتو شنو

عمر:عملتا اتفاق مع وعد 

ملك:و هو شنو؟

عمر:لو هيا بجد عايزه تنتقم و تقتل اهلها .. تقتلهم و انا حا اخذ ليها حقها من سالم .. انا وعدتها انى اخفى الأدله حقه الجريمه حقته .. و اخفى اى آثر ممكن يدل عليهم .. مقابل ده حا يتفتح ملف حا اقدر من خلالو انتقم من سالم و محمود و اى زول ليهُ علاقه ب موت امنا او موت مرتي .. ماف زول حا يشك فيني .. و لا في زول ح يفكر انو ال قاتل شخص غريب .. الملف حا يكون مربوط بقاتل من العيله بس ما معروف منو

ملك:دقيقه .. دقيقه .. يعني وعد قتلت امها و ابوها ؟

عمر:ما وعد بس .. كلهم .. وعد و نون و حياه ..

ملك:….

….

#عنده_مروان :

كان قاعد في البيت و بعاين ل عمر و ملك من البلكونه ..

فجأه تلفونو اتصل ..

مروان:اي

جعفر:كلو تمام؟

مروان:انا حاسس انى بعمل في شى غلط .. حا تعرف كل القصه بس اهم جزء لا .. احنا كده بنظلم ملك يا جعفر ..

جعفر:….

#عنده_حياه :

فتحت عيونها قبل ساعتين ..

في البدايه كانت حاسه بعجز في انها تقوم ..

بس بعد مسافه قدرت تقوم .. 

كانت حاسه بلفه راس ..

يدها بترجف ..

بس كانت سامعه صوت بتردد في راسها ..

_اتخلصي من وجعك ده .. لازم تكونى قويه .. لازم تعملي ال حاجات ال اتفقنا عليها ..

حياه دموعها كانت بتنزل ..

فتحت باب الغرفه و شافت اتنين من رجال الشرطه واقفين و بياكلو و بتونسو ..

ما انتبهو لمن حياه طلعت من الغرفه اصلا ..

كانت ماشه و سانده نفسها على الحيطه ..

اثناء ما ماشه شافت غرفه و كان في قزاز كبير بوضح ال جوا الغرفه منو 

و كان جواها بت بعمر ال تسعه سنين تقريباً ..

حياه دخلت و قفلت الباب من جوا ..

وقفت قدام سرير الطفله ..

حياه:آسفه .. بس لازم اعمل كده ..

" صفحه سوداء …

هل ممكن النقطه البيضاء تغير حقيقه ان الصفحه سوداء؟"

يتبع …

               الفصل الثاني عشر من هنا