أعتقد الصدف بتصنع المستحيل،بس في نفس الوقت
هل أصلاً في شى أسمو صدفه ؟..
كل الكون بدور بحذر .. كل المخلوقات مخلوقه ل سبب ما
و كل الناس في مكانها الصح و المناسب ليها تماماً ..
أحياناً بصيبني الفضول ..
لي ف مصطلح اسمو صدفه .. و أحنا عارفين أنو ماف شى ف الحياه بالصدفه !
أحياناً .. التوقيت و المكان بخلوك تحس إنو ده كلو صدفه
بس ..
كلو كان مخطط ليهٌ
و بطريقة ما ..
أنت وقعت في فخ الصدفه .
بتاريخ 2/2/2025
في واحد من شوارع الخرطوم الفاخرة
بيت كبير .. او بصورة أخرى قصر
أصوات الأغاني السودانيه و الزغاريت
و كميه من الناس ال بتضحك و بترقص
بيت عرس و واضح إنها أول فرحه ليهم ..
وعد:ماما امشى انتى اقعدى شويه ليه واقفه ف المطبخ؟
اسمهان:مواعيد الغده قربت و لازم زول يكون واقف فوق راسهم يا وعد
وعد:تمام انا ح اقيف فوق راسهم انتى امشي للضيوف
اسمهان طلعت و وعد فضلت واقفه مع العاملات ف المطبخ
بعد مده طلعت الطابق الفوق تشوف أخواتها
وعد:وين نون و حياه ؟؟
_قالو ماشين الغرفه ال فوق عشان يجهزو
وعد وضح الزهج ف وشها و طلعت ليهم ال طابق ال فوق
كان هادى و ماف ناس عكس الطوابق ال تحت ..
وعد:لا و الله انتُ قاعدين هنا كأنكم العروسات و انا و امي عينا طلعت تحت ف الخدمه و الترتيب
نون:اوف احنا من الصباح اصلاً بنجهز برضو .. يعني عشان اخوات العريس مفروض نكون مبهدلين و واقفين بس بنشتغل؟
وعد:طيب لو وحده فيكم خلصت ممكن تنزل تحت عشان انا كمان ألحق اجهز زيكم؟
حياه:تمام م تجوطى بنزل انا اصلاً خلصته .. جاين متين هما الرجال؟
وعد:لسه قدامهم ساعه لمن الصلاه تخلص و يعقدو
نون:يعني حسي سالم بكل قواه العقليه ح يدبس و يتزوج بت عمو محمود؟
وعد:عاينو ما عايزين كلام طالع نازل ف النهايه د بت عمنا و حالياً مرة اخونا .. امور الحموات و النسابه ده عليكم الله م ندخل فيهٌ و البت كمان م ليها ذنب بالحصل و لا المشاكل بين ابوي و ابوها .. اصلا ما شاء لله عليها م فيها غلطه
حياه:انتى يا اختي يا حبيبتي بتشوفي كل الناس كويسين عشان كده ح نخليك براحتك لمن نشوف ف النهايه هيا ح تعمل شنو و تقتنعي براك
وعد ما ركزت مع كلامهم و بدت تتجهز
حياه نزلت تحت عشان تشوف لو ف شغل تعملو
اما نون كالعاده بتتصور عشان هيا شايفه نفسها مشهوره
بس لو يعتبر انو مليون متابع على التيك توك شهره
فأتوقع انها مشهوره فعلاً ..
رغم انهم أخوات بس طبعاً مختلفين كل الاختلاف
وعد الكبيره ال عاقله ال بتمشي وره عاطفته و ما بتحب المشاكل ..
حياه المتوسطه ال في الغالب ماف زول بركز معاها .. بس ذكيه و شاطره ف دراسته و دايما بتطلع الأولى ف اى شى ..
اما نون فالصغيره ال ماف زول بحاول انو يربيها .. سوشيل ميديا و اهتمامات ال بنات ال كلنا بنعرفها ..
سالم الولد الوحيد
هو اصغر من وعد بسنه بس م بظهر فارق العمر ده بينهم .. و اصلا ملامح وعد صغيره فعامر بظهر اكبر منها ..
عاش قصه حب ممنوعه مع بت عمو محمود
بس قاوم كل المشاكل و اتغلب على كلام ابوهو و ع رفض عمو
و اخذ البت البحبها
و رغم انو كل الاهل مستغربين
بس سالم فاز بالمعركه و خلى كل الأهل يتلمو على فرحهم ..
جو الرجال بعد العقد و أصوات الفرح كان ماليه المكان
الحقيقه انو لحظات العرس مؤثره
و بتخلي كل الحقد و كل المشاكل تختفي لدقائق ..
سالم كان مقرر هو و نجاه مرتو انهم م عايزين عرس
فكانت حفله العقد ال ف البيت آخر و أول حفله ليهم
ماف زول اعترض لانو كل الأهل كانو خايفين من ابو سالم و من عمو محمود أنهم يتشاكلو
المشكله البينهم كانت كبيره ل درجه انهم قررو انو م يجمعوهم ف حفله و لا ف مكان غير المسجد
اكيد ف النهايه م ح يقتلو بعض في مسجد ؟..
سالم قعد كم ساعه و احتفل مع اهلو و طلع ياخذ مرتو عشان يمشو ع المطار و يسافرو طوالي ..
كان عقد غريب و العروسه اصلا م ظهرت على بيت العريس احتراماً لمشاكل ابوها و انو اصلا زعلان
سالم احترم قرارها فبالتالي كل الناس كانت مجبوره تحترم قرارتهم ..
مشو العرسان ..
بدو الضيوف يمشو كمان ..
و بعد يوم كامل من التعب رجع الهدوء ل بيت العرس
و كأنو م كان ف عرس قبل كم ساعه ف البيت ..
بس الهدوء ال مره دى كان مخيف
مخيف .. و غير معتاد !…
صوت صريخ نون .. بعدها صوت صريخ حياه
بعدها نظرات الخلعه في عيون وعد ..
عارفين ف مثل اجنبي
معناهٌ بقول :
" غالباً بعد الفرح .. إعصار حُزن .."
و قد كان بها ..
بيت العرس .. أصبح بيت عزاء
…..
#بعد_اربعه_وعشرين_ساعه
مهند:منو فيكم عملا ؟؟
نون:انت بتقول شنو؟اكيد ماف زول من بيتنا قتلهم!!!
مهند:ماف دليل انو ف زول جا من بره اصلا .. و كيف ماف زول فيكم سمع او حس ب شى ؟؟؟
نون:ما عارفه .. انت حسي بتحقق معانا و اهلنا هم الميتين لو ملاحظ!!!!بعدين لي م يكون عمو محمود هو القتلو؟؟؟هو كان بكرهه بابا و هددو قبل كده انو ح يقتلو!!! امكن م استحمل انو ادانا بتو ما عارفه .. لو سمحته خليني امشي حاسه اني قاعده اموت خنقه هنا
مهند:كان في خلافات ف بيتكم بين اى وحده من اخواتك او بين اخوك و اهلك؟
نون:لا
….
مهند:حاسس حاجه غريبه كلكم بتقولو نفس الاسم
حياه:اكيد كلنا ح نقول نفس الاسم لانو كل الدنيا عارفه بعداوه بابا و عمو محمود
مهند:و امك؟؟
حياه:م عارفه..امكن كانت ف الوقت الغلط و المكان ال غلط .. امكن شافتو عشان كده عمل كده
مهند:لي م تكون وحده فيكم؟ف النهايه حاجه م منطقيه انو ماف زول فيكم سمع او حس ب شى و أنتو ثلاثه بنات ف البيت !!!
حياه:شوف احنا كنا ف الطابق ال ثالث..عارف يعني شنو ف فرق طابق كامل بينا و بينهم؟؟؟طبيعي م نحس ب ش
مهند:د ف حاله انهم م صرخو ..بس لو صرخو ؟؟
حياه:امكن م صرخو .. اكيد كنا ح نسمعهم .. احنا م لينا علاقه لي نقتل اهلنا ؟؟؟؟
….
مهند:م عايزه تتكلمي؟
وعد:…
مهند:عدم كلامك م بدل ع حاجات كويسه ..
وعد:انا شفتى امي و ابوي ميتين قبل كم ساعه .. ال طبيعي اني اتكلم ؟
مهند:لو اتكلمتي ح تساعدينا نفهم الحاصل شنو
وعد:لمن تفهم ال حاصل شنو اهلي ح يرجعو يعيشو ؟؟؟
مهند:….
….
مهند:كل الناس وجهت اصابع الإتهام ليك
محمود:اكيد م ح تصل المشاكل اني اقتل اخوي و مرتو
مهند:بس ال بعرفو انك هددتو قبل فتره انك ح تقتلو
محمود:لو هددته زول معناتا ح انفذ؟كنت مضايق شديد بس ..
مهند:امممم .. وين كنت امبارح بليل ؟؟بالضبط من الساعه أثنين فجر لمن سته صباحاً ..
محمود:…
مهند:ماف اجابه؟؟؟
محمود م جاوب .. ملامح الخوف ف وشو
مهند كان مستغرب شديد
عدم جوابو ع السؤال ده م مطمن
معقول يكون هو ال قتل اخو فعلاً ؟..
معقول الموضوع يكون بالبساطه دى
معقول يكون غبي لدرجه يقتل اخو ال كل الدنيا عارفه بعداوتهم ؟
حتى م خطط ل كذبه يقولها !!
معقول الجواب يكون بالسهوله دى ؟…
مهند طلع من غرفه التحقيق و دخل المكتب
دخلت وراهو زميلةُ في الشغل
أروى:الحاصل شنو؟ما ينفع تخليهم كتير انت اصلا م عندك دليل ضدهم و دى تعتبر إفاده ما اكتر .. المحامي ضغط علينا يا مهند
مهند:محامي محمود وين؟
أروى:لسه ما جا .. شكلو هو اصلا العملها .. ما عندو عذر غياب ..
مهند:في زول يمشي يقتل زول و م يفكر كيف ح يطلع منها؟
أروى:أمكن ما كان مخطط .. يعني مشى و اتشاكلو او أى شى و قتلهم
مهند:ده ف حاله كان بمشي بيت اخو دايما بس انت اصلا بيت م بتدخلو كيف تمشي صدفه و من غير تخطيط انك ح تقتل زول هناك ؟؟؟
اروى:اوك يا مهند انت شاكك ف منو؟
مهند:ما عارف .. بس م محمود
اروى:اكيد م وحده من البنات
مهند:لي اكيد ؟؟اغلبيه الجرايم البتحصل اقرب زول مفروض تشكي فيهُ هو اقرب زول للضحيه
اروى:ماف سبب يا مهند .. واضح انو علاقتهم طبيعيه مع اهلهم و واضح انهم م مريضين نفسيا
مهند م رده على اروى و قعد يقرى ملف كل وحده فيهم ..
كل وحده كان عندها ملف ب اسمها
فيهُ كل تفاصيل حياتها المهمه ..
اتولدت وين و متين .. سلمها التعليمي كان وين و متين
لو عانت من مرض او لا ..
و أثناء ما مهند بقرى في ملف وحده من البنات
شاف حاجه مُلفته و عباره مهمه بالنسبه ليهُ
" فترة من العِلاج النفسي تحت إشراف دكتور عبد الوهاب ناصر "
….
#عنده_محمود :
مُنتظر في غُرفه التحقيق
جا واحد من الشباب الشغالين في مركز الشرطه
_السندوتش ده ليك
محمود:م عايز
_افتح شوف
محمود استغرب و الشاب طلع طوالي
فتح السندوتش ال كان ملفوف في ورق كتير
و وقعت عينُ على كلام مكتوب في الورقه
" لو قلت حاجه عننا او عرفو انت كنت وين
ح تكون آخر لحظات في حياتك .. انت و كل عيلتك "
محمود كان قلبو بدق سريع
مسك الورقه و دخله جيبو و يدو كانت بترجف
محمود:يا رب .. ساعدني .. اعمل شنو ف المصيبه دى !!!
…
#عنده_مهند :
دخل غرفه التحقيق ال كان فيها وحده من البنات
مهند:ها يا حلوه .. مكتوب بتعاني من قلق مفرط .. هلوسه أحياناً و تم تشخيصك عام 2020 بإكتئاب .. دكتور عبد الوهاب بعد فتره علاج مدته سنتين وقف عنك العلاج و شخصك أنك طبيعيه و خاليه من أى مرض نفسي .. حالياً في سؤالين .. شنو البأكد لي أنك ما مجنونه؟؟و السؤال الثاني شنو ال سبب اصلا عشان تعاني من إكتئاب ؟!!!
مهند رمى الورق قدامها و كان بعاين ليها بنظرات مليانه تحدى
كأنو إكتشف حاجه مهمه
مهند:شنو ال بخلى وحده عايشه حياه سعيده زيك تكتئب؟؟
…..
#في_مكان_آخر:
في نفس الوقت ال كان فيهُ مهند بحقق مع البنات
كانت في قصه بتدور في وحده من ضواحى الخرطوم :
#بلسان_ملك :
كُنت مصدعه شديد .. اليوم كان مليان شديد
الحفله ال كانت عاملاها حنان .. تفاصيل الجوطه و كميه الناس ال جات ..
و المشكله انى شايفه انو ده كلو نوع من انواع التبذير ..
و السخف اكيد ..
معقوله ف يوم اكون سخيفه لدرجه اعمل حفله كبيره كده بس عشان ولدى جا من امريكا؟
رغم انو راجلي عمار عكس أهلو تماماً
انسان هادى و بعيد كل البُعد عن التفاصيل دى ..
عُمرى ما اتوقعته في يوم تكون حماتي بالشخصيه دى ..
بس الإنسان م دايماً بياخذ ال حاجات المتوقعه
و شئت الأقدار إنو حنان تكون أم راجلي ..
و عشان الحفله خلصت متأخر و كمان عمار ليهُ فتره طويله من أخوهو مروان ال جا من السفر يادوب
قررنا نبيت معاهم اليوم ده ..
كُنت قاعده في الغرفه براي
عمار كان مع مروان ف غرفتو
نزلت تحت عشان اشرب مويه من المطبخ
دخلت المطبخ و نص الأنوار مطفيه
ما حاولتا افتح نور لاني كنت شايفه عادى
اخذت الكبايه و كنت بشرب .. حسيت ف صوت حركه ف الحديقه بره
الشباك كان ف جزء صغير منو فاتح ..
عاينت و قلت امكن ديل عمار و مروان
بس اثناء م انا بعاين شفتا حنان ام عمار
كانت واقفه و بتعاين ف تلفونها
استغربت شديد لانو الوقت كان متأخر
رغم اني م بهتم للتفاصيل دى و م بحس بالفضول
بس في شى خلاني افضل واقفه و اعاين
جا السواق ال شغال مع حنان من سنين طويله
اداها ورقه و مشى سريع
حنان اخذت الورقه و دخلت جوا سريع
قبل تدخل كانت بتعاين ل فوق
عرفته انها بتعاين للبلكونه ال في غرفه مروان
كانت عايزه تتأكد لو ف زول شافها
ختيت كبايه المويه و فضلت قاعده ف المطبخ فتره تقديريه
كُنت عايزاها تدخل غرفته و بعد الفتره دى انا طلعته فوق طوالي و دخلت الغرفه حقتى انا و عمار
قعدت ف السرير و سرحته
الموقف كان غريب شديد و حسيت انو ف ش م طبيعي
و للأسف انا دايماً احساسي بكون صح ..
#فلاش_باك
ملك:بابا .. انت ح تبقا احسن ما تقول كده
عبد الوهاب:انا عايز اموت مطمن .. م عايز كل السوء العملتو ف الحياه يطلع فيك
ملك:ابوي انت م عملت ش سئ لزول اصلاً .. انت احسن راجل انا شفتو
عبد الوهاب:انتى ما عارفه الحقيقيه يا بتي و لا عارفه انا شنو .. خليني اموت مرتاح و اخذى عمار يا ملك ..
عبد الوهاب بدء يكح شديد
ملك:م تتعب نفسك ح نتفاهم ف ده كلو لمن تبقى احسن
عبد الوهاب:عمار راجل و ح يحافظ عليك، خليني اموت مطمن بس يا ملك .. م عايز اخليك للدنيا دى من غير سند
كُنت ببكي و بشهق .. ابوي مسك يدي قوي
عبد الوهاب:الزول الكويس القلب بحبو ف النهايه، انتِ كمان ح تحبي اكيد .. ما واثقه ف كلامي؟
ملك:واثقه يا ابوي
عبد الوهاب:حنان .. حنان خليك بعيده منها .. م تدخلي ف اي ش يخصها و هيا كمان ح تعمل كده معاك انا متأكد
ملك:ابوي في حاجه انا ما عارفاها؟
عبد الوهاب:ملك أحياناً لازم تكوني جمبه السوء عشان تكوني ب أمان .. انا سئ شديد .. شايف طريقي لجنهم من هِنا يا ملك
كُنت مخلوعه ف كلامو و ببكي كل ما يقول شى
حسيت بطعنه ف قلبي
الإنسان ال كنت بقدسو و بشوفو اعظم راجل
بقول كلام غريب و بعترف لي إنو سئ ؟!
عبد الوهاب:دعواتك و صلاتك لي م ح تنجيني يا ملك .. ماف شى ح ينجيني من ال كنت بعملو .. ماف شى ح ينقذني من العقاب العظيم
كان بعاين ل سقف الغرفه و بتكلم بصعوبه
عبد الوهاب:ربنا غضبان علي .. ياه من غضب الرحمان .. شديد العقاب يا ملك .. يا ريت م دخلت الطريق ده .. بس يا ريت ح تنفع ف شنو حسي ؟؟ ضيعته عمرى و حياتي ف الحرام .. لا حول و لا قوه الا بالله
جسمي كشه و حسيت ب عظمه ال حاجه ال ابوي عملها
ما حاجه بسيطه
ما حاجه ساهله
ذنب عظيم .. عملت شنو يا ابوي ؟
خايفه اعرف .. خايفه اشوف حقيقه الانسان ال كان بطل ف عيوني
يا رب من وجعي ..
يا رب يخف عذابك بعدين .. ربنا يسامحك يا ابوي
قطع تفكيري صوت كركبه جمبه باب غرفتي
فتحت الباب بس م كان ف شى
سمعت الصوت تاني بس المره د من جهة الشباك
مشيت جمبه الشباك و فتحتو
عاينت ل الحديقه تحت كان ف ظل ل زول واقف جمبه الحيطه
بس م قادره اشوف هو منو !!!
فضلت مراقبه و الظل كان بتحرك يمين و شمال و فجأه ظهر كأنو شال حاجه
كأنو شايل كيس كبير
ختيت يدي ف قلبي و انا سامعه صوت قلبي بضرب بسرعه
رجعت اعاين بتركيز اكتر
بس الشخصيه مشت ف الإتجاه ال معاكس و م قدرت اعرف هو منو و لا شايل شنو !!
م عارفه كنت بفكر ف شنو بس نزلته و دقيت باب غرفه حنان
لمن م فتحت لي
فتحت الباب و دخلته
ما كانت ف الغرفه
استغربت و فضلت بعاين لكل ركن ف الغرفه
ما عارفه كنت عايزه اشوف شنو
فجأه سمعت صوتها دخلت
حنان:بتفتشي ع شنو؟
إلتفت و عاينت ليها
ملك:كنت ..
حنان:اطلعي غرفتك ..
م رديت عليها و كنت طالعه بس لاحظته ل يدها اليمين كان ف آثار لخربشه
استغربت اكتر و طلعت غرفتي
كان ف بالي جمله ابوي الله يرحمو بس
" ملك أحياناً لازم تكوني جمبه السوء عشان تكوني ب أمان .. "
بس السؤال هِنا
انا جمبه ياتو نوع من السوء ؟…
#قفزه_زمنيه :
بعد شهرين من الأحداث بلسان شخصيه مجهوله " قد يكون المتحدث فتاه او رجل " :
_كنت مبسوط/ه بشكل الدم و بالطريقه ال قتلتهم بيها؛
عارف عملت شنو؟مسكت سكي/ن و ختيتها في رقبتهم .. الدم كان بطير في كل مكان .. ما كان في صراخ لاني قطعت حبالهم الصوتيه قبل يستوعبو اصلاً .. بعد ماتو جا في بالي لي م اطعنهم في بطنهم و صدرهم طعنات كتيره وره بعض ؟ ح اتفشى اكيد و انا بشوف المنظر ده .. حسي ح اعمل فيك كده .. لأنك زيها كنت في المكان و الزمان الغلط .. ما كانت ح تموت اليوم داك لو م طلعت من غرفته .. و انت كمان م كنت ح تموت لو م عرفته الحقيقه .. صح؟
" الحقيقه ..
كانت سيئه لدرجه أنك بدون وعى بتقرب كل يوم خطوه من الموت ..
لسه عايز تعرفها ؟!"